E horoa anaˈe ia tatou iho no te mau ohipa maitatai atoa
1 Teie te nehenehe e taiohia no nia i te mau Ite no Iehova: “Mea fifi roa ia ite i te tahi atu faanahonahoraa faaroo i reira te mau melo e ohipa ˈi ma te itoito hau atu â i te mau Ite no Iehova.” No te aha te mau Ite no Iehova e puai ai e e itoito ai?
2 Te tahi o te mau tumu no to ratou ia îraa i te manaˈo e rave ru i te ohipa. Ua ite o Iesu e eita o ˈna e faaea tamau noa mai i nia i te fenua nei no te rave faahope i ta ˈna nei taviniraa (Ioane 9:4). I teie nei mahana, a tuu noa ˈi te Tamaiti a te Atua i to ˈna mau enemi i raro aˈe ia ˈna, te taa ra i te mau tavini a Iehova e e tia ia ratou ia rave faahope roa i ta ratou taviniraa i roto i te hoê taime taotiahia. No reira ratou i pûpû ai ia ratou iho no te taviniraa moˈa (Sal. 110:1-3). No te mea hoi e tia e ia rahi te feia rave ohipa i roto i te aua auhuneraa, eita ïa ratou e nehenehe e haaparuparu (Mat. 9:37, 38). No reira, te tutava nei ratou i te apee i te hiˈoraa o Iesu, te hoê hiˈoraa tia mau i te pae no te haapaeraa ia ˈna iho e te itoito.—Ioane 5:17.
3 Te tahi atoa tumu no reira te mau Ite no Iehova e ohipa ˈi ma to ratou taatoaraa, mai no Iehova, e mea taa ê roa ta ratou faanahonahoraa na te ao nei i te tahi atu mau pûpû faaroo. E ere i te mea tia ore ia parau e te ani noa nei te mau haapaoraa i ta ratou mau melo te tahi noa taime iti e maa tutavaraa noa. Ua ohipa rii noa te mau tiaturiraa a te mau taata aore ra aita roa ˈtu i nia i to ratou oraraa no te mau mahana atoa, to ratou mau taairaa e o vetahi ê aore ra ta ratou mau opuaraa. Ma te ore e turaihia e te faaroo mau, te titau nei ratou i to ratou mau tiai mamoe e ia ‘faahiti i te mau parau tamǎrû,’ e ia parau ratou e ua navai noa to ratou faaohiparaa i te hoê huru haamoriraa (Isa. 30:10). E tia ïa i te mau upoo faatere haapaoraa ia ‘faanavenave i to ratou mau taria,’ ma te tapea noa i te hoê huru paruparu e te hupehupe i te pae varua.—Tim. 2, 4:3.
4 Auê ïa taa-ê-raa e te mau Ite no Iehova! E titau ta tatou nei haamoriraa i te mau tutavaraa e te ohipa. I te mau mahana atoa, e i roto i te taatoaraa o te mau mea o ta tatou e rave ra, te ora nei tatou ia au i ta tatou nei mau tiaturiraa. Oia mau, te horoa mai nei te parau mau e rave rahi mau oaoaraa, te titau atoa nei râ te reira ‘e rave rahi mau aroraa’ mai te peu e e hinaaro tatou e faaî maitai i te mau titauraa e au. (Hiˈo Tesalonia 1, 2:2.) E mea ravai i te mau hopoia o te oraraa i te mau mahana atoa no te haapao i te rahiraa o te mau taata. No reira, eiaha teie mau haapeapearaa e tapea ia tatou ia tuu i te Basileia i te parahiraa matamua!—Mat. 6:33.
5 I te mea hoi e mea maitai e te faufaa roa te ohipa ta tatou e rave ra i roto i te taviniraa a Iehova te turaihia ra tatou ia ‘faaherehere’ i te taime eiaha no te tahi atu mau tapao e ia faaohipa i te reira ma te tano no te mau ohipa i te pae varua (Eph. 5:16). Ma te ite e te au maira Iehova i to tatou paieti e to tatou pûpû-taatoa-raa ia tatou, e mau tumu atoa ta tatou no te ohipa ma te tuutuu ore. Te horoa maira ta tatou mau haamaitairaa i teie nei e te mau huru oraraa no a muri aˈe na tatou i te faaotiraa faufaa e tamau i te ‘rohi e i te aro’ no te Basileia.—Tim. 1, 4:10.
6 Paieti e te haapaeraa ia ˈna iho: I teie nei mahana te tuu ra te rahiraa o te mau taata i te mau ohipa materia e to ratou mau hinaaro i te parahiraa matamua. Te manaˈo ra ratou e aita e ohipa i hau aˈe i te faufaa maoti râ te tamaa, te inu e e ahu (Mat. 6:31). Aita ratou e navai ra i te mea faufaa noa. Ta ratou tapao o te fanaˈo-faahope-raa ïa i te oraraa e ia ‘pue te taoˈa rahi i roto i te vairaa no te mau matahiti a muri aˈe no te faaea maite, e amu, e inu, e ia rearea maite.’ (Luka 12:19.) Te faariro rahi nei te feia e apiti nei i te mau pureraa i te mau tutavaraa tataitahi titauhia e ta ratou haapaoraa mai te hoê ofatiraa i to ratou mau tiaraa. Te au ore nei ratou i te manaˈo e haapae i te mau tapao i te pae materia, aore ra e faaiti atoa mai, e e haapae i te mau ohipa peepee. Ma te manaˈo noa ia ratou iho mea fifi roa, mea tano ore no ratou ia haapae ia ratou iho.
7 Mea taa ê ta tatou huru hiˈoraa i te mau ohipa. Te faateitei nei te Parau a te Atua ia tatou ia farii tatou i te mau manaˈo o te Atua eiaha râ to te mau taata (Isa. 55:8, 9). Te atuatu nei tatou i te mau tapao i roto i to tatou oraraa o tei hau aˈe i te mau hinaaro o te tino. Ua riro te faatiaraa i te mana arii o Iehova e te faaraaraa i to ˈna iˈoa ei mau uiraa faufaa roa ˈˈe i te ao taatoa nei. Te auraa o te reira i mua ia Iehova oia hoi “e au hoi te mau fenua atoa mai te mea aore ra.” (Isa. 40:17.) Ia tamata noa ˈtu i te ora ma te haafaufaa ore i te hinaaro o te Atua e mea maamaa roa ïa.—Kor. 1, 3:19.
8 Mai te peu e e mea titauhia iho â te tahi mau taoˈa materia e e mea faufaa te tahi atu no te turu i te mau ohipa a te Basileia, te taa ra ïa tatou e e ere hoi te reira “i te mau mea i hau i te maitai ra.” (Phil. 1:10.) E pee ïa tatou i te faaueraa tumu e vai ra i roto i te Timoteo 1, 6:8: e e taotia tatou ia tatou iho i te pae materia e e ara tatou e ia fariu to tatou mafatu i nia i ‘te mau mea hiˈo-ore-hia ra, e tia mau â ïa i te vairaa.’—Kor. 2, 4:18.
9 Rahi atu â tatou i te tapea mai i te mau manaˈo o te Atua no tatou, e iti mai ïa to tatou tapitapiraa no te mau ohipa i te pae materia. Ia haamanaˈo anaˈe tatou i te mau mea o ta Iehova i rave aˈena no tatou e i te mau haamaitairaa faahiahia roa ta ˈna i tǎpǔ mai no tatou, ma te mafatu maitai ïa tatou e farii ai i te mau tutavaraa atoa ta ˈna e titau ra ia tatou ia rave (Mareko 10:29, 30). E tia ia tatou ia horoa i to tatou iho ora. E niuhia to tatou ora e to tatou oraraa no a muri aˈe i nia i to ˈna aroha e to ˈna here. I te mea hoi e te taviniraa ta tatou e horoa nei ‘o ta tatou ïa e tia ia rave,’ te faahepo nei tatou ia tatou iho ia pûpû ia tatou no ˈna (Luka 17:10). Noa ˈtu eaha te ohipa e anihia ia tatou ia rave i roto i te taviniraa a Iehova, te oaoa nei tatou i te rave, i te iteraa e ‘ooti tatou ma te rahi.’—Kor. 2, 9:6, 7.
10 Te hinaarohia ra te mau taata rave ohipa taatoa: I to ˈna haamataraa, ua puai te ohipa i roto i te amuiraa kerisetiano. Ua titauhia ia rave faahope i te faaiteraa hou te toparaa o Ierusalema, i te matahiti 70 i to tatou nei tau. Te reira hoi te tau i “riro roa ˈtura te varua” o te mau pǐpǐ a Iesu. (Ohipa 18:5.) No te aano-oioi-raa te ohipa, e mea faufaa ia faaineine rahi atu â i te mau taata poro e te mau tiai mamoe aravihi. Ua titau-atoa-hia ia faanaho i te tauturu ta ratou e nehenehe e afai mai. Ua hinaarohia te mau taata ite i te paraparau ma te aravihi i te mau mana faatere, e te mau melo aravihi i te haapao i te faanahoraa e te opereraa i te mau tauihaa materia e rave rau (Ohipa 6:1-6; Eph. 4:11). Te vai ra paha o tei itehia, vetahi râ aita ïa. Tera râ, ua ‘faaitoito hua’ ratou paatoa, ma te rave amui e o vetahi ê ma to ratou mafatu taatoa no te rave i te ohipa.—Luka 13:24.
11 I te roaraa o te mau senekele e rave rahi i mairi, e ere i te mea faufaa ia rave rahi i te ohipa na te ao atoa nei. Tera râ, ua ravehia te hoê faaapîraa rahi i te ohipa no nia i te Basileia i to Iesu haamataraa i te faatere i te matahiti 1914. I te omuaraa, mea iti tei ite i te faufaaraa o te mau taata pûpû taatoa ia ratou no te Basileia, oia te mau mirioni rima tauturu i te fenua taatoa nei.
12 I teie nei mahana, te faatere ra te faanahonahoraa e rave rahi mau opuaraa o te titau ra i ta ˈna mau faufaa i te faito taotiahia. Te ru nei te ohipa no te Basileia i nia i te hoê faito rahi. I te mea hoi e te ora nei tatou i te tau hopea, te hinaaro nei tatou e horoa ia tatou iho e e faaohipa i ta tatou mau faufaa atoa no te rave i te ohipa tei horoahia mai na tatou. E nehenehe tatou e ohipa ma te vitiviti inaha hoi te piri maira te hopea o te faanahoraa o te mau mea iino i teie mahana. Te piihia ra i te taatoaraa o te mau tavini o tei pûpû ia ratou no Iehova ia horoa mai i te rima tauturu i roto i te ohipa faufaa o te ootiraa.
13 Eaha te tia ia ravehia? E nehenehe iho â tatou e parau e e mea “rahi â te rave i te ohipa a te Fatu.” (Kor. 1, 15:58.) I roto e rave rahi vahi, ua tae i te taime ootiraa, mea iti râ te feia rave ohipa. Te titau-manihini-hia ra tatou ia rave i ta tatou tuhaa, eiaha na roto noa i te poro-maite-raa i ta tatou tuhaa fenua, na roto atoa râ i te pahonoraa i te tautooraa e tavini i te vahi i reira e hinaaro-rahi-hia ˈi te tauturu.
14 E mea faahiahia ia ite e te horoa nei te mau Ite ia ratou iho i te mau fenua atoa no te mau ohipa e rave rau: Te apiti nei ratou i roto i te paturaa i te mau fare haamoriraa, te rave nei ratou i te ohipa no vetahi ê i te roaraa o te mau tairururaa, to reira ratou i muri aˈe i te hoê ati no te afai i te tauturu, te haere tamau nei ratou e tamâ i te Piha no te Basileia o ta ratou amuiraa, e te vai atu â. No nia i teie manaˈo hopea, e tia ia faahaamanaˈo e mea faufaa ia vai mâ noa te piha e te faanaho maitai i muri aˈe i te putuputuraa tataitahi. Te faaite ra te taata e rave ra i te mau ohipa haehaa e ua taa maitai ia ˈna i te mau parau a Iesu i roto i te Luka 16:10: “O tei haapao maitai i te mea iti ra, ua haapao maitai atoa i te mea rahi: e o tei ore i haapao i te mea iti ra, aore atoa ïa i haapao i te mea rahi.”
■ E turu anaˈe i te mau ohipa i roto i ta tatou amuiraa: Oia mau, te ohipa ra te amuiraa tataitahi i roto i te tuhaa o te hoê faanahonahoraa na te ao nei e no ǒ mai ta ˈna mau aratairaa i te “tavini haapao maitai e te paari,” te vai nei râ te tahi mau taata poro i roto (Mat. 24:45). Ua niu-rahi-hia te ohipa ta te hoê amuiraa e rave ra i nia i te mea ta te Ite tataitahi e hinaaro aore ra e nehenehe e rave. Te haapapu ra te reira i te faufaaraa ia poro i te parau apî maitai i roto i te tuhaa fenua o ta tatou amuiraa, ia faariro i te mau taata ei pǐpǐ e ia haapuai ia ratou i te pae varua. E tuhaa ta tatou paatoa ia rave. E nehenehe atoa tatou e haamau i te mau tapao no te haapii tataitahi i te Bibilia, e horoa i te mau pahonoraa maitatai i te roaraa o te putuputuraa e te tururaa i te mau taata o te hinaaro ra i te tauturu i roto i te amuiraa. I roto i teie mau tuhaa atoa, e nehenehe tatou e faaite e te hinaaro nei tatou e horoa i te rima tauturu.
■ Te horoa nei te mau tiaau i te hiˈoraa: Ua horoa o Iehova i te ohipa haapaoraa i te amuiraa na te mau matahiapo (Ohipa 20:28). O te mau taeae tei fanaˈo i teie haamaitairaa taa ê ma te tutava i te faaî i te tahi mau titauraa (Tim. 1, 3:1). Oia mau, e nehenehe te mau taeae atoa e faaineine ia ratou no te amo i te mau hopoia rahi atu â. Te faufaahia nei te rahiraa o te mau taeae i te pae varua. E tia ia ratou ia tamau i te rahi i raro aˈe i te aratairaa here mau a te mau matahiapo o ta ratou amuiraa. E tia ia ratou ia haapii tamau noa i te Bibilia e te mau buka. E nehenehe ratou e faaite i to ratou hinaaro maitai na roto i te auraroraa i te mau matahiapo nominohia e te varua moˈa, na roto i te peeraa i te hiˈoraa o ta ratou i vaiiho mai e te faatupuraa i te mau huru maitatai o te imihia ra i nia i te mau tiaau.—Heb. 13:7, 17.
■ E rave anaˈe i te taviniraa ma te taime taatoa: Te tuhaa matamua a te mau amuiraa oia hoi te pororaa i te parau apî maitai (Mat. 24:14). Auê ïa haamaitairaa e ia haapuai anaˈe te mau melo itoito i ta ratou mau tutavaraa e ia riro mai ei pionie! Te titau ra ïa te reira ia ratou i te pae rahi ia taui i to ratou huru oraraa. Mai te peu e te hinaaro ra ratou e tamau noa i roto i teie huru taviniraa taa ê, e tia ia ratou ia rave noa i te mau tauiraa i roto i to ratou oraraa. E haamaitaihia râ te feia o te tapea maite ra i ta ratou haamaitairaa taa ê e o te ore e faaea hoê matahiti aore ra e piti matahiti i muri iho no te hoê paruparu morohi noa na Iehova. Ma te parau e te ohipa atoa, e nehenehe te mau matahiapo î i te here e te tahi atu mau kerisetiano paari e tauturu i te mau pionie ia haamanuïa i ta ratou taviniraa. Auê ïa huru feruriraa nehenehe to te mau taurearea e rave ra i te taviniraa pionie ia hope anaˈe ta ratou haapiiraa! E nehenehe atoa e parauhia no te mau taata paari o te rave atoa ra i te taviniraa pionie tamau ia tae anaˈe i te taime e mama mai ai ta ratou mau ohipa. E ite te kerisetiano pûpûhia o te apiti ra i roto i te ohipa ootiraa vitiviti a Iehova i te hoê oaoa rahi.—Isa. 60:22.
■ E apiti anaˈe i te paturaa o te mau fare putuputuraa e te atuaturaa: Tau hanere piha apî no te mau putuputuraa e te mau Piha tairururaa tei patuhia. E te mea maere, fatata te taatoaraa o te ohipa, na to tatou ïa mau taeae e mau tuahine ïa i rave ma te horoa i to ratou taime e to ratou aravihi (Par. 1, 28:21). E mau tausani rima tauturu o te atuatu ra i teie mau fare ma te rave i te mau ohipa atoa tei horoahia na ratou (Par. 2, 34:8). I te mea hoi e tuhaa teie ohipa no te taviniraa moˈa, te horoa nei te feia e apiti ra ia ratou iho ma te mafatu maitai. Aita ratou e ani ra ia faahoˈihia mai ta ratou moni no ta ratou ohipa, aita roa ˈtu ratou e hinaaro ia aufauhia no te haere e poro na te mau fare, no te hohora i te mau oreroraa parau huiraatira i roto i ta ratou amuiraa aore ra no te rave i te ohipa i te mau tairururaa mataeinaa e te haaati. Te pûpû nei ratou ma te tamoni ore i ta ratou mau tauturu i te roaraa o te faaineineraa o te mau opuaraa e hamani i te mau fare haamoriraa no te arue ia Iehova e to ratou paturaa. Te tauturu nei ratou no te faaî i te mau parau faatia, no te haapao i te tabula faufaa moni, no te faaau i te mau hoo, no te numera i te rahiraa tauihaa e titauhia, e te vai atu â. Aita teie mau tavini haapao maitai a Iehova e faahepo ra i te mau amuiraa ia aufau i te tahi tuhaa moni hau aita atoa e imi na roto i te mau ravea atoa ia huti roa mai i te maitai i te pae materia, aore ra na roto i te tahi atu mau raveraa, no te tauturu ta ratou e horoa ra, no te mea ua pûpûhia to ratou mau aravihi atoa e ta ratou mau faufaa na Iehova. (Hiˈo i Te taviniraa o te Basileia no te avaˈe febuare 1992, api 4, paratarapha 10.) No te au-maite-raa o te paturaa, te hinaarohia ra te mau taata rave ohipa itoito o te ohipa ra i roto i ta ratou taviniraa ‘ma te aau atoa mai te mea e e na [Iehova].’—Kol. 3:23.
15 Na te aha i faariro i te manaˈo haapaeraa ia ˈna iho o te mau tavini o Iehova ei mea otahi? Na to ratou huru feruriraa e horoa. Ua hau atu to ratou horoa maitai i te horoa-noa-raa i te moni aore ra e rave rau tauihaa materia: te ‘horoa-roa-raa ma te hinaaro mau’ ia ratou iho (Sal. 110:3). Te ite ra tatou i ǒ nei i te auraa o te pûpûraa ia tatou iho no Iehova. E haamauruururaa taa ê ta tatou. Oia mau, o ta tatou e rave ra o ta vetahi ê e au ra, o ta tatou e ite roa ˈtu, no reira e ite ïa tatou i te ‘oaoa rahi’ e e ‘ooti tatou tatou ma te rahi.’ (Ohipa 20:35; Kor. 2, 9:6; Luka 6:38.) To tatou Haamaitai rahi, o to tatou Metua ïa o Iehova i nia i te raˈi, o te ‘au i te taata horoa noa.’ (Kor. 2, 9:7.) E tataihanere ia faahoˈi mai o ˈna i ta tatou na roto i te mau haamaitairaa mure ore (Mal. 3:10; Roma 6:23). Ia pûpûhia mai na outou i te mau haamaitairaa taa ê i roto i te taviniraa a Iehova, e horoa anei outou i te rima tauturu e e pahono anei outou i te titau-manihini-raa mai ta Isaia i rave: “Inaha, teie au; o vau ta oe e tono”?—Isa. 6:9.