E pûpû anaˈe ia tatou ma te hinaaro mau
1 Ua tohu te papai salamo ra o Davida e ‘e pûpû’ te nunaa a Iehova ia ˈna ‘ma te hinaaro mau,’ oia hoi “e hinaaro oioi noa” oia e tavini. (Sal. 110:3, nota, MN) O te ohipa mau e itehia ra i roto i te autaeaeraa na te ao nei. I roto i na matahiti taviniraa tataitahi e maha i mairi aˈenei, ua horoa te nunaa a Iehova hau atu i te hoê miria hora no te faaite i te parau apî maitai o te Basileia. Taa ê atu râ i te ohipa pororaa e te faariroraa i te taata ei pǐpǐ, e rave rahi ravea ta tatou no te pûpû ia tatou ma te hinaaro mau no te tauturu i to tatou taata-tupu.
2 Te mau tuhaa e nehenehe ai tatou e tauturu ma te hinaaro mau: Peneiaˈe te hinaaro ra te tahi mau melo o te amuiraa i te tauturu no te haere i te mau putuputuraa. No te aha ïa tatou e ore ai e pûpû atu i te haere e tii ia ratou? Peneiaˈe ua roohia vetahi i te maˈi, i te hapepa aore ra ua tapeahia ratou i te fare maˈi. E nehenehe anei ta tatou e haere e hiˈo ia ratou aore ra e tauturu ia ratou na roto i te tahi ravea? Peneiaˈe te hinaaro ra te hoê taeae aore ra te hoê tuahine, aore ra te hoê utuafare, i te tahi mau faaitoitoraa. Ua manaˈo anei tatou e ani ia ratou ia apiti mai i te tahi mau taime i roto i ta tatou haapiiraa utuafare? Peneiaˈe te hinaaro ra te hoê pionie aore ra te hoê taata poro i te tahi hoa no ˈna i roto i te taviniraa. No te aha tatou e ore ai e haere na muri iho ia ˈna i roto i te taviniraa? Tera te tahi mau tuhaa e nehenehe ai tatou e rave ma te hinaaro mau i te maitai i nia i te feia tei riro ei fetii faaroo no tatou.—Gal. 6:10.
3 E nehenehe te mau taeae e faaite i to ratou hinaaro ia faaohipahia ratou i roto i te faanahonahoraa a Iehova na roto i te tutavaraa i te faaî i te mau titauraa e anihia ra i te mau matahiapo e te mau tavini tauturu. (Tim. 1, 3:2-10, 12, 13; Tito 1:5-9) I te mea te rahi noa ˈtura tatou, te hinaaro nei tatou i te mau taeae aravihi o te ineine i te horoa i te hiˈoraa i roto i te ohipa pororaa e te haapiiraa, e tae noa ˈtu i roto i te ohipa tiai mamoe i roto i te mau amuiraa.—Tim. 1, 3:1.
4 Peneiaˈe e nehenehe ta vetahi i rotopu ia tatou e rave hau atu â i roto i te taviniraa a Iehova na roto i te riroraa ei pionie tauturu i te tahi mau taime. Aore ra, na roto paha i te tauiraa ma te au i ta tatou tabula ohipa, e nehenehe ta tatou e riro ei pionie tauturu tamau aore ra ei pionie tamau. E faatia anei to tatou huru tupuraa ia tatou ia reva i te tahi motu e te hinaaro-rahi-hia ra te tauturu? E nehenehe anei tatou e faanaho ia tatou no te tavini i te Betela ma te turu tia ˈtu i te haereraa i mua o te ohipa na te ao nei? E ohipa rahi te ravehia nei i te pae no te paturaa i te mau Piha no te Basileia, te mau Fare tairururaa e te mau Betela na te ao nei, e te titau nei te reira e rave rahi feia rave ohipa ma te hinaaro mau. Te farii-popou-hia nei te feia e pûpû nei ia ratou ma te hinaaro mau no te rave i teie mau ohipa maitatai roa e te fanaˈo nei ratou i te mau haamaitairaa rahi.—Luka 6:38.
5 Te ora nei tatou i te hoê tau maere mau. Na roto i to ˈna varua, te faatupu nei Iehova i te hoê ohipa faahiahia na te fenua nei auaa ta ˈna mau tavini hinaaro mau! I te mau taime atoa Iehova e ani mai ai ia tatou, na roto i ta ˈna faanahonahoraa, ia rohi hau atu â i roto i te taviniraa o te Basileia, e tano ia aniani tatou e: ‘Te pûpû noa râ anei au ia ˈu iho ma te hinaaro mau?’ I muri iho, e tia ia tatou ia hiˈopoa i to tatou mafatu e to tatou huru oraraa i roto i te pure. E turai to tatou here i te Atua ia tatou ia rave i te mau tutavaraa atoa i roto i te taviniraa moˈa, ma te faaoaoa hua i te mafatu o Iehova.—Zeph. 3:17.