E tauturu tatou ia vetahi ê ia faahanahana i to tatou Poiete
1 Hoê â anei to tatou manaˈo e to te taata papai salamo ra i to ˈna parauraa e: “E Iehova, (...) tei ia oe hoi te tumu o te ora.” (Sal. 36:5, 9). Nafea tatou iho e nehenehe ai e tauturu ia vetahi ê ia farii ia Iehova ei Poiete no tatou e ia faahanahana ia ˈna? Ma te pûpû i te avaˈe tiunu i te buka Nohea mai te ora—Mea tupu noa mai aore ra mea poietehia? (farani) E mea faahiahia roa teie buka, i te mea te horoa nei i te mau haapapuraa o te vai-mau-raa o te Atua e te faaite ra e mea hape te haapiiraa e mea tupu noa mai te mau mea. Te haapapu atoa ra oia e o te Bibilia te Parau a te Atua. Te hinaaro mau nei tatou e faaite i te mau taata atoa e te faahanahana ra te poieteraa, eiaha râ te tupu-noa-raa mai te mau mea atoa, i te Atua ra o Iehova.
2 Teie te hoê faaiteraa ohie e te tano.
I muri aˈe i te aroharaa i te taata, e faaite tatou i te hohoˈa i te api 6 e e ani tatou e:
◼ “Nohea mai te ora i nia i te fenua nei? Te parau nei vetahi ê e mea tupu taue noa mai. Te faahanahana ra te Bibilia i te Atua. Eaha to oe manaˈo? [A vaiiho i te taata ia pahono.] Te horoa ra teie buka i te mau pahonoraa e tuea ra e te Bibilia e te mau haapapuraa i te pae ite aivanaa. Te hinaaro nei au e pûpû ia oe ia tuatapapa oe i te mau faaiteraa atoa e ia horoa mai i to oe iho manaˈo.”
3 I muri aˈe i te faaiteraa e o vai tatou, e nehenehe tatou e parau e:
◼ “I roto i teie nei ao apî e ite aivanaa, e mea tano anei ia tiaturi i te poieteraa, aore ra i to oe manaˈoraa, e mea tupu noa mai anei tatou? [A vaiiho i te taata ia pahono.] A hiˈo na i te haaferuriraa a te Bibilia i roto i taua tuhaa ra. [A taio i te Hebera 3:4.] Aita anei oe e manaˈo ra e taata patu to te mau paturaa atoa? No reira, ua tupu noa mai anei te ao o te reva?” E faaite tatou i te hohoˈa i te api 114 o te buka Poieteraa, e huti tatou i muri iho i te ara-maite-raa o te taata i nia i te manaˈo faahitihia i te paratarapha 2, api 115. Mai te peu e te anaanatae ra te taata e e rave oia i te buka, e parau tatou ia ˈna e e hoˈi faahou mai tatou e tauaparau i teie uiraa: Eaha te oraraa o te taata e o te fenua no a muri aˈe?
4 Aore ra, i muri aˈe i te aroharaa i te taata, e nehenehe tatou e parau e:
◼ “I to oe manaˈo, mai te aha te huru o to tatou mau tupuna? [A vaiiho i te taata ia pahono.] E mai teie ‘uri taata’ anei ratou? [A hohora te buka Poieteraa i te api 83.] A hiˈo na i ta te Bibilia e parau ra i roto i te Ohipa 17:26. [Taio.] Te niuhia ra te mau hohoˈa o te mau ‘uri taata’ i nia i te aha?” A huti i te ara-maite-raa i nia i te mau parau i raro aˈe i te hohoˈa i te api 89. A parau i te taata e huti mai oia i te haapiiraa na roto i te taioraa i taua buka ra e e ite oia i te pahonoraa i taua uiraa ra.
5 Te tahi atu raveraa oia hoi ia faaite i te api matamua roa o te buka “Poieteraa” e ia parau e:
◼ “I teie mahana, te ui nei matou i teie uiraa i to matou mau taata tapiri: E mea tupu noa mai anei aore ra mea poietehia te taata? Eaha to oe manaˈo? [A vaiiho i te taata ia pahono.] Noa ˈtu e e rave rahi mau taata maramarama o te faariro nei i te tupu-noa-raa o te mau mea atoa mai te hoê parau mau, aita râ vetahi feia maramarama atoa e tiaturi nei. A hiˈo na i te faaotiraa a te hoê taata ratere tahito na te reva. [A faaite i te api 123.] E tia ia tatou ia tuatapapa maitai i te mau ohipa ia taa e tia anei ia tatou ia tiaturi i te tupu-noa-raa mai i te mau mea aore ra i te poieteraa.” Mai te peu e e farii te taata i te buka, e faahiti tatou i te hoê uiraa ta tatou e pahono ia hoˈi mai tatou.
6 Te hinaaro ra anei tatou e tauturu ia vetahi ê ia ite i te mau parau mau bibilia faahiahia roa no nia i to tatou Atua e ta ˈna opuaraa no nia i ta ˈna poieteraa? E tauturu te buka Poieteraa ia tatou ia na reira. Te faahanahana ra oia i to tatou Poiete Rahi, te Mana hope ra o Iehova, ma te arue i ta ˈna mau ohipa e ma te faaite i ta ˈna opuaraa nehenehe oia hoi te faaraaraa i to ˈna iˈoa e te haamaitairaa i te huitaata nei na roto i te Basileia o te Mesia.