Pahonoraa i ta outou mau uiraa
◼ Eaha te mau ravea paruru e rave ia poro anaˈe i roto i te hoê tuhaa fenua atâta?
1 Te faaroo pinepine nei tatou i te parau o te haavîraa uˈana, te hamani-ino-raa e te haapeapearaa, i roto iho â râ i te mau oire. Te haapeapea nei te reira ia tatou, ua ite râ tatou, i roto atoa i te mau vahi tei huenane, e anaanatae te mau taata farii maitai i te poroi o te Basileia. No reira, i te taime tano, e tia ia tatou ia ite i te itoito ia haere i mua, ma te tiaturi e te vai ara ra Iehova i nia ia tatou.—Mas. 29:25; Tes. 1, 2:2.
2 Ia haere anaˈe tatou i roto i te hoê vahi atâta paha, te titau ra Iehova ia haapao maitai tatou e ia tapea i te manaˈo tia. Ia vai ara tatou. “E ite te taata haapao i te ino, e ua ape ihora; te haere noa ra râ te ite ore e pohe atura.” (Mas. 22:3). Te taa ra te feia poro aravihi e mea paari ia poro e te tahi atu taata aore ra hau atu, mai te peu e e titauhia. Te taio nei tatou i roto i te Koheleta 4:9, 12 e: “E maitai te taata toopiti i te taata hoê (...). Etaeta rahi to te taata ia rave mai i te hoê ra, e tia ia raua atoa ia rave atu ia ˈna.” E ite pinepine te feia iino i te mau taata e faaea ra ratou anaˈe, no te mea e mau taata ohie roa no te hamani ino.
3 Ia ara maitai tatou ia poro anaˈe i roto i te mau fare tahuˈa e mea pouri te mau eˈa no te haere i te mau vahi haereraa taata poiri e te mau eˈa paiumaraa e aita e taata. Ia haapao maitai tatou ia titauhia mai tatou ia tomo i roto i te hoê fare aore ra i te hoê piha. Eiaha tatou e faaô atu i roto i te hoê aimârôraa e te feia e au ra e mea atâta ratou aore ra iria. Ia faaite oioi noa tatou e Ite no Iehova tatou. No reira te feia poro e tapea noa ˈi i roto i to ratou rima te hoê Bibilia aore ra te hoê vea o Te Pare Tiairaa aore ra A ara mai na!
4 Ia haapao maitai tatou i te mau taata e hahaere noa ra i roto i te aroâ. Ia vai ara tatou ia farerei tatou i te mau taata e ere ratou no taua vahi ra. Eiaha e tamau i te mau taoˈa piru moni rahi. Mai te peu e e tia ia tatou ia haere e poro i te po, eiaha tatou e haere na roto i te mau aroâ poiri e aita i rahi te taata. Ia tupu te hamani-ino-raa, eiaha e patoi mai te peu e te hinaaro-noa-hia ra ta tatou moni aore ra ta tatou mau taoˈa; e mea faufaa aˈe to ratou ora i te hoê taoˈa materia.—Mareko 8:36.
5 E tia i te mau taeae e faatere ra i te ohipa a te hoê pǔpǔ ia vai ara e ia ite i te mau taime atoa teihea te feia poro e eaha ta ratou e rave ra. I roto i te rahiraa o te mau tupuraa, e mea maitai aˈe ia poro te pǔpǔ i roto i te hoê â vahi; eita ïa te feia poro e atea ê i te tahi. Ia tupu te faahuehueraa aore ra te mau ohipa haavî uˈana, noa ˈtu eaha te huru, a faarue oioi noa i te tuhaa fenua.
6 Ia vai ara e ia haapao maitai tatou, e nehenehe tatou e tamau i te farerei i te mau taata e noho ra i roto i te mau vahi atâta e “autâ noa e ua pii hua, i te mau parau faufau atoa i ravehia i roto ra.”—Ezek. 9:4.