“Te mǎtaˈu paieti”—Tairururaa mataeinaa 1994
1 Ua tahoê mai te mau tairururaa mataeinaa 1993 “Te haapiiraa no ǒ mai i te Atua ra” faanahohia i nia i te tuhaa fenua nei o te amaa no Tahiti e 3 691 taata, e rave rahi i rotopu ia ratou tei faaite i to ratou aau mehara hohonu no taua tairururaa faaitoito ra i te pae varua. E 65 taata tei bapetizo ia ratou no te mea ua faaohipa ratou i te haapiiraa no ǒ mai i te Atua ra i roto i te Bibilia.
2 Ma te haamanaˈo i taua tairururaa faaitoito mau ra, te hinaaro nei tatou e tutava no te haere i te porotarama anaanatae o te mau tairururaa mataeinaa 1994 “Te mǎtaˈu paieti” o teie matahiti. No te rahi o te mau fifi e farereihia ra e te mau taata i teie nei mahana, e mea papu e e titau manihini e e tamata tatou pauroa i te afai atu i te tairururaa i te feia o te haapii ra i te Bibilia e o tatou. E faaitoito e e haapuai teie oroa ia tatou no te tamau i te tavini ia Iehova ma te mǎtaˈu paieti noa ˈtu te mau haafifiraa ta tatou e farerei i mua nei.
3 A faanaho maitai ia outou e a pure no te haere i na mahana e toru o teie tamaaraa au mau i te pae varua, mai te himene haamataraa e tae noa ˈtu i te pure faaotiraa. Ia rave outou i te mau faanahoraa no te haere i te tairururaa, a manaˈo atoa ma te here i te feia e hinaaro ra i te tauturu, te feia iho â râ o tei anaanatae i te parau mau aita i maoro aˈenei, ia haere atoa mai ratou i te mau rururaa atoa.
4 E mea faufaa ia hiˈopoa outou i te mau haamaramaramaraa i roto i teie api hau e te feia e haapii ra i te Bibilia e o outou e o te opua ra e haere i te tairururaa (Gal. 6:10). I te mahana pae, e haamata te tairururaa e te upaupa i te 10 h 20 e e faaoti i te hora 5 i te ahiahi. I te mahana maa, e haamata oia i te hora 9 h 30 e e faaoti, te himene e te pure faaotiraa atoa, i te hora 5 i te ahiahi. E haamata te rururaa o te sabati poipoi i te hora 9 h 30 e e faaoti te tairururaa i te hora 4 h 15 i te ahiahi. E tauturu te mau haamaramaramaraa i muri nei ia outou i roto i ta outou faaineineraa.
5 Porotarama o te mau tairururaa: I teie matahiti faahou, ua faanahohia e 9 tairururaa mataeinaa i nia i te taatoaraa o ta tatou tuhaa fenua. No te taime matamua i faatupuhia ˈi te mau tairururaa mataeinaa i roto i ta tatou Fare tairururaa no Toahotu. Ua haafaufaa tatou i te faanahoraa e te huru maitai o te hamaniraa o te fare. Hau atu, ua noaa i te mau tairururaa faanahohia na te mau motu i te hoê faahopearaa rahi aˈe i ta tatou i manaˈo. No te taime matamua atoa, ua fanaˈo te feia no Tuhaa pae e no te Fenua matuita i te taatoaraa o te porotarama. E mea putapû mau te mau haamauruururaa a te mau taeae e te mau tuahine e a te feia haapii atoa. E vauvau-faahou-hia te porotarama i roto i te taatoaraa o ta tatou tuhaa fenua.
6 Teie te mau taio mahana e te mau vahi o te mau tairururaa faanahohia:
15-17 no tiurai 1994
Piha no te Basileia no Nuku Hiva, Fenua Matuita
Fare Tairururaa no Toahotu: Rururaa reo tahiti, tuhaa 1
22-24 no tiurai 1994
Piha no te Basileia no Raiatea: Rururaa reo farani no Raromatai
Fare Tairururaa no Toahotu: Rururaa reo tahiti, tuhaa 2
29-31 no tiurai 1994
Fare Tairururaa no Toahotu: Rururaa reo farani, tuhaa 1
Piha no te Basileia no Huahine: Rururaa reo tahiti no Raromatai
5-7 no atete 1994
Fare Tairururaa no Toahotu: Rururaa reo farani, tuhaa 2
12-14 no atete 1994
Fare Tairururaa no Toahotu: Rururaa reo farani, tuhaa 3
Piha no te Basileia no Rurutu, Tuhaa pae
7 Nafea ia faaineine i teie nei: E mea puai mau te anaanatae faaarahia e te faanahoraa o te mau tairururaa na te mau motu. E rave rahi mau taeae o tei pahono aˈena ma te turu i teie mau tere e: “Inaha, teie au; o vau ta oe e tono” ma te pee i te manaˈo o te Isaia 6:8. Ua faaite to tatou mau taeae e mau tuahine no te mau motu i to ratou mauruuru no taua mau taime oaoa ra i te roaraa o te mau tairururaa.
8 No reira, no te faaohie i te faanahoraa e ia nehenehe outou e haamau i te tabula no teie mau tere, e noaa i te mau amuiraa atoa i teie nei te mau parau tapaoraa iˈoa. Te vai ra teie mau parau i te taeae papai parau o te amuiraa. E ere teie mau parau i te hoê tapaoraa hopea, e tia râ ia faarirohia mai te hoê faaauraa. E tia ia faaî i te hoê parau no te melo tataitahi o te utuafare, tae noa ˈtu te mau tamarii.
9 E faahoˈihia te mau parau i te taeae papai parau e e faataehia te reira i te piha ohipa a te Taiete na mua ˈˈe i te 1 no eperera 1994. Aitâ te mau tarifa manureva i haamauhia ˈtura, tera râ, te hinaaro nei matou e haapapu atu e eita teie mau faanahoraa e faaiti mai i te moni, e mea pinepine hoi ia faanahohia te hoê pǔpǔ, e mea au aˈe na te mau totaiete manureva i te horoa mai i te mau titeti tamoni ore o te faaohipahia no te mau tavini ma te taime taatoa.
10 Tera râ, mai te peu e e tapao outou ia outou, e nehenehe ïa outou e ratere e te taatoaraa o te pǔpǔ e e faanaho ma te ohie aˈe i te mau vahi faaearaa i reira e te mau ohipa amui.
11 Eiaha tatou e haafaufaa ore i teie faanahoraa, no te mea e mai te peu e e horoa tatou i te tahi tuhaa o to tatou taime vata no te reira, aore ra mai te peu e ei utuafare e opua tatou i te faariro i teie mau tairururaa ei taime faafaaearaa, e horoa mai te mau aparauraa e te faufaaraa i te pae varua o te amuimuiraa o te nunaa o Iehova i te mau haamaitairaa rahi.
12 Te mau tupuraa taa ê no te vahi faaearaa i Tahiti nei: Na mua roa no te mau taata no te mau motu mai teie faanahoraa, tera râ, no te feia no Tahiti nei atoa o te hinaaro i te vahi faaearaa i pihai iho noa i te Fare Tairururaa. No te feia poro anaˈe teie tauturu, e ta ratou mau tamarii, e roo maitai to ratou e ua fariihia ta ratou aniraa na te tomite no te taviniraa o te amuiraa. E tia i te tomite ia haapao i taua mau taata ra e eiaha râ ia horoa ˈtu e na te Tomite no te Tairururaa e rave. E nehenehe te mau matahiapo aore ra te tahi atu mau melo o te amuiraa tei ite i to ratou huru tupuraa e afai atu ia ratou i te tauturu titauhia ma te here.
13 E pinepine te reira i te titau i te feia poro ia tapitapi i te mau hinaaro o te mau tavini ma te taime taatoa, te feia ruhiruhia, te feia huma, aore ra te tahi atu. Ei hiˈoraa, e nehenehe tatou e haapao ia ratou ma te afai ia ratou aore ra ma te haapao ia ratou i roto i te tahi atu mau ravea.—Iak. 2:15-17; Ioane 1, 3:17, 18.
14 Oia mau, e tutava te tuhaa haapao i te vahi faaearaa i te imi i te fare no te feia poro e mau hinaaro taa ê to ratou e eita ratou e nehenehe e tauturuhia e te mau melo o ta ratou amuiraa. E nehenehe teie feia poro e faaite i te taeae papai parau i te mau fifi o ta ratou e farerei ra. E aparau ïa te taeae papai parau i te tomite no te taviniraa o te amuiraa ia ite e nehenehe anei i te amuiraa e imi i te faaearaa no teie mau taata i te roaraa o te tairururaa. Mai te peu e eita, e nehenehe o ˈna e faaî i te hoê Aniraa i te piha no te mau tupuraa taa ê.
15 No te feia anaˈe e mau hinaaro taa ê to ratou teie api parau. E faaîhia te reira e te taata ani e e horoahia i te taeae papai parau, o te hiˈopoa maitai e ua horoa-taatoa-hia anei te mau haamaramaramaraa e e mea tano anei, e te hinaaro mau ra te taata ani i te hoê vahi faaearaa; e tia ia FAATAA-MAITAI-HIA te mau tumu i te area vaiihohia no te reira i nia i te api parau. E tia ia ravehia teie ohipa na mua ˈˈe i te tairururaa. E afai te taeae papai parau i te api parau i te tuhaa haapao i te vahi faaearaa, o te haere roa ˈtu e farerei i te taata ani.
16 Mau rururaa na roto i te reo aparaa rima: Mai tei faanahohia i te tairururaa i mairi aˈenei, te opuahia ra e faanaho i te hoê tuhaa o te porotarama na roto i te reo aparaa rima. Ia au i te mau titauraa i roto i Te taviniraa o te Basileia no novema 1993, e tia ia tatou ia haapao i te mau hinaaro o ta tatou tuhaa fenua.
17 No reira, te titauhia ra i te mau matahiapo o te mau amuiraa atoa ia faaite oioi i te tiaau haaati te mau iˈoa o te mau taata o te anaanatae ra i teie porotarama. E nehenehe ïa e haapapuhia te mau parau i roto i te mau amuiraa e te mau tuhaa haaati. Aita matou e parau ra i ǒ nei no te feia e hinaaro e apiti i te mau pǔpǔ o te reo aparaa rima, tera râ, no te feia tariˈa turi o te nehenehe e fanaˈo i te hoê porotarama e hurihia.