Ia rahi atu â te mau Piha no te Basileia no te faaruru i te maraaraa

¹ E mea maoro i teie nei, ua faaite te hoê peropheta a Iehova ‘e tomo mai te mau mea i hinaarohia e te mau fenua atoa ra’. (Hagai 2:7) Te ite mau nei tatou e te aratai ra te haapiiraa no ǒ mai i te Atua ra i te mau taata e rave rahi ia ite i te parau mau e ia riro mai ei feia haamori ia Iehova. Auê ïa oaoa ia ite e 177 bapetizoraa tei tupu i Polinesia nei i te roaraa o te matahiti taviniraa 1993! No te tamau i te horoa i teie feia apî i te tauturu titauhia, e tia ia tatou ‘ia haamanaˈo maite i to tatou mau haerea’ e ia hiˈo maitai mai te peu e te turu ra anei tatou i te ohipa no ǒ mai i te Atua ra hau atu â i ta tatou e nehenehe (a hiˈo i te Hagai 1:5). Tera râ, e vai noa to tatou apitiraa i te paturaa i te mau vahi haamoriraa tano, o te farii i teie rahiraa feia haamori apî ia Iehova ei tuhaa faufaa o ta tatou turu i te ohipa no ǒ mai i te Atua ra.

² Te vai ra i teie nei te Afata a te Taiete no te mau Piha no te Basileia. I roto noa i te matahiti taviniraa 1993, ua haamata e 3 amuiraa i te paturaa o ta ratou Piha no te Basileia. E mea itoito ia ite i te vitiviti o te feia poro ia afai mai i ta ratou turu i te pae moni i teie afata moni o te “ohu noa”. E faahoˈihia te moni horoahia i te mau amuiraa i roto i te mau afata moni haamaraahia e te mau faito apî, e e tamau noa ïa te mau ô horoahia i teie afata i te faaohipahia, te hoê matahiti i muri aˈe i te tahi, i te paturaa i te mau Piha no te Basileia.

³ Te tauturu a te tomite paturaa no te pae fenua: I Polinesia nei, te turu ra te tomite paturaa no te pae fenua i te mau matahiapo o te haapao ra i te mau ohipa i roto i te mau paturaa aore ra te mau faaapîraa o te mau Piha no te Basileia. Te tauturu ra oia ia hiˈo e mea titauhia anei i te hoê fare apî aore ra te mau tauiraa i roto i te piha e vai ra e e nehenehe oia e fanaˈo i te hoê tauturu rapae, hou te hoo o te fenua e tae roa i te otiraa o te mau ohipa. Tei raro aˈe te mau amuiraa taatoa i te mana o teie tomite.

⁴ Ua apiti mai tau hanere feia rave ohipa i te mau ohipa faaapîraa aore ra paturaa. Te pûpû nei teie mau taata, e rave rahi e feia aravihi, mau taata toroa, i to ratou taime e to ratou mau puai i roto i te mau tuhaa taa ê, mai te hooraa mai i te fenua, te mau aniraa a te hau, te haamauraa i te kalena ohipa, te faaineineraa i te mau aniraa i te mau tauihaa. E haere roa ta ratou turu i te hooraa mai i te mau tauihaa maitatai i te mau moni tano, i te mau ohipa faaineineraa i te fenua e te vai-ara-raa o te mau ohipa paturaa iho. O te hoê ravea maitai roa ia turu ma te horoa noa i te ohipa o te Basileia na roto i ta ˈna mau faufaa, e e horoa mai i te mau haamaitairaa e rave rahi a Iehova. — Mas. 11:25.

⁵ E tia i te mau matahiapo ia farerei i te tomite paturaa no te pae fenua i te taime e haamata ˈi te amuiraa i te opua te faaapîraa o te hoê piha e vai ra aore ra te paturaa i te hoê fare apî. No te aha hoi te reira? Te vai ra i te mau tomite paturaa no te pae fenua te mau faanahoraa o te nehenehe e aratai i te mau amuiraa i roto i ta ratou mau maimiraa matamua. E rave rahi tuhaa te tia ia haapaohia no te maitiraa o te hoê fenua, taa ê atu i te moni hooraa. E nehenehe e amuihia mai i roto i te moni o te fenua i te tahi mau haamâuˈaraa teimaha mai: te mau ohipa rarahi i te pae faaafaroraa i te fenua, te faarueraa i te mau raau atâta aore ra taero, te mau haafifiraa i te pae o te ture.

⁶ Ua horoa te Taiete i te tomite paturaa no te pae fenua te mau hohoˈa fare o te Piha no te Basileia. Hou a maiti ai i ta ratou piha no a muri aˈe, e tia i te mau matahiapo o te amuiraa ia farerei i te tomite no te pae fenua e ia faataa e o ˈna i te hohoˈa o te fare ma te rave i te hiˈoraa o te mau hohoˈa fare a te Taiete. E faaiti te reira i te mau hoo e e nehenehe ïa te amuiraa e maiti i te fare au noa, e tano râ, i faaauhia i nia i te ravea paturaa.

⁷ E tia ia haamauhia te mau tuhaa faufaa moni tia e te faataa-maitai-hia. Ua haere atu te mau taeae aravihi i te tomite no te pae fenua no te tauturu i te mau amuiraa ia haamauhia te hoê tuhaa faufaa moni tano e ia faaturahia. I te hopearaa o te mau ohipa, e noaa mai i te tomite no te pae fenua i te hohoˈa o te api parau taatoa o te tuhaa faufaa moni o te opuaraa.

⁸ Te feia hiˈopoa tei maere: Ua horoa te ohipa a te varua moˈa o Iehova i nia i te mau taeae rave ohipa i roto i te mau Piha no te Basileia i te hoê faaiteraa puai. Ua papai te faatere o te hoê taiete o tei hoo i te raau no te tafare o te hoê piha e: “Aita vau e haamanaˈo ra e ua maere aˈena anei au i te feia rave ohipa i to ˈu iteraa i te mau Ite no Iehova i te ohipa i roto i te paturaa. E ohipa oaoa mau e te maere, e te oaoa nei au i te apitiraa i roto i te tahi faito. E tia ia haapopouhia outou e to outou mau taata, e ia manuïa outou i roto i ta outou mau opuaraa no a muri aˈe.”

⁹ I rapae au mai, ua afai te hoê taata hoo i te hoê taata rave ohipa i nia i te vahi paturaa i te tahi noa hora i roto i na mahana e toru. Te faatia ra teie taata e: “Ua hoonahia to ˈu oraraa i to ˈu farereiraa ia outou i teie hopea hebedoma. I teie nei, e manaˈo ê atu â to ˈu no nia i te mau Ite no Iehova! Aita outou e patoto noa ra i te mau uputa. Ua oaoa roa vau i te apitiraa i te ohipa. Eiaha e maere mai te peu e e haere mai au i ta outou putuputuraa huiraatira i mua.”

¹⁰ I te hopea o te hoê paturaa, ua papai te hoê tavana i te iˈoa o te oire e: “Ua maere roa matou i te iteraa e tau hanere taata tauturu o te rave amui e te patu ra i te piha ma te vitiviti. E fare nehenehe mau â teie. Ua maere roa te feia no to ˈu nei fenua i te oioi o te mau ohipa. Te faanehenehe mau nei teie Piha no te Basileia apî roa i te oire, e te oaoa nei matou i te reira e i ta outou amuiraa.”

¹¹ Ia rahi mai â te mau rima tauturu: Te tutava nei te mau tomite no te pae fenua i te haafaufaa i te mau aravihi atoa i roto i te mau amuiraa o te faaohipa i te Piha no te Basileia te tia ia patuhia aore ra ia faaapîhia. Te ohipa atoa nei ratou e te tahi atu mau taeae, te mau matahiapo e te mau tavini tauturu iho â râ, e te faaineine nei ia ratou no te mau ohipa. E faaohipa teie mau taeae paari i muri aˈe i te mau aravihi i noaa mai ia ratou no te tahi atu mau vahi paturaa. E tia ïa i te mau melo o te mau amuiraa o te opua ra i te hoê paturaa ia faaite i te hinaaro mau e ia rave paatoa i te ohipa; eita e nehenehe e ani i te tomite no te pae fenua e i te mau taeae o tei tahoê mai ia rave i te taatoaraa o te mau ohipa (Neh. 4:6b). Na te aroha e turai i te mau taeae o tei faaineinehia ia horoa i to ratou mau aravihi no te tahi atu mau amuiraa o te patu ra aore ra o te faaapî nei, e o te hinaaro rahi atoa nei i te fare. — Neh. 5:19; Phil. 2:3, 4.

¹² Te faaitoitohia ra te mau taeae e te mau tuahine aravihi i roto i te fare aore ra i roto i te mau toroa no te paturaa e te fanaˈo ra i te hoê roo maitai i roto i te amuiraa ia haere mai no te apiti i teie ohipa rahi mau. E haere ratou e farerei i te tiaau-peretiteni aore ra i te papai parau o te tapao ia ratou i nia i te tabula o te feia rave ohipa e vai nei i roto i te tuhaa haaati. I nia i teie api parau e haapapuhia ˈi to ratou aravihi i roto i te paturaa aore ra i roto i te tahi atu mau tuhaa mai te tatairaa, te vai-maitai-raa, te tapihoo tauihaa, te tuhaa faufaa moni e te mau ohipa i te pae ture. E faaapîhia teie tabula i te mau tere atoa o te tiaau haaati. E tia i te mau melo tapaohia ia riro mai ei feia bapetizo e e fariihia e te tomite taviniraa o te amuiraa. I muri aˈe, e afaihia teie tabula matamua i te Taiete ra ia ineine anaˈe. Ma te pahono i teie pii, te faaite nei tatou i to tatou here no to tatou taata-tupu, e i te feia piri roa ia tatou: to tatou mau taeae kerisetiano. — Mat. 7:12; 22:39; Ioane 13:35.

¹³ E haamauruuruhia te tauturu a te feia rave ohipa: E mea varavara te feia aita i ite maitai i te ohipa rahi o te paturaa o te hoê Piha no te Basileia ia ore ratou e apiti roa mai. I te otiraa ta ratou Piha no te Basileia, ua papai te mau matahiapo e: “Ua riro mau te mau aˈoraa ta te mau taeae o te tomite paturaa no te pae fenua i horoa mai ia matou ra e te faaoromai ei haamaitairaa mau. Ia haamanaˈo anaˈe matou i te turu ta ratou i afai mai ia matou ra, ma te faatere i te mau ohipa e ma te faatano i te faaô mai te feia ohipa aravihi, eita matou e nehenehe e ore e faahiti i te Petero 1, 5:2, 3, i reira e taiohia ˈi e tia ia faaamu i te nǎnǎ ‘eiaha no te faaueue, no te hinaaro râ; eiaha no te taoˈa tia ore ra, no te tae mau râ o te aau; eiaha ma te faahepo i nia iho i te tufaa a te Atua ra, ei aveia râ no te nǎnǎ.’ Te horoa mau nei teie mau taeae i te hoê hiˈoraa maitai i roto i te taviniraa no Iehova. I te roaraa o te taime paturaa, ua tauiui te mau taeae e rave rahi taime i te faaearaa, ua haere i te mau vahi atea, ua horoa e rave rahi hora, ua horoa mai i te taoˈa e te mau tauihaa, e ua pûpû atoa mai i te mau taoˈa e rave rau huru, te taatoaraa o te reira no te tauturu ia matou ia patu i ta matou Piha no te Basileia. Te haapapu ra te horoa maitai o teie mau taeae e te ‘here nei ratou i te utuafare o te mau taeae’. Auê ïa faaitoitoraa faufaa no tatou! — Petero 1, 2:17.”

¹⁴ Te itehia ra te hinaaro mau e te itoito o te mau taeae, o ta te mau reni i muri mai e faaite ra: “Auê ïa oaoa hohonu e ia ite i te mau amuiraa reo ěê ia rave apiti i roto i te tapao e haamori ia Iehova i roto i te tahoê!” Te tupu mau nei te mau parau a Salamo 133:1, 3 e: “Inaha hoi, te maitai e te popou, ia parahi atoa te mau taeae ma te au maite!” Ua faaite hoê matahiapo o tei ohipa e te hoê tomite no te pae fenua, ma te parau i te haamaitairaa rahi ia tavini i to ˈna mau taeae, e “ua faaitoito-puai-hia te mau amuiraa e teie mau taeae o te tere mai e tau hanere kilometera no te tauturu ia ratou ia tapea i ta ratou euhe ia Iehova. (...) Ua riro mau tatou ei utuafare o te mau taeae, tahoêhia e te here”!

¹⁵ No te haamauruuru i te mau ohipa ravehia i roto i te Piha no te Basileia, ua papai te hoê tiaau-peretiteni e: “E rave rahi taeae ruhiruhia i roto i ta matou amuiraa, e eita iho â e maraa ia matou ia rave i teie ohipa matou anaˈe. Te haamauruuru rahi nei matou ia outou, outou e te mau taeae atoa e tei roto te here ia Iehova ia ratou mai ia outou, e aita i hinaaro e tapea noa no ratou, ia faaite râ. Te hinaaro nei matou e parau i to matou mau taeae: ‘A tamau i ta outou ohipa maitai roa.’ Te haapopouhia nei ta outou mau tutavaraa e e rave rahi mau hoa e te faaoaoa ra i to tatou Metua ra o Iehova ma te papu.” Ua papai te hoê tomite paturaa e: “Ua ite matou i te rahi o te ohipa i ravehia e te feia ohipa Philem. 21). Ua faahiti te mau taata no te vahi e: ‘Tei ia outou ra Iehova!’”

¹⁶ Te vai faufaa noa ra te turu i te pae moni: Ua tauturu te mau ô horoa maitai tei tuuhia i roto i te Afata a te Taiete no te mau Piha no te Basileia i te mau amuiraa i tahito ra e e tamau noa ratou i te faaî i teie tiaraa ma te papu. Aita anei te Atua ra Iehova e horoa nei i te hiˈoraa no te horoa ma te manaˈo miimii ore (Iak. 1:17)? Mai te peu e e mea mau aita ta te taatoaraa hoê â ravea, e nehenehe râ ma te ara i ta tatou iho mau haamâuˈaraa e turu taatoa i te ohipa paturaa. Te faaoaoa mau ra teie horoa maitai ma te tano i te mafatu o Iehova, e te horoa maira i te hoê faaitoitoraa puai i to tatou mau taeae.

¹⁷ Te farii maitai ra ‘te hoê nahoa rahi’ o te rahi noa maira i te poroi o te Basileia. Te haere mai nei ‘te mau mea hinaarohia’ i te hiero pae varua o Iehova, o ‘te faaî i to ˈna fare i te hanahana.’ (Apo. 7:9; Hagai 2:7.) I te hiˈoraa o te mau ati Iuda haapao maitai i te tau o Hagai, e ia tapea i to tatou mafatu i nia i te ohipa a te Atua, e ia turu hau atu i ta tatou e nehenehe i te paturaa o te mau Piha no te Basileia, no te mea te hinaaro-ru-hia ra te reira. Ua patuhia tau tausani Piha no te Basileia nehenehe i teie mau matahiti i mairi, te tamau noa nei râ te maraaraa i te hoê tereraa vitiviti e te reira na roto i te ao taatoa. E ravea faahiahia roa ta tatou turu tamau i te mau Afata a te Taiete no te mau Piha no te Basileia no te apiti i te ohipa a te Atua ra.