Te mau hoˈi-faahou-raa e farerei poto e te aravihi
1 Te faatupu tamau ra anei tatou i te mau hoˈi-faahou-raa e farerei, aore ra te faahaumani ra anei te reira i te mea aita tatou i ite e eaha ra te parau? Aita e faufaa ia mǎtaˈu i te rave i te mau hoˈi-faahou-raa e farerei. Ia aravihi tatou i roto i taua ohipa ra, e ara tatou i na tapao e toru: 1) ia ineine maitai tatou; 2) ia nehenehe e tatara hoê aore ra e piti manaˈo o te tahi mau tumu parau bibilia poto; 3) ia ineine i te faaroo i te manaˈo o te mau taata.
2 Ia faaineine anaˈe tatou no te hoê hoˈi-faahou-raa e farerei, e feruri tatou i te tumu parau tano ia tatarahia. E taata haapii anei te taata e faaroo ra? I teie avaˈe, e rahi atu â te taime to te feia haapii e rave rahi no te tauaparau i te mau tumu parau bibilia, no te mea e fanaˈo ratou i te hoê taime faaearaa haapiiraa. E farerei paha tatou i te feia e faaroo mai i te poroi o te Basileia. Ua faahiti anei tatou i te hoê uiraa i te hopearaa o ta tatou tere na mua ˈtu? Ua faaite anei te taata i te anaanatae no te hoê tumu parau taa ê? E hiˈopoa faahou i ta tatou mau nota, e imi anaˈe i roto i te buka Haaferuriraa i te mau haamaramaramaraa o ta tatou e hinaaro no te faatupu i te hoê hoˈi-faahou-raa e farerei aravihi. I te roaraa, e faaite tatou i te mahanahana e te huru auhoa. E aroha i te taata ma to ˈna iˈoa.
3 Mai te peu e ua farii te taata i Te Pare Tiairaa e te A ara mai na! i to tatou tere matamua, e niu tatou i te aparauraa i nia i te hoê aore ra e piti manaˈo poto i maitihia i roto i te hoê vea. Mai te peu e ua vaiiho tatou i te hoê api parau iti, e nehenehe tatou e tatara i te api parau iti iho, aore ra e tamau i te aparauraa ma te faaau atu i te hoê manaˈo tano hutihia mai roto mai i te hoê vea aore ra te hoê vea iti.
4 Mai te peu e ua vaiiho tatou i te hoê api parau iti “E ora anei teie nei ao?”, e parau noa ˈtu e:
◼ “I te taime hopea o to ˈu haereraa mai, ua tauaparau tatou i te parau tǎpǔ a te Atua no te hoê ao apî i roto i te hau. Mai ta tatou i ite aˈena, e haamauhia te mau huru maitatai roa ˈˈe maoti te Basileia o te Atua. I to oe manaˈo, eaha te tia ia ravehia no te ite i taua ao apî ra?” E vaiiho i te taata ia faaite i to ˈna manaˈo, e i muri iho e faaite atu ia ˈna o ta te Salamo 37:9,11, 29 e parau ra.
5 Mai te peu e ua vaiiho tatou i te api parau ra “Eaha te tiaturiraa no te feia herehia e tatou tei pohe?”, e haamata ïa tatou i te hoê aparauraa maoti te tahi mau faaararaa i muri mai:
◼ “I te hopea o ta tatou tauaparauraa hopea, ua vaiiho mai au na oe i te hoê api parau iti teie te tumu parau Eaha te tiaturiraa no te feia herehia e tatou tei pohe? Te faaite nei te paratarapha toru i te tahi mau uiraa anaanatae mau: ‘No te aha te taata e pohe ai? Teihea roa te mau taata pohe? Nafea e roaa ˈi te haapapuraa e ora faahou mai ratou?’ Te pahono nei te upoo parau ‘Te pohe, e te ohipa e tupu i te poheraa’ i taua mau uiraa tataitahi. Te vai ra ia ˈu nei te hoê o taua api parau iti ra. A hiˈo na i tei parauhia ra i te paratarapha maha.” Ma te titauraa i te taata ia pee i te taioraa, e taio i te paratarapha e na irava e piti i faahitihia, e i muri iho e ani tatou i to ˈna manaˈo. E faaroo maitai tatou i ta ˈna pahonoraa e tamau atu ai i te aparauraa.
6 I roto i te aparauraa, e nehenehe te taata e faaite te mau manaˈo hape. E mea faufaa ore ia faatupu i te mau aimǎrôraa. E tutava râ tatou i te tapea noa mai i te tumu parau i tuatapapahia. E faatitiaifaro tatou i te tahi mau manaˈo e ere no roto mai i te Bibilia i te mau hoˈi-faahou-raa i muri mai.
7 I te avaˈe eperera, e imi anaˈe i te mau ravea atoa ia apee i te anaanatae i faaitehia ma te faatupuraa i te mau hoˈi-faahou-raa e farerei poto e te aravihi.