Ia faaite tatou i to tatou mauruuru no te hoo
1 Noa ˈtu eaha to ratou ihotumu, te hinaaro nei te taata e faaite i to ratou faatura no te hoê hoa aore ra no te hoê fetii tei pohe. E nehenehe teie hinaaro e puai roa mai te peu e ua pohe te taata herehia na roto i te faaoraraa i te tahi atu mau taata. Te vai atoa ra to te feia e tiaturi nei e ora e a muri noa ˈtu i te mau tumu maitatai roa no te faaite i to ratou mauruuru no te hoo, na roto i te haereraa ˈtu, i te 6 no eperera, i te oroa Haamanaˈoraa o te poheraa o te Mesia. — Kor. 2, 5:14; Ioane 1, 2:2.
2 Ia mauruuru tatou i te faufaa o te here o Iehova: Mea tano roa e ia faaite tatou i to tatou mauruuru taatoa i Tei haamaitai rahi roa ˈˈe i te huitaata nei, te Atua ra o Iehova, o tei horoa mai i te hoo (Ioane 1, 4:9, 10)! Te ite-papu-hia ra te hohonuraa o te here o Iehova na roto i te ô faito ore o ta ˈna i pûpû no te horoa mai i te hoo: e ere noa hoê o ta ˈna mau mirioni melahi parau-tia o ta ˈna i pûpû, o ta ˈna râ Tamaiti fanau tahi, tei here-rahi-roa ˈˈe-hia e ana (Mas. 8:22, 30). Ua faahaamanaˈo teie Tamaiti, o ˈna tei matau maitai aˈe ia Iehova, i te reira i te na ôraa e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” — Ioane 3:16.
3 Ia mauruuru tatou i te faufaa o te here o Iesu Mesia: Oia atoa, e tia ia tatou ia faaite i to tatou mauruuru rahi no Iesu Mesia, o tei horoa i to ˈna ora ei hoo no te mau taata e rave rahi (Mat. 20:28). Te itehia ra to ˈna here i te mea e ua farii oia i te auraro i te hinaaro o Iehova no nia i te hoo. E feruri anaˈe na tatou i te tiaraa hau aˈe i te faahiahia o ta ˈna e fanaˈo ra i pihai iho i to ˈna Metua e te mau muriadi melahi parau-tia, e o ta ˈna hoi i faarue no te riro mai ei hoo no tatou. Aita oia i haamarirau i mua i te manaˈo e ora i rotopu i te mau taata tia ore e e tavini ia ratou, aore ra e pohe no te pǔpǔ i te hoo. Aita, teie râ, ua “rave atura i to te tavini ra huru, i te fanauraa mai ma te huru o te taata nei. E (...) ua faahaehaa oia ia ˈna iho, i te haapao-maite-raa e tae noa ˈtura i te pohe i te [pou haamauiuiraa] ra”. — Phil. 2:5-8.
4 Nafea tatou ia faaite i to tatou mauruuru no te hoo: Eita tatou e faaite i to tatou mauruuru no te hoo na roto i te parau-noa-raa ˈtu e mauruuru. Mea titauhia e ia haapii tatou e eaha te mau faanahoraa ta Iehova i rave no te faaora ia tatou na roto i te arai o Iesu Mesia (Ioane 17:3). E tia ia tatou i muri iho ia faatupu i te faaroo i roto i te hoo (Ohipa 3:19). E tia ia turaihia tatou ia horoa ia tatou iho no Iehova na roto i te pûpûraa ia tatou no ˈna e te bapetizoraa (Mat. 16:24). Mai te peu e e ora tatou ia au maite i te auraa o ta tatou euhe, e faaohipa ïa tatou i te mau ravea atoa no te faaite i te hoo, teie faanahoraa faahiahia i ravehia ia ora tatou. — Roma 10:10.
5 E nehenehe tatou paatoa e farii i teie mau titauraa. Eita hoi e nehenehe e parau e eita e maraa ia tatou. Te na ô ra te Mika 6:8 e: “E eaha ta Iehova hinaaro ia oe ra maori râ o te rave i te parau-tia, e ia hinaaro hoi i te aroha, e te haere ma te haehaa i te aro o to Atua.” Ia au i teie huru manaˈo, ua parau atu o Davida ia Iehova e: “No ǒ na mai te mau mea atoa nei, e na oe iho tei hopoihia ˈtu e matou nei.” — Par. 1, 29:14.
6 Ei hiˈoraa, na mua ˈˈe i te oroa Haamanaˈoraa, no te aha e ore ai e taio e e tuatapapa e to tatou utuafare i te mau pene 112 e tae atu i te 126 o te buka Te taata rahi roa ˈˈe? E nehenehe ïa tatou e faatupu i te hoê mauruuru puai aˈe no te mau faanahoraa faahiahia i ravehia e Iehova. Ia na reira tatou, e nehenehe ïa tatou paatoa e faaineine i to tatou feruriraa no te faaite i te mauruuru no te hoo i te oroa Haamanaˈoraa i te 6 no eperera 1993.