E faaite anaˈe e nafea Iehova ia haamau i te hau e te ino ore
1 Ua opua te mau taata e rave rahi mau ravea no te hopoi mai i te hau e te ino ore, tera râ aita roa ˈtu hoê noa ˈˈe i nehenehe e haamâha i te mau hinaaro faufaa o te mau taata i nia i te fenua taatoa nei. Noa ˈtu e o te mau feii i te pae faaroo i te pae o te nunaa e here aiˈa, e i te pae faahanahanaraa i te nunaa, e tae noa ˈtu i te manaˈo haru tiaraa e te nounou i roto i te ao o te politita, te mau haafifiraa matamua i te hau e te ino ore, ua ite te mau kerisetiano mau e no te patoiraa te mau taata ia faatura i te Atua ra o Iehova e no te mana o te Diabolo ra o Satani i fifi ai te huitaata nei. — Sal. 127:1; Ier. 8:9; Ioane 1, 5:19.
2 I te avaˈe tenuare, e tutava tatou i te faataa i to tatou mau taata-tupu e te ravea otahi roa no te haamau i te hau e te ino ore, o ta te Atua ïa i faanaho, e tei ia Iehova ra te ravea hopea o te mau fifi atoa o te huitaata nei.
3 E faaohipa anaˈe i te mau api parau iti apî: No te haaparare i teie poroi mahanahana, te vai ra ia tatou nei te mau api parau iti apî o tei faaitehia mai i te tairururaa mataeinaa “Te feia amo i te maramarama”. Ua faaite mai te hoê faahiˈoraa ohie e mea nafea ia faaohipa i te api parau iti n° 19, E ora anei teie nei ao? no te omuaraa i te hoê tauaparauraa e no te haamata i te hoê haapiiraa bibilia. Eita e ore e putapû e rave rahi ia ite anaˈe ratou e mea nafea te parau tohu a Iesu no nia i te hopea e tupu ai.
4 I teie mahana, te taiâ nei e te tiai nei te tahi tau mirioni taata i te faaoraraa e i te hoê ao e vai ra te hau, te ino ore e te peapea ore. E mea papu e e riro te api parau iti n° 20, Te tamârǔraa no te feia e taiâ ra, ei tautururaa no te mau taata e rave rahi.
5 Te horoa maira te api parau iti n° 21, A fanaˈo i te hoê oraraa utuafare oaoa, i te tahi mau aˈoraa ohie no te haamaitai i te oraraa utuafare, a tiai noa ˈtu ai i te hoê oraraa faahiahia no a muri aˈe i roto i te ao apî i tǎpǔhia e te Atua.
6 Te pahono nei te api parau iti n° 22 ma te haavare ore i te uiraa O vai mau na te faatere o te ao nei? Te faataa nei oia e no te aha te mau taata e faaohipa ˈi i te mau ravea riaria mau no te haamauiui e no te taparahi i te tahi e te tahi, area ra te hinaaro nei te rahiraa o te mau taata e ora ma te hau e te ino ore. Te vai nei te mau puai iino i te pae varua i roto i te mau raˈi, tera râ te faahemaraa haavarevare roa ˈˈe a Satani oia hoi te aratairaa i te mau taata e rave rahi ia patoi i to ˈna vai-mau-raa e o ta ˈna atoa mau demoni.
7 E haamata anaˈe i te mau haapiiraa bibilia: E nehenehe e haamata i te hoê haapiiraa bibilia maoti te hoê api parau iti, te hoê vea iti, te hoê vea aore ra te hoê buka. Mai te peu e buka ta taua taata ra, a faaite atu ma te aravihi e mea nafea ia faaohipa i te reira no te haapii i te Bibilia. Ua riro te mau api parau iti apî e te vea iti Te haapao mau ra anei te Atua ia tatou? ei mau mauhaa maitatai roa no te faaara e no te faarahi i te anaanatae o te mau taata e no te haamata i te mau haapiiraa bibilia. Hau atu â, e nehenehe tatou e pûpû atu i te hoê buka noa ˈtu eaha te huru i neneihia hou te matahiti 1981 i te mau taata e anaanatae hau atu â i te parau mau. Mai te peu e te vai nei i roto i ta outou amuiraa te mau buka Oraraa utuafare, “Ia tae mai ra to oe ra basileia” (farani), Parau mau aore ra Taurearea (farani), a feruri ia faaohipa maitai i te reira i roto i te taviniraa.
8 O to tatou Poiete anaˈe, te Atua ra o Iehova o te nehenehe e hopoi mai te ino ore mau. Te hinaaro nei tatou e ia haamatara te mau taata e rave rahi i to ratou mafatu e to ratou feruriraa i te parau mau i roto i te Parau a te Atua e ia tufa ratou i te tiaturiraa o ta ˈna e faaite ra. E faaohipa maitai anaˈe i te mau mauhaa e vai ra ia tatou nei no te haapii, e e faaite anaˈe e mea nafea te Atua ia haamau i te hau e te ino ore. — Isa. 2:3, 4.