Ia ore oe e hinaaro faahou e ora

Te faataa ra o Adriana, no Beresilia: “Mea puai roa tera mau huru aau. Ua manaˈo atura vau mea au aˈe ia haapohe ia ˈu.”

UA MAUIUI ê na anei oe a ore atu ai e hinaaro faahou e ora? Te taa ra ïa ia oe i te mau huru aau o Adriana. E ahoaho rahi to ˈna, e mauiui o ˈna e no ˈna, aita e ravea faahou. Ua parau te mau taote ua roohia o ˈna i te hepohepo rahi.

A feruri atoa na ia Kaoru i te fenua Tapone o tei haapao i to ˈna na metua ruhiruhia tei roohia i te maˈi. Te faataa ra o ˈna: “I taua taime ra, ua oti roa vau i te mau faateimaharaa o te vahi ohiparaa. Aita vau i hinaaro faahou e tamaa e aita vau i nehenehe e taoto maitai. Manaˈo atura vau e ore roa to ˈu mau fifi mai te peu e pohe vau.”

Te na ô ra o Ojebode no te fenua Nigeria: “No to ˈu oto rahi e taˈi noa vau. Ua imi atura vau i te ravea no te haapohe ia ˈu.” Auaˈe râ aita o Ojebode, Kaoru e Adriana i haapohe ia ratou iho. Tera râ, hau atu i te 100 000 taata o te haapohe nei ia ratou i te matahiti taitahi.

IHEA E ITEHIA ˈI TE TAUTURU

Te rahiraa o te taata e haapohe nei ia ratou iho, o te mau tane ïa. I rotopu ia ratou, e rave rahi tei haama i te ani i te tauturu. Ua parau Iesu e hinaaro te feia maˈi i te taote. (Luka 5:31) No reira, mai te peu no te hepohepo rahi te hinaaro ra oe e haapohe ia oe, eiaha e haama i te ani i te tauturu. No e rave rahi taata o te hepohepo nei, ua nehenehe ratou e faaruru i te reira maoti te rapaauraa ta te mau taote i horoa ˈtu. Ua fanaˈo o Ojebode, Kaoru e Adriana i te tauturu a te mau taote e i teie nei, ua maitai mai ratou.

E tauturu te mau taote ma te faaohipa i te raau aore ra ma te paraparau i te taata o te hepohepo nei no te ite nafea ia tauturu atu ia faatano i to ˈna huru feruriraa e haerea. E hinaaro atoa oia ia papu i to ˈna utuafare e to ˈna mau hoa to ˈna huru ma te faaoromai, aupuru e ma te turu ia ˈna. Te hoa maitai roa ˈˈe o te taata, o te Atua ra, o Iehova. Te horoa mai ra oia i te tauturu faahiahia mau maoti ta ˈna Parau, te Bibilia.

TE VAI RA ANEI TE HOÊ RAVEA TAMAU?

E titauhia paha i te feia o te hepohepo rahi nei ia fanaˈo i te ravea rapaauraa no te hoê area taime maoro aˈe e ia taui i to ratou huru oraraa. Noa ˈtu e te faaruru ra oe i te hepohepo rahi, e nehenehe râ oe e fanaˈo i te hoê a muri aˈe oaoa, mai ia Ojebode. Te na ô ra oia: “Te tiai ru nei au ia tupu te parau tohu i roto i te Isaia 33:24, aita hoê aˈe taata e parau faahou: ‘Ua paruparu vau i te maˈi.’” Mai ia Ojebode, a fanaˈo i te tamahanahanaraa maoti te parau fafau a te Atua no nia i “te hoê fenua apî” e ore roa “te mauiui.” (Apokalupo 21:1, 4) Ia au i teie parau fafau, aita faahou ïa e mauiui i te pae o te feruriraa e o te huru aau. E ore roa te mau huru aau mauiui mau e a muri noa ˈtu. Aita faahou te reira “e manaˈohia, e ore e faatupu-faahou-hia i roto i [to oe] aau.”—Isaia 65:17.

Irava Bibilia o te tauturu mai

Te taa ra te Atua i to oe mau huru aau.

“O vau hoi to Atua ra, o Iehova, o tei mau ia oe i to rima atau ra; o tei parau atu ia oe e, Eiaha e mǎtaˈu; o vau hoi to oe tauturu.”—Isaia 41:13.

Te taa ra Iehova i to tatou mau huru aau hau aˈe i te tahi taata, e te hinaaro ra oia e tauturu mai.

A feruriruri i nia i te Parau a te Atua.

“Ua ani atura [Elia] i te pohe; na ô aˈera, . . . E Iehova, a rave mai oe ia ˈu.”—Te mau arii 1, 19:4.

Te parau ra o Ojebode: “Ua tauturu mai te feruriruriraa i nia i te Parau a te Atua. Ua taa ia ˈu e ua manaˈo atoa o Elia mai ia ˈu i te hoê taime o to ˈna oraraa.”

A huti mai i te haapiiraa maoti te mau hiˈoraa Bibilia.

“Ua pure râ vau [Iesu] no oe [Petero] ia ore to oe faaroo ia paruparu.”—Luka 22:32.

I to Petero parauraa e toru taime e aita oia i ite ia Iesu, ua hepohepo rahi oia e ua taˈi roa oia. Te parau ra o Kaoru: “A feruriruri ai i nia i ta Petero i rave e te huru o Iesu i nia ia ˈna, ua taa ia ˈu e ua tâuˈa Iehova e Iesu i to Petero mau huru aau. Ua faaitoito te reira ia ˈu.”

Aita faahou te mau huru aau mauiui mau “e manaˈohia, e ore e faatupu-faahou-hia i roto i [to oe] aau.”—Isaia 65:17