3 Te tauturu no te faaoromai i te mau fifi

Te vai ra te tahi mau fifi eita e nehenehe e ape e e faaafaro i teie nei. Ei hiˈoraa, mai te peu ua pohe tei herehia aore ra te faaruru ra outou i te hoê maˈi tamau, aita ˈtu â ravea maori râ te faaoromairaa i te mauiui. E nehenehe anei te Bibilia e tauturu mai i mua i tera mau fifi ino mau?

TE MAˈI TAMAU

Te parau ra o Rose: “Ua roohia vau i te hoê maˈi fetii e mea mauiui mau te reira. Ua ino roa to ˈu oraraa.” Hoê o te mau fifi rahi roa ˈˈe ta ˈna i faaruru, oia hoi i te tahi taime, aita oia i nehenehe e tiatonu i nia i ta ˈna haapiiraa Bibilia e te mau ohipa haamoriraa. Ua tauturu mai râ te mau parau a Iesu i roto i te Mataio 19:26 o te na ô ra: “I te Atua râ, e tia ïa te mau mea atoa.” Ua taa ia Rose e e rave rau huru haapiiraa. No to ˈna mauiui, aita o ˈna e nehenehe e taio maoro. E haamata ïa oia i te faaroo i te taioraa Bibilia haruharuhia e te mau papai Bibilia.a Te na ô ra oia: “Aita anaˈe tera mau ravea, aita vau e ite e nafea ia vai puai to ˈu faaroo.”

E oto mai o Rose no te mea aita o ˈna e nehenehe faahou e rave i te tahi ohipa ta ˈna i matau i te rave. E tamahanahanahia oia maoti te mau parau i roto i te Korinetia 2, 8:12: “Ia anaanatae hoi te tahi taata i te horoa, e fariihia ïa ia au i te mea e vai ra ia ˈna, eiaha râ i te mea aita e vai ra ia ˈna.” Maoti teie irava, e haamanaˈo o Rose e mea oaoa na te Atua i ta ˈna e rave ra no te mea te rave ra o Rose i ta ˈna e nehenehe noa ˈtu to ˈna mau taotiaraa.

TE MAUIUI

Te haamanaˈo ra o Delphine, tei faahitihia na mua ˈtu: “Ua pohe ta ˈu tamahine i te 18raa o to ˈna matahiti. No to ˈu mauiui rahi, ua oti roa vau. No ˈu, eita to ˈu oraraa e maitai mai.” Ua tamahanahanahia râ oia maoti te Salamo 94:19. Te na ô ra te papai Salamo i te Atua: “I rotopu i to ˈu nei manaˈo tapitapi i roto ia ˈu nei, na to haamahanahana e faaoaoa mai.” Ua parau o Delphine: “Ua pure au ia Iehova ia tauturu mai ia rave au i te ohipa o te tamahanahana ia ˈu.”

Ua haa oia ei rima tauturu. I te tahi taime, te faaau ra oia ia ˈna mai te hoê penitara. Noa ˈtu ua fati, e nehenehe e faaohipa i te reira no te peni i te tahi hohoˈa. Hoê â huru no ˈna. Noa ˈtu te mauiui ra oia, ua taa ia ˈna e nehenehe â oia e tauturu ia vetahi ê. Te haamanaˈo ra oia: “E faaohipa vau i te mau aratairaa e huru feruriraa o te Bibilia no te tamahanahana i te feia e haapii ra i te Bibilia e o vau. Vitiviti au i te taa e o Iehova te tamǎrû e tamahanahana mai ia ˈu.” Ua papai oia i te iˈoa o te mau taata Bibilia tei faaruru i te hoê taime mauiui mau i roto i to ratou oraraa. Te parau ra oia: “Noa ˈtu te tupuraa, ua pure tamau pauroa o ratou ia Iehova.” Ua haapii atoa oia e “eita e noaa mai te pahonoraa eita anaˈe tatou e taio i te Bibilia.”

Maoti te haapiiraa Bibilia, ua taa ia Delphine i te tahi atu manaˈo faufaa: ia haapao noa oia i te a muri aˈe, eiaha râ i tei tupu i na mua ˈtu. Ua tamahanahanahia o Delphine maoti teie tiaturiraa i roto i te Ohipa 24:15: “E tia-faahou-raa to te feia parau-tia e to te feia parau-tia ore.” Ua papu anei ia Delphine e e faatia faahou iho â mai Iehova i ta ˈna tamahine? A hiˈo na i ta Delphine i pahono: “Ia feruri au i to ˈu a muri aˈe, te ite nei au i ta ˈu tamahine. Tei roto maua i te aua. Mea papu ia ˈu e e tupu iho â te reira i te taime faataahia e to ˈu Metua o Iehova. Te ite nei au ia ˈna mai i te taime i ite ai e i here ai au ia ˈna i to ˈna fanauraa.”

a Te vai ra tera mau pehe haruharuhia i nia i te jw.org.

Maoti te Bibilia, e noaa ia tatou te tamahanahanaraa noa ˈtu te mau tupuraa fifi roa ˈˈe

E NAFEA TE ATUA E TAUTURU AI IA TATOU?

Mea papu te pahonoraa Bibilia. Te na-ô-hia ra: “Te fatata maira Iehova i te feia e tiaoro atu ia ˈna, i te feia atoa i tiaoro atu ia ˈna ma te haavare ore. E faatia oia i te hinaaro o te feia i mǎtaˈu ia ˈna, e faaroo mai oia i ta ratou tiaoro, e e faaora hoi ia ratou.” (Salamo 145:18, 19) Mea tamahanahana teie mau parau, e ere anei? Tera râ, e nafea te Atua e pahono ai i te mau pure a te feia e imi ra i ta ˈna aratairaa ma te aau tae?

MA TE HOROA MAI I TE PUAI:

No te mau fifi rahi, pinepine tatou i te toaruaru e i te rohirohi mai. E nehenehe to tatou tino e paruparu, oia atoa to tatou feruriraa e faaroo. (Maseli 24:10) Tera râ, “te horoa nei [Iehova] i te itoito no te matapouri [aore ra te feia rohirohi]; e te faarahi nei oia i te etaeta no tei paruparu ra.” (Isaia 40:29) Ua faaruru te aposetolo Paulo i te mau fifi atâta mau. Ua parau oia: “E puai to ˈu ia faaruru i te mau mea atoa maoti tei horoa mai i te puai.” (Philipi 4:13) Ua puaihia o Paulo maoti te varua moˈa o te Atua. E nehenehe atoa outou e ani i te Atua ia horoa mai i to ˈna varua moˈa.—Luka 11:13.

MA TE HOROA MAI I TE PAARI:

Eaha te rave mai te peu te hinaaro ra outou i te tauturu no te taa e no te faaohipa i te hoê aˈoraa Bibilia? Ua papai te pǐpǐ ra o Iakobo: “Ia ere noa ˈtu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa ma te ore e faahapa, e e horoahia mai ta ˈna.” (Iakobo 1:5) E ohipa outou ia au i ta outou mau pure ma te taio i te Bibilia e ma te faaohipa i ta outou i haapii mai. (Iakobo 1:23-25) A na reira ˈi, e ite iho â outou e mea î i te paari te mau aˈoraa Bibilia.

MA TE HOROA MAI I TE HAU:

Noa ˈtu te mauiui ra outou no te ahoaho rahi, e nehenehe Iehova e tamǎrû ia outou. Te na ô ra ta ˈna Parau: “Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa na roto i te Mesia ra o Iesu.” (Philipi 4:6, 7) A ani na ia Iehova i te hau!

Tera râ, eaha te rave mai te peu eita to outou mau fifi e faaafaro-oioi-hia mai? Eiaha e manaˈo e ua faarue te Atua ia outou. Noa ˈtu te vai noa â ra to outou mau fifi, e horoa ˈtu te Atua i te itoito e te puai no te faaoromai i te reira. (Korinetia 1, 10:13) Te fafau atoa ra te Bibilia e fatata roa te taime e faaafaro-roa-hia to outou mau fifi atoa!