A haapao i te faaararaa no te ora ˈtu!

I TE 26 no Titema 2004, ua tupu te tahi aueueraa fenua i te faito puai 9,1 i Simeulue, te tahi motu i te pae apatoerau o Sumatra i Initonetia. Ua hiˈo e ua ite te taata atoa ua topa roa te faito o te miti. Horo taue atura te taatoaraa i nia i te mouˈa ma te tuô, “Miti faaî!” Toru ahuru minuti i muri iho, ua tairi mai te mau are puai mau e ino roa aˈera te rahiraa o te mau fare e oire iti.

O te motu Simeulue te vahi matamua o tei faaû i tera miti faaî ino mau. I nia na 78 000 taata o tera motu, e hitu anaˈe tei pohe. Mea iti ia faaauhia i te tahi atu mau numera.a Teie te tahi parau matauhia e te feia no ǒ: ‘Ia tupu te tahi aueueraa puai e ia hoˈi te miti i tai, a horo i nia i te mouˈa, e miti faaî te haere maira.’ Ua tupu aˈena te reira i Simeulue e ua haapii te feia no ǒ i te hiˈopoa i te mau tapao no te ite e miti faaî te haere mai ra. Ma te haapao i te mau tapao faaara, ua ora mai ratou.

Te parau ra te Bibilia fatata atoa te tahi ohipa i te tupu, “e ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu.” (Mataio 24:21) Eita to tatou paraneta e haamouhia na roto i te mau raveraa iino a te taata aore ra i muri aˈe i te tahi ohipa o te tupu i roto i te reva. Te opua ra hoi te Atua ia vai te fenua e a muri noa ˈtu. (Koheleta 1:4) E ravea na te Atua te ati rahi o te fatata i te tupu. I reira “e haamouhia ai te feia e ino roa ai te fenua nei ia ratou” e e ore roa te ino e te mauiui. (Apokalupo 11:18, Te Faufaa Api; Maseli 2:22) Auê haamaitairaa e!

Eita râ te mau taata maitatai e pohe mai ia tupu te miti faaî, te aueueraa fenua aore ra no te tahi mouˈa auahi. Te na ô ra te Bibilia, “e aroha hoi te Atua.” E te fafau ra tera Atua o Iehova te iˈoa, “e parahi te feia parau-tia i nia i te fenua, e parahi tamau â ratou i reira.” (Ioane 1, 4:8; Salamo 37:29) Eaha râ te rave no te ora ˈtu i te ati rahi e no te fanaˈo i te mau haamaitairaa i fafauhia? A haapao i te mau faaararaa!

A TAPAO NA I TE MAU TAUIRAA

Aita tatou i ite afea te hopea o te ino e te mauiui e tae mai ai. Ua na ô hoi Iesu: “Area te reira mahana e te reira hora, e ore roa te hoê e ite; e ore hoi te mau melahi o te raˈi, e ore atoa te Tamaiti, maori râ o te Metua anaˈe.” Ua faaitoito mai râ Iesu ia “ara.” (Mareko 13:32; Mataio 25:13) I te aha? Te faaite mai ra te Bibilia i te tupuraa o te ao hou te hopea. Mai te tapao o tei faaite i te feia no Simeulue e miti faaî te haere mai ra, ua riro te mau ohipa e tupu na te ao ei faaararaa fatata te hopea i te tae mai. A hiˈo i te tumu parau tarenihia no te ite eaha te tahi mau ohipa ta te Bibilia i tohu.

Ia hiˈohia tera e tera ohipa faaitehia i roto i te tumu parau tarenihia, ua tupu aˈena iho â te reira i nia i te tahi faito. Ua parau râ Iesu ia ite tatou i “taua mau mea,” ua fatata ïa te hopea. (Mataio 24:33) A uiui na, ‘Inafea taua mau mea i faaitehia i te tupuraa na te ao taatoa, i te hoê â taime e te hoê faito ino mau?’ E ere anei i to tatou nei tau?

TE HAAPAPURAA I TO IEHOVA HERE

Ua parau te tahi peretiteni tahito o Marite, “Ia ravehia te mau faanahoraa no te faaara oioi, . . . e ora te taata.” I muri aˈe i te miti faaî i tupu i 2004, ua ravehia te tahi mau faanahoraa i tera fenua no te arai i te ati mai tera. E ohipa atoa ta te Atua i rave no te faaara i te taata fatata te hopea. Ua tohu te Bibilia: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”—Mataio 24:14.

I te matahiti noa i mairi, ua poro te mau Ite no Iehova i te parau apî oaoa fatata piti miria hora i 240 fenua na roto hau atu 700 reo. Maoti te mau ravea apî o teie tau, te haapapu nei te ohipa pororaa ua piri roa mai te hopea. No to ratou here i te taata tupu, te tutava nei te mau Ite no Iehova i te faaite ua fatata roa te mahana haavaraa a te Atua. (Mataio 22:39) Te ite ra anei oe i to Iehova here? Ua tae roa ˈtu hoi teie poroi ia oe. A haamanaˈo, “aita roa [te Atua] i hinaaro e ia pohe atu te hoê, ia noaa paatoa râ te tatarahapa.” (Petero 2, 3:9) E farii anei oe i te here o te Atua e e haapao atoa anei i te mau faaararaa?

A HORO NO TE ORA ˈTU!

A haamanaˈo na i ta te mau taata o Simeulue i rave. Ua horo oioi ratou i nia i te vahi teitei aˈe i te taime a hoˈi ai te miti i tai e ua ora mai ratou. Ei auraa parau, e titau-atoa-hia ia horo oioi i te vahi teitei aˈe no te ora ˈtu i te ati rahi e fatata maira. E nafea? Ua faaurua te Atua i te peropheta Isaia no te papai i te tahi titau-manihini-raa mahanahana mau no “te mau mahana hopea,” te tau ta tatou e ora nei. Te na ôhia ra: “E haere mai, e haere tatou i nia i te mouˈa o Iehova . . . e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.”—Isaia 2:2, 3.

E ite-maitai-hia te mau mea na nia mai i te mouˈa e e vahi papu te reira. Ma te ite atoa i te mau haapiiraa a te Atua maoti te Bibilia, ua tauturuhia e mirioni taata na te ao ia taui i to ratou oraraa. (Timoteo 2, 3:16, 17) Ua haamata ïa ratou i te “haere . . . na te eˈa” o te Atua e te fanaˈo i ta ˈna farii maitai e ta ˈna parururaa.

E farii anei oe i tera titau-manihini-raa e te paruru î i te here o te Atua i teie tau fifi mau? Te faaitoito atu nei matou ia hiˈopoa maite i te mau irava Bibilia e haapapu ra te ora nei tatou i “te anotau hopea” mai ta te tumu parau tarenihia e faaite ra. E oaoa roa te mau Ite no Iehova o to oe vahi i te tauturu atu ia taa e ia haapao i te mau irava Bibilia i horoahia. E uiraa anei ta oe? E ite paha oe i te mau pahonoraa i nia i ta matou reni www.jw.org/ty.