Ua rahi roa te ati!

E 35 matahiti to Smita,a te tahi vahine e ora ra i Dacca i te fenua Bangladesh. Ua ite te feia i matau ia ˈna e e vahine apî î i te here oia, tâuˈa ia vetahi ê, itoito i te rave i te ohipa e oaoa atoa i te faaite i ta ˈna i haapii no nia i te Atua. Ua hitimahuta roa to ˈna utuafare e hoa a ite ai e ua maˈihia e ua pohe taue noa Smita i roto noa hoê hebedoma!

Mai ia Smita, e roo maitai atoa to James e to ta ˈna vahine e 30 matahiti. I te tahi mahana, ua haere raua e farerei i to raua mau hoa i te tooa o te râ o Marite, aita râ i hoˈi noa ˈˈe i New york, ua pohe hoi i roto i te tahi ati purumu. Ua oto roa te feia ta raua i here e te mau hoa rave ohipa.

Eita e titauhia ia hiˈo atea no te ite e ua rahi roa te ino e te mauiui i teie mahana. Ua pohe te huiraatira e faehau i roto i te mau tamaˈi. Ua taparahihia e ua hamani-ino-hia te taata hapa ore. No te ati purumu e no te maˈi, ua pohe vetahi noa ˈtu eaha to ratou matahiti aore ra tiaraa. Aita te mau ati natura i maiti i te taata ta ratou e rave. Ua rahi roa te mauiui no te faainoraa e te ohipa tia ore. Peneiaˈe, ua faaruru atoa oe i te tahi ati.

E uiui iho â ïa tatou:

• No te aha te taata maitai e ati atoa ˈi?

• O te Atua anei te tumu o tera mau ati?

• E tupu anei te mau ati mai tera noa aore ra o te taata te tumu?

• Mea tano anei ia parau e no te Karmab te taata e mauiui ai?

• Mai te peu e te vai ra te Atua mana hope, no te aha oia e ore ai e paruru i te taata maitai i te ati?

• E faaorehia anei te ino e te mauiui i te hoê mahana?

No te pahono i tera mau uiraa, e titauhia ia ite na mua, no te aha te taata atoa e ati ai e eaha ta te Atua e rave?