Te mauruuru ra anei oe e te haapao maira Iehova?

1, 2. Mea taa ê ta Iehova hiˈoraa mai ia tatou i ta te mau taviri hohoˈa hiˈopoaraa i te tereraa pereoo. A faataa na.

MEA rahi te fenua e faaohipa nei i te mau taviri hohoˈa no te hiˈopoa i te tereraa pereoo e no te haruharu i te mau ati purumu. Ia tupu noa ˈtu te hoê ati purumu e ua taie te taata faahoro, e itehia ïa oia e te feia mana o te tapea ia ˈna. Maoti teie mau taviri hohoˈa, mea fifi roa ˈtu â ïa no te taata ia ape i te mau faahopearaa o ta ratou mau ohipa.

² Teie râ, mai tera atoa anei ïa ta Iehova, to tatou Metua î i te here, hiˈoraa mai ia tatou? Te parau ra iho â te Bibilia e “tei te mau vahi atoa” to Iehova mata. (Mas. 15:3) Te auraa anei ïa e te tamoemoe noa ra oia i te mau taime e ofati ai tatou i ta ˈna mau ture? Te tiai noa ra anei o ˈna i te faautua ia tatou i te taime iho â e hape ai tatou? Aita roa ˈtu! (Ier. 16:17; Heb. 4:13) Te hiˈo maira Iehova no to ˈna here ia tatou e no to ˈna hinaaro ia maitai e ia oaoa tatou.—Pet. 1, 3:12.

3. Eaha na ravea e pae e haapao ai te Atua ia tatou ma te here?

³ Na te aha e tauturu mai ia taa e te hiˈo maira te Atua no to ˈna here ia tatou? E hiˈo mai tatou e nafea oia e na reira ˈi. (1) Ma te faaara mai mai te peu e e hinaaro ino to tatou, (2) ma te aˈo mai ia hahi ê tatou, (3) ma te aratai mai maoti te mau aratairaa o ta ˈna Parau, (4) ma te tauturu mai ia û tatou i te mau fifi rau, e (5) ma te haamaitai mai ia ite oia i te maitai i roto ia tatou.

TE HOÊ ATUA HAAPAO MAITAI O TE FAAARA MAI

4. No te aha Iehova i faaara ˈi ia Kaina e tei “te uputa” te hara?

⁴ E hiˈo mai tatou na mua e nafea te Atua e faaara mai ai mai te peu e e hinaaro ino to tatou. (Par. 1, 28:9) No te taa i teie ravea e haapao ˈi te Atua ia tatou, a hiˈo na i ta ˈna i rave i to Kaina ‘ririraa’ no te mea aita o ˈna i fariihia e te Atua. (A taio i te Genese 4:3-7.) Ua faaue Iehova ia Kaina ia ‘rave i te maitai.’ Aita anaˈe, ua faaara Iehova e tei “te uputa” te hara. Na ô atura te Atua: “Ei nia ˈˈe oe ia ˈna.” Te hinaaro ra oia ia faaroo Kaina i te faaararaa e ia “itehia mai” aore ra ia farii-maitai-hia oia. Maoti hoi te farii maitai a te Atua e maitai noa ˈi to ˈna taairaa e o ˈNa.

5. E nafea Iehova e faaara mai ai mai te peu e e hinaaro ino to tatou?

⁵ E tatou ïa i teie mahana? E ite roa to Iehova mata eaha to roto i to tatou aau. Eita ïa e nehenehe e huna i to tatou mau hinaaro e manaˈo. Te hinaaro ra to tatou Metua î i te here ia haere tatou na te eˈa parau-tia. Eita râ oia e faahepo mai. Na roto i ta ˈna Parau te Bibilia, e faaara mai oia ia hahi ê tatou. E nafea ïa? Ia taio tatou i te Bibilia i te mau mahana atoa, e pinepine tatou i te tapao i te hoê irava o te tauturu mai ia haavî i te mau hinaaro ino. E faaite atoa mai paha ta tatou mau papai Kerisetiano i te tahi fifi ta tatou e farerei nei e e nafea ia faaafaro atu. E i ta tatou mau putuputuraa, e fanaˈo tatou pauroa i te mau aˈoraa o te tae mai i te taime tano!

6, 7. (a) Ua faaineinehia te mau papai no te mau mirioni taata. No te aha e nehenehe ai e parau e e haapapuraa te reira o te here o te Atua no oe? (b) E nafea oe e fanaˈo ai i te haapao maitai a Iehova?

⁶ Te faaite papu ra teie mau faaararaa atoa e te haapao maira Iehova ia tatou taitahi ma te here. Parau mau, mea maoro te papairaahia te Bibilia, ua faaineine te faanahonahoraa a te Atua i te mau papai no te mau mirioni taata e no te amuiraa taatoa te mau aˈoraa e horoahia ra i te mau putuputuraa. Teie râ, te ani ra Iehova ia oe ia faaroo i ta ˈna Parau ia rave hoi oe i te mea maitai. Tapao faaite ïa e te tâuˈa ra Iehova ia oe ma te here.

⁷ No te fanaˈo i te mau faaararaa a te Atua, e mea tia ia ite tatou na mua roa e te haapao mau ra oia ia tatou. E mea titauhia ïa ia farii tatou i ta ˈna Parau, ma te tutava i te tinai i te mau manaˈo aita e au ra i te Atua. (A taio i te Isaia 55:6, 7.) Ia haapao maite tatou i te mau faaararaa i horoahia mai, eita tatou e fifihia. Tera râ, mai te peu e e hema tatou i to tatou mau hinaaro ino, eaha te tauturu ta to tatou Metua î i te here e horoa mai?

TE AˈO MAIRA TO TATOU METUA Î I TE HERE

8, 9. E nafea te aˈoraa Bibilia o te horoahia mai e te hoê taata e haapapu ai e te haapao maira Iehova? A faataa.

⁸ Ua ite tatou e te haapao maira Iehova a aˈo mai ai oia. (A taio i te Hebera 12:5, 6.) Parau mau, eita tatou e au ia aˈohia tatou. (Heb. 12:11) Ia horoa mai râ te hoê taata i te aˈoraa no ǒ mai i te Bibilia, mea faufaa roa ia taa no te aha o ˈna e na reira ˈi. Aita o ˈna e na reira ra no te faahuru ê ia tatou. Te ite nei râ o ˈna e te fifi ra to tatou taairaa e o Iehova. Te faataa ra o ˈna i te taime e te tutava ra o ˈna i te faaite mai maoti te Bibilia e nafea ia hoˈi ia Iehova ra. E farii tatou i tera aˈoraa, no ǒ mai hoi te reira ia Iehova ra.

⁹ Ei hiˈoraa, i hiˈo noa na te hoê taeae i te mau hohoˈa faufau hou a riro mai ai ei taeae. Faaea aˈera o ˈna i tera peu a haapii ai i te parau mau. I muri aˈe, ua hoo mai o ˈna i te hoê niuniu afaifai apî e haamata faahou aˈera i te hiˈo i te mau hohoˈa faufau i nia i te Internet. (Iak. 1:14, 15) E au ra e te vai noa ra tera hiaai i roto ia ˈna mai te arahu o te ama noa ra. I te hoê mahana, ua horoa o ˈna i ta ˈna niuniu afaifai i te hoê matahiapo e fa mai nei te mau reni Internet e itehia ˈi te hohoˈa faufau. Horoa oioi aˈera tera matahiapo i te aˈoraa i te taeae. Ua faaroo maitai o ˈna i te aˈoraa e i te pae hopea ua faaea i tera peu ino. Te ite nei Iehova i te mau hara ta tatou e rave huna nei e e nehenehe o ˈna e aˈo mai hou a ino roa ˈi to tatou mau taairaa e o ˈna. Te mauruuru mau nei tatou ia Iehova i te haapaoraa mai ia tatou.

E TAUTURU MAI TE FAAOHIPARAA I TE MAU ARATAIRAA BIBILIA

10, 11. (a) E nafea oe e nehenehe ai e imi i te aratairaa a te Atua? (b) A faataa na i te hiˈoraa o te hoê utuafare o tei pee ma te î i te paari i te aratairaa a Iehova.

¹⁰ Ua himene te fatu salamo ia Iehova: “E riro oe i te aratai ia ˈu i ta oe ra parau.” (Sal. 73:24) A hinaaro ai i te aratairaa, ‘eiaha tatou e haamoe’ ia Iehova. E hiˈopoa anaˈe i ta ˈna Parau no te ite i to ˈNa manaˈo. Eita noa te faaohiparaa i te mau aratairaa Bibilia e tauturu ia tatou i te pae varua. I te tahi taime, e tauturu atoa mai te reira ia haapao i to tatou mau hinaaro i te pae materia.—Mas. 3:6.

¹¹ Ei hiˈoraa, te ora nei te hoê utuafare rarahi i Philipino i roto i te hoê fare faaapu ta ratou e tarahu nei. E pionie tamau te papa e te mama. Ua maere roa ratou a faatae ai te fatu o te faaapu i te hoê parau papai o tei faaite e eita ratou e nehenehe faahou e ora i reira. Ua taa ia ratou i muri iho e ua pari haavare te tahi taata ia ratou i te haerea tia ore. Ua haapeapea te taeae, aita hoi o ˈna i ite ihea ratou e ora ˈi. Ua tiaturi râ o ˈna ia Iehova e ua parau: “E aupuru mai Iehova. E haapao noa o ˈna i to tatou mau hinaaro noa ˈtu eaha te tupu.” Ua pee te utuafare i te mau aratairaa Bibilia e mea faatura e mea hau noa ratou noa ˈtu te mau pariraa. Tau mahana i muri iho, parau aˈera te fatu o te faaapu e e nehenehe ratou e faaea noa i reira. Ua maere roa o ˈna i to ratou haerea i mua i te mau pariraa i taui ai o ˈna i to ˈna manaˈo e i horoa atoa ai i te tâpû fenua rahi aˈe no te faaapu. (A taio i te Petero 1, 2:12.) Mea papu, ia pee tatou i te mau aratairaa Bibilia, e tauturu Iehova ia tatou i te mau taime fifi.

TE HOÊ HOA O TE TAUTURU MAI IA FAAOROMAI I TE FIFI

12, 13. I roto i teihea mau tupuraa e uiui ai vetahi e te haapao mau ra anei te Atua i to ratou mauiui?

¹² I te tahi râ mau taime, e vai noa mai te tahi fifi. Mea maoro paha ïa tatou i te faaruru-noa-raa i te hoê maˈi, te patoiraa a te mau melo utuafare aore ra te hamani-ino-raa. Te fifi mau atoa ra paha tatou e te hoê melo o te amuiraa no te mea mea taa ê to ˈna huru i to tatou.

¹³ Ei hiˈoraa, e huru ê paha oe i te parau a te hoê taeae. E parau paha oe: ‘Eita tera mau mea e itehia i roto i ta te Atua faanahonahoraa!’ Teie râ, e fanaˈo tera taeae i te mau hopoia i roto i te amuiraa e e au ra e mea auhia o ˈna. E manaˈo paha oe: ‘Eaha hoi tera huru? Aita Iehova e ite ra? No te aha o ˈna e vaiiho noa ˈi i tera ohipa?’—Sal. 13:1, 2; Hab. 1:2, 3.

14. No te aha Iehova e vaiiho ai i te mau taeae ia aˈo mai ia tatou?

¹⁴ Mea rahi aˈe te ohipa ta Iehova e ite nei e e nehenehe o ˈna e vaiiho i te hoê tupuraa no te mau tumu faufaa. Ei hiˈoraa, e huru ê paha tatou a horoa mai ai te hoê taata i te aˈoraa no te mea i to tatou manaˈo, e ere tera aˈoraa i te mea tano. Mea taa ê râ paha to te Atua manaˈo. Peneiaˈe ua tano iho â tatou i te aˈoraahia. I roto i to ˈna aamu, ua faatia te taeae Karl Klein e i te hoê taime ua aˈo-maitai-hia o ˈna e te taeae Joseph Rutherford. Tau taime i muri aˈe, ua aroha atu te taeae Rutherford ia ˈna ma te oaoa, aita râ o ˈna i pahono roa ˈtu. Ua taa i te taeae Rutherford e te huru ê noa ra te taeae Klein no te mea ua aˈohia o ˈna. Faaara aˈera o ˈna i te taeae Klein: “A ara! E noaahia oe e te Diabolo.” Ua tauturu mau teie aˈoraa i te taeae Klein. A riro mai ai ei melo o te Tino aratai, ua parau o ˈna e e tiaraa to to tatou mau taeae no te aˈo mai ia tatou. E ia riri tatou ia ratou no te tahi aˈoraa, e haru te Diabolo ia tatou. O ta ˈna ïa i haapii mai.a

15. Eaha te haamanaˈo no te ore e fiu a tiai ai ia tauturu atu Iehova ia oe i roto i te hoê tupuraa fifi?

¹⁵ E nehenehe tatou e fiu ia ore te hoê tupuraa fifi e hope. E nafea ïa? A feruri na e te faahoro ra oe i te hoê pereoo i nia i te purumu rahi a maumau atu ai te tereraa pereoo. Aita oe i ite ehia taime e titauhia ia tiai. Ia ore oe e faaoromai a imi atu ai i te tahi atu purumu, peneiaˈe e moe oe a taere roa ˈtu ai. Oia atoa, ia pee maite oe i te mau aratairaa i roto i te Parau a te Atua, e tapae iho â oe i te vahi hinaarohia.

16. No te aha ˈtu â Iehova e maiti ai i te vaiiho noa i te tahi fifi ia tupu?

¹⁶ E nehenehe Iehova e vaiiho noa i te tahi fifi ia tupu no te faaineine ia tatou. (A taio i te Petero 1, 5:6-10.) E ere na te Atua e haafifi ra ia tatou. (Iak. 1:13) O ‘to enemi te diabolo’ te tumu o te rahiraa o te mau fifi. Ua ite râ te Atua e e nehenehe te hoê tupuraa fifi e tauturu mai ia tatou ia paari mai i te pae varua. Te ite ra o ˈna i to tatou mauiui e e ara o ˈna ia ore te reira ia maoro roa no te mea ‘te tiai ra oia ia tatou.’ Te haapao maitai ra Iehova ia oe a faaruru ai oe i te fifi. A tiaturi e e tauturu mai o ˈna ia oe ia matara mai i teie mau fifi.—Kor. 2, 4:7-9.

HAAMAITAIHIA E TA TE ATUA FARII MAITAI

17. Te imi ra Iehova ia vai ma, e no te aha?

¹⁷ Te hiˈo ra te Atua i to tatou oraraa no te hoê tumu au mau. Na roto i te peropheta Hanani, ua parau te Atua i te arii Asa: “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Par. 2, 16:9) Ua ite te Atua e aita i tia, aore ra i hoê, to Asa aau. Teie râ, e ‘horoa o ˈna i te etaeta’ ia oe ia tamau oe i te rave i te mea tia.

18. Eaha te haamanaˈo no nia ia Iehova ia manaˈo oe e aita oe e auhia ra? (A hiˈo i te hohoˈa matamua.)

¹⁸ Te hinaaro ra te Atua ia ‘imi tatou i te maitai,’ ia ‘hinaaro i te maitai’ e ia “rave i te maitai.” E nehenehe ïa o ˈna e “aroha mai,” aore ra e faaite mai i ta ˈna farii maitai. (Am. 5:14, 15; Pet. 1, 3:11, 12) Te ite e te haamaitai nei Iehova i te feia parau-tia. (Sal. 34:15) A haamanaˈo na ei hiˈoraa i na vahine faafanau Hebera o Sipera e o Pua. A faatîtîhia ˈi te mau Iseraela i Aiphiti, ua faaue Pharao ia raua ia haapohe i te mau aiû Hebera tamaroa atoa te fanauhia. Ua mǎtaˈu rahi aˈe râ teie na vahine i te Atua. No to raua manaˈo haava tei tu i te hinaaro o te Atua, aita raua i na reira. I muri aˈe, ua noaa atoa mai ta Sipera e ta Pua tamarii. (Exo. 1:15-17, 20, 21) Ua ite Iehova i te ohipa maitai ta raua i rave. I te tahi taime, e manaˈo paha tatou e aita e taata e haapao ra i te maitai ta tatou e rave. Te haapao nei râ Iehova i te mau mea maitai atoa ta tatou i rave e e haamaitai mai oia.—Mat. 6:4, 6; Tim. 1, 5:25; Heb. 6:10.

19. Mea nafea te hoê tuahine i te haapiiraa e te ite ra Iehova i te mau mea maitai e ravehia ra?

¹⁹ Ua haapii mai te hoê tuahine Honegeria i Auteteria e ua ite te Atua i ta ˈna mau tutavaraa. Ua horoahia ia ˈna ra te vahi nohoraa o te hoê taata reo Honegeria ta ˈna e nehenehe e poro atu. Oioi aˈera o ˈna i te haere i tera vahi, aita râ e taata. I te tahi mau taime e au ra e e taata to roto i te fare o te ore râ e pahono mai. Ua vaiiho o ˈna i te mau papai, i te rata e i ta ˈna numera niuniu. I muri aˈe i te haere-noa-raa i tera vahi hoê matahiti e te afa, matara mai nei te opani! Ua fariihia o ˈna e te hoê vahine mǎrû o tei parau: “E e, a tomo mai. Ua taio vau i te mau mea atoa ta oe i vaiiho mai e te tiai ra vau ia oe.” No to ˈna mariri ai taata, ua rapaauhia teie vahine e te chimiothérapie e aita o ˈna i ineine i te farerei i te taata. Ua farii o ˈna i te haapii i te Bibilia. Oia mau, ua haamaitai te Atua i te tuahine no ta ˈna mau tutavaraa!

20. Eaha to manaˈo i te haapao maitai o Iehova ia oe?

²⁰ Mai ta tatou i hiˈopoa mai, te ite ra Iehova i te mau mea atoa ta tatou e rave ra e te imi ra o ˈna i te aau o te taata atoa. Aita tatou e manaˈo ra e te tamata ra o ˈna i te ite mai aore ra i te haruharu i te mau hape atoa ta tatou i rave. Te haafatata ˈtu nei râ tatou ia Iehova no te mea te haapao maira oia e te hinaaro mau ra oia e tauturu mai e e haamaitai mai no te maitai ta tatou e rave.