A haafaufaa ˈtu â i to Iehova mau huru maitatai

1. (a) O teihea huru maitatai o Iehova ta te hoê Kerisetiano e nehenehe e hiˈopoa? (b) Eaha te faufaaraa ia hiˈopoa i to te Atua mau huru maitatai?

O TEIHEA huru maitatai ta oe e manaˈo a feruri ai i te huru o Iehova? Mea rahi o tatou te manaˈo i te here, te parau-tia, te paari e te puai. Mea rahi râ to ˈna huru maitatai au mau. E 40 tiahapa te nehenehe e faataahia e o tei hiˈopoahia i roto i ta tatou mau papai. A feruri na i te mau mea faahiahia ta tatou e ite no nia i te huru o Iehova maoti ta tatou iho haapiiraa aore ra ei utuafare! Eaha te faufaaraa o tera haapiiraa? E faarahi te reira i to tatou mauruuru no to tatou Metua i te raˈi ra. E e hinaaro atu â ïa tatou e haafatata ˈtu ia ˈna e e pee i to ˈna huru.—Ios. 23:8; Sal. 73:28.

2. (a) A faataa na e nafea ia haafaufaa ˈtu â i to te Atua mau huru maitatai. (b) Eaha ta tatou e hiˈopoa mai?

² E nafea ia haapii ia haafaufaa ˈtu â i te tahi mea? A feruri na e e rave mai oe i te hoê maa apî. A hauˈa ˈi . . . mea noˈanoˈa. A tamata ˈi . . . mea au mau. Tunu roa atoa ˈtura oe i tera maa. Oia atoa, e haafaufaa ˈtu â tatou i te hoê huru maitai o Iehova a haapii ai, a feruri maite ai, e a faaohipa ˈi i te reira i roto i to tatou iho oraraa. (Eph. 5:1) E tauturu mai teie tumu parau e na tumu parau e piti i muri mai ia haafaufaa ˈtu â i to te Atua mau huru maitatai ta tatou e ore e manaˈo pinepine. I te huru maitai taitahi, e hiˈo mai tatou: Eaha te reira? E nafea Iehova e faaite ai i te reira? E e nafea tatou e faaite atoa ˈi i tera huru maitai taa ê?

MEA OHIE IEHOVA IA HAAFATATA ˈTU

3, 4. (a) Eaha no oe te hoê taata ohie ia haafatata ˈtu? (b) E nafea Iehova e haapapu ai e mea ohie ia haafatata ˈtu ia ˈna?

³ E hiˈo anaˈe na mua i te ohieraa ia haafatata ˈtu. No oe, eaha te hoê taata ohie ia haafatata ˈtu? E parau paha oe, ‘Te hoê taata maitai, o te vata oioi e mea ohie ia paraparau atu.’ E nehenehe oe e ite e mai tera anei te hoê taata aore ra aita ma te faaroo i ta ˈna e parau ra e ma te hiˈo i ta ˈna aparaa rima, to ˈna hohoˈa mata e te tahi atu mau tapao.

⁴ E nafea Iehova e faaite ai e mea ohie ia paraparau atu ia ˈna? O ˈna te Atua Poiete puai hope o te ao nui. Noa ˈtu râ, te haapapu maira oia e te hinaaro ra oia e faaroo e e pahono i ta tatou mau pure. (A taio i te Salamo 145:18; Isaia 30:18, 19.) E nehenehe e paraparau maoro i te Atua i te mau taime e vahi atoa. Eita roa ˈtu hoi o ˈna e faahapa mai. (Sal. 65:2; Iak. 1:5) Te faataa ra te Parau a te Atua ia Iehova e te mau taˈo ta tatou e taa ia paraparau ohie tatou ia ˈna na roto i te pure. Ei hiˈoraa, ua papai te fatu salamo Davida e tei nia ia tatou “to Iehova mata” e ‘te mauhia nei tatou e to ˈna rima atau.’ (Sal. 34:15; 63:8) Ua faaau te peropheta Isaia ia Iehova i te hoê tiai mamoe ma te parau: “E haaputu oia i te mau fanauˈa rii i roto i tana rima, e ei roto ratou i tana ouma ia hopoi.” (Isa. 40:11) A feruri na! Te hinaaro ra Iehova ia piri roa ˈtu â tatou ia ˈna mai te hoê fanauˈa rii i roto i te ouma o te hoê tiai mamoe î i te here. Mea ohie mau ia haafatata ˈtu i to tatou Metua! E nafea ia pee i to Iehova huru?

E HURU MAITAI FAUFAA MAU

5. No te aha mea faufaa ˈi no te mau matahiapo ia riro ei mea ohie ia haafatata ˈtu?

⁵ Ua uihia iho nei i te mau Ite itoito rahi no te fenua taa ê, “O teihea huru maitai o te hoê matahiapo mea au aˈe na oe?” Ua pahono te rahiraa, “Mea ohie anaˈe ia haafatata ˈtu ia ˈna.” Parau mau, e mea tia ia faaite atu â te Kerisetiano taitahi i teie huru maitai. Mea faufaa roa ˈtu â râ no te mau matahiapo. (Isa. 32:1, 2) Ua faaite te hoê tuahine no te aha mea faufaa roa ˈi no ˈna: “E faufaahia matou i te tahi atu mau huru maitatai o te hoê matahiapo mea ohie anaˈe ia haafatata ˈtu ia ˈna.” Parau mau iho â. Eaha ïa te rave ia paraparau ohie mai vetahi ê ia oe?

6. Eaha te hoê ravea faufaa ia paraparau ohie mai vetahi ê ia oe?

⁶ Te hoê ravea faufaa no te na reira, o te anaanatae-mau-raa ïa i te tahi atu e te tautururaa ia ratou. Mea ohie aˈe ïa no te mau taeae e tuahine, te feia apî atoa, ia paraparau ia oe. (Mar. 10:13-16) Te na ô nei Carlos, 12 matahiti: “Mea au na ˈu ia ite i te mau matahiapo i te [Piha a te Basileia] ia ataata e ia faaite i te mǎrû.” Eita e navai ia parau te hoê matahiapo e ua ineine o ˈna i te faaroo e te tauturu. Ia na reira atoa râ o ˈna e tia ˈi. (Ioa. 1, 3:18) E nafea ïa?

7. No te aha te taata e paraparau ohie ai ia tatou a ite ai i ta tatou tareta tairururaa? Eaha te haapiiraa e huti mai?

⁷ Teie te hoê hiˈoraa. Aita i maoro aˈenei, ua haere te hoê taeae i te hoê tairururaa i te tahi atu fenua. I to ˈna hoˈiraa ˈtu na nia i te manureva, ua pine o ˈna i ta ˈna tareta tairururaa. Ua ite te hoê tuati manureva i te tareta e teie mau parau “Ia tae mai to te Atua Basileia.” Parau aˈera o ˈna i te taeae, “Ia tae mai iho â!” Ua aparau raua e ua farii o ˈna i ta tatou mau vea ma te oaoa. Mea rahi o tatou tei ite i teie huru tupuraa. No te aha te taata e paraparau ohie ai ia tatou a ite ai i ta tatou tareta tairururaa? E au ra hoi e te parau ra te reira i te taata: “Ia hinaaro outou, a haafatata mai ia ˈu. A ani mai na te haere nei au ihea.” E tapao te tareta o te faaite ra i te taata e ua ineine tatou i te faataa ˈtu i ta tatou mau tiaturiraa. Oia atoa, e hinaaro te mau matahiapo e faaite i te mau tapao o te parau i to ratou mau hoa Kerisetiano: “Ia hinaaro outou, a haafatata mai ia ˈu.” Eaha te tahi o tera mau tapao?

8. E nafea te mau matahiapo e faaite ai e te anaanatae mau ra ratou ia vetahi ê? Eaha te manaˈo o te amuiraa ia na reira ratou?

⁸ Mea taa ê te tutuu i tera i tera fenua. E pinepine râ te hoê mata ataata, te hoê aroha rima mahanahana e te hoê farii-popou-raa au mau i te faaite e te anaanatae mau ra tatou i to tatou mau taeae e tuahine. O vai te na reira? A tapao na i te hiˈoraa o Iesu. Te faatia ra Mataio e a putuputu ai e ta ˈna mau pǐpǐ, “ua faafatata maira Iesu” e ua paraparau atura ia ratou. (Mat. 28:18) Ia haafatata atoa ˈtu te mau matahiapo i to ratou mau hoa haamori a paraparau atu ai ia ratou. Eaha te manaˈo o te amuiraa ia na reira ratou? Ua na ô te hoê tuahine pionie e 88 matahiti: “Mea here na ˈu te mau matahiapo no to ratou mata ataata e ta ratou mau parau faaitoito a tomo ai au i roto i te Piha a te Basileia.” Ua parau te tahi atu tuahine taiva ore: “E au ra paha e e ohipa faufaa ore te reira, teie râ ia farii popou mai te hoê matahiapo ia ˈu i te putuputuraa ma te mata ataata, auê hoi te au e!”

MEA OHIE IA HAAFATATA ˈTU E MEA VATA

9, 10. (a) Eaha te hiˈoraa maitai ta Iehova i vaiiho mai? (b) E nafea te mau matahiapo e vata ˈi no vetahi ê?

⁹ Eita vetahi e haere mai ia tatou ra ia ore tatou e vata. E hiˈoraa maitai mau Iehova i roto i tera tuhaa. “Aita . . . oia i atea ê atu ia tatou atoa nei.” (Ohi. 17:27) No te vata, e tia i te mau matahiapo ia faataa i te taime na mua ˈˈe e i muri aˈe i te mau putuputuraa no te aparau e to ratou mau taeae e tuahine, apî aore ra paari. Ua tapao te hoê taeae pionie: “E haafaufaa te hoê matahiapo ia ˈu ia ani mai o ˈna i to ˈu huru e ia faaea o ˈna no te faaroo i ta ˈu pahonoraa.” Ua parau te hoê tuahine tei tavini ia Iehova fatata e 50 matahiti: “Te faaite maira te mau matahiapo o te rave maa taime i muri aˈe i te mau putuputuraa no te aparau mai ia ˈu e mea faufaa roa vau.”

¹⁰ Parau mau, mea faufaa atoa ia haapao te mau matahiapo i te tahi atu mau hopoia. Ta ratou râ fa matamua i te mau putuputuraa, o te haapaoraa ïa i te nǎnǎ.

MEA PAETAHI ORE IEHOVA

11, 12. (a) Eaha te hoê taata paetahi ore? (b) No te aha e hiˈoraa maitai ai o Iehova o te paetahi ore?

¹¹ Te paetahi ore. O te tahi atu ïa huru maitai au mau o Iehova. Eaha te hoê taata paetahi ore? O te hoê ïa taata tia, aita to ˈna e manaˈo oti noa e aita atoa o ˈna e haapao ra i te huru o te taata. E itehia to ˈna paetahi ore haavare ore i nia i to ˈna huru e ta ˈna mau haaraa. No te aha mea faufaa ˈi na mea toopiti? Mea paetahi ore anaˈe te hoê taata, e haa o ˈna ma te paetahi ore i nia ia vetahi ê. I roto i te mau Papai Heleni Kerisetiano, te auraa o te parau ‘e ore e haapao i te huru o te taata,’ o te oreraa ïa e haafaufaa aˈe i te tahi hohoˈa mata i te tahi atu. (Ohi. 10:34) E haapao ïa te hoê taata paetahi ore i te huru mau o te tahi atu, eiaha râ i to ˈna huru rapaeau aore ra huru oraraa.

¹² O Iehova te hiˈoraa maitai roa ˈˈe o te paetahi ore. Te na ô ra ta ˈNa Parau e e ore oia ‘e haapao i te huru o te taata.’ (A taio i te Ohipa 10:34, 35; Deuteronomi 10:17.) Ta te hoê ïa tupuraa i te tau o Mose e faaite ra.

13, 14. (a) Tei mua na tamahine faaipoipo-ore-hia e pae a Zelophehada i teihea fifi? (b) Mea nafea Iehova i te faaiteraa i te paetahi ore?

¹³ Hou te mau Iseraela a tomo ai i te Fenua tǎpǔhia, tei mua e pae tuahine faaipoipo-ore-hia i te hoê fifi. Ua ite ratou e e fanaˈo to ratou utuafare, mai te tahi atu utuafare Iseraela, i te hoê tâpû fenua tei horoahia i to ratou papa. (Num. 26:52-55) Ua pohe râ to ratou papa o Zelophehada no te opu o Manase. Ia au i te tutuu, na ta ˈna mau tamaiti e fanaˈo i te tuhaa fenua. E tamahine noa râ ta ˈna. (Num. 26:33) E horoahia anei ïa te fenua i te fetii a vaiiho noa ˈtu ai i teie mau tamahine aore aˈe tufaa?

¹⁴ Ua tia aˈera na tuahine e pae i mua ia Mose e ua ani atura: “Eaha e haamoehia ˈi te iˈoa o to matou metua tane i to ˈna ra fetii, i te mea aore a ˈna e tamarii tamaroa?” Ua taparu atura ratou: “Ho mai i te tahi tufaa no matou i roto i te mau taeae o to matou metua.” Ua parau anei Mose, ‘Aita e ravea, tera te ture’? Aita, “ua hopoi aˈera Mose i tana parau na ratou ra i mua i te aro o Iehova.” (Num. 27:2-5) Eaha te pahonoraa? Ua na ô Iehova ia Mose: “E parau tia ta te mau tamahine a Zelophehada: e hopoi â oe i te tahi tufaa no ratou i roto i te mau taeae o to ratou ra metua tane; e ruri oe i te tufaa o to ratou ra metua tane no ratou.” Ua haamau atoa Iehova i te hoê ture e ua parau ia Mose: “Ia pohe te taata ra, e aita a ˈna e tamaiti, e ruri outou i to ˈna tufaa no te tamahine.” (Num. 27:6-8; Ios. 17:1-6) Mai reira mai, ua paruruhia te mau vahine Iseraela atoa o te faaruru i tera fifi.

15. (a) E nafea Iehova e haa ˈi i nia i to ˈna nunaa, tera iho â râ e fifi nei? (b) Eaha te tahi atu faatiaraa Bibilia e faaite ra e mea paetahi ore Iehova?

¹⁵ Auê faaotiraa î i te hamani maitai e te paetahi ore! Ua haa Iehova i nia i teie mau vahine, tei roto hoi i te fifi, ma te tura mai ta ˈna i rave i nia i te tahi atu mau Iseraela. (Sal. 68:5) Hoê noa teie o te faatiaraa Bibilia e rave rahi e faaite ra i teie parau mau mahanahana: E haa Iehova i nia i ta ˈna mau tavini atoa ma te paetahi ore.—Sam. 1, 16:1-13; Ohi. 10:30-35, 44-48.

E NEHENEHE E PEE I TE HIˈORAA O IEHOVA

16. E nafea ia faaite roa ˈtu â e mea paetahi ore tatou?

¹⁶ E nafea ia pee i te paetahi ore o Iehova? A haamanaˈo, e piti tuhaa to teie huru maitai. E itehia e mea paetahi ore tatou i nia i ta tatou mau haaraa i nia ia vetahi ê. E manaˈo paha tatou e mai te reira iho â tatou. E farii râ oe e e ere i te mea ohie ia hiˈopoa i to tatou iho mau huru aau ma te tano. E nafea oe e ite ai e mea paetahi ore iho â oe? E hiˈoraa maitai o Iesu. I to ˈna hinaaroraa e ite i ta te taata e parau ra no nia ia ˈna, ua ui oia i to ˈna mau hoa tiaturihia: “O vai au te Tamaiti a te taata nei i ta te taata nei parauraa?” (Mat. 16:13, 14) E na reira atoa anaˈe. E nehenehe oe e ani i te tahi mau hoa haavare ore e ua matauhia anei oe ei taata paetahi ore. Ia aha ia parau mai o ˈna e te haafaufaa rii noa ra oe i te tahi huru taata ia au paha i to ratou iri, tiaraa totiare aore ra faufaa? A faaite i to oe mau huru aau ia Iehova ma te taparu ia ˈna ia tauturu ia oe ia faatano i to oe haerea ia itehia ˈtu â to ˈna paetahi ore.—Mat. 7:7; Kol. 3:10, 11.

17. E nafea ia haa i nia ia vetahi ê ma te paetahi ore?

¹⁷ I roto i te amuiraa, e faaite tatou i to tatou hinaaro e pee i to Iehova paetahi ore ma te haa i nia i to tatou mau taeae e tuahine atoa ma te tura e te hamani maitai. Ei hiˈoraa, no te faaite i te farii maitai, e hinaaro tatou e titau manihini i te Kerisetiano rau. Tera paha e ere hoê â huru oraraa i to tatou, oia atoa tei veve, te otare aore ra te vahine ivi. (A taio i te Galatia 2:10; Iakobo 1:27.) A poro ai, e faaite tatou i te parau apî maitai ma te paetahi ore i te mau huru taata atoa e i te taata ěê. Auê tatou i te oaoa e te vai ra te mau papai Bibilia na roto e 600 tiahapa reo! E ere anei teie i te paetahi ore?

18. E nafea oe e faaite ai e te haafaufaa ra oe i teie na huru maitatai o Iehova: mea ohie ia haafatata ˈtu e mea paetahi ore?

¹⁸ Mea ohie ia haafatata ˈtu ia Iehova e mea paetahi ore o ˈna. E feruri maite anaˈe i teie na huru maitatai. E mauruuru atu â ïa tatou ia Iehova e e hinaaro atu â tatou e na reira atoa i nia i to tatou mau hoa haamori e te feia ta tatou e poro ra.