Ua horoa ratou ia ratou iho—i Mehiko

MEA mahanahana mau ia ite e te rahi noa ˈtu ra te feia apî Ite no Iehova te faaohie ra i to ratou oraraa no te tavini hau atu â. (Mat. 6:22) Eaha te mau tauiraa ta ratou i rave? Eaha te mau fifi ta ratou i faaruru? E haamatau anaˈe ïa e o vetahi e tavini nei i Mehiko.

“E MEA TIA IA TAUI”

No Marite mai Dustin e Jassa. Ua faaipoipo raua i Tenuare 2007. I muri iti noa ˈˈe, ua tia ia raua ia fanaˈo i ta raua i hinaaro noa na: te hoê pahi taie ei nohoraa. Ua tutau raua i to raua pahi i pihaiiho ia Astoria, i Marite. E oire nehenehe mau teie haaatihia e te aivi î i te tumu raau e te mouˈa tapoˈihia e te hiona. To pihaiiho noa raua i te moana Patitifa. Ua na ô Dustin, “Noa ˈtu ihea oe e hiˈo ai, auê te nehenehe e!” No teie na hoa faaipoipo, ua faaohie raua i to raua oraraa e ua tiaturi ia Iehova. Ua manaˈo raua, ‘Eaha hoi, te ora nei mâua i nia i te hoê pahi 7,9 metera i te roa, te ohipa nei afa mahana, te haere nei i te hoê amuiraa reo ê, e te rave nei i te taviniraa pionie tauturu i te tahi taime.’ A feruri ai râ, ua taa ia Dustin e Jassa e te haavare noa ra raua ia raua. “Aita mâua e turu ra i te amuiraa. Te rahiraa o to mâua taime, no te tataî ïa i to mâua pahi,” ta Dustin ïa e parau ra. “Ua ite mâua e e mea tia ia taui no te tuu ia Iehova na mua roa.”

Te na ô ra Jassa: “Hou a faaipoipo ai, i ora na vau i Mehiko. Tei roto vau i te hoê amuiraa reo Beretane. Ua au vau i te tavini i ǒ e ua oaoa vau i te hoˈi atu.” Ia rahi atu â to raua hinaaro e tavini i te fenua ê, ua taio Dustin e Jassa i roto i ta raua haamoriraa utuafare i te aamu no nia i te mau taeae e tuahine tei haere i te fenua ê tei ineine no te auhune. (Ioa. 4:35) Te na ô ra Dustin: “Ua hinaaro mâua e ite atoa i tera oaoa.” A faaite mai ai te mau hoa i Mehiko e e pǔpǔ apî te hinaaro ra i te tauturu, ua rave Dustin raua Jassa i ta raua faaotiraa. Ua faarue raua i ta raua ohipa, ua hoo atu i to raua pahi e ua haere i Mehiko.

‘O TA MÂUA ÏA I ORE I FANAˈO AˈENEI’

Ua faaea Dustin e Jassa i te oire o Tecomán, i pihaiiho noâ i te moana Patitifa. E 4,3 tiahapa kilometera râ i te pae apatoa o Astoria. Te na ô ra Dustin: “E ere i te mea puvaivai faahou e aita e ite-faahou-hia ra te mouˈa. Mea veavea râ e o te tumu taporo noa ta oe e ite.” Aita raua i ite mai i te ohipa i te omuaraa. Aita ta raua e moni faahou. Te raiti e te pipi, tera noa ta raua maa e piti taime i te mahana e hoê hebedoma i muri i te tahi. Te na ô ra Jassa: “I te taime iho â aita e nehenehe faahou e amu i tera maa, horoa mai nei ta mâua mau piahi Bibilia i te vî, te meiˈa, te iita e . . . te pute î i te taporo!” I muri aˈe, ua ohipa raua i nia i te Internet no te hoê fare haapiiraa i Taïwan. Te navai roa nei te moni ta raua e fanaˈo nei no te amo i ta raua mau haamâuˈaraa.

Eaha to Dustin e Jassa manaˈo i to raua huru oraraa apî? Te na ô nei raua no nia i tera tauiraa, “O te ohipa maitai roa ˈˈe teie ta mâua i ore i fanaˈo aˈenei. Aita roa ˈtu mâua i manaˈo e e piri roa ˈtu â to mâua taairaa e o Iehova e to mâua iho. Mea rahi te mea ta mâua e rave amui nei: e haere i roto i te taviniraa, e aparau no nia i te ravea e tauturu ai i ta mâua mau piahi Bibilia, e faaineine i te mau putuputuraa. Aita atoa e haapeapearaa faahou mai i na mua ˈˈe.” Te na ô faahou nei raua: “Ua ite mâua i teie nei i te tahi mea ta mâua i ore roa ˈtu i taa maitai: mea mau iho â te parau fafau o te Salamo 34:8 e na ô ra, ‘A tamata na ia ite i te maitai o Iehova!’”

TE MAU TUMU I NA REIRA ˈI E TAUSANI ITE

Ua hau atu i te 2 900 taeae e tuahine tei haere e tavini i te mau tuhaa fenua i Mehiko e hinaaro-rahi-hia ra te feia poro. Mea faaipoipo vetahi e mea faaea taa noa te tahi atu. E 20 aore ra 30 tiahapa matahiti to te rahiraa. Eaha tei turai ia ratou paatoa ia na reira noa ˈtu e mea fifi roa? Te uiraa ïa i tuuhia ia vetahi o ratou. Ua horoa ratou e toru tumu. Teihea?

No te faaite i te here ia Iehova e i te taata-tupu. Ua bapetizohia Leticia i te 18raa o to ˈna matahiti. Te na ô nei oia: “I to ˈu pûpûraa ia ˈu ia Iehova, ua taa ia ˈu e e mea tia ia tavini ia ˈna ma to ˈu aau e ora atoa. No te faaite e te here nei au ia Iehova ma to ˈu aau atoa, ua hinaaro vau e faaohipa ˈtu â i to ˈu taime e itoito i roto i ta ˈna taviniraa.” (Mar. 12:30) Ua faaipoipo Hermilo ia Leticia i teie nei. E 20 tiahapa matahiti to ˈna a haere ai o ˈna e tavini i te vahi e hinaaro-rahi-hia te feia poro. Te na ô ra oia: “Ua taa ia ˈu e te ravea maitai aˈe no te faaite i to ˈu here i to ˈu taata-tupu, o te tautururaa ïa ia ratou ia haamâha i to ratou mau hinaaro pae varua.” (Mar. 12:31) Ua faarue ïa o ˈna i te oire ruperupe no Monterrey, i ta ˈna ohipa i te fare moni e i te hoê huru oraraa fanaˈo. E ua haere i te hoê oire nainai.

No te ite noa i te oaoa mau. I muri iti noa ˈˈe i to ˈna bapetizoraa, ua apee Leticia i te hoê tuahine pionie aravihi. Ua poro raua i te hoê oire moemoe aita e amuiraa hoê avaˈe i te maoro. Te haamanaˈo ra Leticia: “Ua faahiahia roa vau. Ua oaoa roa vau i te ite i te taata ia farii i te poroi o te Basileia ta mâua i faaite atu. I te hoperaa tera avaˈe, ua manaˈo vau, ‘Tera ta ˈu e hinaaro e rave i to ˈu oraraa!’” Hoê â atoa no Essly, e tuahine taa noa e 20 tiahapa matahiti i teie nei. Ua au o ˈna i tera taviniraa no te oaoa ta ˈna i ite. A haere noa ˈi o ˈna i te haapiiraa, ua farerei o ˈna e rave rahi Ite itoito rahi e tavini ra i te vahi e hinaaro-rahi-hia te tauturu. Te na ô ra oia, “A ite ai i te mata ataata o tera mau taeae e tuahine, ua hinaaro vau e fanaˈo atoa i to ratou huru oraraa.” Mea rahi te tuahine tei rave atoa mai ia Essly. I Mehiko, ua hau atu i te 680 tuahine taa noa te tavini ra i te vahi e hinaaro-rahi-hia te tauturu. E hiˈoraa maitai mau ratou no te feia apî e paari atoa!

No te fanaˈo i te hoê oraraa faufaa e te mauruuru. I te otiraa ta ˈna tau haapiiraa tuarua, ua pûpûhia ia Essly ia haere i te haapiiraa teitei. Ua faaitoito vetahi ê ia ˈna ia farii i te reira. E noaa ïa ia ˈna ta ˈna parau tuite, te hoê toroa e te hoê pereoo. E nehenehe atoa ta ˈna e revareva. Aita râ o ˈna i faaroo atu. Te na ô nei Essly: “Mea rahi to ˈu hoa Kerisetiano tei tapi i tera mau mea. Ua ite râ vau e e ere faahou te mau fa pae varua i te mea faufaa roa no ratou. Ua ite atoa vau e ua inoino roa ratou no te mau fifi ta ratou i ite a faaô roa ˈtu â ˈi ia ratou i roto i te mau ohipa a te ao. Ua hinaaro vau e faaohipa i to ˈu apîraa no te tavini rahi roa ˈtu â ia Iehova.”

Ua apiti Essly i te tahi mau haapiiraa ia itea ia ˈna te tahi ohipa e tia ˈi ia ˈna ia amo i ta ˈna mau haamâuˈaraa ei pionie. E ua haere atura i te hoê vahi e hinaaro-ru-hia ra te taata poro. Ua haapii atoa o ˈna i te mau reo a te mau Otomis e Tlapanèques. E toru matahiti i teie nei o ˈna i te poro-noa-raa i te mau vahi moemoe aita e amuiraa. Te na ô nei oia: “Ua fanaˈo vau i te hoê oraraa faufaa e te mauruuru i te taviniraa i te vahi e hinaarohia ra te tauturu. Te mea faufaa roa ˈtu â, ua piri roa ˈtu to ˈu mau taairaa e o Iehova.” Te manaˈo atoa ïa o Phillip e Racquel no Marite mai. Te na ô ra teie na hoa faaipoipo e 30 tiahapa matahiti to raua: “Te taui oioi nei teie nei ao. No e rave rahi, mea papu ore ïa to ratou oraraa. Ua ite râ mâua e mea faufaa to mâua oraraa a tavini ai i te vahi e ite-noa-hia ˈi te taata e rave rahi roa ia faaroo i te poroi Bibilia. Mea mauruuru mau te reira!”

UA NAFEA RATOU NOA ˈTU TE MAU FIFI?

Mea fifi atoa ia poro i te vahi e hinaaro-rahi-hia ra te taata poro. O te imiraa moni te tahi. No te ite mai i te ohipa, na oe e faatano ia oe i te oraraa i reira oe e tavini ai. Te faataa ra Verónica, te hoê pionie aravihi: “I te hoê vahi, i faaineine e i hoo na vau i te maa mâmâ oti noa. I te tahi atu, i hoo na vau i te ahu e i tâpû na vau i te rouru. I teie nei, te tamâ nei au i te hoê fare e te haapii nei au i te mau metua apî ia tauaparau e ta ratou mau tamarii.”

E ere i te mea ohie ia faatano i to oraraa i te tahi atu taˈere, ia ora iho â râ oe e te feia tumu o te hoê tuhaa fenua moemoe. Ta Phillip e Racquel ïa i ite a tavini ai i roto i te tuhaa fenua e paraparauhia ra te reo Nahuatl. Te na ô ra Phillip, “Mea taa ê roa tera taˈere.” Eaha tei tauturu ia raua? “Ua tiatonu mâua i te mau mea maitatai ta mâua i ite: te taairaa piri o te utuafare, te haavare ore ta ratou e faaite i roto i ta ratou mau haaraa i nia ia vetahi ê, e to ratou aau horoa noa.” Te na ô ra Racquel: “Mea rahi te mea ta mâua i haapii a ora ˈi i ǒ nei e a tavini ai e to mâua mau taeae e tuahine no ǒ nei.”

E NAFEA IA FAAINEINE IA OUTOU?

Te hinaaro ra anei outou e tavini i te mau tuhaa fenua e hinaarohia ra te tauturu? Eaha te rave no te faaineine ia outou? Ua parau te mau taeae e tuahine tei matau i tera huru taviniraa: Hou a haere ai, a haamata i te faaohie i to outou huru oraraa e a mauruuru i ta outou e fanaˈo ra. (Phil. 4:11, 12) Ia aha ˈtu â? Te faatia ra Leticia: “Aita vau i rave i te mau ohipa e faaea maoro ai au i te hoê vahi. Ua hinaaro vau e haere i te tahi noa ˈtu vahi e hinaaro ra i te tauturu i te taime e titauhia ˈi.” Te na ô ra Hermilo: “Ua haapii au i te tunu i te maa, i te puˈa e i te auri i te ahu.” Te parau ra Verónica: “A ora ˈi au i te fare e to ˈu utuafare, ua tauturu atu vau ia tamâ i te fare e ua haapii au i te faaineine i te mau maa maitatai e te mâmâ. E i te haaputu atoa i te moni.”

E vau matahiti faaipoiporaa to Levi e Amelia, no Marite mai. Na te mau pure taa maitai i tauturu ia raua ia faaineine ia raua no te tavini i Mehiko. Te na ô ra Levi: “Ua hiˈopoa na mua mâua ehia moni te titauhia no te tavini i te fenua ê hoê matahiti i te maoro. E ua pure atura mâua ia Iehova ia tauturu mai ia haaputu i tera tino moni taa maitai.” Tau avaˈe i mairi, ua tia ia raua ia haaputu i te tino moni ta raua i faahiti i roto i te pure. E ma te ore e haamarirau, ua haere i Mehiko. Te na ô nei Levi: “Ua pahono Iehova i ta mâua iho â i ani. Na mâua ˈtura ïa i teie nei ia na reira.” Te na ô ra Amelia: “Ua manaˈo mâua e faaea i ǒ nei hoê matahiti. E hitu matahiti râ mâua i ǒ nei i teie nei, e eita mâua e manaˈo ra e reva! Ua ite roa mâua i te tauturu a Iehova a ora ˈi i ǒ nei. I te mau mahana atoa, te ite nei mâua i to ˈna maitai.”

No Adam e Jennifer, e hoa faaipoipo no Marite mai o te poro ra i te feia reo Beretane i Mehiko, mea faufaa roa ˈtoa te pure. Te faaitoito nei raua: “Eiaha e tiai i te mau huru tupuraa maitai roa. A faaite i roto i te pure e te hinaaro ra outou e tavini i te fenua ê. E a haa ia au i ta outou mau pure. A faaohie i to outou huru oraraa, a papai i te amaa o te fenua ta outou e hinaaro ra e haere, a feruri i te mau haamâuˈaraa e a reva!”a Ia na reira outou, e fanaˈo outou i te hoê huru oraraa oaoa mau e i te mau haamaitairaa rahi i te pae varua.