E haapueraa buka au maite

NO TE AHA MEA TAA Ê AI TE BIBILIA? E pinepine te mau buka tahito papaihia i te hoê â tau i te patoi i te tahi e te tahi. Mea varavara i te itehia i te au-maite-raa i roto i te mau buka papaihia e te taata taa ê, i te vahi taa ê e i te tau taa ê. Area râ te Bibilia, te na ô ra ïa e no ǒ mai ta ˈna na 66 buka i te hoê noa Ihotaata. E poroi auhoê ïa e te au maite te itehia i roto.—Timoteo 2, 3:16.

TE HOÊ HIˈORAA: Na Mose, te hoê tiai mamoe o te senekele 16 hou te Mesia, i papai i te buka matamua o te Bibilia. Ua faaite mai oia i roto e e fa mai te hoê huaai, aore ra huero, no te faaora i te huitaata. Ua tohu atoa teie buka e e huaai teie huero o Aberahama, o Isaaka e o Iakoba. (Genese 3:15; 22:17, 18; 26:24; 28:14) Fatata e 500 matahiti i muri aˈe, ua faaite te peropheta Natana e e na roto mai te huero i te opu fetii hui arii o Davida. (Samuela 2, 7:12) Hoê tausani matahiti i muri aˈe, ua faataa te aposetolo Paulo e te huero, o Iesu ïa e te hoê pǔpǔ o ta ˈna mau pǐpǐ ta ˈna i maiti. (Roma 1:1-4; Galatia 3:16, 29) E i te hopea o te senekele matamua, ua tohu te buka hopea o te Bibilia e e faaite te mau melo o te huero ia Iesu a ora ˈi ratou i te fenua. Oia atoa e e faatiahia ratou i te raˈi e e faatere e o Iesu e tausani matahiti. E haamou na tuhaa e piti o te huero i te Diabolo e e faaora i te huitaata.—Apokalupo 12:17; 20:6-10.

EAHA TA TE FEIA TATARA BIBILIA E PARAU RA? I muri aˈe i te hiˈopoa-maitai-raa i na buka e 66 o te Bibilia, ua papai Louis Gaussen e ua maere roa oia i ‘te auhoêraa o teie buka, tei papaihia i nia e tausani pae hanere matahiti e te taata papai e rave rahi roa o tei tapi i te hoê â fa e o tei haa tamau ia au i te reira, noa ˈtu e aita ratou i taa maitai roa i te aamu o te faaoraraa o te ao e te Tamaiti a te Atua.’—Théopneustie ou Inspiration Plénière des Saintes Écritures.

EAHA TO OE MANAˈO? E itehia anei te au-maite-raa tia roa i roto i te tahi atu buka papaihia e 40 tiahapa taata taa ê i nia hau atu 1 500 matahiti? Aore ra i roto i te Bibilia anaˈe?