Na vai e haapii i te tamarii?
“Aore te pǐpǐ i hau i tana ra orometua, o te pǐpǐ râ i haapii-hua-hia ra, e riro ïa i te faito atoa i tana orometua.”—LUKA 6:40.
TE MANAˈO ra te tahi mau metua e mea maˈua ratou i te haapii i ta ratou mau tamarii no nia i te Atua. No te mea paha aita ratou i haere maoro i te haapiiraa aore ra aita i navai to ratou ite i te faaroo. No reira ïa ratou e hinaaro ai e na te hoê fetii aore ra te hoê tia faaroo e rave i teie ohipa faufaa roa.
O vai râ te tano ia haapii i te mau tamarii i te pue parau mau Bibilia e te aratairaa maitai? A hiˈo i ta te Bibilia e parau ra e ta te tahi feia maimi i ite mai.
Te ohipa a te metua tane
Te parau ra te Bibilia: “E te mau metua [tane], eiaha e faaooo atu i ta outou tamarii ia riri: e haapii râ ia ratou i te peu maitatai, ma te aô atu ia ratou i te Fatu.”—Ephesia 6:4, “Te Bibilia Moˈa V.C.J.S.” (1976)
Ta te feia maimi i ite: Mea faufaa ia papu maitai i te metua tane ta ˈna mau tiaturiraa faaroo. Te na ô ra te hoê tumu parau piahia i te matahiti 2009: “E tauturu te apitiraa i te hoê pǔpǔ faaroo i te mau tane ia riro mai ei metua tane maitai aˈe. Te horoa ra te haapaoraa i te mau taotiaraa e te tamahanahanaraa na te taata, oia atoa te haapiiraa e te aratairaa no nia i te oraraa.”—Fathers’ Religious Involvement and Early Childhood Behavior.
Ia au i te Bibilia, mea faufaa roa ia haapii te metua tane i ta ˈna mau tamarii. (Maseli 4:1; Kolosa 3:21; Hebera 12:9) I te matahiti 2009, ua pia te haapiiraa tuatoru no Floride i te hoê tumu parau e hiˈopoa ra i te haerea o te tamarii tei haapii-maite-hia e to ratou papa. E tamarii aroha noa e te manaˈo maitai ia ratou iho. Aita te tamaroa e rave ra i te ohipa ino. E mea feruri maitai te mau tamahine. Ta te feia maimi ïa i ite. Mea faufaa iho â te mau aˈoraa Bibilia e tae roa mai i teie mahana.
Te ohipa a te metua vahine
Te parau ra te Bibilia: “Eiaha e faarue i te ture a to metua vahine.”—Maseli 1:8, “V.C.J.S.”
Ta te feia maimi i ite: I te matahiti 2006, ua faataa te hoê buka e mea pinepine aˈe te mama i te paraparau e i te ohipa e ta raua mau tamarii rii, i te papa. E itehia te reira i roto e rave rahi fenua. Tei te huru paraparau, ohipa e haerea o te mama e paari maitai ai ta ˈna tamarii.—Handbook of Child Psychology.
Ia haapii te papa e te mama i ta raua mau tamarii i te parau mau no nia i te Atua, e piti ô faufaa roa ta raua e horoa ˈtu. A tahi, e nehenehe te mau tamarii e faahoa i to ratou Metua i te raˈi, a maitai atu ai i te roaraa o to ratou oraraa. Te piti, e haapii ratou e nafea te hoê tane e ta ˈna vahine e ohipa amui ai ia raea te mau fa faufaa. (Kolosa 3:18-20) Na te papa e te mama te hopoia e haapii i ta raua mau tamarii no nia i te Atua e ta ˈna e titau ra i te utuafare, noa ˈtu e e nehenehe vetahi ê e tauturu atu.
E nafea râ na metua? Te vai ra te mau ravea maitai roa.