E pee anei oe i ta Iehova aratairaa î i te here?
‘Te riaria nei au i te mau eˈa haavare atoa.’—SAL. 119:128.
1, 2. (a) Ia ani outou i te tauturu a te hoê hoa, e mauruuru outou no teihea faaararaa e no te aha? (b) Eaha ta Iehova e faaara ra i ta ˈna mau tavini, e no te aha?
E HINAARO paha oe e haere i te hoê vahi. E ani oe i te tauturu a te hoê hoa papu tei ite e nafea ia tae i reira. A faataa maite ai oia ia oe, e parau atoa paha o ˈna: “A haapao maitai i tera vahi. Mea hape te tapao purumu. Mea rahi tei moe.” E mauruuru anei oe ia ˈna no to ˈna tapitapi, a pee atu ai i ta ˈna faaararaa? Mai taua hoa atoa ra te Atua ra o Iehova. Te faataa maite ra oia e nafea tatou e tae ai i te ora mure ore. Te faaara atoa maira oia eaha te mau fifi atâta e hahi ê ai tatou.—Deut. 5:32; Isa. 30:21.
2 I roto i teie tumu parau e to muri iho, e hiˈo mai tatou i te tahi mau fifi atâta ta Iehova to tatou Hoa e faaara maira. E haamanaˈo anaˈe e no to ˈna tapitapi e here e na reira ˈi oia. To ˈna hinaaro ia tae tatou i te ora mure ore. E peapea oia ia rave te taata i te faaotiraa tano ore, a hahi ê atu ai. (Ezk. 33:11) E faataa teie tumu parau e toru fifi atâta. A tahi, no ǒ mai ia vetahi ê, te piti, no roto mai ia tatou e te toru, te tahi mea faufaa ore atâta roa. Mea faufaa ia ite tatou i te reira e e nafea to tatou Metua i te raˈi e haapii mai ai ia faaruru atu. Ua parau te hoê fatu salamo ia Iehova e ‘te riaria nei oia i te mau eˈa haavare atoa.’ (Sal. 119:128) O oe atoa anei? E hiˈo anaˈe e nafea ia faaoti papu e na reira.
Eiaha e pee “i te feia rahi”
3. (a) No te aha mea atâta ˈi ia pee i te tahi atu mau ratere aita anaˈe tatou i ite i te eˈa e rave? (b) Eaha te faaueraa tumu faufaa o te Exodo 23:2?
3 I roto i te hoê tere roa, aita paha oe i ite i te eˈa e rave. E nafea ïa oe? E hinaaro paha oe e pee i te tahi atu mau ratere tei rave i te hoê â faaotiraa. Mea atâta te reira. Aita paha ratou e haere ra i te vahi ta oe i opua, aore ra ua ihu atoa paha ratou. Maoti teie hiˈoraa e taa ˈi ia tatou te faaueraa tumu o te hoê ture tei horoahia ia Iseraela i tahito. Ua faaarahia te mau tavana e te mau ite i roto i te mau ohipa haavaraa eiaha e “pee i te feia rahi” mea atâta hoi. (A taio i te Exodo 23:2.) E hema ohie noa iho â te taata hara i te faaheporaa a vetahi ê. E ere râ no te ohipa haavaraa anaˈe teie faaueraa tumu.
4, 5. A faataa mai i te faaheporaahia Iosua raua Kaleba ia pee i te feia rahi. Maoti te aha i faaruru ai raua i tera fifi?
4 E pinepine tatou i te faahepohia ia “pee i te feia rahi.” E tupu taue mai paha te reira e mea fifi roa ia faaruru atu. A hiˈo na ia Iosua raua Kaleba. Ua haere raua e 10 tane ê atu e hiˈo i te Fenua Tǎpǔhia. I to ratou hoˈiraa mai, 10 o ratou tei faatoaruaru i te nunaa ma te parau e e aito to ǒ no roto mai i te huaai o te mau melahi orure hau e ta ratou mau vahine. (Gen. 6:4) E haavare tera. Ua mou roa tera mau tamarii ino i te diluvi e aita e huaai. E vare iho â te feia faaroo paruparu i te mau manaˈo hape. Ua riaria ˈtura te nunaa. Ua manaˈo aˈera te rahiraa eiaha e tomo i te Fenua Tǎpǔhia mai ta Iehova i faaue. Ua aha Iosua raua Kaleba i roto i teie tupuraa fifi?—Num. 13:25-33.
5 Aita raua i pee i te feia rahi. Ua faaite iho â raua i te parau mau noa ˈtu te riri o te nunaa tei hinaaro e pehi ia raua i te ofai! No te aha raua i ore ai i mǎtaˈu? No to raua faaroo ia Iehova. E taa i te feia faaroo e mea taa ê te mau haavare a te taata i te mau parau fafau moˈa a te Atua ra o Iehova. Ua faaite raua i muri aˈe i to raua manaˈo i ta Iehova haapapuraa e e tupu ta ˈna parau fafau atoa. (A taio i te Iosua 14:6, 8; 23:2, 14.) Mea here na Iosua raua Kaleba i to raua Atua taiva ore e aita raua i hinaaro e haapeapea ia ˈna ma te pee i te feia faaroo ore. E hiˈoraa maitai ïa ta raua i vaiiho mai.—Num. 14:1-10.
6. E nafea tatou e faahepohia ˈi ia pee i te feia rahi?
6 E hinaaro anei oe i te tahi taime e pee i te feia rahi? I teie mahana, mea rahi roa te vahavaha ra i ta Iehova mau ture aveia. E pinepine ratou i te horoa i te mau manaˈo hape. E parau paha ratou e aita e ino to te peu faufau, te haavîraa uˈana e te peu tahutahu ite-rahi-hia i roto i te mau porotarama e hohoˈa teata e te mau hauti video. (Tim. 2, 3:1-5) Ia maiti oe i te faaanaanataeraa no oe aore ra no to oe utuafare, e faaoti anei oe ia au i to vetahi ê manaˈo? Ia na reira oe, te pee ra ïa oe i te feia rahi.
7, 8. (a) E nafea ia haapii i te feruri, e no te aha e mea faufaa aˈe ai te reira i te peeraa i te hoê anairaa ture etaeta? (b) No te aha e hiˈoraa faaitoito ai to te Kerisetiano apî e rave rahi?
7 Ua horoa mai Iehova i te hoê ô faufaa roa, te neheneheraa e feruri, o te tauturu mai ia rave i te mau faaotiraa. Ia mataro râ tatou i te haapii i te feruri. (Heb. 5:14) Ia pee tatou i te feia rahi aore ra i te hoê anairaa ture etaeta no nia i te manaˈo haava, eita ïa tatou e haapii i te feruri. No reira i ore ai i horoahia te hoê anairaa hohoˈa, buka e reni Internet ia haapae to Iehova nunaa. No te mea e taui oioi roa teie nei ao, mea faufaa ore ïa. (Kor. 1, 7:31) Te mea ino roa ˈtu â, eita tatou e feruri maite i te mau faaueraa tumu Bibilia, e pure e e rave i te mau faaotiraa ia au i te reira.—Eph. 5:10.
8 I te tahi taime, eita te taata e au i ta tatou mau faaotiraa niuhia i nia i te Bibilia. I te haapiiraa, e faahepohia te mau Kerisetiano apî ia rave i ta vetahi ê mau peu. (Pet. 1, 4:4) E mea oaoa ia ite e te pee ra te mau Kerisetiano apî e te mea paari i te faaroo o Iosua raua Kaleba, ma te ore e pee i te feia rahi.
Eiaha e pee i ‘to outou aau e mata’
9. (a) No te haere i te tahi vahi, no te aha mea atâta ˈi ia rave i te hoê eˈa mea au na tatou? (b) No te aha e ture faufaa ˈi te Numera 15:37, 38 no te nunaa o te Atua i tahito?
9 E hiˈo mai tatou i te piti o te fifi atâta no roto mai ia tatou. A feruri na: Te haere ra oe i te tahi vahi e e hohoˈa fenua ta oe o te tauturu ia oe ia tae i reira. E vaiiho râ oe i te hohoˈa fenua, a haere noa ˈtu ai na te eˈa mea nehenehe i to oe manaˈo. Eaha te tupu? Eita ïa oe e tapae. Maoti teie hiˈoraa e taa ˈi ia tatou te ture ta Iehova i horoa ia Iseraela i tahito, e tuu i te faaunaunaraa e te taamu tapemoana i nia i te hiti o to ratou ahu. I teie mahana, mea fifi roa no te taata e rave rahi ia taa i te reira. (A taio i te Numera 15:37, 38.) Eaha râ te faufaaraa o teie ture? Ma te auraro i te reira e taa ê ai te nunaa o te Atua i te mau nunaa tapiri ěê, a mauruuru atu ai Iehova ia ratou. (Lev. 18:24, 25) Te faaite atoa ra râ teie ture i te hoê fifi atâta no roto mai ia tatou, a ore atu ai tatou e tae i te ora mure ore.
10. Mea nafea Iehova i faaite ai e ua ite maitai oia i te huru o te taata?
10 Ua faataa Iehova i to ˈna nunaa i te tumu o teie ture: “Eiaha e pee haere i to outou iho aau, e to outou iho mata.” (Num. 15:39) Ua ite maitai Iehova i te huru o te taata. E hema hanoa to tatou aau i ta tatou e ite mata. Te faaara maira te Bibilia: “E haavare rahi to te aau i te mau mea atoa nei, e ua ino roa; o vai te ite?” (Ier. 17:9) Te taa ra ïa ia oe e ua tano ta Iehova faaararaa ia Iseraela. Ua ite maitai oia e e hiˈo ratou i te mau nunaa tapiri ěê aita e haamori ra ia Iehova, a hinaaro atu ai e manaˈo e e ohipa mai ia ratou.—Mas. 13:20.
11. E nafea paha tatou e hema ˈi i ta tatou e ite mata?
11 I teie mahana, e hema ohie roa to tatou aau i ta tatou e ite mata. Te ora nei tatou i roto i te hoê ao o te faaaraara i te mau hinaaro o te tino. E nafea ïa ia faaohipa i te faaueraa tumu o te Numera 15:39? A feruri na: I te haapiiraa, i te ohipa aore ra i to oe vahi, e oomo paha te taata i te ahu o te faatupu i te hinaaro e taati. E nafea oe? E hinaaro paha oe e ahu mai ia ratou, eiaha râ mai te hoê Kerisetiano.—Roma 12:1, 2.
12, 13. (a) Ia aha tatou ia hinaaro tatou e hiˈo i te mea ino? (b) Eaha te tauturu mai ia ore e faaturori ia vetahi ê?
12 Mea faufaa roa ia haavî ia tatou. Ia hinaaro tatou e hiˈo i te mea ino, e haamanaˈo anaˈe i te faaotiraa papu a Ioba taiva ore. Ua faaau oia i te faufaa i to ˈna mata, oia hoi eiaha e hiˈo faahinaaro i te hoê vahine e ere i ta ˈna iho. (Ioba 31:1) Tera atoa te faaotiraa a te arii Davida: “E ore au e tuu i te hoê mea ino i mua i tau mata.” (Sal. 101:3) Te mau mea atoa e haafifi i to tatou taairaa e o Iehova, “mea ino” ïa. Oia atoa te mea ta tatou e ite mata o te faatupu i te hinaaro tia ore i roto i to tatou aau, a hara ˈtu ai.
13 Eita roa ˈtu râ tatou e hinaaro e riro ei “mea ino,” ei auraa parau, no vetahi ê ma te faaturori ia ratou. E ahu anaˈe ïa ma te au e te faaieie ore ia au i te Bibilia, eiaha râ mai ta tatou e hinaaro. (Tim. 1, 2:9) Ia faatura tatou i to vetahi ê manaˈo haava e huru aau. (Roma 15:1, 2) E haamaitairaa te Kerisetiano apî e rave rahi o te horoa ra i te hiˈoraa maitai no te amuiraa. Ua maiti ratou i te faaoaoa ia Iehova i roto i te mau mea atoa ta ratou e rave, tae noa ˈtu te ahuraa. Mea oaoa roa ïa!
Eiaha e tapi i te mau “mea faufaa ore”
14. Eaha ta Samuela i faaara no nia i te mau “mea faufaa ore”?
14 A feruri na e te fano ra oe na te moana, ite aˈera oe i te hoê motu. Taui atura oe i te aveia no te tere i taua motu ra. Tera râ, aita hoê aˈe motu! Eaha te tupu? E fifi ïa oe! A hiˈo na ia Iseraela. Ua hinaaro ratou e riro mai te mau nunaa tapiri e faaterehia ra e te hoê taata. E hara te reira, no te mea te patoi ra ratou ia Iehova ei Arii no ratou. Ua faatia Iehova ia rave ratou i te hoê arii taata, ua tono râ oia i ta ˈna peropheta Samuela e faaara eiaha e tapi i te mau “mea faufaa ore.” Ua ite maitai Iehova i te fifi.—A taio i te Samuela 1, 12:21.
15. Mea nafea Iseraela i tapi ai i te mau mea faufaa ore?
15 Ua manaˈo paha Iseraela e e arii papu aˈe te hoê taata ta ratou e ite mata, eiaha râ te Atua itea ore ra o Iehova. Mai te peu e tera iho â, te tapi ra ïa ratou i te mea faufaa ore! E ohie atoa ïa ratou i te vare i te tahi atu haavare rau a Satani, mai te haamoriraa i te idolo. Ua turai te mau arii i te taata ia tiaturi i te mau atua raau aore ra ofai ta ratou e ite mata e e tapea, eiaha râ i te Atua itea ore tei poiete i te mau mea atoa. Ua papai râ te aposetolo Paulo e mea “faufaa ore” te mau idolo. (Kor. 1, 8:4) Eita te mau idolo e ite, e faaroo, e paraparau, aore ra e ohipa. Mea maamaa ïa ia haamori i te idolo o te ore hoi e tauturu i te taata. Auê ïa te ati no te feia atoa e tiaturi atu!—Sal. 115:4-8.
16. (a) E nafea Satani e faahema ˈi e rave rahi i teie mahana ia tapi i te mau mea faufaa ore? (b) No te aha te taoˈa e te moni e taa ê ai ia Iehova?
16 Mea ite roa Satani i te faahema i te taata ia tapi i te mau mea faufaa ore, ei hiˈoraa, ia tiaturi e e maitai te oraraa i te taoˈa, te moni, te faufaa, e te ohipa aufau-maitai-hia. Eaha râ ta te reira e hopoi mai ia tupu te maˈi, te fifi i te pae moni, aore ra te ati natura? Aore ra ia moemoe te taata, ia hinaaro e ite i te tumu o te oraraa e te pahonoraa o te mau uiraa faufaa? E tamǎrû anei te reira i te taata i mua i te pohe? Ia tiaturi tatou i te taoˈa e te moni, ua hape roa ïa tatou. Eita te reira e tauturu e e paruru ia tatou i te maˈi e te pohe. Mea faufaa ore anaˈe hoi. (Mas. 23:4, 5) O Iehova anaˈe râ, te Atua mau, te tauturu ia tatou. Maoti noa te taairaa piri e o ˈna e maitai ai to tatou oraraa. E haamaitairaa faufaa mau â tera! Eiaha roa ïa e faarue ia ˈna no te tapi i te mau mea faufaa ore.
17. Eaha ta outou e faaoti no nia i te mau fifi atâta ta tatou i hiˈo mai nei?
17 Aita anei tatou e oaoa ra e na Iehova to tatou Hoa e aratai ra ia tatou ia tae i te ora mure ore? E haapao noa anaˈe i ta ˈna mau faaararaa î i te here eiaha e pee i te feia rahi e i to tatou aau e eiaha e tapi i te mau mea faufaa ore. E ora ïa tatou e a muri noa ˈtu. I to muri iho tumu parau, e hiˈo mai tatou e toru atu â faaararaa a Iehova eiaha e pee i te mau eˈa haavare.—Sal. 119:128.
Eaha to outou manaˈo?
E nafea outou e faaohipa ˈi i te mau faaueraa tumu o teie mau irava?
[Hohoˈa i te api 10]
E hinaaro anei oe i te tahi taime e pee i te feia rahi?
[Hohoˈa i te api 13]
No te aha mea atâta ˈi ia pee i to oe aau e mata?
[Hohoˈa i te api 14]
Te tapi ra anei oe i te mau mea faufaa ore?