Neneiraa faaohiehia reo Beretane
TE OAOA nei matou i te faaite e mai te neneiraa no te haapiiraa o Te Pare Tiairaa no Tiurai e no te hoê matahiti tamataraa, e pia-atoa-hia te hoê neneiraa Beretane faaohiehia i te mau avaˈe atoa. E ite outou i roto i tera vea i te mau tumu parau haapiiraa, e ia nehenehe, te tahi atu â tumu parau. Te tiaturi nei matou e e haamâha te reira i te hoê hinaaro pae varua faufaa o e rave rahi Ite no Iehova. No te aha?
E paraparau-atoa-hia te reo Beretane e to tatou mau taeae i Fiti, Ghana, Kenya, Libéria, Nigéria, Papua e Solomona. Noa ˈtu e e paraparau to tatou mau taeae i to ratou iho reo, e pinepine ratou i te faaohipa i te reo Beretane i te mau putuputuraa e i roto i te pororaa. Mea ohie aˈe râ te reo Beretane ta ratou e faaohipa ra i to roto i ta tatou mau papai. Te vai atoa ra te tahi mau Ite no Iehova tei haere i te tahi atu fenua. Noa ˈtu e aita ratou i ite maitai i te reo Beretane, e mea tia ia paraparau ratou na roto i tera reo. Hau atu â, eita ratou e nehenehe e haere i te mau putuputuraa na roto i to ratou iho reo.
O te mau tumu parau hiˈopoahia i te hebedoma taitahi i te Haapiiraa o Te Pare Tiairaa te ravea matamua e fanaˈo noa ˈi tatou i te maa pae varua i te taime au. Te faaohipa ra te neneiraa Beretane faaohiehia i te hoê huru paraparau ohie aˈe ia taa ia faufaahia te taatoaraa. Mea taa ê te api matamua o teie vea apî. E tuati te mau upoo parau iti, paratarafa, uiraa haamanaˈoraa e hohoˈa o te mau tumu parau haapiiraa i to te tahi atu neneiraa. E nehenehe ïa te taatoaraa e faaineine i te neneiraa ta ratou e hinaaro e e apiti i te Haapiiraa o Te Pare Tiairaa. No te ite i te taa-ê-raa, a hiˈo i te hiˈoraa i raro no roto mai i te paratarafa 2 o te tumu parau haapiiraa matamua o teie vea.
Te tiaturi nei matou e e pahono teie faanahoraa apî i te pure o e rave rahi tei ani ia Iehova: “E haapii mai oe ia ˈu ia ite au i ta oe ra parau.” (Sal. 119:73) Ua papu ia matou e e faaineine maitai aˈe ïa te feia aita i ite maitai i te reo Beretane ia ratou, oia atoa vetahi mau tamarii e paraparau ra i tera reo, no te Haapiiraa o Te Pare Tiairaa i te mau hebedoma atoa. Te haamauruuru nei matou ia Iehova o te ‘aroha i te hui taeae’ ma te faaohipa i te “tavini haapao maitai e te paari” no te horoa i te maa pae varua rahi.—Pet. 1, 2:17; Mat. 24:45.
Tino aratai a te mau Ite no Iehova