Mea faufaa anei te oraraa?

E RAVE rahi te ui nei e mea faufaa anei te oraraa. No te hoê taote no Auteteria, mea faufaa ore ïa. Te mea peapea, tera atoa te manaˈo o te taata.

No te aha? E mirioni taata i te ao nei e faaruru ra i te fifi, te ati, te veve, te haavîraa uˈana e te faaheporaa. E oraraa peapea roa to ratou ia au i te Ioba 14:1. E imi i te ora ta ratou fa i te mau mahana atoa.

E mirioni taata ê atu, e oraraa fanaˈo to ratou. Te oaoa ra ratou ia hiˈohia. Aita râ. No te aha? No te mau fifi manaˈo-ore-hia i te pae moni ta ratou e farerei ra, aore ra no te tahi atu mau ati, mai te poheraa te hoê tamarii. Mou roa ˈtura ta ratou mau opuaraa.—Ioba 5:7.

Mea poto roa te oraraa. Tera atoa te tahi atu tumu i manaˈo ai te taata e mea faufaa ore te oraraa. Mea rahi aita e taa ra no te aha te taata o te nehenehe hoi e rave i te mau mea rau e pohe oioi ai. Noa ˈtu e e oraraa maitai to tatou, e pohe iho â tatou paatoa i te hoê mahana.—Koheleta 3:19, 20.

E taui anei te oraraa?

I tahito ra, ua ite te arii Solomona i te faaohiparaa te taata i to ratou ite no te faaapu, patu, e te haapao i to ratou utuafare, mai ta tatou e rave nei. Ua ui râ oia eaha te faahopearaa o te reira. Mea faufaa ore ïa e te amu i te mataˈi ia au i te Koheleta 2:17.

Teie râ, mea faufaa ore anei te mau mea atoa ta te taata e rave? E ere, ua faaite noa Solomona i te huru mau o te oraraa i roto i teie nei ao tia ore. Tera râ, te haapapu maira te Bibilia e e taui te oraraa!

E nehenehe oe e tiaturi i te reira. A taio ïa i na tumu parau i muri iho e faataa ra no te aha mea faufaa ore ai te oraraa ia hiˈohia, e nafea te Atua e faaafaro ai i te reira, e e nafea to oe oraraa e faufaahia ˈi i teie nei â.