Te moni e te mau faufaa morare—Te hoê haapiiraa no te tuatapaparaa mai

I TE 7 no Eperera 1630 ra, fatata e maha hanere taata i roto e maha pahi o tei faarue i te fenua Beretane no te fano atu i Marite. E rave rahi i rotopu ia ratou e feia maramarama. E feia tapihoo manuïa te tahi atu. E melo atoa vetahi no te apooraa iriti ture. Ua iti te faanavairaa faufaa i Beretane, e ua ino roa ˈtu â i te tupuraa mai te tamaˈi e Toru ahuru Matahiti i Europa (1618-48). No te papu ore, ua faarue ratou i to ratou fare, ta ratou tapihooraa, e to ratou mau fetii e ua reva ˈtura i te ara no te imi i te mea maitai aˈe.

E ere noa râ tera taiete i tiaturihia i te hoê pǔpǔ tapihoo o te faaohipa i te mau tupuraa maitatai no to ratou iho maitai. E Puritains itoito rahi ratou, o tei horo ê no te hamani-ino-raa a te faaroo.a Ta ratou fa mau, o te haamauraa ïa i te hoê pǔpǔ taata o te mǎtaˈu ra i te Atua i reira ratou e to ratou mau huaai e nehenehe ai e ruperupe i te pae materia ma te ore e ofati i te mau ture aveia o te Bibilia. I muri iti noa ˈˈe i te tapaeraa i Salem, i Massachusetts, ua ani ratou i te hoê tâpû fenua nainai e titapou atu i te pae miti. Ua parau ratou i to ratou nohoraa apî o Boston.

Te hoê ohipa faito fifi

Ua rave o John Winthrop, to ratou raatira e tavana rahi, i te mea maitai roa ˈˈe no te turu i te taoˈa rahi a te taata iho e te mea maitai no te huiraatira i roto i te fenua aihuaraau apî. Ua hinaaro o ˈna e ia fanaˈo te taata i te moni e te mau faufaa morare atoa. Ua riro râ te reira ei ohipa faito fifi. Ma te feruri atea i te mau tautooraa, ua paraparau o ˈna ma te maramarama i to ˈna mau hoa no nia i te tuhaa a te taoˈa rahi i roto i te hoê totaiete taata o te mǎtaˈu ra i te Atua.

Mai te tahi atu mau raatira Puritains, ua tiaturi o Winthrop e e ere te tapiraa i te taoˈa rahi iho i te mea ino. Ua paturu o ˈna e te fa matamua roa o te taoˈa rahi, o te tautururaa ïa ia vetahi ê. No reira, rahi noa ˈtu â te taoˈa a te hoê taata, rahi noa ˈtu â te maitai ta ˈna e nehenehe e rave. “Mea faahoruhoru roa ˈtu â te taoˈa rahi i te feruriraa o te Puritain i te tahi atu mau tumu parau,” ta te vahine tuatapapa o Patricia O’Toole ïa e parau ra. “E tapao te reira o te haamaitairaa a te Atua e o te hoê tamataraa puai o te hara o te teoteo . . . e o te mau hara o te tino.”

No te ape i te mau hara o te nehenehe e tupu mai na roto i te taoˈa rahi e te oraraa fanaˈo, ua faaitoito o Winthrop i te faito tano noa e te haavîraa ia ˈna iho. Aita râ i maoro roa, ua turai te feruriraa ohipa o to ˈna mau hoa tivira ia aro i ta ˈna mau tamataraa e faahepo ia ratou ia faatupu i te paieti e ia here te tahi i te tahi. Ua haamata te feia amahamaha i te patoi i ta ratou i ite ei faaôraa a Winthrop i roto i ta ratou iho mau ohipa. Ua haamata te tahi i te turai i te huiraatira ia maiti i te hoê apooraa o te rave i te hoê â faaotiraa. Ua maiti noa te tahi atu i te reva i Connecticut i pihai mai no te tapi i to ratou iho mau hinaaro.

“Te taime maitai, te ruperuperaa, te faatereraa manahune,” ta O’Toole ïa e parau ra, “o te mau mana puai atoa ïa i roto i te oraraa o te mau Puritains i Massachusetts, e e atuatu te taatoaraa o te reira i te nounou o te taata ma te ore e haapao i te manaˈo tumu o Winthrop no te maitai o te huiraatira.” I 1649, ua pohe o Winthrop fatata ma te moni ore, i te 61raa o to ˈna matahiti. Noa ˈtu e ua ora mai te aihuaraau paruparu noa ˈtu te fifi e rave rahi, aita roa ˈtu o Winthrop i ora maoro no te ite i to ˈna moemoeâ ia tupu.

Te tamau noa ra te imiraa

Aita to John Winthrop hiˈoraa moemoeâ o te hoê ao maitai aˈe i moe na muri ia ˈna. E hanere tausani taata o te faarue nei i te mau matahiti atoa ia Afirika, Asia Apatoa hitia o te râ, Europa Hitia o te râ, e Marite Latino, ma te tiaturi e itehia mai te hoê oraraa maitai aˈe. Ua turaihia te tahi o ratou e te mau hanere buka apî, apooraa e te mau afata poroi Web o tei faatupuhia i te mau matahiti atoa o te fafau ra i te taviri o te taoˈa rahi. Papu maitai, e rave rahi o te tutava noa nei ia fanaˈo i te moni, ma te tiaturi eiaha e vaiiho i te mau faufaa morare.

Ei parau mau, e mea peapea te mau faahopearaa. E pinepine roa te feia e imi nei i te taoˈa rahi i te haapae i ta ratou mau faaueraa tumu e tae noa ˈtu i te tahi taime i to ratou faaroo i nia i te fata o Mamona. No reira, e nehenehe outou e ui ma te tano: “E nehenehe anei te tahi e riro ei Kerisetiano mau e ei taata taoˈa rahi atoa? E vai anei te hoê totaiete e mǎtaˈu ra i te Atua o te ruperupe i te pae materia e i te pae varua?” Te pahono ra te Bibilia i tera mau uiraa, mai ta te tumu parau i muri nei e faaite ra.

[Nota i raro i te api]