Te fatata roa maira “te tau faatia-faahou-raa”!
Hou rii Iesu a maue ai i nia i te raˈi, ua ui te tahi o ta ˈna mau pǐpǐ ia ˈna e: “E te Fatu, ei teie nei anei oe e faahoˈi mai ai i te hau ia Iseraela?” Te faaite ra te pahonoraa a Iesu e e mairi te hoê tau hou te Basileia e tae mai ai. Na roto i taua taime ra, e ohipa i te rahi te tia i ta ˈna mau pǐpǐ ia rave. E tia ia ratou ia riro ei ite no Iesu “i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua ra.”—Ohipa 1:6-8.
EITA taua ohipa ra e oti i roto tau mahana, hebedoma, aore ra avaˈe. Ma te ore roa ˈtu râ e haamarirau, ua haamata aˈera te mau pǐpǐ i te poro. Aita râ i ore to ratou anaanatae i te parau o te faatia-faahou-raa. Ua paraparau te aposetolo Petero no nia i te reira i mua i te hoê nahoa taata rahi i putuputu i Ierusalema, a na ô ai e: “E tatarahapa outou, e e fariu mai, ia paraihia ta outou hara, ia itea mai te anotau haumâru no ǒ mai i te aro o te Fatu ra; e ia tono mai oia ia Iesu Mesia, o tei haapaohia i mutaa ihora no outou: ei te raˈi â hoi oia parahi ai, e tae noa ˈtu i te tau [faatia-faahou-raa o] te mau mea atoa nei, ta te Atua i parau mai i te vaha o te mau peropheta moˈa atoa no ˈna mai te matamua mai â o teie nei ao ra.”—Ohipa 3:19-21; MN.
E aratai teie “tau faatia-faahou-raa” i “te anotau haumâru” no ǒ mai ia Iehova ra. E tae mai te faatia-faahou-raa i tohuhia na roto e piti tuhaa. A tahi, e itehia te hoê faatia-faahou-raa pae varua haumâru, o te tupu ra ïa i teie nei. A piti, e apeehia te reira e te haamauraa o te hoê paradaiso pae tino i nia i te fenua.
Haamataraa te tau faatia-faahou-raa
Mai ta te aposetolo Petero i faataa ˈtu i taua nahoa i Ierusalema ra, ‘ei te raˈi Iesu e parahi ai.’ O te reira te tupuraa e tae roa i te matahiti 1914 i to Iesu fariiraa i to ˈna mana arii e haamataraa i te faatere ei Arii nominohia e te Atua. I taua taime ra, o ta Petero ïa i tohu, e “tono” Iehova i ta ˈna Tamaiti, oia hoi ua faatia Oia ia amo Iesu i ta ˈna tuhaa ei taata faahiahia roa ˈˈe i roto i te mau opuaraa a te Atua. Te faataa ra te Bibilia i te tupuraa na roto i te mau parau taipe: “Ua fanau maira ta [te faanahonahoraa a te Atua i te raˈi] e tamaroa, [te Basileia o te Atua i te rima o Iesu Mesia] o te riro ia ˈna te tavana i te mau fenua atoa ma te setepa auri ra.”—Apokalupo 12:5.
Aita roa ˈtu râ te mau nunaa i hinaaro e auraro atu i te faatereraa a te Mesia. Inaha, ua tuhi ratou i ta ˈna mau tino huiraatira haapao maitai i te fenua nei, matauhia i teie nei ei Ite no Iehova. Mai to mua ˈtu ia ratou, oia te mau aposetolo, aita te mau Ite i haamarirau i te rave i “te ohipa pororaa no nia ia Iesu.” (Apokalupo 12:17, MN) I tera e tera fenua, ua tupu taue mai te patoiraa i te ohipa ta te mau Kerisetiano haavare ore e rave ra. I te matahiti 1918, ua tuuhia te mau melo aratai o te pu rahi a te Taiete Watch Tower no Brooklyn, i New York, i mua i te tiribuna na nia i te mau pariraa hamani-haere-noa-hia e ua faautuahia ratou ma te tia ore i te mau tau tapearaa roa. No te hoê taime, e au ra e e topa to teie nei tau ohipa pororaa “e tae noa ˈtu i te hopea o te fenua ra.”—Apokalupo 11:7-10.
I te matahiti 1919 râ, ua tuuhia te mau melo o te pu rahi tei tapeahia e i muri aˈe, ua faaore-roa-hia te mau pariraa haavare. Aita ratou i faataere i te rave i te ohipa faatia-faahou-raa pae varua. Mai reira mai, ua fanaˈo noa te nunaa o Iehova i te ruperuperaa pae varua aitâ i itehia aˈenei.
Ua ravehia te hoê faanahoraa rahi no te haapii i te taata o te mau nunaa atoa ia haapao i te mau mea ta te Mesia i faaue i ta ˈna mau pǐpǐ ia rave. (Mataio 28:20) Mea haumâru mau te iteraa i to te tahi pae tei riro na mai te animala ra, tauiraa i to ratou huru! Ua tatara ratou i te huru taata tahito tei faatupu i te mau haerea mai “te tairoiro,” “te faaino,” e “te parau tiaâ,” e ua ahu ratou i te huru taata apî, “o tei faahouhia i te ite ra, mai te huru atoa o tei hamani ia ˈna ra.” I te auraa pae varua, te tupu ra te mau parau a te peropheta Isaia i teie nei â: “Ei reira te luko [te hoê taata o tei faaite na i te mau huru e au i to te luko] e parahi atoa ˈi raua o te arenio [te hoê taata e faaite ra i te huru feruriraa haehaa]; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai.”—Kolosa 3:8-10; Isaia 11:6, 9.
Fatata roa te tahi atu â faatia-faahou-raa!
Hau atu i te faatia-faahou-raa tei horoa mai i te paradaiso pae varua o teie mahana, te tae oioi mai ra te tau i reira to tatou palaneta e riro mai ai ei paradaiso pae tino. Ua riro na te hoê tuhaa iti o te fenua ei paradaiso i to Iehova tuuraa i to tatou na tupuna, o Adamu e o Eva, i roto i te ô i Edene. (Genese 1:29-31) No reira tatou e nehenehe ai e parau e e faatia-faahou-hia te Paradaiso. Hou râ te reira e tupu ai, e tia ia tamâhia te fenua i te haapaoraa hape o te ore e faahanahana i te Atua. Na te tuhaa politita o teie nei ao e rave i te reira. (Apokalupo 17:15-18) E ia oti e haamouhia ˈtu ai te mau tuhaa politita e tapihoo e to ratou atoa feia paturu. I te pae hopea, e tapeahia te mau enemi o te Atua e toe ra—o Satani te Diabolo e ta ˈna mau demoni—e ia hoê tausani noa ˈtu te matahiti—o te roaraa ïa o te opuaraa o te faatia-faahou-raa. Ia tae i taua tau ra, “e rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra.” (Isaia 35:1) E ore roa te mau peapea na te fenua atoa nei. (Isaia 14:7) Tae noa ˈtu te mau mirioni taata i pohe, e faahoˈihia mai ïa i te ora i nia i te fenua. E fanaˈo te taatoaraa i te faufaa o te tusia taraehara o te tataˈi. (Apokalupo 20:12-15; 22:1, 2) Aita e matapo, e tariˈa turi, e e pirioi faahou i nia i te fenua. “E ore hoi to reira e parau e, Ua paruparu vau i te maˈi.” (Isaia 33:24) I te hoperaa iho â te Faatereraa Tausani Matahiti a te Mesia, e tuuhia te Diabolo e ta ˈna mau demoni no te hoê taime poto e e ite ratou i teihea faito te tupuraa te opuaraa a te Atua no te fenua i taua taime ra. I te pae hopea, e haamouhia ratou e a muri noa ˈtu.—Apokalupo 20:1-3.
Ia raea i te fenua te hopea o na tausani matahiti faatia-faahou-raa, e arue “tei huti i te aho ra” ia Iehova, e e na reira ratou e a muri noa ˈtu. (Salamo 150:6) E riro anei outou ei roto atoa ia ratou? E nehenehe ta outou.