Te puai no te hamani i te mea apî: Te hamani nei Iehova i “te mau mea apî atoa”

1, 2. I teie tau, eaha ta tatou e nehenehe e ere e eaha to tatou huru i tera taime?

UA MOˈE aore ra ua parari te taoˈa hauti ta te hoê tamarii e au roa ˈˈe e te taˈi ra oia ma te peapea. E mauiui roa te aau ia faaroo atu! Ua ite aˈenei oe i te huru o te hoê tamarii ia faahoˈi mai to ˈna metua i te hauti i moˈe? E ere paha i te mea ohipa  rahi no te metua ia imi aore ra ia tataî i te taoˈa hauti. No te tamarii râ, mea faufaa roa ïa. E oaoa roa oia, inaha, ua faahoˈihia mai te mea ta ˈna i manaˈo eita o ˈna e ite faahou!

² E mana to Iehova, te Metua maitai roa ˈˈe, no te hamani i te mea apî ia fanaˈo faahou ta ˈna mau tamarii i te fenua i ta ratou i ere. I teie “tau ino mau . . . e te fifi ia faaruru,” mea rahi atu â ta tatou e nehenehe e ere mai te mau mea ta tatou e haafaufaa nei: To tatou fare, ta tatou mau faufaa, te ohipa e tae noa ˈtu i to tatou ea maitai. (Timoteo 2, 3:1-5) E peapea roa atoa paha tatou ia tuinohia te natura e ia mou te tahi mau animara e raau huru rau. E mauiui roa ˈtu râ tatou ia pohe te hoê taata ta tatou e here ra. E î roa to tatou aau i te oto e te mauiui a manaˈo atu ai eita e roaa ia faaoromai.​—Samuela 2, 18:33.

3. Ia au i te Ohipa 3:21, eaha ta Iehova i faaineine e e nafea Iehova ia faatupu i te reira?

³ Mea mahanahana mau ïa ia ite e faaohipa Iehova i to ˈna puai no te hamani i te mau mea apî atoa! Mai ta tatou e ite mai, mea rahi te mau mea ta te Atua e hinaaro e faaapî no ta ˈna mau tamarii i te fenua. Oia mau, te faaite ra te Bibilia ua faaineine Iehova i “te tau e faahoˈihia ˈi te mau mea atoa mai i te matamua ra.” (Ohipa 3:21) No te rave i te reira, e faaohipa Iehova i te Faatereraa arii ta ˈna i tuu i roto i te rima o ta ˈna Tamaiti o Iesu Mesia. Te vai ra te haapapuraa e ua haamata teie faatereraa i te faatere i nia i te raˈi i te matahiti 1914.a (Mataio 24:3-14) E tupu te tahi mau faaapîraa i teie tau, area te tahi atu, a muri aˈe ïa!

Ua haamau-faahou-hia te haamoriraa viivii ore

4, 5. Eaha tei tupu i Ierusalema i te matahiti 607 hou te tau o Iesu e eaha ta Iehova i fafau?

⁴ Te tahi mea ta Iehova i faahoˈi na mua, o te haamoriraa viivii ore ïa. E hiˈopoa poto anaˈe i te aamu o te faatereraa i Iuda. E tauturu mai te reira ia taa e nafea Iehova ia faaohipa i to ˈna puai rahi no te hamani i te mau mea apî.​—Roma 15:4.

⁵ A feruri na eaha te huru o te mau ati Iuda haapao maitai a ite ai ua haamouhia Ierusalema i te matahiti 607 hou te tau o Iesu. Ua faarirohia to ratou oire here ei haapueraa huˈahuˈa e ua parari te mau patu. Te mea ino atu â, ua vavahihia te hiero nehenehe ta Solomona i patu, te pu iho o te haamoriraa viivii ore a Iehova i nia i te fenua. (Salamo 79:1) Ua hopoi-tîtî-hia tei ora mai i Babulonia e ua riro to ratou fenua aiˈa ei nohoraa no te mau animara oviri. (Ieremia 9:11) Ua manaˈo paha te ati Iuda eita ratou e hoˈi faahou i Ierusalema. (Salamo 137:1) Ua tohu-ê-hia na teie haamouraa, ua fafau râ Iehova te vai ra te tau e faahoˈihia ˈi te mau mea atoa mai i te matamua ra.

6-8. (1) Eaha ta te mau peropheta e rave rahi i papai e eaha te tupuraa matamua o taua mau parau tohu ra? (2) Mea nafea tera mau parau tohu i te tupuraa i nia i te nunaa o te Atua i teie mahana?

⁶ E rave rahi peropheta tei papai no nia i te tau e faahoˈihia ˈi te mau mea atoa mai i te matamua ra.b Na roto ia ratou, ua fafau Iehova e maitai faahou mai to ratou fenua, e î faahou mai i te taata, e hotu rahi mai te maa e e paruruhia ratou i te animara oviri e i te enemi. E riro to ratou fenua ei paradaiso mau! (Isaia 65:25; Ezekiela 34:25; 36:35) Hau atu â, e haamau-faahou-hia te haamoriraa viivii ore e e patu-faahou-hia te hiero. (Mika 4:1-5) Ua tauturu teie mau parau tohu i te mau ati Iuda ia faaoromai i na 70 matahiti faatîtîraa i Babulonia.

⁷ I te pae hopea, ua tae mai te tau e faahoˈihia ˈi te mau mea atoa mai i te matamua ra. Ua tiamâ mai te mau ati Iuda ia Babulonia, ua hoˈi i Ierusalema e ua patu faahou i te hiero o Iehova. (Ezera 1:1, 2) A pûpû noa ˈi ratou i te hoê haamoriraa viivii ore ia Iehova, ua haamaitaihia ratou, ua hotu e ua ruperupe noa to ratou fenua. Ua paruru oia ia ratou i te enemi e te animara oviri tei parahi i to ratou fenua e rave rahi matahiti i te maoro. Eita e ore, ua oaoa mau ratou i te iteraa ua faaohipa Iehova i to ˈna puai no te hamani i te mau mea apî! Ua riro noa râ te reira ei hohoˈa no te mau mea rahi aˈe i tupu i muri mai. Afea ra? “I te pae hopea o te mau mahana” i te faariroraahia te huaai fafauhia a Davida ei Arii i te raˈi.​—Isaia 2:2-4; 9:6, 7.

⁸ I muri iti noa ˈˈe i to Iesu riroraa mai ei Arii i te raˈi i te matahiti 1914, ua tauturu oia i te nunaa haapao maitai o te Atua i nia i te fenua ia haamori faahou ia Iehova mai ta ˈna e titau ra. Mai te arii Peresia ra o Kuro tei faatiamâ i te toea o te mau ati Iuda ia Babulonia i te matahiti 537 hou te tau o Iesu, ua faatiamâ atoa Iesu i te toea o te mau ati Iuda pae varua, ta ˈna iho mau pǐpǐ, i te mana o “Babulonia rahi,” te taatoaraa o te mau haapaoraa hape. (Apokalupo 18:1-5; Roma 2:29) Mai te matahiti 1919 mai, ua haamori faahou te mau Kerisetiano mau ia Iehova mai ta ˈna e titau ra. (Malaki 3:1-5) Mai reira mai, ua haamori te nunaa o Iehova ia ˈna i roto i to ˈna hiero tamâhia o tei faahohoˈahia i te mau faanahoraa atoa ta te Atua i rave ia haamori ta ˈna mau tavini ia ˈna ia au i to ˈna hinaaro. No te aha mea faufaa no tatou i teie mahana?

No te aha mea faufaa no tatou?

9. Eaha tei tupu i muri aˈe i te pohe o te aposetolo hopea a Iesu, eaha râ ta Iehova e rave ra i to tatou nei tau?

⁹ Ua haamori te mau Kerisetiano matamua ia Iehova mai ta ˈna e titau ra e ua haamaitaihia ratou. Ua tohu râ Iesu e te mau aposetolo ia tae i te hoê taime, eita faahou vetahi e haamori i te Atua ma te tano. (Mataio 13:24-30; Ohipa 20:29, 30) I muri aˈe i te pohe o te aposetolo hopea a Iesu, ua rahi noa ˈtu â te feia e faahua parau ra e pǐpǐ ratou na te Mesia. Ua farii te mau tia faaroo i te mau haapiiraa e peu a te mau nunaa ěê. Aita roa ˈtu ratou i tauturu i te taata ia faafatata ˈtu i te Atua. Ua haapii hoi ratou e Toru tahi te Atua, e titauhia ia faˈi i te hara i te mau perepitero, ia pure ia Maria e i te mau peata, eiaha râ ia Iehova. E rave rahi haapiiraa hape tei parare e rave rahi matahiti te maoro e te rahi noa ˈtu ra te taata o te rave i te ino. Eaha ïa ta Iehova e rave? Te faaohipa ra Iehova i to ˈna puai no te haamau faahou i te haamoriraa viivii ore! E nehenehe e parau, tera te tahi o te mau mea faufaa roa ˈˈe ta Iehova i faaapî i to tatou tau.

10, 11. (1) Eaha na tuhaa e piti o te paradaiso pae varua e e nafea oe ia haapapu tei roto oe i te paradaiso pae varua? (2) Eaha te huru taata ta Iehova e haaputuputu i roto i te paradaiso pae varua e eaha ta ratou e ite a muri aˈe?

¹⁰ I teie mahana, tei roto te mau Kerisetiano mau i te hoê paradaiso pae varua. Eaha te paradaiso pae varua? Na mua roa, e piti tuhaa to te reira. A tahi, o te haamoriraa ïa i te Atua mau ra o Iehova ma te ore e pee i te tahi noa ˈˈe haapiiraa hape. E fanaˈo tatou i te maa pae varua o te tauturu mai ia ite o vai to tatou Metua i te raˈi, e nafea ia faaoaoa e ia faafatata ia ˈna. (Ioane 4:24) A piti, o te huru ïa o te taata i roto i te paradaiso pae varua. Mai ta Isaia i tohu, “i te pae hopea o te mau mahana,” e haapii Iehova i te feia e haamori ra ia ˈna e nafea ia ora ma te hau. Eita tatou e haapii faahou i te tamaˈi. Noa ˈtu to tatou huru tia ore, e tauturu mai oia ia “ahu mai i te huru taata apî.” E haamaitai oia i ta tatou mau tutavaraa na roto i te horoaraa mai i to ˈna varua moˈa ia faatupu tatou i te mau huru maitatai nehenehe. (Ephesia 4:22-24; Galatia 5:22, 23) Ia vaiiho oe i te varua o te Atua ia aratai ia oe, tei roto mau ïa oe i te paradaiso pae varua.

¹¹ Ua haamata ê na Iehova i te haaputuputu i te huru taata ta ˈna e here, oia hoi te feia e here ra ia ˈna, e hinaaro ra i te hau e “te feia e hiaai ra i te mau mea pae varua.” (Mataio 5:3) Tera te huru taata o te ite i te mau mea apî ta Iehova e rave i nia i te fenua taatoa a muri aˈe.

“Inaha, te hamani nei au i te mau mea apî atoa”

12, 13. (1) Eaha te haapapu ra a muri aˈe e tupu roa ˈi te mau parau fafau i roto i te Isaia? (2) Mai tei parauhia i Edene, eaha te opuaraa a Iehova e eaha ïa ta tatou i papu?

¹² E rave rahi parau fafau o te faaite mai ra eaha te mau mea apî ta Iehova e rave a muri aˈe. Ei hiˈoraa, ua papai Isaia ia tae i te hoê taime e faaorahia te feia maˈi, te pirioi, te matapo e te tariˈa turi e e faaore-roa-hia te pohe. (Isaia 25:8; 35:1-7) Aita taua mau parau fafau ra i tupu mau i Iseraela i tahito ra, ua tupu râ i to tatou nei tau a haamau faahou ai Iehova i te haamoriraa viivii ore i nia i te fenua. Te haapapu mai ra te reira a muri aˈe ïa tera mau parau fafau e tupu roa ˈi. E nafea tatou e ite ai?

¹³ I te ô i Edene ra, ua faataa maitai Iehova i ta ˈna opuaraa: Ia parahi ïa te taata i nia i te fenua ma te oaoa, te oraora maitai e te tahoê, ia haapao maitai te tane e te vahine i te fenua e i te mau mea ora atoa i nia iho e ia faarirohia te reira ei paradaiso. (Genese 1:28) Mea taa ê roa râ ta tatou e ite nei i teie mahana. Te auraa anei eita ta Iehova opuaraa e tupu? E ere roa ˈtu! E faariro hoi Iesu, te Arii ta Iehova i maiti, i te fenua taatoa ei paradaiso.​—Isaia 55:10, 11; Luka 23:43.

14, 15. (1) A muri aˈe, e nafea Iehova ia hamani i “te mau mea apî atoa”? (2) Mai te aha te huru ia riro te fenua ei paradaiso e eaha ta oe e tiai ru ra?

¹⁴ A feruri na ia riro te fenua taatoa ei paradaiso! Te na ô ra Iehova no nia i taua tau ra: “Inaha, te hamani nei au i te mau mea apî atoa.” (Apokalupo 21:5) Eaha ïa te auraa? Oia hoi, ia faaohipa Iehova i to ˈna puai no te haamou i teie ao ino, e toe noa mai “te raˈi apî e te fenua apî.” Na te hoê ïa faatereraa apî i te raˈi e faatere mai i te fenua apî, oia hoi te feia e here ra ia Iehova e e rave ra i to ˈna hinaaro. (Petero 2, 3:13) Eita Satani e ta ˈna atoa mau demoni e nehenehe faahou e faatupu i te ohipa ino, eita te huitaata e mauiui faahou e e tupu roa te hau!​—Apokalupo 20:3.

¹⁵ I tera taime, e nehenehe ïa e faariro i te fenua ei paradaiso mai tei opuahia i te omuaraa. Ua hamani Iehova i te fenua ia nehenehe te reira e hoˈi mai to ˈna huru matamua. Ia faaorehia te feia atoa o te haaviivii e te tuino ra i te natura, e mâ faahou mai te mau roto e te mau anavai. Ia ore te mau tamaˈi, e nehenehe faahou mai te mau fenua i tuinohia. E oaoa roa tatou i te ohipa ia riro te fenua taatoa mai te ô i Edene ra i reira te mau animara e raau huru rau e tupu maitai ai! Eita te taata e haapohe faahou i te animara e eita atoa e tuino faahou i te uru raau. E faaea hau noa te taata e te mau mea atoa i poietehia i nia i te fenua. Aita atoa e tumu e mǎtaˈu ai te tamarii i te mau animara oviri.​—Isaia 9:6, 7; 11:1-9.

16. I roto i te paradaiso, eaha te mau mea apî ta Iehova e rave no te taata tataitahi?

¹⁶ E ite-atoa-hia te mau mea apî i nia i te taata tataitahi. E ora te maˈi o te feia e ora ˈtu i Aramagedo. Mai ta ˈna i rave i te fenua nei, e faaohipa Iesu i te puai no ǒ mai i te Atua no te faaora i te matapo, te tariˈa turi, te pirioi e te feia ua paruparu te tino. (Mataio 15:30) E oaoa te feia ruhiruhia ia hoˈi faahou mai to ratou puai mai i te apîraa. (Ioba 33:25) E moremore faahou mai te iri, e etaeta e e ohipa maitai faahou te avae, te rima e te tahi atu mau tuhaa o te tino. E ite te huitaata haapao maitai i te mau faahopearaa ino o te hara e to te huru tia ore ia ore mǎrû noa. E mauruuru mau tatou i te Atua ra o Iehova ia faaohipa oia i to ˈna puai no te hamani i te mau mea apî! I teie nei, e hiˈopoa anaˈe i te tahi ohipa apî faahiahia mau ta Iehova e rave a muri aˈe.

E tia faahou mai tei pohe!

17, 18. (1) No te aha Iesu i aˈo ai i te mau Sadukea? (2) No te aha Elia i ani ai ia Iehova ia faatupu i te hoê tia-faahou-raa?

¹⁷ I te tau o Iesu, aita te tahi mau aratai haapaoraa parauhia te mau Sadukea i tiaturi i te tia-faahou-raa. Ua aˈo Iesu ia ratou na roto i teie mau parau: “Ua hape outou, no te mea aita outou i ite i te mau Papai e e nafea te mana o te Atua e ohipa ˈi.” (Mataio 22:29) Oia, te faaite ra te mau Papai e mana to Iehova no te faatia faahou mai i te feia pohe. E hiˈopoa anaˈe i te tahi mau hiˈoraa.

¹⁸ A feruri na i tei tupu i te tau o Elia. Ua farii manihini te hoê vahine ivi i te peropheta i to ˈna fare tau taime. I te hoê râ mahana, ua pohe te tamaiti otahi a teie vahine ivi e tei roto oia i te rima o to ˈna mama. Papu, ua aroha roa te peropheta i teie tamaiti, mea here roa hoi na Elia ia ˈna. Ua oto roa te aau o te mama, i muri aˈe i te poheraa ta ˈna tane, o raua anaˈe te tamaiti to raua oraraa. Peneiaˈe ua tiaturi oia na ta ˈna tamaiti e aupuru mai ia ˈna ia paari roa oia. No te hepohepo rahi, ua manaˈo te vahine ivi ra ua faautua te Atua ia ˈna no te tahi hape tahito. Ua peapea roa Elia no ˈna. Rave mǎrû maira oia i te tino pohe o te tamaiti i te rima o to ˈna mama, amo aˈera ia ˈna i roto i to ˈna piha e pure atura i te Atua ra o Iehova ia faahoˈi mai i te ora i roto i teie tamaiti.​—Te mau arii 1, 17:8-21.

19, 20. (1) Mea nafea Aberahama i te faaiteraa i to ˈna faaroo i te tia-faahou-raa e eaha te tumu i na reira ˈi oia? (2) Mea nafea Iehova i te haamaitairaa i te faaroo o Elia?

¹⁹ E ere o Elia te taata matamua tei tiaturi i te tia-faahou-raa. E rave rahi matahiti na mua ˈtu, ua tiaturi atoa Aberahama e nehenehe Iehova e faatia mai i te taata mai te pohe mai. Eaha te tumu? Ua ite oia i te semeio ta Iehova i rave, ua fanau Sara i te hoê tamaiti i te 90raa o to ˈna matahiti, area o Aberahama, 100 ïa matahiti to ˈna i tera taime. (Genese 17:17; 21:2, 3) I te paariraa mai ta ˈna tamaiti, ua ani Iehova ia Aberahama e pûpû ia Isaaka ei tusia. Ua faaite Aberahama i to ˈna faaroo e ua tiaturi papu oia e nehenehe Iehova e faatia mai i ta ˈna tamaiti here mai te pohe mai. (Hebera 11:17-19) No reira o ˈna i parau ai i ta ˈna na tavini e hoˈi mai iho â raua Isaaka.​—Genese 22:5.

²⁰ Aita râ i titauhia te hoê tia-faahou-raa, ua faaora hoi Iehova ia Isaaka i taua taime ra. Area i roto i te tupuraa o Elia, ua pohe ê na te tamaiti a te vahine ivi. Ua faatupu râ Iehova i ta te peropheta i ani ma te faaroo papu! Ua faahoˈi iho â Iehova i te ora i roto i te tamaiti e afai atura Elia ia ˈna i to ˈna mama ra ma te faahiti i teie mau parau putapû mau: “A hiˈo, te ora ra ta oe tamaiti.”​—Te mau arii 1, 17:22-24.

21, 22. (1) No te aha te Bibilia e faahiti ai i te mau tia-faahou-raa i tupu aˈenei? (2) I roto i te paradaiso, ehia taata te faatiahia mai e na vai e faatupu i te reira?

²¹ Teie te taime matamua e faahiti ai te Bibilia ua faaohipa Iehova i to ˈna puai no te faatia mai i te taata mai te pohe mai. I muri aˈe, ua horoa atoa Iehova i te puai no te faatia mai i tei pohe ia Elisaia, Iesu, Paulo e Petero. Parau mau, ua pohe faahou tei faatiahia mai. Tera râ, te haapapu mai ra taua mau faatiaraa Bibilia ra i te mau mea faahiahia roa ta Iehova e rave a muri aˈe.

²² I roto i te paradaiso, i reira Iesu e riro ai “te tia-faahou-raa e te ora.” (Ioane 11:25) E faatia mai oia e mirioni taata o te nehenehe e ora e a muri noa ˈtu i roto i te paradaiso i nia i te fenua nei. (Ioane 5:28, 29) Auê te oaoa ia tauahi faahou tatou i te mau hoa e fetii o te faatiahia mai mai te pohe mai! E arue te huitaata taatoa ia Iehova i te faaohiparaa i to ˈna puai no te hamani i te mau mea apî.

23. Eaha te tahi tia-faahou-raa faahiahia roa ta Iehova i rave? E nafea te reira ia tauturu i te taata?

²³ Ua horoa mai Iehova i te haapapuraa e nehenehe iho â o ˈna e faatupu i te tia-faahou-raa. Te tahi tia-faahou-raa faahiahia roa ta Iehova i rave, o te tia-faahou-raa ïa o ta ˈna Tamaiti, ua faatia mai hoi oia ia Iesu ei varua puai. Hau atu i te 500 taata tei ite mata ia Iesu i muri aˈe i to ˈna tia-faahou-raa. (Korinetia 1, 15:5, 6) E nehenehe teie tupuraa e tauturu i te taata ia tiaturi i te tia-faahou-raa. A muri aˈe, e faaohipa Iehova i to ˈna puai no te faatia mai i te taata mai te pohe mai.

24. No te aha tatou e nehenehe ai e tiaturi e faatia mai Iehova i tei pohe e eaha te tiaturiraa mea faufaa ia poihere tatou?

²⁴ E puai to Iehova no te faatia mai i te taata mai te pohe mai, tera râ, te hinaaro atoa ra oia e na reira. Ua papai Ioba e te tiai ru mau ra Iehova i te faatia mai i tei pohe. (Ioba 14:15) Oia mau, e hinaaro iho â oe e faafatata ˈtu i te Atua o te faaohipa i to ˈna puai ma te here. A haamanaˈo râ, te tia-faahou-raa, hoê noa ïa o te mau mea apî ta Iehova e faatupu. A tamau noa ˈi oe i te faafatata ˈtu ia Iehova, a poihere noa i te tiaturiraa faahiahia e ora i roto i te paradaiso i reira oe e ite ai i “te mau mea apî atoa” ta Iehova e faatupu!​—Apokalupo 21:5.