Te haamanaˈo ra anei outou?

Ua feruri maite anei outou i te mau vea hopea nei o Te Pare Tiairaa? Mai te peu e e, e anaanatae ïa outou i te faahaamanaˈo i te mau manaˈo i muri nei:

◻ Eaha te tahi mau uiraa e nehenehe e piti Kerisetiano e uiui hou e feruri ai i te momoˈaraa?

‘Te papu mau ra anei ia ˈu i te huru pae varua o te tahi e to ˈna paieti i te Atua? E nehenehe anei au e feruri i te tavini i te Atua e o ˈna no te oraraa taatoa? E faaite tahaa mau anei mâua i te mau huru taata te tahi i te tahi? E tiaturi anei au e tuati mâua e a muri noa ˈtu? Ua ite maitai anei mâua i te mau ohipa i mutaa iho e te mau tupuraa i teie nei no nia te tahi i te tahi?’—15/8, api 31.

◻ Eaha te manaˈo o Iesu i to ˈna parauraa i ta ˈna mau pǐpǐ e: “O outou te miti no te fenua”? (Mataio 5:13)

Te na ô ra Iesu e e ohipa te pororaa a ta ˈna mau pǐpǐ ia vetahi ê no nia i te Basileia o te Atua mai te hoê ravea rapaauraa aore ra faaoraraa i nia i te feia e faaroo mai ia ratou. Oia mau, e paruruhia te feia e faaohipa i te mau parau a Iesu i te viivii i te pae morare e te pae varua i roto i te ao nei.—15/8, api 32.

◻ Nafea te feia e haamatau ra e nehenehe ai e ape i te marei o te peu taatiraa tia ore?

Mai te peu e te haamatau ra outou, e haerea paari ia ape i te faaea outou e to outou hoa anaˈe i roto i te tahi mau tupuraa tano ore. Mea maitai aˈe ia amuimui outou e to outou hoa e te tahi atu mau taata aore ra i te mau vahi taata. A taotia i te mau faaiteraa i te here, ma te faatura i te manaˈo hohonu e te haava manaˈo o te tahi.—1/9, api 17, 18.

◻ Eaha te maramarama?

O te neheneheraa ïa e hiˈo i roto i te hoê mea e e ite eaha to roto ma te taa i te tuatiraa i rotopu i to ˈna mau tuhaa taitahi e te taatoaraa, i reira e itehia ˈi te auraa o te reira. (Maseli 4:1)—15/9, api 13.

◻ Eaha ta Iehova e titau ra ia tatou i teie mahana?

Ta Iehova e titau mau ra ia tatou, te faarooraa i Ta ˈna Tamaiti e te peeraa i to ˈna hiˈoraa e ta ˈna mau haapiiraa. (Mataio 16:24; Petero 1, 2:21)—15/9, api 22.

◻ O vai ma anaˈe te ite i te hau?

I te mea e e “Atua hau” o Iehova, o te feia noa ïa o te here ra i te Atua e o te auraro hohonu ra i ta ˈna mau faaueraa tumu tia te ite i te hau. (Roma 15:33)—1/10, api 11.

◻ Nafea te roaaraa mai ia Iosepha te puai morare no te patoi i te vahine a Potiphara i tera e tera mahana?

Ua haafaufaa Iosepha i to ˈna mau taairaa e o Iehova hau atu i ta ˈna haafaufaaraa i te mau peu navenave taime poto. Oia atoa, noa ˈtu e aita oia i raro aˈe i te hoê pǎpǎ ture a te Atua, ua taa maitai ia Iosepha te mau faaueraa tumu morare. (Genese 39:9)—1/10, api 29.

◻ Eaha te faufaaraa o to tatou ineineraa i te faaore i te hara a to tatou mau taeae?

Ua taai-rahi-hia te faaore-noa-raa mai te Atua i ta tatou mau hara i to tatou ineineraa i te faaore i ta vetahi ê. (Mataio 6:12; Luka 11:4)—15/10, api 17.

◻ Eaha te mau hara ta te Mataio 18:15-17 e faataa ra, e na te eaha e faaite ra i te reira?

E mau hara rahi mau ta Iesu i hinaaro e parau, no te mea e nehenehe te taata rave hara e hiˈohia “mai te etene e te telona.” Aita te mau ati Iuda e afaro ra e te mau Etene, e ua ape ratou i te mau telona. No reira, te parau ra te Mataio 18:15-17 no te mau hara rahi, eiaha râ te inoino aore ra te mauiui ta outou e nehenehe noa e faaore e e haamoe. (Mataio 18:21, 22)—15/10, api 19.

◻ Eaha ta te hinaaro-mau-raa i te Parau a te Atua e titau ra?

E turai te hinaaro i te Parau a te Atua i te hoê taata ia ora ia au i ta ˈna mau titauraa. (Salamo 119:97, 101, 105) E titau te reira ia faatitiaifaro tamau i to ˈna mau manaˈo e huru oraraa.—1/11, api 14.

◻ No te mea ua fanaˈo rahi tatou no ǒ mai ia Iehova ra, eaha ïa ta tatou e nehenehe e faahoˈi na te Arii e Taata horoa rahi roa ˈˈe?

Te faaite ra te Bibilia e te ô maitai roa ˈˈe ta tatou e nehenehe e horoa na Iehova, ‘o te hoê ïa tusia arueraa.’ (Hebera 13:15, MN) No te aha? No te mea, ua taai-roa-hia teie tusia i te faaoraraa i te taata, te hoê haapeapearaa rahi a Iehova i teie nei anotau hopea. (Ezekiela 18:23)—1/11, api 21.

◻ Eaha ta Solomona i hinaaro e parau ia ˈna i papai e: “E au te parau a te feia paari ra i te patia”? (Koheleta 12:11)

E turai te mau parau a te feia e paari to ratou no ǒ mai i te Atua ra i te feia taio aore ra te feia e faaroo ra ia haere i mua ia au i te mau parau paari i taiohia aore ra i faaroohia.—15/11, api 21.

◻ Eaha te ite maite no ǒ mai i te Atua ra?

O te aravihi ïa i te faataa ê i te mea tano e te mea hape e i te maiti i te haerea maitai. E horoa mai te haapiiraa e te faaohiparaa i te Parau a te Atua i te ite maite.—15/11, api 25.

◻ Eaha te titauhia ia faito-noa-hia te hoê hinaaroraa e farii i te tahi mau hopoia? (Timoteo 1, 3:1)

E titauhia ia faito-noa-hia te reira e te feruriraa maitai. Eiaha te hoê e farii e rave rahi roa hopoia a erehia ˈtu ai oia i te oaoa i roto i te taviniraa a Iehova. Mea maitai te hoê feruriraa horoa noa, e tia atoa râ i te hinaaroraa ia faahohoˈa i te iteraa i to ˈna mau otia e te feruriraa “haapao maitai.” (Tito 2:12; Apokalupo 3:15, 16)—1/12, api 28.

◻ Nafea ia faaruru i te tautooraa o te hopoia metua?

Te aˈo ra te Atua i te mau metua ia riro ei hiˈoraa, ei hoa, ei feia aparau, e ei orometua haapii. (Deuteronomi 6:6, 7)—1/12, api 32.