E tauturu anei te Bibilia ia tatou i teie mahana?
“FATATA 1 % o te Bibilia taatoa te au ia taiohia, area te toea ra, mea faufaa ore ïa e ua hope te tau.” O te parau teie a te hoê taata apî. E rave rahi o te farii i to ˈna manaˈo. Noa ˈtu e te tamau noa ra te Bibilia i te riro ei buka hoo-roa ˈˈe-hia na te ao atoa nei, e mau mirioni o te tâuˈa rii nei i te reira e o te ore e mataro i ta ˈna mau haapiiraa.
I roto i ta ˈna neneiraa no te Noela 1996, te faataa ra te vea Helemani ra Süddeutsche Zeitung e “te iti noa ˈtura te feia taio [i te Bibilia]. I te tau o te ihi o te natura e te maraaraa o te ereraa i te faaroo, i te hiˈoraa o te rahiraa, mea huru ê te mau aamu Bibilia e mea fifi ia taa.” Te haapapu ra te mau titorotororaa i teie faataaraa. Te faaite ra te tahi mau tuatapaparaa e aita e rave rahi tamarii i ite maitai o vai o Iesu. I roto i te hoê titorotororaa, tei raro aˈe i te afaraa o te mau taata tei uiuihia te nehenehe e faatia i te mau aamu Bibilia o te tamaiti i haamâuˈa i ta ˈna faufaa e te ati Samaria maitai.
Te na ô ra te vea ra Reformiertes Presse a te Ekalesia Evanelia Helevetia e i Helevetia, aita e ani-faahou-hia ra te Bibilia mai tei matauhia na. I rotopu atoa i te feia e Bibilia ta ratou, e pinepine te reira i te î noa i te repo puehu i nia i te paepae. I Beretane, aita te tupuraa i taa ê atu. Ia au i te hoê titorotororaa, noa ˈtu e e Bibilia ta te rahiraa o te taata, aita ratou e taio rii ra i te reira.
I te tahi aˈe pae, mea taa ê roa te manaˈo o te mau mirioni taata na te ao nei no nia i te Bibilia. Te hiˈo nei ratou i te reira mai te Parau a te Atua e te manaˈo nei ratou e mea maitai e mea faufaa te reira. No reira ratou e taio tamau ai i te reira. Ua papai te hoê vahine apî e: “E tamata vau i te taio hoê aore ra e piti pene o te Bibilia i te mau mahana atoa. Mea au roa na ˈu te reira.” E tapao maitai teie mau taata eaha ta te Bibilia e haapii ra, e e tamata ratou i te faaohipa i ta ˈna mau aˈoraa i roto i to ratou oraraa. E tiaturi ratou e e tauturu te Bibilia ia ratou i roto i teie ao arepurepu.
Eaha to outou manaˈo? Mea faufaa ore anei te Bibilia i to tatou nei tau? Aore ra mea faufaa e mea maitai anei te reira? E tauturu anei te Bibilia ia tatou i teie mahana?