Hoê buka aita e tâuˈahia ra e te rahiraa o te feia apî
“NAFEA vau e ite ai e e Parau a te Atua mau anei te Bibilia? Aita vau e anaanatae ra i tera buka,” tera ïa ta te hoê vahine apî o Beate te iˈoa i parau.
I Heremani, i reira o Beate e faaea ˈi, tera atoa te manaˈo o te rahiraa o te feia apî; no reira, aita ratou e manaˈo ra e mea faufaa ia taio i te Bibilia. Ia au i te hoê titorotororaa i ravehia i reira aita i maoro aˈenei, fatata 1 % o te feia apî mea pinepine roa i te taio i te Bibilia, e 2 % mea pinepine, 19 % mea varavara, e fatata i te 80 % aita roa ˈtu. Tera atoa paha te mau numera i te tahi atu â mau fenua, peneiaˈe i to outou fenua atoa. Papu maitai, e buka te Bibilia aita e tâuˈahia ra e te rahiraa o te feia apî.
E ere ïa i te mea maere e parare ai te ite-ore-raa i te Bibilia i roto i te ui apî aˈe! I te omuaraa o te matahiti 2000, ua tapao te vea ra Lausitzer Rundschau i te hoê titorotororaa o tei faaite mai e mea rahi te taata tei matau i te Ture Ahuru e tei faaohipa i te reira ei aveia i roto i te oraraa. No te feia tei hau atu i te 60 matahiti, e 67 % o ratou tei ite i te mau faaueraa e tei arataihia e te reira; no te feia iti aˈe i te 30 matahiti, e 28 % noa ïa. Oia, mea rahi te feia apî aita i matau i te Parau a te Atua.
E manaˈo ê to te tahi pae
I te tahi aˈe pae, na te ao atoa nei, e mau mirioni feia apî tei itea mai ia ratou e mea faufaa roa te Parau a te Atua. Te vai ra te hiˈoraa o Alexander, 19 matahiti, o te taio i te Bibilia i te mau poipoi atoa hou e haere ai i te ohipa. “No ˈu, tera te ravea maitai roa ˈˈe e haamata ˈi i te mahana,” ta ˈna ïa e parau ra. Ua matau o Sandra i te taio i te hoê tuhaa o te Bibilia i te mau ahiahi atoa. “Ua riro te reira ei peu matauhia e au i te mau mahana atoa,” ta ˈna ïa e faataa ra. Ua haamau aˈena o Julia, 13 matahiti, i te hoê porotarama, oia hoi e taio hoê aˈe pene o te Bibilia hou e haere ai e taoto i te po. “Mea au mau â na ˈu te reira, e e hinaaro vau e na reira noa i te tau a muri aˈe.”
Teihea te manaˈo tano e te paari? Mea hoona mau anei ia taio i te Bibilia? Mea faufaa anei te reira no te ui apî aˈe? Eaha to outou manaˈo?