Mau uiraa a te feia taio

Nafea te mau Kerisetiano ia hiˈo maite i te momoˈaraa?

E tumu no te oaoa te hoê momoˈaraa, e ohipa faufaa atoa râ. Eita hoê aˈe Kerisetiano paari e haafaufaa ore i te hoê momoˈaraa, ma te manaˈo e e nehenehe oia e faaore i te momoˈaraa no te hoê tumu haihai i te mau taime atoa. Te tau o te momoˈaraa, e taime atoa ïa no na hoa e piti no te haamatau-maitai-raa ia raua hou te faaipoiporaa.

No nia i teie tumu parau, e tia ia tatou ia ite e e ô atoa mai te mau peu tumu totiale i roto i te faaipoiporaa, e te mau taahiraa avae e aratai i te reira, mea taa ê roa ïa i te tahi atu mau vahi e tau. Te faahohoˈa ra te Bibilia i te reira.

I roto i te tahi tupuraa, ua momoˈahia na tamahine e piti a Lota, o tei ‘ore roa â i ite i te taata,’ i na tane e piti o te fenua iho. ‘Ua faaipoipo na hunoa a Lota i ta ˈna ra pue tamahine,’ aita râ te Bibilia e faaite ra ia tatou no te aha aore ra nafea te momoˈaraa i te tupuraa. E mau tamahine paari anei? E tuhaa faufaa anei ta raua i roto i te maitiraa i te taata ta raua e faaipoipo atu? Ua momoˈahia anei raua ma te rave i te tahi mau taahiraa avae i mua i te huiraatira? Aita tatou i ite. (Genese 19:8-14) Ua ite tatou e ua rave Iakoba i ta ˈna iho faaauraa e te metua tane o Rahela no te faaipoipo ia Rahela i muri aˈe i to ˈna ohiparaa e hitu matahiti na ˈna. Noa ˈtu e ua pii o Iakoba ia Rahela “ta ˈu vahine,” aita raua i taoto noa ˈˈe i roto i taua mau matahiti ra. (Genese 29:18-21) Te tahi atu hiˈoraa, hou oia e nehenehe ai e faaipoipo i te tamahine a Saula, ua upootia mai o Davida i nia i te mau Philiseti. I to ˈna farereiraa na nia i te titauraa a Saula, ua nehenehe o Davida e faaipoipo i te tamahine ra o Mikala. (Samuela 1, 18:20-28) Mea taa ê teie mau “momoˈaraa” te tahi i te tahi e te mea i matauhia i roto e rave rahi fenua i teie mahana.

E mau faatureraa to te Ture a Mose no nia i te faaipoiporaa e te momoˈaraa. Ei hiˈoraa, e nehenehe te hoê tane e faaea hau atu i te hoê vahine; e nehenehe oia e faataa no te mau tumu rau, noa ˈtu eita te vahine e nehenehe. (Exodo 22:16, 17; Deuteronomi 24:1-4) E tia i te hoê tane i taoto i te hoê paretenia i ore i momoˈahia ia faaipoipo ia ˈna mai te peu e ua farii te metua tane, eita oia e nehenehe noa ˈˈe e faataa ia ˈna. (Deuteronomi 22:28, 29) E faaohipahia te tahi atu mau ture i roto i te faaipoiporaa, mai te mau taatiraa te tia ia apehia. (Levitiko 12:2, 5; 15:24; 18:19) Eaha te mau faatureraa e faaohipahia no te momoˈaraa?

E tiaraa taa ê to te hoê vahine Iseraela i momoˈahia ia au i te ture e to te hoê vahine i ore i momoˈahia; i roto i te tahi mau tuhaa, ua riro oia ei vahine faaipoipohia. (Deuteronomi 22:23-29; Mataio 1:18, 19) Eita te mau ati Iseraela e nehenehe e momoˈa aore ra e faaipoipo atu e vetahi mau fetii. Mea pinepine e mau fetii piri ratou, ua opanihia râ te tahi mau momoˈaraa e mau faaipoiporaa no te tufaaraa faufaa. (Levitiko 18:6-20; a hiˈo i Te Pare Tiairaa o 15 no Tiunu 1978, mau api 25-28 [Farani].) E mea papu maitai e eita e tia i te mau tavini a te Atua ia haafaufaa ore i te momoˈaraa.

Tei raro aˈe te mau ati Iseraela i teie mau faatureraa atoa o te Ture, aita râ te mau Kerisetiano i raro aˈe faahou i te Ture, oia atoa i to ˈna mau faatureraa no nia i te momoˈaraa aore ra te faaipoiporaa. (Roma 7:4, 6; Ephesia 2:15; Hebera 8:6, 13) Inaha, ua haapii Iesu e ua taa ê te ture Kerisetiano no te faaipoiporaa i to te Ture. (Mataio 19:3-9) Aita râ oia i faaiti mai i te faufaaraa o te faaipoiporaa, eita atoa no te momoˈaraa. No reira, eaha ïa te faufaaraa o te momoˈaraa i rotopu i te mau Kerisetiano?

I te mau fenua e rave rahi, na te mau taata e maiti no ratou iho o vai ta ratou e faaipoipo. I te taime a tǎpǔ ai te hoê tane e te hoê vahine i te faaipoipo te tahi i te tahi, ua momoˈahia ïa raua. Mea pinepine aita te tahi atu taahiraa avae e titauhia no te faatupu i te momoˈaraa. Oia mau, i te tahi mau vahi, e peu matauhia ia pûpû te hoê tane na ta ˈna vahine i te hoê tapea rima no te faˈi i to raua momoˈaraa. Aore ra e peu tumu ia faaara ˈtu i te momoˈaraa i te mau fetii e te mau hoa, mai te hoê tamaaraa utuafare aore ra te tahi atu amuamuraa. Na raua iho e rave i taua mau faaotiraa ra, e ere te reira i te mau titauraa a te mau Papai. Te momoˈaraa, o te faaauraa ïa a na taata e piti.a

Eiaha te hoê Kerisetiano e ru noa i te haamatau, te momoˈa, aore ra te faaipoipo. E nenei matou i te tumu parau i niuhia i nia i te Bibilia o te nehenehe e tauturu i te feia faaea taa noa ia faaoti e e mea paari anei ia haamata i te haamatau aore ra ia rave i te mau taahiraa avae no te momoˈa aore ra no te faaipoipo.b Te tapao faufaa o teie aˈoraa, oia hoi e faaipoiporaa tamau te faaipoiporaa Kerisetiano.—Genese 2:24; Mareko 10:6-9.

E tia i na Kerisetiano e piti ia matau maitai mau te tahi i te tahi hou raua e haamata ˈi i te feruri i te momoˈaraa. E nehenehe te taata taitahi e uiui e, ‘Te papu mau ra anei ia ˈu i te huru pae varua o te tahi e to ˈna paieti i te Atua? E nehenehe anei au e feruri i te tavini i te Atua e o ˈna no te oraraa taatoa? E faaite tahaa mau anei mâua i te mau huru taata te tahi i te tahi? E tiaturi anei au e tuati mâua e a muri noa ˈtu? Ua ite maitai anei mâua i te mau ohipa i mutaa iho e te mau tupuraa i teie nei no nia te tahi i te tahi?’

I te taime a momoˈahia ˈi na Kerisetiano e piti, e mea tano no raua e no vetahi atu ia tiaturi e e tupu te faaipoiporaa i muri iho. Ua aˈo o Iesu e: “Ia riro . . . ta outou oia ei oia, e ta outou aita ei aita.” (Mataio 5:37) E na reira te mau Kerisetiano i momoˈahia. I te tahi tupuraa varavara râ, e nehenehe te hoê Kerisetiano i momoˈahia e ite i te tahi ohipa faufaa i ore i faahitihia aore ra i hunahia hou te momoˈaraa. E riro paha te reira ei tupuraa faufaa no nia i te oraraa o te tahi i mutaa iho, te mau ohipa iino aore ra te mau peu morare tia ore. E tia i te Kerisetiano o te ite noa ˈtu i te reira ia faaoti eaha ta ˈna e rave. Peneiaˈe e aparau roa ˈtu na taata e piti no nia i te tupuraa e e farii e tamau noa to raua momoˈaraa. Aore ra e nehenehe paha raua e faaoti i te faaore i te momoˈaraa. Noa ˈtu e ohipa na te taata taitahi i te na reiraraa—e ere te reira i te tahi mea ta vetahi ê e faahepo, e ore e tamata i te faataa i muri iho, aore ra e haava—e faaotiraa teimaha roa te reira. I te tahi aˈe pae, e nehenehe te hoê o te ite i te tupuraa faufaa e faaoti iho i te faaore i te momoˈaraa, noa ˈtu e e hinaaro te tahi atu taata e tamau noa te reira.—A hiˈo i te “Mau uiraa a te feia taio” i roto i Te Pare Tiairaa o te 15 no Setepa 1975 (Farani).

Te vai ra te tumu papu no te faatitiaifaro i teie mau tupuraa hou a opua ˈi i te hoê faaipoiporaa. Ua parau o Iesu e te tumu otahi ia au i te mau Papai no te faataa o te faatiamâ i te hoê ia faaipoipo faahou oia, o te por·neiʹa ïa, te peu taatiraa tia ore a te tahi atu hoa faaipoipo. (Mataio 5:32; 19:9) Aita oia i parau e e nehenehe e faaorehia te hoê faaipoiporaa ia au i te ture na roto i te faataaraa mai te peu e e ite te hoê i te hoê fifi rahi aore ra te hoê hara ino hou te faaipoiporaa.

Ei hiˈoraa, i te tau o Iesu, e nehenehe te rooraahia i te maˈi lepera e ite-papu-hia. Mai te peu e ua ite te hoê tane ati Iuda e ua roohia ta ˈna vahine (ma te ite aore ra ma te ite ore) a faaipoipo ai oia ia ˈna, e tumu anei to ˈna no te faataa? E nehenehe ïa te hoê ati Iuda i raro aˈe i te Ture e faataa, aita râ Iesu i parau e e tano te reira no ta ˈna mau pǐpǐ. E rave anaˈe i te tahi mau tupuraa o teie tau. E faaipoipo paha te hoê tane i roohia i te maˈi purumu syphilis, te herpès génital, te tirotiro VIH, aore ra te tahi atu maˈi pee ma te ore e faaite i te tupuraa. Peneiaˈe, ua roohia oia i teie maˈi na roto i te peu taatiraa tia ore hou aore ra i te roaraa o te momoˈaraa. Eita te vahine tei ite i muri iho i to ˈna maˈi aore ra i to ˈna taiataraa i mutaa iho (tae noa ˈtu te oreraa e fanau aore ra te paruparu) e taui i te mea e ua faaipoipohia raua i teie nei. E ere te oraraa au ore no mutaa iho hou te faaipoiporaa e riro e niu i roto i te mau Papai no te faaore i te faaipoiporaa mai te peu e ua roohia oia i te tahi maˈi aore ra ua hapû oia i te hoê tamarii no te tahi atu tane i te faaipoiporaahia. I teie nei, ua faaipoipo raua e ua rave raua iho i te hara te tahi i te tahi.

Parau mau, mea varavara teie mau tupuraa, e haapapu noa râ teie mau hiˈoraa i te manaˈo faufaa: Eiaha e haafaufaa-ore-hia te momoˈaraa. Hou e i roto i te hoê momoˈaraa, ia tutava ïa te mau Kerisetiano ia matau maitai te tahi i te tahi. Ia faaitoito raua ia riro ei taata haavare ore i nia i te mea ta te tahi e hinaaro ra e ite aore ra e tia ia ite. (I te tahi mau fenua, e titauhia i na hoa e piti ia au i te ture ia hiˈopoahia e te taote hou te faaipoiporaa. E nehenehe vetahi e hinaaro i te hoê hiˈopoaraa no te haamaramaramaraa iho â ia ratou.) No reira, e riro te oaoa e te faufaaraa o te hoê momoˈaraa ei opuaraa maitai e fanaˈo ai na taata e piti i te faaipoiporaa oaoa roa e te faufaa.—Maseli 5:18, 19; Ephesia 5:33.

[Nota i raro i te api]