Te hereraa i to “te fetii faaroo ra”

E TAAIRAA utuafare fetii to te mau Kerisetiano mau i rotopu ia ratou ratou iho. Oia mau, mai te senekele matamua o to tatou tau, ua pii ratou i te tahi e te tahi e “taeae” e e “tuahine.” (Mareko 3:31-35; Philemona 1, 2) E ere e mau parau noa teie; ua riro ratou ei faataaraa no te huru e faaitehia ra e te mau taata haamori i te Atua i nia i te tahi e te tahi. (A faaau e te Ioane 1, 4:7, 8.) Te na ô ra Iesu e: “O te mea teie e ite ai te taata atoa e, e pǐpǐ outou na ˈu ia [“here,” MN] outou ia outou iho.”—Ioane 13:35.

Ua ite-papu-hia teie here i te avaˈe Tiurai 1997 a apeehia ˈi te hoê paˈurâ i tamau noa na hoi e te mau ûa puai e te pape pue i te fenua Tireni. Ua hinaaro taue aˈera e rave rahi taata i te maa, te ahu e te tahi atu mau ohipa. I roto i te mau ati rahi, te tutava nei te mau Ite no Iehova i te pee i te aˈoraa a Paulo i to Galatia: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.”—Galatia 6:10.

No reira, ua faanahonaho oioi te mau Ite no Iehova ia ratou iho no te pahono atu. Ua haaputuhia te maa, te ahu, te mau mea mai te reira te huru, tei faataahia, tei puohuhia e tei haponohia ˈtu i muri iho i te fenua i atihia. Ua horoa atoa te mau tamarii i te mau taoˈa hauti. Ua maere roa te hoê tuahine i to ˈna iteraa i te Piha no te Basileia tei î i teie mau tauihaa tauturu. “Ua hitimaue au, ma te taa ore e e ata anei au aore ra e taˈi,” o ta ˈna ïa e parau ra. “Tera iho â te mea ta matou e hinaaro ra.”

I muri iho, ma te manaˈo-ore-hia, ua tairi te hoê aueueraa fenua i te hoê tuhaa o taua noâ fenua ra i inohia e te vai pue. E rave rahi fare tei paparari. No te faaruru i te mau aniraa, ua haamauhia e rave rahi tomite tauturu. Ua ohipa te mau Tomite Paturaa no te Fenua, tei haapao-noa-hia hoi e te tomite paturaa fare a te mau Ite no Iehova, e ua horoa i to ratou turu. Te faahopearaa? Ua horoahia te mau fare e au—tei faanahohia e tei patuhia e te mau taeae—no te feia aita to ratou e fare faahou. Noa ˈtu e aita teie mau fare i oti roa, mea taa ê roa te reira i tei horoahia e te moni tarahu na roto i te mau tutavaraa a te mau taata e ere i te Ite e aita hoi e mau tahua e e mau haamaramaramaraa e aita i penihia.

Ua tere mai te tahi mau taeae na te atea mai no te tauturu. Ua tere te peretiteni o te Tomite Paturaa no te Fenua e hiˈopoa haere e piti mahana—noa ˈtu tei nia oia i te hoê parahiraa turairai. Ua rohi te hoê taeae matapo, ma te amo i te mau pou i te tamuta ra no te tâpû i te reira i te faito e hinaarohia. Ua haaputu te hoê taeae tariˈa turi i te mau pou e ua afai i te vahi e hinaarohia ˈi.

Ua maere roa e rave rahi taata e mataitai ra i te tauturu i horoahia e te mau taeae. I te hoê oire, ua vaiihohia te hoê pereoo mutoi i pihaiiho i te hoê fare i penihia a te hoê tuahine. Ua uiui maere te mutoi. Ua ui atu te tahi i te hoê taeae e: “O vai ma teie mau taata rave ohipa e au ra e mea oaoa roa ratou, e ehia moni tei aufauhia ia ratou?” Ua faataa te taeae ra e e mau taata tauturu pauroa ratou. Ua faataa te hoê o te mau mutoi e te aufau ra oia i te hoê tuhaa ahuru i ta ˈna ekalesia, teie râ, aita atoa ta ˈna orometua i haere mai e farerei ia ˈna mai te aueueraa fenua mai â! I te mahana i muri iho, ua niuniuhia mai te tuahine e te hoê raatira mutoi. Ua hiˈopoa atoa oia i te feia rave ohipa. Ua parau oia e ua maere roa oia i te feruriraa anaanatae o te feia rave ohipa e ua hinaaro oia e apiti atu ia ratou!

Oia mau, ua riro te horoaraa i te tauturu i Tireni ei tupuraa oaoa no te feia rima tauturu e e faaiteraa maitai roa no te feia e mataitai ra.