E haafaufaa anaˈe i “te mau ô taata”
“E [haapao] atu outou i te feia i rave [puai] i te ohipa i roto ia outou na . . . e ia rahi roa te faatura ia ratou ma te [here], no ta ratou ra ohipa.”—TESALONIA 1, 5:12, 13; MN.
1. Ia au i te Ohipa 20:35, eaha ta te horoaraa e nehenehe e rave? A faataa.
“E MEA maitai i te horoa ˈtu i te rave mai.” (Ohipa 20:35) Te haamanaˈo ra anei outou i te taime hopea i ite ai outou i te tanoraa o taua mau parau a Iesu ra? O te hoê paha ô ta outou i horoa na te hoê taata mea here na outou. Ua maiti maitai outou i te reira, no te mea ua hinaaro outou ia riro taua ô ra ei ohipa ta tei herehia e outou e poihere. Auê te mata oaoa o tei herehia e outou i te tamahanahana i to outou mafatu e! Ia turaihia ma te au, e faaite ïa te horoaraa i te here, e e mana to te faaiteraa i te here e faaoaoa ia outou.
2, 3. (a) No te aha e nehenehe ai e parau e aita e taata oaoa aˈe maoti râ o Iehova, e nafea te faanahoraahia “te mau ô taata” e faaoaoa ˈi i to ˈna mafatu? (b) Eaha ta tatou e ore e hinaaro e rave i nia i te hoê ô a te Atua?
2 O vai ïa te taata oaoa aˈe maoti râ o Iehova, Tei ho mai i “te mau mea maitatai” atoa? (Iakobo 1:17; Timoteo 1, 1:11) Na te here i turai ia ˈna ia horoa i te mau ô atoa. (Ioane 1, 4:8) E parau mau iho â râ no te ô ta te Atua i horoa i te amuiraa na roto i te Mesia—“te [“mau ô,” MN] taata.” (Ephesia 4:8) Te faanahoraahia te mau matahiapo no te haapao i te nǎnǎ, e faaiteraa ïa i te here hohonu o te Atua no to ˈna nunaa. Mea maiti-maitai-hia teie mau taata—e tia ia ratou ia faaî i te mau titauraa Bibilia. (Timoteo 1, 3:1-7; Tito 1:5-9) Ua ite ratou e e tia ia ratou ia “faaherehere i te nǎnǎ,” e tumu ïa ta te mau mamoe no te mauruuru i taua mau tiai mamoe î i te here ra. (Ohipa 20:29; Salamo 100:3) Ia ite Iehova e ua î te mafatu o ta ˈna mau mamoe i te mauruuru, mea papu maitai e e oaoa atoa to ˈna mafatu!—Maseli 27:11.
3 Papu maitai e eita tatou e hinaaro e faaiti i te faufaa o te hoê ô no ǒ mai i te Atua ra; eita atoa tatou e hinaaro e haafaufaa ore i ta ˈna mau ô. E piti ïa uiraa e hiti maira: Nafea te mau matahiapo ia hiˈo i ta ratou hopoia i roto i te amuiraa? E nafea te toea o te nǎnǎ e faaite ai e te haafaufaa ra ratou i “te mau ô taata”?
‘E hoa rave ohipa matou no outou’
4, 5. (a) Ua faaau Paulo i te amuiraa i te aha, e no te aha e tano ai teie faahohoˈaraa? (b) Eaha ta te faahohoˈaraa a Paulo e faaite ra no nia i ta tatou huru hiˈoraa e raveraa te tahi i te tahi?
4 Ua horoa Iehova i te tahi faito mana i roto i te amuiraa na “te mau ô taata.” Parau mau, eita te mau matahiapo e hinaaro e faaohipa hape i to ratou mana, ua ite râ ratou e mea ohie roa ia na reira no te mea e taata tia ore ratou. Nafea ïa ratou ia hiˈo i to ratou iho taairaa e te toea o te nǎnǎ? A hiˈo ïa i te faahohoˈaraa i faahitihia e te aposetolo Paulo. I muri aˈe i to ˈna parauraa no te aha “te mau ô taata” i horoahia mai ai, teie ta Paulo i papai: “Ia tupu i te auraa ˈtu ia ˈna i te upoo ra i te Mesia, i te mau mea atoa nei: no ˈna hoi te au-maite-raa o te tino atoa ra, e i ati ai hoi no te maitai o te mau tiaatiraa atoa, e te puai au o te mau vahi atoa ra, tupu aˈera te tino i te rahiraa o to ˈna iho maitai ma te aroha.” (Ephesia 4:15, 16) No reira, te faaau ra Paulo i te amuiraa, tae noa ˈtu i te mau matahiapo e te tahi atu mau melo, i te hoê tino taata. No te aha teie faahohoˈaraa e tano ai?
5 Mea rahi te mau melo taa ê o te hoê tino taata, hoê noa râ upoo. Tera râ, aita hoê aˈe mea i roto i te tino—mai te hoê uaua iˈo, te hoê uaua uira, te hoê uaua toto—e mea faufaa ore. Mea faufaa te melo taitahi e te turu ra te reira i te oraora-maitai-raa e te nehenehe o te taatoaraa. Oia atoa no te amuiraa, mea rahi te mau melo taa ê, e nehenehe râ te melo taitahi—apî aore ra ruhiruhia, pautuutu aore ra paruparu—e turu i te oraora-maitai-raa e te nehenehe i te pae varua o te amuiraa taatoa. (Korinetia 1, 12:14-26) Eiaha hoê aˈe e manaˈo e mea faufaa ore oia. I te tahi aˈe pae, eiaha vetahi e manaˈo e mea teitei aˈe ratou, no te mea e melo anaˈe tatou pauroa—te mau tiai mamoe e te mau mamoe atoa—no te tino, tera râ, hoê noa upoo, oia te Mesia. Te faataa ra Paulo i te hoê hohoˈa mahanahana o te here, te haapao, e te faatura e tia ia tatou ia faaite te tahi i te tahi. Ma te farii i te reira, e tauturuhia ïa te mau matahiapo ia tapea i te hoê manaˈo haehaa e te faito noa no nia i ta ratou hopoia i roto i te amuiraa.
6. Noa ˈtu to ˈna tiaraa aposetolo, nafea Paulo i te faaiteraa i te hoê huru feruriraa haehaa?
6 Eita teie “mau ô taata” e imi i te faatere i te oraraa aore ra te faaroo o to ratou mau hoa Kerisetiano. Teie ta Paulo i parau i to Korinetia ma te haehaa, noa ˈtu e e tiaraa aposetolo to ˈna: “E ere . . . mai te mea e o matou te fatu o to outou faaroo, ei [hoa rave ohipa] râ matou [no] to outou oaoa; [maoti hoi to outou faaroo e mau ai outou].” (Korinetia 2, 1:24; MN) Aita Paulo i hinaaro e faatere i te faaroo e te huru oraraa o to ˈna mau taeae. Aita mau â oia i ite i te faufaaraa no ˈna ia na reira, no te mea ua tiaturi oia e e mau tane e mau vahine haapao maitai aˈena ratou i riro ei melo no te faanahonahoraa a Iehova no te mea ua hinaaro ratou e rave i te mea tia. No reira, te parau ra Paulo no nia ia ˈna iho e to ˈna hoa ratere o Timoteo e: ‘Ta mâua ohipa, o te rohiraa ïa e o outou no te tavini i te Atua ma te oaoa.’ (Korinetia 2, 1:1) Auê ïa feruriraa haehaa mau e!
7. Eaha ta te mau matahiapo haehaa e taa ra no nia i ta ratou hopoia i roto i te amuiraa, e eaha ta ratou e tiaturi ra i to ratou mau hoa rave ohipa?
7 Tera atoa te ohipa a “te mau ô taata” i teie mahana. E ‘mau hoa rave ohipa ratou no to tatou oaoa.’ Ua taa i te mau matahiapo haehaa e e ere na ratou e faaoti i tei maraa ia vetahi ê ia rave i roto i te taviniraa a te Atua. Ua ite ratou e noa ˈtu e e nehenehe ratou e faaitoito ia vetahi ê ia faarahi aore ra ia haamaitai i ta ratou taviniraa, no roto mai te taviniraa i te Atua i te hoê mafatu tae. (A faaau e te Korinetia 2, 9:7.) Te tiaturi nei ratou e mai te peu e te oaoa ra to ratou mau hoa rave ohipa, e rave ïa ratou i tei maraa ia ratou. Te hinaaro mau nei ratou e tauturu i to ratou mau taeae ia “haamori ia Iehova ma te oaoa.”—Salamo 100:2.
Te tautururaa i te taatoaraa ia tavini ma te oaoa
8. Eaha te tahi mau ravea e tauturu ai te mau matahiapo i to ratou mau taeae ia tavini ia Iehova ma te oaoa?
8 E te mau matahiapo, nafea outou e nehenehe ai e tauturu i to outou mau taeae ia tavini ma te oaoa? E nehenehe outou e faaitoito na roto i to outou hiˈoraa. (Petero 1, 5:3) A faaite i to outou itoito e to outou oaoa i roto i te taviniraa, e e turaihia ïa vetahi ê ia pee i to outou hiˈoraa. A haapopou ia vetahi ê no ta ratou mau tutavaraa haavare ore. (Ephesia 4:29) E turai te haapopouraa mahanahana e te haavare ore ia vetahi ê ia manaˈo e mea faufaa ratou e te hinaarohia ra ratou. E faaitoito te reira i te mau mamoe ia hinaaro e rave i te mea maitai roa ˈˈe no te tavini i te Atua. A haapae i te mau faaauraa tano ore. (Galatia 6:4) E riro taua mau faaauraa ra i te haaparuparu eiaha râ i te turai ia vetahi ê ia haamaitai ia ratou. Hau atu â, e ere hoê â huru tupuraa e aravihi to te mau mamoe a Iehova. Mai ia Paulo, a faaite i te tiaturi i to outou mau taeae. E “tiaturi, MN” te here “i te mau mea atoa,” e tia ïa ia tatou ia tiaturi e te here ra to tatou mau taeae i te Atua e te hinaaro ra ratou e faaoaoa ia ˈna. (Korinetia 1, 13:7) Ia ‘faatura outou ia vetahi ê,’ e huti mai ïa outou i te mea maitai roa ˈˈe i roto ia ratou. (Roma 12:10) Ia papu ia outou e ia faaitoitohia e ia tamǎrûhia te mau mamoe, e rave ïa te rahiraa i tei maraa ia ratou no te tavini i te Atua, e e ite ïa ratou i te oaoa i roto i taua taviniraa ra.—Mataio 11:28-30.
9. Eaha te manaˈo no nia i te mau matahiapo e tauturu i te matahiapo taitahi ia tavini ma te oaoa?
9 Ia hiˈo outou ia outou iho ma te haehaa ei “hoa rave ohipa,” e tauturuhia ïa outou ia tavini ma te oaoa e ia haafaufaa i te mau aravihi otahi o ta outou mau matahiapo. To te matahiapo taitahi to ˈna iho maramarama e to ˈna iho aravihi ta ˈna e nehenehe e faaohipa no te maitai o te amuiraa. (Petero 1, 4:10) Mea ite paha hoê i te horoa i te haapiiraa. Area te tahi atu ra, mea ite ïa i te faanaho. E te tahi atu, mea ohie paha ia paraparau ia ˈna no to ˈna huru mahanahana e te aroha. Inaha, e ere hoê â faito ite to te mau matahiapo. No te mea anei e e ite taa ê to te hoê matahiapo—ei hiˈoraa, te ite i te horoa i te haapiiraa—mea teitei aˈe ïa oia i te tahi atu? Eita roa ˈtu! (Korinetia 1, 4:7) I te tahi aˈe pae, aita e faufaa ia pohehae outou no to te tahi aravihi aore ra ia manaˈo outou e mea maˈua outou ia haapopou vetahi ê i te tahi atu matahiapo no to ˈna aravihi. A haamanaˈo, e aravihi atoa to outou ta Iehova e ite ra i roto ia outou. E e nehenehe oia e tauturu ia outou ia haamaitai i taua mau aravihi ra e ia faaohipa i te reira no te maitai o to outou mau taeae.—Philipi 4:13.
‘E faaroo e e auraro’
10. No te aha e tano ai ia faaite tatou i to tatou mauruuru no “te mau ô taata”?
10 Ia noaa mai ia tatou te hoê ô, mea tano ïa ia haamauruuru tatou. “Ia mauruuru roa outou,” ta te Kolosa 3:15 ïa e parau ra. E “te mau ô taata” ïa, te ô taoˈa rahi ta Iehova i horoa mai na tatou? Parau mau, e haamauruuru tatou na mua ia Iehova, te Atua horoa maitai. E “te mau ô taata” iho ïa? Nafea tatou e nehenehe ai e faaite i to tatou mauruuru ia ratou?
11. (a) Nafea tatou e faaite ai i to tatou mauruuru no “te mau ô taata”? (b) Eaha te auraa o te mau parau ra “e faaroo” e “e auraro”?
11 E nehenehe tatou e faaite i to tatou mauruuru no “te mau ô taata” na roto i te pee-oioi-raa i ta ratou mau aˈoraa e mau faaotiraa i niuhia i nia i te Bibilia. Te aˈo maira te Bibilia e: “E faaroo i to outou mau aratai, e auraro atu outou; te faaitoito ra hoi ratou i to outou mau [“nephe,” MN], e faaitehia hoi ta ratou parau; ia na reira râ ratou ma te oaoa, eiaha ma te oto: e ore hoi e faufaahia ta outou i te reira.” (Hebera 13:17) A tapao na e e tia ia tatou eiaha “e faaroo” noa ia “auraro” atoa râ i te mau aratai. Te auraa o te parau Heleni no te parau ra “e auraro” oia ïa “a tuu ia outou.” Teie ta te taata ite Bibilia ra o R. C. H. Lenski e parau ra no nia i te mau taˈo ra “e faaroo” e “e auraro”: “E faaroo te hoê taata ia farii oia i tei faauehia ia ˈna ia rave, ua papu ia ˈna e mea tano e mea maitai te reira; e tuu te hoê taata ia ˈna . . . mai te peu e e manaˈo taa ê roa to ˈna.” Ia taa e ia farii tatou i te aratairaa a te feia e faatere nei ia tatou, e faaroo ïa tatou ma te aau tae. Nafea râ ia ore tatou e taa no te aha te hoê faaotiraa taa ê i ravehia ˈi?
12. No te aha e tia ˈi ia tatou ia auraro, aore ra ia tuu, noa ˈtu e aita tatou e taa maitai ra no te aha i ravehia ˈi te hoê faaotiraa taa ê?
12 I ǒ nei tatou e titauhia ˈi ia auraro, aore ra ia tuu. No te aha? No te mea e tia ia tatou ia tiaturi e te ohipa nei teie mau tane aravihi i te pae varua no to tatou maitai. Inaha, ua ite maitai ratou e e hopoia ta ratou i mua ia Iehova no te haapao i te mau mamoe i horoahia ia ratou. (Iakobo 3:1) Hau atu â, e tia ia tatou ia haamanaˈo e aita tatou i ite i te mau tupuraa huna atoa i aratai ia ratou ia rave i te hoê faaotiraa ma te ite.—Maseli 18:13.
13. Na te aha e tauturu ia tatou ia auraro i te mau faaotiraa i te pae haavaraa a te mau matahiapo?
13 Eaha ïa no nia i te auraroraa i te mau faaotiraa i te pae haavaraa? Parau mau, e ere te reira i te mea ohie, mai te peu iho â râ e ua ravehia te hoê faaotiraa e tiavaru i te tahi taata herehia e tatou—te hoê fetii aore ra te hoê hoa piri. I ǒ nei faahou, mea maitai aˈe ia farii i te faaotiraa a “te mau ô taata.” E nehenehe ta ratou e faaite hau atu â i te paetahi ore ia tatou nei, e ua ite hau atu â atoa ratou i te mau tupuraa. E pinepine teie mau taeae i te mauiui no teie mau faaotiraa; e hopoia faufaa mau ia ‘haava no Iehova.’ (Paraleipomeno 2, 19:6) Te tutava rahi nei ratou i te faaite i te aroha, no te mea ua ite ratou e “ua ineine” te Atua “i te faaore i te hara.” (Salamo 86:5, MN) E tia atoa râ ia ratou ia ara ia vai mâ noa te amuiraa, e te faaue ra te Bibilia ia tiavaru ratou i te feia rave hara tatarahapa ore. (Korinetia 1, 5:11-13) I roto i te mau tupuraa e rave rahi, e farii te taata rave hara i te faaotiraa. E tia ia aˈohia oia ia taa ia ˈna e ua hape oia. Ia auraro tatou, te feia e here ra ia ˈna, i te faaotiraa i ravehia, e riro ïa tatou i te tauturu ia ˈna ia fanaˈo i te aˈo.—Hebera 12:11.
“Ia rahi roa te faatura ia ratou”
14, 15. (a) Ia au i te Tesalonia 1, 5:12, 13, no te aha e au ai i te mau matahiapo to tatou faatura? (b) No te aha e parauhia ˈi e te “rave puai” ra te mau matahiapo ‘i te ohipa i rotopu ia tatou’?
14 E nehenehe atoa tatou e faaite i to tatou mauruuru no “te mau ô taata” na roto i te faaturaraa ia ratou. I to ˈna papairaa i te amuiraa no Tesalonia, teie ta Paulo i aˈo i te mau melo: “E [haapao] atu outou i te feia i rave [puai] i te ohipa i roto ia outou na, o te mau faaite i nia iho ia outou i te Fatu nei, o tei aˈo atu hoi ia outou; e ia rahi roa te faatura ia ratou ma te [here], no ta ratou ra ohipa.” (Tesalonia 1, 5:12, 13; MN) E “rave puai i te ohipa”—aita anei te reira e faataa ra i te mau matahiapo itoito e horoa ra ia ratou no tatou? A feruri na i te hoê taime i te hopoia teimaha ta teie mau taeae here e amo nei.
15 I roto i te mau tupuraa e rave rahi, e mau tane ratou e rave nei i te ohipa no te faatamaa i to ratou utuafare. (Timoteo 1, 5:8) Mai te peu e e tamarii ta te matahiapo, e hinaaro teie mau tamarii apî i te taime e te ara-maite-raa o to ratou metua tane. E tia ia ˈna ia tauturu ia ratou ia rave i ta ratou ohipa haapiiraa, e ia faanaho atoa i te tahi taime no te faaanaanatae i ta ratou mau tamarii ma te au. (Koheleta 3:1, 4) Te mea faufaa roa ˈˈe, e haapao oia i te mau hinaaro pae varua o to ˈna utuafare, ma te faatere tamau i te hoê haapiiraa Bibilia utuafare, ma te poro e o ratou i roto i te taviniraa, e ma te afai ia ratou i te mau putuputuraa Kerisetiano. (Deuteronomi 6:4-7; Ephesia 6:4) Eiaha ia moehia ia tatou e taa ê noa ˈtu i teie mau hopoia matauhia e te rahiraa o tatou, e hopoia hau ta te mau matahiapo: mai te faaineineraa i te mau tumu parau o te putuputuraa, te tere farereiraa a te tiai mamoe, te haapaoraa i te maitairaa i te pae varua o te amuiraa e, ia titauhia, te raveraa i te tahi mau haavaraa. Te amo nei vetahi i te mau hopoia hau i te pae no te mau tairururaa haaati, mataeinaa, te paturaa i te Piha no te Basileia, e te mau Tomite Tuatiraa e te Fare maˈi. Oia mau, te “rave puai” nei teie mau taeae “i te ohipa”!
16. A faataa i te mau ravea e nehenehe ai tatou e faaite i te mauruuru i te mau matahiapo.
16 Nafea tatou e faatura ˈi ia ratou? Te na ô ra te hoê maseli a te Bibilia e: “E maitai rahi hoi to te parau ia au te parauraa.” (Maseli 15:23; 25:11) E nehenehe ïa te mau parau haamauruuru e te faaitoito mau e faaite ia ratou e aita tatou e haafaufaa ore ra i ta ratou ohipa puai. Ia faaite atoa tatou i te manaˈo faito noa i ta tatou e titau ra ia ratou. I te hoê pae, eiaha tatou e taiâ i te ani i ta ratou tauturu. Te vai ra te mau taime e ‘horuhoru to tatou aau’ e e hinaaro tatou i te faaitoitoraa, te aratairaa, aore ra te aˈoraa a te Bibilia e horoahia mai e te feia “[“aravihi,” MN] ia haapii” i te Parau a te Atua. (Salamo 55:4; Timoteo 1, 3:2) I te hoê â taime, e tia ia tatou ia haamanaˈo e eita te hoê matahiapo e nehenehe e horoa rahi mai i to ˈna taime no tatou, no te mea eita ta ˈna e nehenehe e tuu i te hiti i te mau hinaaro o to ˈna utuafare aore ra o vetahi ê i roto i te amuiraa. Ia ‘aroha’ tatou i teie mau taeae e rave puai ra i te ohipa, eita ïa tatou e hinaaro e titau rahi ia ratou. (Petero 1, 3:8) Eita, e faaite tatou i to tatou mauruuru no te taime e te ara-maite-raa ta ratou e nehenehe e horoa mai no tatou ma te au.—Philipi 4:5.
17, 18. Eaha te mau haapaeraa e ravehia ra e te mau vahine e rave rahi e mau matahiapo ta ratou mau tane, e nafea tatou e faaite ai e aita tatou e haafaufaa ore ra i teie mau tuahine haapao maitai?
17 E te mau vahine ïa a te mau matahiapo? Eita anei e au atoa ia ratou to tatou faatura? Inaha, te tufa nei ratou i ta ratou mau tane na te amuiraa. E titau pinepine te reira ia ratou ia rave i te mau haapaeraa. I te tahi mau taime, e tia i te mau matahiapo ia haapao i te mau ohipa a te amuiraa i te po maoti i te horoa i te taime no to ratou utuafare. I roto i te amuiraa e rave rahi, ua ineine te mau vahine Kerisetiano haapao maitai i te rave i taua mau haapaeraa ra ia nehenehe ta ratou mau tane e haapao i te mau mamoe a Iehova.—A faaau e te Korinetia 2, 12:15.
18 Nafea tatou e faaite ai e aita tatou e haafaufaa ore ra i teie mau tuahine Kerisetiano haapao maitai? Papu maitai e e ere na roto i te titauraa ma te tano ore i ta ratou mau tane. Eiaha atoa râ tatou e haamoe i te puai o te tahi noa mau parau haamauruuru. Te na ô ra te Maseli 16:24 e: “E au te parau maitai i te topata rii meli ra; e momona i te taata nei, e ora hoi to te ivi.” A hiˈo na i teie aamu. I muri aˈe i te hoê putuputuraa Kerisetiano, ua haere te tahi nau hoa faaipoipo e farerei i te hoê matahiapo e ani atura e paraparau ia ˈna no nia i ta raua tamaiti apî. A paraparau ai te matahiapo i teie nau hoa faaipoipo, te tiai noa ra ta ˈna vahine ma te faaoromai. I muri iho, ua haere te metua vahine e farerei i te vahine a te matahiapo e na ô atura e: “Te hinaaro nei au e haamauruuru ia oe no te taime ta ta oe tane e rave ra no te tauturu i to ˈu utuafare.” Ua haaputapû mau â teie mau parau haamauruuru au e te ohie i te mafatu o te vahine a taua matahiapo ra.
19. (a) Te rave nei te mau matahiapo, ei pǔpǔ, ma te haapao maitai i teihea mau hopoia? (b) Ia faaoti tatou pauroa i te rave i te aha?
19 Te faanahoraahia te mau matahiapo no te haapao i te mau mamoe, o te hoê ïa o “te mau mea maitatai i ho-mai-hia mai.” (Iakobo 1:17) E ere teie mau tane i te mau taata tia roa; mai ia tatou nei, e hape ratou. (Te mau arii 1, 8:46) Ei pǔpǔ râ, te rave nei te mau matahiapo na te ao nei ma te haapao maitai i te mau hopoia ta Iehova i faataa na ratou—oia hoi, te faatitiaifaroraa, te paturaa, te tahoêraa, e te parururaa i te nǎnǎ. Ia faaoti ïa te matahiapo taitahi i te tamau i te haapao i te mau mamoe a Iehova ma te here, e haapapu atu ai e e ô aore ra e haamaitairaa oia no to ˈna mau taeae. E ia faaoti tatou pauroa i te faaite i to tatou mauruuru no “te mau ô taata” na roto i te faarooraa, te auraroraa, e te faaturaraa ia ratou no ta ratou ohipa puai. E mauruuru mau â tatou i te mea e ua horoa mai Iehova ma te here i te mau taata e parau nei i ta ˈna mau mamoe e: ‘Ta matou ohipa, o te tautururaa ïa ia outou ia tavini i te Atua ma te oaoa’!
Nafea outou ia pahono?
◻ No te aha e nehenehe ai e faaau ma te tano i te amuiraa i te hoê tino?
◻ Nafea te mau matahiapo e nehenehe ai e tauturu i to ratou mau taeae ia tavini ia Iehova ma te oaoa?
◻ No te aha eiaha noa tatou e faaroo, ia auraro atoa râ i te feia e aratai nei ia tatou?
◻ Nafea tatou e faaite ai i to tatou faatura i te mau matahiapo?
[Hohoˈa i te api 16]
E te mau matahiapo, a haapopou ia vetahi ê no ta ratou mau tutavaraa haavare ore
[Hohoˈa i te api 17]
Maoti to ratou hiˈoraa itoito i roto i te taviniraa, e nehenehe te mau matahiapo e tauturu i te mau melo utuafare e ia vetahi ê ia tavini ma te oaoa
[Hohoˈa i te api 18]
Te haafaufaa nei tatou i ta tatou mau matahiapo e rave puai ra i te ohipa!