Te faatia ra te feia poro i te Basileia

‘E tia te mau mea atoa nei i te Atua’

E PARAU mau te mau parau i nia nei, tei itehia i roto i te Mataio 19:26, no te hoê vahine apî i Venezuela. I muri aˈe i to ˈna haapiiraa i te tuu i te tiaturi taatoa i nia ia Iehova, ua nehenehe oia e haapaiuma i te hoê fifi rahi. Te faatia ra oia e:

“E vahine maitai roa e te here to ˈu mama ruau. Ma te peapea, ua pohe oia i te 16raa o to ˈu matahiti. Ua riro to ˈna pohe ei tairiraa ino mau no ˈu, ua maamaahia vau, eita vau e hinaaro faahou e haere i rapaeau i te fare i roto i te aua. Ua faataa ê roa vau ia ˈu.

“Aita vau i haere i te haapiiraa, aita atoa vau i rave i te hoê ohipa. Ua faaea noa vau i roto i to ˈu piha. Ma te haamoemoe ia ˈu e aita e hoa, ua roohia vau i te maˈi hepohepo uˈana. Ua ino roa vau e ua hinaaro vau e pohe e e haapohe ia ˈu. Ua uiui noa vau ia ˈu iho e, ‘No te aha vau e ora ˈi?’

“Ua matau to ˈu mama e ia afaihia mai te mau vea ra Te Pare Tiairaa e te A ara mai na! e te hoê Ite apî o Gisela te iˈoa. I te hoê mahana, ua ite to ˈu mama ia Gisela a haere mai ai oia na to matou fare e ua ani oia ia ˈna e e nehenehe anei ta ˈna e tauturu ia ˈu. Ua farii Gisela e tamata, aita râ vau e hinaaro e farerei ia ˈna. Aita te reira i faaotohe ia Gisela. Ua papai mai oia ia ˈu e ua parau oia e te hinaaro ra o ˈna e faahoa ia ˈu e te hinaaro ra te hoê taata faufaa roa ˈtu â ia ˈna e faahoa atoa ia ˈu. Taua taata ra, o ta ˈna e parau ra, o te Atua ra o Iehova ïa.

“Ua haaputapû te reira ia ˈu, e ua pahono atura vau i ta ˈna rata. E toru avaˈe to mâua papai-noa-raa. I muri iti noa ˈˈe e rave rahi faaitoitoraa a Gisela i noaa mai ai ia ˈu te itoito e farerei ia ˈna i te pae hopea. I to mâua farerei-matamua-raa, ua haapii mai oia ia ˈu i te Bibilia, ma te faaohipa i te buka ra E nehenehe oe e ora e a muri noa ˈtu i roto i te paradaiso i nia i te fenua nei. I muri aˈe i te haapiiraa, ua titau manihini maira oia ia ˈu ia haere i te hoê putuputuraa i te Piha no Basileia no te reira vahi. Ua maere au, aita vau i haere i rapaeau i te fare a maha aˈenei matahiti, e mea riaria na ˈu ia feruri e tei nia vau i te purumu.

“E faaoromai rahi to Gisela ia ˈu. Ua haapapu mai oia ia ˈu e aita e tumu ia mătaˈu vau e e apiti mai oia ia ˈu i te putuputuraa. I te pae hopea, ua farii au. I to mâua taeraa ˈtu i te Piha no te Basileia, ua haamata aˈera vau i te ruru e te tahe i te hau. Aita ta ˈu e nehenehe e aroha i te taata. Tera râ, ua farii au i te haere noa i te mau putuputuraa, e ua titau mai o Gisela ia ˈu ma te taiva ore i te mau hebedoma atoa.

“No te tauturu ia ˈu ia haapaiuma i to ˈu mǎtaˈu, ua tii oioi roa mai Gisela ia ˈu no te mau putuputuraa. E tia na mâua i te uputa e e aroha i te mau taata a tae mai ai ratou. Na roto i teie ravea, e farii au hoê anaˈe aore ra e piti taata i te hoê taime, tae noa ˈtu i te hoê pǔpǔ rahi atoa i te hoê â taime. I te taime e aita ta ˈu e nehenehe faahou, e faahiti mai Gisela i te Mataio 19:26: ‘Eita mau â ïa e tia i te taata nei; e tia râ te mau mea atoa nei i te Atua.’

“Noa ˈtu e ere i te mea ohie, i te pae hopea, ua nehenehe au e haere i te haaputuputuraa taata rahi i te hoê tairururaa haaati. Auê ïa taahiraa avae rahi no ˈu e! I te avaˈe Setepa 1995, ua faaitoito vau i te paraparau i te mau matahiapo no nia i te raveraa i te taviniraa na te mau fare. E ono avaˈe i muri iho, i te avaˈe Eperera 1996, ua pûpû vau ia ˈu no Iehova na roto i te bapetizoraa i roto i te pape.

“I to te tahi taata aniraa mai ia ˈu e mea nafea to ˈu faaitoitoraa i te na reira, ua pahono vau e: ‘E rahi aˈe to ˈu hinaaro e faaoaoa ia Iehova i to ˈu mǎtaˈu.’ A tupu noa ˈi te maˈi hepohepo i te tahi taime, ua rahi to ˈu oaoa i to ˈu taviniraa ei pionie tamau. Ia haamanaˈo anaˈe au, te farii nei au i te manaˈo o Gisela. E Hoa to ˈu i teie nei o te anaanatae ra ia ˈu e o ‘te tauturu mai ia ˈu.’”—Philipi 4:13.

[Hohoˈa i te api 8]

“E rahi aˈe to ˈu hinaaro e faaoaoa ia Iehova i to ˈu mǎtaˈu”