Te haamanaˈo ra anei outou?

Ua au anei outou i te taioraa i te mau numera hopea o Te Pare Tiairaa? A hiˈo mai te peu e e nehenehe ta outou e pahono i te mau uiraa i muri nei:

◻ No te aha e tano maitai ai te faahitiraa parau a Paulo ‘e vea ei mono i te Mesia’ no te mau Kerisetiano faatavaihia? (Korinetia 2, 5:20)

I tahito ra, e tonohia te mau vea aore ra te mau tia i te mau taime aroraa iho â râ no te hiˈo e e nehenehe anei e faaore i te tamaˈi. (Luka 14:31, 32) I te mea e ua atea ê te ao taata nei i te Atua, ua tono te Atua i ta ˈna mau tia faatavaihia no te faaara i te taata i ta ˈna mau parau faahauraa, ma te faaitoito ia ratou ia imi i te hau e te Atua.—15/12, api 18.

◻ Eaha na mea e maha tei haapaari i te faaroo o Aberahama?

A tahi, ua faaite oia i to ˈna faaroo i te Atua na roto i te haapaoraa ˈtu ia paraparau o Iehova (Hebera 11:8); a piti, e taairaa piri roa to te faaroo o Aberahama e to to ˈna tiaturiraa (Roma 4:18); a toru, ua paraparau o Aberahama e o Iehova; e te maha, ua turu o Iehova ia ˈna i to ˈna peeraa i ta ˈna aratairaa. E nehenehe taua mau mea ra e haapaari i to tatou faaroo i teie mahana.—1/1, api 17.

◻ Eaha te auraa o teie mau parau “Eiaha e faarue ia matou ia roohia-noa-hia e te ati”? (Mataio 6:13)

Te ani ra tatou i te Atua ia ore tatou ia hiˈa ia tamatahia tatou eiaha tatou e auraro ia ˈna. E nehenehe o Iehova e aratai ia tatou ia ore tatou ia hema e ia noaahia e Satani, oia hoi “te ino.” (Korinetia 1, 10:13)—15/1, api 14.

◻ Eaha ta te hoê taata e tia ia rave ia faaore mai te Atua i ta ˈna hara?

E tia ia faˈihia te reira i te Atua ma te oto e “[“te mau hotu e,” MN] au i te tatarahapa.” (Luka 3:8) E turai atoa te hoê feruriraa tatarahapa e te hinaaroraa e faatitiaifaro i te mea hape, ia ani tatou i te tauturu pae varua a te mau matahiapo Kerisetiano. (Iakobo 5:13-15)—15/1, api 19.

◻ No te aha e tia ia tatou ia riro ei taata haehaa?

E tiai e e faaoromai te hoê taata haehaa e eita o ˈna e faateitei ia ˈna iho. E huti mai te haehaa i te tahi mau hoa papu o te here ia outou. Te mea faufaa roa ˈtu â, e noaa mai te haamaitairaa a Iehova. (Maseli 22:4)—1/2, api 7.

◻ Eaha te taa-ê-raa i rotopu i te pohe o Iesu e to Adamu?

Ua tano iho â ia pohe Adamu, no te mea aita oia i auraro ma te hinaaro mau i to ˈna Poiete. (Genese 2:16, 17) Area o Iesu ra, aita roa ˈtu i tano ia pohe oia, no te mea ‘aita roa oia i rave i te hara.’ (Petero 1, 2:22) No reira ïa i to Iesu poheraa, te vai ra ia ˈna te hoê mea faufaa roa ta te taata hara ra o Adamu i ore i fanaˈo i to ˈna poheraa—oia hoi te tiaraa e ora ei taata tia roa. E faufaaraa to te pohe o Iesu ei tusia no te hoo i te huitaata nei.—15/2, api 15.

◻ I roto i te orama a Ezekiela, eaha ta te oire e faahohoˈa ra?

I te mea e tei roto te oire i te hoê fenua o teie nei ao (e ere i te mea moˈa), o te hoê ïa mea no te fenua nei. Te faahohoˈa ra te oire i te tiaauraa i nia i te fenua e maitaihia ˈi te feia atoa no te totaiete taata parau-tia o te fenua nei.—1/3, api 18.

◻ No te aha o Iesu i horoi ai i te avae o ta ˈna mau pǐpǐ i te faatupuraahia te oroa Pasa i te 33 T.T.?

Aita o Iesu i haamau i te hoê peu tuutuu o te horoiraa avae. Ua tauturu râ oia i ta ˈna mau aposetolo ia pee i te hoê haerea apî—e feruriraa haehaa e te hoê hinaaro e rave i te ohipa haihai roa ˈˈe no to ratou mau taeae.—1/3, api 30.

◻ I roto i ta tatou haapiiraa ia vetahi ê, eaha te mea faufaa aˈe i te mau aravihi natura?

O to tatou ïa huru maitatai e te mau peu pae varua ta tatou i rave, ta te feia e haapii ra e nehenehe e pee. (Luka 6:40; Petero 2, 3:11)—15/3, mau api 11, 12.

◻ Nafea te mau taata orero i mua i te taata e nehenehe ai e haamaitai i ta ratou taioraa i te mau Papai?

Na roto ïa i te haamatauraa i te taio. E, na roto i te taio-pinepine-raa ma te reo puai e tae roa ˈtu i te taime e nehenehe ai ratou e taio ohie. Mai te peu e te vai ra te mau ripene haruharuhia o te Bibilia, mea maitai ïa ia faaroo i te aravihi o te oreroraa e te tauiuiraa i te reo o te taata taio e ia tapao nafea te mau iˈoa e te mau parau matau-ore-hia ia faahitihia.—15/3, api 20.

◻ Nafea ‘te varua e hoˈi ai i te Atua’ ia pohe te hoê taata? (Koheleta 12:7)

I te mea e o te varua te puai ora, “e hoˈi” ïa oia “i te Atua” mau ra, teie ïa te auraa, tei te Atua anaˈe te tiaturiraa o taua taata ra no te hoê ora no a muri aˈe. O te Atua anaˈe te nehenehe e faahoˈi mai i te varua, aore ra te puai ora, no te faahoˈi faahou mai i te hoê taata i te ora. (Salamo 104:30)—1/4, api 17.