“Te haereraa na te moana i te hoê tau vero”

EITA anei outou e manaˈo e mea tano ore, mea maamaa, e mea atâta roa teie ohipa? Te na reira nei râ vetahi, ei auraa parau. Nafea ïa? Ua parau te papai buka Beretane no te senekele 17 o Thomas Fuller e: “Eiaha e rave i te hoê noa ˈˈe ohipa na roto i te riri. No te mea e riro te reira mai te haereraa na te moana i te hoê tau vero.”

E nehenehe te raveraa i te ohipa na roto i te riri uˈana e faatupu i te tahi mau faahopearaa iino. Ua haapapuhia te reira e te hoê tupuraa tei faatiahia i roto i te Bibilia. Ua ohipa Simeona e o Levi, na tamaiti a te patereareha tahito ra o Iakoba, na roto i te hoê riri tahoo rahi i te maferaraahia to raua tuahine o Dina. Ei faahopearaa, ua tupu te tahi taparahiraa taata rahi e te eiâraa. E ere i te mea maere e ua faahapa Iakoba i ta raua ohipa ino, ma te parau e: “Ua hauriria vau ia orua, i te faariroraa ia ˈu ei mea faufau i te mau taata o teie nei fenua.”—Genese 34:25-30.

Ma te paari, te faaitoito ra te Parau a te Atua, te Bibilia, eiaha e na reira. Te parau ra oia e: “Faarue i te tairoiro, eiaha te riri; eiaha to oe ra inoino ia tae roa i te rave i te parau ino ra.” (Salamo 37:8) E nehenehe te peeraa i teie aˈoraa e paruru ia tatou ia rave i te hara ino.—Koheleta 10:4; a hiˈo atoa i te Maseli 22:24, 25.