Te hau na te ao nei no teihea pu?
E AFAI mai anei te tahoêraa o te haapiiraa e te haapaoraa i te hau na te ao nei? Teie te moemoeâ o te Taote ra Robert Muller, te tauturu papai parau rahi tahito o te mau Nunaa Amui e te taata fanaˈo i te Re o te UNESCO no te matahiti 1989 no te Haapiiraa i te Hau. Mai tei faataahia i roto i te vea ra The Vancouver Sun, ua “papu [i te Taote Muller] e e tia ia haapiihia i te feia haapii atoa na te ao nei i te hoê tuhaa o te mau tupuraa e te mau faufaa no nia i to tatou palaneta, te huitaata e te haavî ore.” Te manaˈo nei oia i te mahana e haapii ai te mau taatiraa atoa no te haapiiraa i te mau tamarii e ati aˈe te ao nei e o te mau Nunaa Amui te tiaturiraa maitai roa ˈˈe no te hau. Te tiaturi atoa nei oia e “e riro te mau haapaoraa atoa o te ao nei ei mau tuhaa o te hoê faanahonahoraa apî e au i te Nunaa Amui o te piihia te mau Haapaoraa Amui,” ta te vea ra Sun ïa i papai. I reira ïa “te mau haapiiraa faaroo atoa e faatupu ai i te i te haavî ore.”
E riro mai anei te hau na te ao nei ei tupuraa mau? Mea papu roa ïa! E ere râ na roto i te tahi ohiparaa a te taata. Hau atu i te 2 700 matahiti i teie nei, ua faataa te hoê taata papai i faauruahia i te pu teitei o te haapiiraa no te hau ia ˈna i tohu e e “haapiihia . . . e Iehova” te mau taata piˈo ore e e hau “rahi” to ratou.—Isaia 54:13.
O te Atua anaˈe “[te] horoa i te hau,” ta te Bibilia ïa e parau nei. (Roma 16:20, MN) I teie nei â, te ravehia nei te hoê porotarama haapiiraa faahiahia na te ao atoa nei, e te haapii nei Iehova i to ˈna nunaa ia ‘imi i te hau e ia [“tapapa,” MN] i te reira,’ ia “tiapai . . . i ta ratou ˈoˈe ei auri arote,” e ia ore e “haapii faahou i te tamaˈi.”—Petero 1, 3:11; Isaia 2:2-4.
O te haamoriraa i niuhia i nia i te parau mau, aita e haavarevare e te haavare, te fariihia e te haamaitaihia e te Atua. (Mataio 15:7-9; Ioane 4:23, 24) O te haamoriraa mau anaˈe, e au maite roa ra i te Parau a te Atua, te nehenehe e faatupu i te mau taata e ora ra i roto i te hau e te tahoê e o te here mau ra te tahi i te tahi.—Ioane 13:35.
No te haapii hau atu â no nia i te mea ta te Parau a te Atua e parau ra no nia i te hau na te ao nei, te titau manihini nei matou ia outou ia farerei atu i te mau taata i nenei i teie nei vea.