Ehia maororaa e nehenehe ai tatou e ora?
Te ora maoro e maoro atu â ra te mau taata, i tae ai vetahi i te ani e, ‘Ehia maororaa e nehenehe ai tatou e ora?’
IA AU i te buka ra The New Encyclopædia Britannica (1995), i te tau i mairi aˈenei, ua tiaturi te rahiraa e o Pierre Joubert tei ora maoro roa ˈˈe. I te matahiti 1814 ua pohe o ˈna i te 113raa o to ˈna matahiti. Parau mau, te parauhia ra e ua ora maoro vetahi ê, aita râ to ratou mau matahiti i haapapu-maitai-hia e te tahi mau papai. Teie râ, te vai ra te tahi mau papai o te haapapu maitai ra e ua ora maoro aˈe te tahi mau taata ia Pierre Joubert.
Ua fanauhia o Jeanne Louise Calment i Arles, i te pae apatoa hitia o te râ o Farani, i te 21 no Febuare 1875. Ua atutu te parau o to ˈna poheraa i te 4 no Atete 1997—oia hoi 122 matahiti i muri iho. I te matahiti 1986, ua pohe o Shigechiyo Izumi no te fenua Tapone i te 120raa o to ˈna matahiti. Te faataa ra Le livre Guinness des records, neneiraa no 1999, ia Sarah Knauss 118 matahiti to ˈna mai te vahine paari roa ˈˈe i te taime i papaihia ˈi teie buka. Ua fanauhia o ˈna i te 24 no Setepa 1880 i Pennsylvanie, Hau Amui no Marite. I to Marie-Louise Febronie Meilleur no te fenua Québec, i Kanada, poheraa i te matahiti 1998 i te 118raa o to ˈna matahiti, ua paari aˈe o ˈna ia Sarah i nia i te faito 26 mahana.
No reira, ua maraa te numera o te feia ruhiruhia roa ˈˈe ma te peapea mau. Te manaˈohia ra e e maraa te numera o te feia hanere matahiti e hau atu, i nia i te faito 2,2 mirioni i te afaraa matamua o te senekele e haere maira! Hoê â atoa no te feia e 80 matahiti to ratou e e hau atu, ua maraa mai e 26,7 mirioni i te matahiti 1970 i e 66 mirioni i te matahiti 1998. O te hoê ïa maraaraa 147 %, ia faaauhia e te maraaraa o te huiraatira o te ao taatoa nei e 60 %.
E ere i te mea maere e te ora maoro nei te mau taata. Te rave ra e rave rahi i te tahi mau ohipa ta te rahiraa o te feia e 20 matahiti eita e nehenehe e rave. I te matahiti 1990, ua faaoti John Kelley e 82 matahiti i te hoê hororaa atea—42 195 kilometera i te atearaa—i roto e pae hora e e pae minuti. I te matahiti 1991, ua horo Mavis Lindgren te hoê mama ruau e 84 matahiti, i teie atearaa i roto e hitu hora e e iva minuti. E aita i maoro aˈenei, ua faaoti te hoê tane e 91 matahiti i te hororaa atea a te oire no New York!
E ere no te parau e aita te feia ruhiruhia i te tau tahito ra i rave i te tahi mau ohipa maere mau. I te 99raa o to ˈna matahiti, ua “horo atura” o te patereareha ra no te tau Bibilia o Aberahama no te farii i ta ˈna mau manihini. I te 85raa o to ˈna matahiti, ua parau o Kaleba e: “Taua etaeta no ˈu i reira ra [e 45 matahiti na mua ˈtu], o to ˈu â ïa etaeta i teie nei, ia aro i te tamaˈi ra, e ia hahaere noa atoa ra.” E te parau ra te Bibilia no nia ia Mose i te 120raa o to ˈna matahiti, “aore to ˈna mata i mohimohi, aore hoi to ˈna [“puai ora,” MN] i iti.”—Genese 18:2; Iosua 14:10, 11; Deuteronomi 34:7.
Ua parau o Iesu Mesia no nia i te taata matamua, o Adamu, e te taata patu i te araka ra o Noa mai te mau taata o te aamu. (Mataio 19:4-6; 24:37-39) Te parau ra te Genese e ua ora o Adamu e 930 matahiti, e o Noa 950. (Genese 5:5; 9:29) Ua ora mau anei te mau taata i teie huru maororaa? E nehenehe anei tatou e ora maoro atu â, e peneiaˈe e a muri noa ˈtu? Mai te peu e e tia ia outou, a hiˈo i te haapapuraa i roto i te tumu parau i muri nei.