E farii anei vetahi ê i ta outou aˈoraa?

E FAATUPU noa mai te aˈoraa tano tei horoa-maitai-hia i te mau faahopearaa maitatai. Mea tano anei? Mea hape! Mea pinepine te aˈoraa maitai roa i horoahia e te mau taata aˈo aravihi i te tâuˈa-ore-hia aore ra i te patoihia.—Maseli 29:19.

Te reira tei tupu i to Iehova aˈoraa ˈtu ia Kaina o tei faatupu i te riri i to ˈna taeae ra o Abela. (Genese 4:3-5) Ma te ite hoi e e riro te reira ei fifi no Kaina, ua parau atu te Atua ia ˈna e: “Eaha oe i riri ai; e eaha hoi i tuatua ˈi to mata na? Ia rave oe i te parau maitai ra, eita anei e itehia mai? e aore i maitai ra, te vai ra te taraehara i te uputa na. E auraro râ oia ia oe, e ei nia ˈˈe oe ia ˈna.”—Genese 4:6, 7.

No reira, ua faaau aˈera Iehova i te hara mai te hoê mea haharu e tiai ra no te haru ia Kaina mai te peu e e onoono oia i te tapea i te riri uˈana i to ˈna taeae. (A faaau e te Iakobo 1:14, 15.) E taime â to Kaina no te taui i to ˈna haerea, no te ‘rave i te maitai’ eiaha râ ia tamau i te hoê haerea ino mau. Ma te peapea, aita o Kaina i tâuˈa. Ua patoi oia i te aˈoraa a Iehova ma te mau faahopearaa iino.

Te inoino nei e te faarue nei te tahi i te huru aˈoraa atoa. (Maseli 1:22-30) E tano anei ia manaˈo e na te taata aˈo te hape i faaruehia ˈi te aˈoraa? (Ioba 38:2) Na outou anei, te taata e horoa ra i te aˈoraa, e faariro ra ei mea fifi na vetahi ê ia farii i te reira? Na te huru tia ore o te taata e haafifi i te reira? Ua riro te huru tia ore o te taata ei fifi mau. E nehenehe râ outou e faaiti mai i te fifi na roto i te pee-maite-raa i te mau faaueraa tumu a te Bibilia i muri nei. E hiˈopoa anaˈe na i te tahi o ratou.

‘A faaafaro ma te aau mârǔ’

“E te mau taeae, noa ˈtu e e hape te hoê taata hou oia e ite ai, o outou o tei aravihi i te pae varua, a tamata i te faaafaro i teie taata na roto i te aau mǎrû, ma te ara atoa ia outou iho, ia ore outou ia hema atoa.” (Galatia 6:1, MN) Te haapapu râ ïa te aposetolo Paulo e e tia i te feia e ‘aravihi to ratou i te pae varua’ ia tamata i te faaafaro i te hoê Kerisetiano o te ‘hape ra hoi hou oia e ite ai.’ I te tahi mau taime, e au ra e mea hinaaro roa ˈˈe na te feia e ere roa ˈtu i te mea aravihi e horoa i te aˈoraa. No reira ˈtura, eiaha roa ˈtu e aˈo oioi ia vetahi ê. (Maseli 10:19; Iakobo 1:19; 3:1) O te mau matahiapo aravihi i te pae varua o te amuiraa te na reira na mua roa. Parau mau, e tia i te hoê Kerisetiano paari i te pae varua ia faaara mai te peu e te ite nei oia i te hoê taeae o te haere tia ra i te hoê vahi atâta.

Mai te peu e e pûpû outou i te aˈoraa e te manaˈo paari, a niu i ta outou e parau ra i nia i te paari o te Atua, eiaha râ i nia i te mau tatararaa taata e i nia i te mau philosophia. (Kolosa 2:8) A riro mai te raatira utuutu maa haapao maitai o te haapapu e mea maitai te mau taoˈa i faaohipahia e aita e taoˈa o te nehenehe e faataero. A haapapu e ua niu-maitai-hia ta outou aˈoraa i nia i te Parau a te Atua e eiaha noa i nia i to outou iho manaˈo. (Timoteo 2, 3:16, 17) Ia na reira outou, e nehenehe ïa outou e tiaturi papu e eita ta outou aˈoraa e faaino i te taata.

Te tapao o te aˈoraa, o te ‘faaafaroraa’ ïa i te hoê taata e hape ra, e ere te faaheporaa ia taui. E au te taˈo Heleni hurihia na roto i te parau “faaafaro” i te hoê parau e faaohipahia no te faahoˈi i te hoê ivi i taa eiaha ia ino atu â. Ia au i te taata tuatapapa taˈo ra o W. E. Vine, te faataa atoa ra te reira i “te faufaaraa o te faaoromai e te tuutuu ore i roto i te huru raveraa.” A feruri na i te mǎrû e te aravihi e titauhia no te ore e haamauiui faufaa ore noa i te pae tino. Oia atoa, e tia i te taata aˈo ia ara hau atu â ia ore oia e haamauiui i te hoê o te aˈohia ra. Mea navai aˈena te fifi ia ani mai te hoê taata i te aˈoraa. A tae atu ïa ia ore ia anihia mai ta outou aˈoraa, e titauhia hau atu â te aravihi e te mǎrû.

Papu maitai, eita ïa outou e “faaafaro” i te hoê taata mai te peu e aita to outou e taairaa e o ˈna. No te ape e ia na reira outou, a haamanaˈo na i te faufaaraa i te “faaaau aroha noa, e te hamani maitai, e te haehaa, e te mǎrû, e te faaoromai rahi.” (Kolosa 3:12) Mai te peu e eita te hoê taote e faaoromai e e riri faufaa ore noa oia, e nehenehe te taata maˈi e ore e tâuˈa i ta ˈna aˈoraa e eita roa ˈtu oia e hoˈi faahou mai no te rapaauraa e hinaarohia.

E ere teie te auraa e ia paruparu te aˈoraa, e tia ˈi. Ua aˈo papu o Iesu Mesia i na amuiraa e hitu i Asia. (Apokalupo 1:4; 3:1-22) Ua horoa roa ˈtu oia ia ratou i te tahi tau aˈoraa tei tia ia ratou ia faaroo e ia faaohipa. Ua vai faito noa te papuraa o te aˈo a Iesu e teie mau huru maitatai mai te aroha e te hamani maitai, o te faaite ra i te huru feruriraa î i te here o to ˈna ra Metua i nia i te raˈi.—Salamo 23:1-6; Ioane 10:7-15.

Te aˈoraa ma te parau mǎrû maitai

“Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.” (Kolosa 4:6) E nehenehe te miti papaa e haamaitai i te maa, e mea au ia amu. Ia aminamina ta outou aˈoraa, e tia ïa ia horoa te reira ‘ma te mǎrû maitai, ma te tamitihia.’ Noa ˈtu e te vai ra te mau taoˈa anoi maitai roa ˈˈe, e nehenehe râ te maa e faaineinehia ma te tairipaa aore ra e haapaehia i nia i te mereti ma te ore roa ˈtu e anaanataehia. Eita ïa te reira e turai i te hoê taata ia tamaa maitai. Inaha, e ere paha i te mea ohie ia horomii noa ˈtu i te tahi maa iti e ere i te mea aminamina.

Ia horoa outou i te aˈoraa, mea faufaa ia maiti i te mau parau tano. Ua parau te taata paari ra o Solomona e: “Mai te [“apara,” MN] auro i roto i te vairaa ario ra, o te parau ïa ia parauhia i te taime mau ra.” (Maseli 25:11) Te manaˈo maitai ra paha oia i te hoê farii ario nehenehe roa nanaˈohia e te mau apara auro maitai roa to roto. Auê i te au i te mata e auê ïa outou i te oaoa e ia horoahia mai te reira ei taoˈa horoa e! Hoê â ïa huru, e nehenehe te mau parau maiti-maitai-hia, e te mǎrû maitai e haafatata roa mai i te hoê taata o ta outou e tamata ra i te tauturu.—Koheleta 12:9, 10.

I te tahi aˈe pae, ‘te parau faaooo, e riri ïa te tupu mai.’ (Maseli 15:1) E nehenehe te mau mau parau tano ore e haamauiui oioi e te faariri maoti i te haamauruuru. Inaha, e ere noa te mau parau tano ore, te taˈiraa reo râ te nehenehe e turai i te hoê taata ia faarue i te aˈoraa maitai e te faufaa hoi. E nehenehe te horoaraa i te aˈoraa ma te faatano ore, ma te aroha ore e haamauiui mai te aroraa ˈtu i te taata e te hoê mauhaa. “Te taata vavi noa ra, e au ïa i te ˈoˈe patiatia ra,” ta te Maseli 12:18 ïa e parau ra. No te aha e paraparau ai ma te feruri ore e e haafifi ai i te hoê taata ia faaroo i te aˈoraa?—Maseli 12:15.

Mai ta Solomona hoi i parau, e tia i te aˈoraa ia “parauhia i te taime mau.” Mea faufaa roa te taime ia manuïa te aˈoraa! E mea papu maitai e eita paha e auhia te maa e te taata o te ore e hinaaro faahou e tamaa. Peneiaˈe, aita i maoro aˈenei to ˈna tamaaraa, aore ra ua maˈihia paha oia. E ere roa ˈtu i te haerea paari e e ere roa ˈtu hoi i te mea au ia faahepo i te taata o te ore e hinaaro e tamaa.

Te aˈoraa ma te aau haehaa

“Faanavai mai outou i to ˈu nei oaoa . . . Eiaha roa ei mea e ravehia ma te mârô e te teoteo faufaa ore ra; ei aau haehaa râ, i te manaˈo haamaitairaa ˈtu te tahi i te tahi eiaha ia ˈna iho. Eiaha hoi te taata atoa e haapao i ta ˈna anaˈe ihora, e haapao atoa râ i ta vetahi ê ra maitai.” (Philipi 2:2-4) Mai te peu e e taata aˈo maitai outou, e turaihia ïa outou ia “haapao” i to vetahi ê ra maitai. E faaite atoa outou i te “aau haehaa” i te mau taeae e tuahine i te pae varua, ma te faariro ia vetahi ê ei mea maitai aˈe ia outou. Eaha ïa te auraa?

E tapea te aau haehaa ia outou ia ore outou e rave i te hoê haerea aore ra reo faateitei. Aita to te hoê aˈe o tatou e tumu no te faateitei ia ˈna i nia i te mau hoa Kerisetiano. E paruparu tatou tataitahi i tera e tera taime. I te mea e eita outou e nehenehe e ite i roto i te mafatu, e mea faufaa iho â râ ia ore e haava i te mau manaˈo o te taata ta outou e aˈo ra. Aita paha to ˈna e manaˈo ino e aita paha oia i ite i to ˈna haerea aore ra i ta ˈna mau ohipa ino. Noa ˈtu e ua ite o ˈna e aita te reira e tuea ra i te mau titauraa a te Atua, aita ïa e feaaraa, mea ohie aˈe na ˈna ia farii i te aˈoraa ia horoahia ma te haehaa e ma te anaanatae mau i to ˈna oraora-maitai-raa i te pae varua.

A feruri na eaha to outou huru mai te peu e ua titau-manihini-hia outou i te hoê tamaaraa e mea toetoe e te hiˈo ino te taata i titau manihini ia outou! Papu maitai ïa eita outou e oaoa i te tamaaraa. Oia mau, e mea “maitai ia amu ra i te [“mau maa tupu,” MN] anaˈe ra ma te aroha, i te puaatoro poria ma te riri.” (Maseli 15:17) Oia atoa, e ere i te mea ohie ia farii i te aˈoraa maitai roa ˈˈe ia faaite te taata aˈo i te au ore no te taata o ta ˈna e aˈo ra aore ra ia faahaehaa e ia faahaamâ ia ˈna. Teie râ, maoti te here, te faatura te tahi i te tahi, e te tiaturi e ohie ai ia horoa e ia farii i te aˈoraa.—Kolosa 3:14.

Te aˈoraa i fariihia

Ua faaite te peropheta ra o Natana i te aau haehaa a aˈo ai oia i te Arii ra o Davida. Ua ite-papu-hia te here e te faatura i roto i ta Natana i parau e i rave. Ua haamata Natana ma te hoê faahohoˈaraa o te haamanaˈo e peneiaˈe e faaroo âta to Davida i te aˈoraa. (Samuela 2, 12:1-4) Ua faaohipa te peropheta Natana i te here o Davida no te parau-tia, noa ˈtu e aita te reira i ite-maitai-hia i roto i ta ˈna mau ohipa e o Bate-Seba. (Samuela 2, 11:2-27) I te haamatararaahia te manaˈo tumu o te faahohoˈaraa, ua faaoti aˈera Davida ma te aau rotahi e: “Ua hara vau ia Iehova.” (Samuela 2, 12:7-13) E ere mai ia Kaina o tei ore i faaroo ia Iehova, ua farii Davida ma te haehaa i te aˈoraa.

Aita e feaaraa, ua aratai Iehova ia Natana, ma te haapao i te huru tia ore o Davida e peneiaˈe e eita oia e farii i te aˈoraa. Ua ohipa Natana ma te mǎrû e ma te papu maitai, ua haamanaˈo oia e mea teitei aˈe o Davida no to ˈna tiaraa arii faatahinuhia a Iehova. Mai te peu e e tiaraa mana to outou, e horoa paha outou i te aˈoraa tano, e ere râ i te mea ohie ia farii i te reira mai te peu e eita outou e faaite i te aau haehaa.

Ua faaafaro Natana ia Davida na roto i te aau mǎrû. Mea mǎrû maitai te mau parau a te peropheta e te faaineine-maitai-hia ia nehenehe o Davida e ohipa no to ˈna iho maitai. Aita Natana i turaihia e to ˈna iho maitai, aita atoa oia i tamata i te faateitei ia ˈna i nia ˈˈe ia Davida i te pae morare aore ra i te pae varua. Auê ïa hiˈoraa maitai no te parauraa i te mau parau tano na roto i te ravea tano! Mai te peu e e faaite outou i teie huru feruriraa, e papu roa ïa outou e e farii mai vetahi ê i ta outou aˈoraa.

[Hohoˈa i te api 22]

Mai te maa maitatai, e tia i ta outou aˈoraa ia riro ei mea maitai

[Hohoˈa i te api 23]

E faariro anei outou i ta outou aˈoraa ia au ia fariihia mai te mau apara auro i roto i te farii ario nanaˈohia?

[Hohoˈa i te api 24]

Ua faaohipa te peropheta Natana ma te haehaa i te here o Davida no te parau-tia