Te fanauraa o Iesu—Te aamu mau

A FERURI na i te hoê tupuraa matau-maitai-hia i roto i te aamu o to outou fenua. Ua haamaramarama-maitai-hia te reira e tau taata tuatapapa aamu. Eaha ˈtura ïa ia parau mai te hoê taata ia outou e aita teie ohipa i tupu aˈenei, e e aai anaˈe? Aore ra, e rave anaˈe i te tumu parau e au ia outou iho, eaha ïa ia parau te hoê taata e mea hape te rahiraa o ta to outou utuafare i faaite mai ia outou no nia i te fanauraa e te apîraa o to outou metua tupuna? E nehenehe outou e riri i te hoê aore ra i te tahi manaˈo. Papu mau e eita outou e farii i taua mau parau ra i to outou noa faarooraa ˈtu!

Inaha, e pinepine te feia faahapa i teie mahana i te patoi i te mau aamu o te Evanelia a Mataio e a Luka no nia i te fanauraa o Iesu. Te parau nei ratou e e taa ê roa teie mau aamu e eita roa ˈtu e tuati e te vai ra i na pae e piti atoa ra, te mau mea haavare e te mau arepurepuraa i te pae aamu. E parau mau anei te reira? Eiaha tatou e farii i taua mau pariraa ra, e hiˈopoa maoti tatou i te mau aamu o te Evanelia no tatou iho. I te na reiraraa, e hiˈo tatou eaha ta te reira e haapii mai ia tatou i teie mahana.

Te fa o te papairaa

Na mua, e tauturu te reira ia haamanaˈo tatou i te fa o teie mau aamu Bibilia. E ere te reira i te mau aamu o te oraraa o te hoê taata; e mau Evanelia râ. Mea faufaa teie taa-ê-raa. I roto i te aamu o te oraraa o te hoê taata, e nehenehe te papai buka e faaî i te mau hanere api, a tutava ˈi i te faaite nafea te taata i te riroraa mai mai tei matau-maitai-hia. No reira te tahi mau aamu o te oraraa o te hoê taata e faaî ai i te mau api e rave rahi no te faataa i te parau o te mau metua, te fanauraa e te tamariiraa o te taata. Mea taa ê te mau Evanelia. I roto i na Evanelia e maha, o Mataio e o Luka anaˈe te faatia no nia i te fanauraa e te tamariiraa o Iesu. E ere râ ta ratou fa te faaiteraa nafea to Iesu riroraa mai mai te taata ta tatou i ite. A haamanaˈo na, ua farii te mau pǐpǐ a Iesu e ua ora na oia ei mea ora varua hou a haere mai ai i te fenua nei. (Ioane 8:23, 58) No reira o Mataio e o Luka i ore ai e huti i te ara-maite-raa i nia i te tamariiraa o Iesu no te faataa eaha te huru taata ta ˈna i riro mai. Aita, ua faatia raua i te mau ohipa i au maite i te fa o ta raua Evanelia.

E eaha te fa o ta raua papairaa? Te auraa o te parau “evanelia,” e “parau apî maitai” ïa. Hoê â poroi ta na taata e piti—oia hoi o Iesu te Mesia i tǎpǔhia; ua pohe oia no te mau hara a te huitaata; e ua faatiahia oia no te ora i nia i te raˈi. Papu maitai râ e mea taa ê te tiaraa totiale o na papai buka e piti e ua papai raua no te feia taio taa ê. Ua faatia Mataio, te hoê taata titau tute i ta ˈna aamu no te feia taio ati Iuda te rahiraa. Ua papai Luka, te hoê taote, na “Teophilo taata maitai roa”—peneiaˈe e tiaraa teitei to ˈna—e, hau atu â, na te feia taio ati Iuda e Etene. (Luka 1:1-3, MN) Ua maiti te papai buka taitahi i te mau ohipa faahiahia roa ˈˈe e te au roa ˈˈe no te haapapu i te manaˈo o ta ˈna feia taio taa ê. Inaha, te haamatara ra te aamu a Mataio i te mau parau tohu o te mau Papai Hebera i tupu na roto ia Iesu. I te tahi aˈe pae, ua pee o Luka i te huru raveraa a te taata tuatapapa aamu ta ta ˈna feia taio ati Iuda e nehenehe e farii.

E ere ïa i te mea maere ia taa ê ta raua aamu. Eita te hoê e faahuru ê i ta te tahi mai ta te feia faahapa e parau ra. E tia roa te tahi i te tahi, e tuea maite te tahi e te tahi no te horoa mai i te hoê hohoˈa taatoa.

Te fanauraa o Iesu i Betelehema

Te faatia ra Mataio e o Luka atoa i te hoê semeio faahiahia roa no nia i te fanauraa o Iesu—oia hoi ua fanauhia oia e te hoê paretenia. Te faaite ra Mataio e te faatupu ra teie semeio i te hoê parau tohu i horoahia ehia senekele na mua ˈˈe e Isaia. (Isaia 7:14; Mataio 1:22, 23) Te faataa ra Luka e ua fanauhia Iesu i Betelehema no te mea ua faahepo te hoê tapaoraa iˈoa i faauehia e Kaisara, ia Iosepha raua Maria ia haere atu i ǒ. (A hiˈo i te tumu parau tarenihia i te api 7.) Mea faufaa roa te mea e ua fanauhia Iesu i Betelehema. Tau senekele na mua ˈˈe, ua tohu te peropheta ra o Mika e e haere mai te Mesia mai te hoê oire iti faufaa ore i pihai iho ia Ierusalema.—Mika 5:2.

Ua tui te roo o te po i fanauhia ˈi Iesu ei niu no te mau Faahohoˈaraa o te fanauraa. Teie râ, mea huru taa ê atoa te aamu mau i tei faahohoˈa-pinepine-hia. Te faaite atoa maira te taata tuatapapa aamu ra o Luka, tei faaite mai no nia i te numeraraa i te huiraatira i aratai ia Iosepha raua o Maria i Betelehema, no nia i te mau tiai mamoe e faaea ra i taua po faahiahia ra i rapaeau e ta ratou mau nǎnǎ. Ua aratai teie na huru tupuraa i te feia tuatapapa Bibilia e rave rahi ia parau e aita Iesu i fanauhia i te avaˈe Titema. Ua haamatara ratou i te mea e eita e nehenehe ia Kaisara e faahepo i te mau ati Iuda riri haere noa ia tere atu i to ratou oire tumu i te tau toetoe e te ûa, o te nehenehe hoi e faariri atu â i te hoê nunaa orure hau. Eita atoa te mau tiai mamoe e nehenehe, ia au i te feia ite, e faaea i rapaeau e ta ratou mau nǎnǎ i roto i taua huru ahuaraˈi ra.—Luka 2:8-14.

A tapao na e ua maiti Iehova i te faaite i te fanauraa o ta ˈna Tamaiti, eiaha i te mau aratai haapaoraa ite e te mana no taua tau ra, i te feia rave ohipa itoito râ e faaea ra i rapaeau. Papu maitai e aita ta te mau papai parau e te mau Pharisea e ohipa e te mau tiai mamoe, o te ore e haapao i te tahi mau parau rii o te ture parau-vaha-hia no ta ratou mau hora raveraa ohipa. Ua haamaitai râ te Atua i teie feia haehaa, e te haapao maitai, i te tura rahi—ua faaara te hoê pǔpǔ melahi ia ratou e ua fanauhia te Mesia ta te nunaa o te Atua i tiai ehia tausani matahiti i teie nei, i Betelehema. O teie mau taata, eiaha na “arii e toru” e ite-pinepine-hia i roto i te mau Faahohoˈaraa o te fanauraa, tei haere e hiˈo ia Maria raua Iosepha e tei ite i teie aiû hara ore e taoto ra i roto i te hoê vairaa maa animala.—Luka 2:15-20.

E haamaitai Iehova i te feia haehaa e imi ra i te parau mau

E haamaitai te Atua i te feia haehaa e here ia ˈna e e anaanatae mau i te iteraa i te tupuraa o ta ˈna mau opuaraa. O te reira te manaˈo tumu o te mau tupuraa i te tau o te fanauraa o Iesu. Fatata hoê avaˈe i muri aˈe i te fanauraa o te tamarii, i to Iosepha raua Maria faaiteraa ia ˈna i te hiero ei auraroraa i te Ture a Mose, ua pûpû raua i te hoê tusia i ǒ oia “e piti uupa, e aore ra, e piti uuairao fanauˈa.” (Luka 2:22-24) E titau te Ture i te hoê mamoe, e faatia râ te reira i teie maitiraa mâmâ aˈe mai te peu e mea veve te taata. (Levitiko 12:1-8) A feruri na. Ua maiti te Atua ra o Iehova, te Arii o te ao taatoa, eiaha i te hoê utuafare taoˈa rahi, i te mea veve râ i reira ta ˈna Tamaiti here e te fanau tahi e paari mai ai. Mai te peu e e metua outou, e tia ia faahaamanaˈo teie ohipa ia outou e te ô maitai roa ˈˈe ta outou e nehenehe e horoa i ta outou tamarii—te mea maitai roa ˈtu â i te taoˈa materia aore ra i te hoê haapiiraa faahiahia—te hoê ïa oraraa utuafare o te tuu i te mau faufaa pae varua i te parahiraa matamua.

I te hiero, e piti taata haamori haapao maitai ê atu â ta Iehova i haamaitai. O Ana te hoê, e vahine ivi 84 matahiti ‘o te ore roa e faarue i te hiero.’ (Luka 2:36, 37) Te tahi, o te hoê ïa taata paari haapao maitai o Simeona te iˈoa. Ua horuhoru roa raua i te haamaitairaa ta te Atua i horoa na raua—te ite-mata-raa i te hoê o te riro mai ei Mesia i tǎpǔhia hou raua a pohe ai. Ua faahiti Simeona i te hoê parau tohu no nia i te tamarii. E parau tohu î i te tiaturiraa, e te huru peapea râ hoi. Te tohu ra oia e, ia tae i te hoê mahana, e putapû teie metua vahine apî o Maria, i te oto no to ˈna tamaiti here.—Luka 2:25-35.

Te hoê tamarii i te haamǎtaˈuraahia

E faahaamanaˈoraa peapea te tohu a Simeona e e ririhia teie tamarii hara ore. A tamarii noa ˈi oia, ua haamata aˈena teie riri i te ohipa. Te faaite huˈahuˈa maira te aamu a Mataio nafea. Tau avaˈe i mairi, e te ora nei Iosepha, Maria e Iesu i teie nei i roto i te hoê fare i Betelehema. Ua farii ratou i te tahi mau taata ěê tiai-ore-hia. Noa ˈtu eaha ta te mau Faahohoˈaraa o te fanauraa e faaite mai, aita Mataio i haapapu mai ehia rahiraa taata i tae atu, aita atoa oia i parau e e mau “taata paari” ratou, ore roa ˈtu ïa e “toru arii.” Ua faaohipa oia i te parau Heleni ra maʹgoi, oia hoi “taata hiˈohiˈo.” Na teie noa mea e faaite i te taata taio e te ohipa ra te hoê mea iino i ǒ nei, no te mea e peu opanihia e te Parau a te Atua te peu hiˈohiˈo e e ape maite te mau ati Iuda haapao maitai i te reira.—Deuteronomi 18:10-12; Isaia 47:13, 14.

Ua pee teie feia hiˈohiˈo i te hoê fetia mai te pae hitia o te râ mai e te tari ra ratou i te mau ô na “te Arii fanau apî o te ati Iuda.” (Mataio 2:2) Aita râ te fetia i aratai ia ratou i Betelehema. Ua hopoi te reira ia ratou i Ierusalema e ia Heroda Rahi ra. Aita ˈtu e taata i te ao nei e ravea ta ˈna e e hinaaro to ˈna e hamani ino i te tamarii ra o Iesu. Ua haapohe teie taparahi taata e taata titau atoa hoi i te mea teitei, i te tahi mau melo o to ˈna iho fetii piri ta ˈna e manaˈo ra e mea atâta no ˈna.a Ua peapea roa oia i te faarooraa no nia i te fanauraa o te hoê ‘Arii o te ati Iuda’ no a muri aˈe, e ua tono aˈera oia i te feia hiˈohiˈo e imi i taua Aiû ra i Betelehema. A haere ai ratou, ua tupu maira te hoê peu huru ê. E au ra e te teretere ra te “fetia” i aratai mai ia ratou i Ierusalema!—Mataio 2:1-9.

Teie râ, e tiarama mau anei teie i nia i te raˈi aore ra e orama noa, aita tatou i ite. Ua ite râ tatou e e ere teie “fetia” no ǒ mai i te Atua ra. Ma te hape ore riaria mau, ua aratai tia ˈtu te reira i teie feia haamori etene ia Iesu ra—te hoê aiû e roaa haere noa e aita e ravea ta ˈna, i paruruhia e te hoê noa tamuta riirii e ta ˈna vahine. Papu mau e e haere atu te feia hiˈohiˈo, te feia i vare ia Heroda, e faaite i te reira i te arii tahoo, o te aratai ïa i te tamarii i te pohe. Ua ohipa mai râ te Atua na roto i te hoê moemoeâ e ua faahoˈi oia ia ratou na nia i te tahi atu eˈa. Ua riro mau ïa te “fetia” ei ravea a te enemi o te Atua oia o Satani, o te rave i te mau mea atoa no te hamani ino i te Mesia. Mea hape mau ïa te faahohoˈaraa i te “fetia” e te feia hiˈohiˈo i roto i te mau Faahohoˈaraa i te fanauraa ei mea tonohia e te Atua!—Mataio 2:9-12.

Eita râ Satani e tuu haere noa. Ua faaue aˈera ta ˈna tavini i roto i teie tupuraa o te Arii Heroda e ia haapohehia te mau tamarii atoa no Betelehema i raro mai i te piti matahiti. Eita râ ta Satani e nehenehe e upootia i roto i te aroraa ia Iehova. Ua tapao Mataio e mea maoro aˈenei to te Atua tohuraa i teie taparahiraa ino o te mau tamarii. Ua patoi faahou Iehova ia Satani a faaara ˈi ia Iosepha na roto i te hoê melahi, e maue ê i Aiphiti ia ora ratou. Ua faatia Mataio e i muri aˈe, ua rave faahou Iosepha i to ˈna utuafare e hopoi e faaea i Nazareta, i reira to Iesu paariraa mai e to ˈna mau taeae e tuahine apî aˈe.—Mataio 2:13-23; 13:55, 56.

Te fanauraa o te Mesia —Eaha te auraa no outou

Te maere ra anei outou i teie haapotoraa o te mau tupuraa e au i te fanauraa e te tamariiriiraa o Iesu? E rave rahi te na reira ra. E maere roa ratou i te iteraa e e au maite te mau aamu te tahi i te tahi e mea tano atoa, noa ˈtu e e mârô te tahi mau taata e eita. E maere roa ratou i te haapiiraa e ua tohuhia te tahi mau tupuraa ehia hanere matahiti na mua ˈˈe. E e maere roa ratou i te mea e e taa ê roa te tahi mau tuhaa faufaa o te mau Evanelia i te mau faataaraa i roto i te mau aai e te mau Faahohoˈaraa o te fanauraa a te tutuu.

Peneiaˈe râ te mea maere roa ˈˈe, te mea ïa e aita te mau oroa Noela matau-noa-hia e rave rahi e faaite ra i te mau manaˈo faufaa o te mau aamu o te Evanelia. Aita e haamanaˈo-rahi-hia ra, ei hiˈoraa, te Metua o Iesu—eiaha o Iosepha, o te Atua râ o Iehova. A feruri na i to ˈna mau manaˈo hohonu i to ˈna horoaraa e na Iosepha raua Maria e haapao ia ˈna. A feruri na i te mauiui o te Metua i nia i te raˈi i to ˈna vaiihoraa i ta ˈna Tamaiti ia paari mai i roto i te hoê ao i reira te hoê arii î i te riri e opua ˈi e haapohe ia ˈna noa ˈtu e e tamarii noa oia! Na te here rahi i te huitaata i turai ia Iehova ia pûpû i teie tusia.—Ioane 3:16.

Mea pinepine te taata mau ra o Iesu i te haamoehia i roto i te mau oroa Noela. Inaha, aita e parau e ua faaite oia i ta ˈna mau pǐpǐ i to ˈna mahana fanauraa; aita atoa e tapao e ua haapao ta ˈna mau pǐpǐ i to ˈna mahana fanauraa.

E ere te fanauraa o Iesu, o to ˈna râ pohe—e to ˈna auraa o te faataui i te aamu—ta ˈna i faaue i ta ˈna mau pǐpǐ ia haapao. (Luka 22:19, 20) Eita, e ere te hoê aiû ravea ore i roto i te hoê vairaa maa animala ta Iesu i hinaaro ia haamanaˈohia, no te mea e ere faahou oia mai te reira i teie nei. Hau atu i te 60 matahiti i muri aˈe i to ˈna haapoheraahia, ua fa ˈtu Iesu na roto i te hoê orama i mua i te aposetolo Ioane mai te hoê Arii puai roa e horo ra i roto i te hoê tamaˈi. (Apokalupo 19:11-16) I roto i te reira tiaraa ei Faatere o te Basileia o te Atua i nia i te raˈi, tatou e tia ˈi ia haapii no nia ia Iesu i teie mahana, no te mea oia te hoê Arii o te taui i te ao nei.

[Nota i raro i te api]

[Hohoˈa i te api 8]

Ua haamaitai te melahi a Iehova i te mau tiai mamoe haehaa i te parau apî maitai o te fanauraa o te Mesia