E tamau anaˈe i te haere i mua i te pae varua!

Ua riro te mahana o to tatou bapetizoraa ei mahana te tia ia tatou ia poihere e ia haamanaˈo noa. Inaha, o te mahana hoi i reira to tatou faaiteraa i te taata e ua pûpû tatou ia tatou iho no te tavini i te atua.

NO TE taata e rave rahi, e titauhia te tutavaraa rahi mau e raea ˈi teie faito—te faarueraa i te mau peu ino matauhia e ratou ehia maororaa, te haapaeraa i te amuimuiraa iino, te tauiraa i te mau huru feruriraa e te haerea i aˈa hohonu roa.

Teie râ, noa ˈtu e e tupuraa oaoa e te faufaa te bapetizoraa i roto i te oraraa o te hoê Kerisetiano, e haamataraa noa te reira. Ua parau te aposetolo Paulo i te mau Kerisetiano bapetizohia no Iudea e: “E vaiiho noa ˈˈe na i te parau matamua o te Mesia ra, e haere â tatou i mua i te paari mau ra.” (Hebera 6:1) Oia mau, e hinaaro te mau Kerisetiano atoa e “riro [mai] . . . ei taata paari, i te faaroo hoê e te ite [papu] hoê i te Tamaiti a te Atua, ia taea te faito ra i te î o te Mesia i te rahi.” (Ephesia 4:13; MN) Mea na roto noa i te haereraa i mua e noaa ˈtu ai te paari e “papu” ai tatou i roto i te “faaroo.”—Kolosa 2:7.

I te mau matahiti i mairi aˈenei, ua haere mai te mau hanere tausani feia haamori pûpû-apî-hia i roto i te amuiraa Kerisetiano. Peneiaˈe o outou te hoê o ratou. Mai to outou mau taeae no te senekele matamua, eita outou e hinaaro e faaea noa ei aiû i te pae varua. Te hinaaro nei outou e riro mai ei taata paari e e haere i mua! Nafea râ? E eaha vetahi mau ravea e nehenehe ai outou e haere i mua?

Te haereraa i mua na roto i te haapiiraa taitahi

Ua parau o Paulo i te mau Kerisetiano no Philipi e: “E te pure nei au ia tupu maite â to outou hinaaro e ia rahi atu â ma te ite [papu] e te [ite maite].” (Philipi 1:9; MN) Mea faufaa roa te tupuraa i te rahi i roto i te “ite papu” no to outou haereraa i mua i te pae varua. E ohipa tamau ‘te [“noaaraa,” MN] te ite i te Atua mau ra, e ia Iesu i te Mesia,’ e ere râ i te hoê mea o te faaea i muri aˈe i te bapetizoraa.—Ioane 17:3.

O te reira ta te hoê tuahine Kerisetiano ta tatou e mairi o Alexandra i ite mai hoê ahuru matahiti i muri aˈe i to ˈna bapetizoraa i te 16raa o to ˈna matahiti. Ua paari oia i roto i te parau mau e ua haere tamau noa oia i te mau putuputuraa Kerisetiano e i roto i te ohipa pororaa. Te papai nei oia e: “I te mau avaˈe i mairi aˈenei, ua itea mai ia ˈu e aita roa ˈtu vau e afaro ra. Ua faaoti aˈera vau e hiˈopoa maitai ia ˈu iho, eaha to ˈu manaˈo i te parau mau e no te aha vau e faaea noa ˈi i roto i te parau mau.” Eaha tei itea mai ia ˈna? Te parau faahou nei oia e: “Ua itea mai ia ˈu e mea ê roa te mau tumu i faaea ˈi au i roto i te parau mau. Te haamanaˈo ra vau e a paari noa ˈi au, ua onoono-maite-hia i nia i te mau putuputuraa e te taviniraa. Mai te huru ra e e ohipa te reira i nia i te mau peu matauhia o te haapiiraa taitahi e te pure. A hiˈopoa noa ˈi râ vau i to ˈu huru, ua itea mai ia ˈu e aita te reira i tupu.”

Ua aˈo te aposetolo Paulo e: “Ta tatou . . . vahi i noaa maira, e na reira tatou i te haere na taua tapao nei â ma te haapao maite â hoi.” (Philipi 3:16) E nehenehe te hoê tapao matauhia e turai ia haere i mua. Na mua ˈˈe outou a bapetizohia ˈi, eita e ore e te vai ra ta outou hoê haapiiraa Bibilia ei tapao matauhia i te mau hebedoma atoa e te hoê orometua haapii aravihi maitai. A rahi noa ˈi to outou mauruuru, ua faaô mai outou i roto i teie tapao matauhia te faaineineraa i te haapiiraa o te hebedoma taitahi, ma te maimi i te mau irava i faahitihia i roto i te Bibilia, e e rave rau atu â. I teie nei e ua bapetizohia outou, te tamau ra anei outou i te “haere na taua tapao nei â”?

Mai te peu e aita, peneiaˈe e titauhia ia tuatapapa faahou outou i ta outou mau fa faufaa roa ˈˈe, ‘ma te faaau atu i te mau mea i hau i te maitai ra.’ (Philipi 1:10) I roto i to tatou oraraa ru noa, e titauhia te hitahita ore no te faaherehere i te taime no te taioraa e te haapiiraa Bibilia taitahi. E hoona râ teie mau tutavaraa i te mau haamaitairaa. A hiˈo faahou na i te hiˈoraa o Alexandra. “E tia ia ˈu ia parau e ua ora vau i roto i te parau mau i te roaraa e 20 matahiti e tiahapa ma te haere noa i te mau putuputuraa e i roto i te taviniraa,” ta ˈna ïa i faˈi. Te parau faahou nei râ oia e: “Ua tae roa vau i te manaˈo e noa ˈtu e mea faufaa roa teie mau mea, eita te reira anaˈe e tauturu ia ˈu ia haamata mai te mau fifi. Ua tupu mai teie mau mea atoa no te mea fatata roa aita roa ˈtu ta ˈu e haapiiraa taitahi, e e ere ta ˈu mau pure i te mea tamau e te hohonu. Te itea maira ia ˈu e e tia ia ˈu ia faaafaro i to ˈu huru feruriraa e ia haamata i te hoê tabula haapiiraa faufaa ia nehenehe mau â e noaa ia ˈu te ite ia Iehova e e here ia ˈna e e haafaufaa i ta ta ˈna Tamaiti i horoa mai na tatou.”

Mai te peu e e hinaaro outou i te tauturu no te haamau i te hoê tapao matauhia haapiiraa taitahi maitatai, e oaoa roa ïa te mau matahiapo e te tahi atu mau Kerisetiano paari i roto i ta outou amuiraa i te tauturu atu ia outou. Hau atu â, e rave rahi mau manaˈo tauturu i roto i te mau tumu parau o Te Pare Tiairaa, te mau numera o te 1 no Me 1995, te 15 no Atete 1993, e o te 15 no Me 1986 (Farani).

Mea titauhia ia haafatata ˈtu i te Atua

Te tahi atu â vahi e tia ia tutava outou no te haere i mua, i roto ïa i to outou mau taairaa e te Atua. Peneiaˈe i te tahi taime, mea titau-rahi-hia te reira i roto i taua tuhaa ra. A hiˈo na ia Anthony tei bapetizohia i to ˈna apîraa ra. “O vau te tamarii matamua o to matou utuafare i bapetizohia,” ta ˈna ïa e faatia nei. “I muri aˈe i to ˈu bapetizoraa, ua tauahi mai to ˈu mama ia ˈu ma te mahanahana mau. Aita vau i ite aˈenei ia ˈna i te oaoaraa mai teie. Mea oaoa roa hoi, e te manaˈo ra vau e mea puai roa vau.” Te vai ra râ te hoê vahi hape. “Mea maoro atoa, aita e feia apî i bapetizohia i roto i ta matou amuiraa,” ta Anthony ïa e parau faahou ra. “No reira vau i teoteo roa ˈi. Ua teoteo roa atoa vau no ta ˈu mau pahonoraa e ta ˈu mau tumu parau i roto i te mau putuputuraa. Ua riro te fariiraa i te arueraa e te haapopouraa a te taata ei mea faufaa aˈe na ˈu i te arueraa ia Iehova. Aita mau â vau e fanaˈo ra i te hoê taairaa fatata e o o ˈna.”

Mai ia Anthony, peneiaˈe ua pûpû vetahi ia ratou no te faaoaoa noa ia vetahi ê eiaha râ no te faaoaoa ia Iehova. Noa ˈtu râ, e titau te Atua e ia tapea taua mau taata ra i ta ratou euhe e tavini ia ˈna. (A faaau e te Koheleta 5:4.) Aita anaˈe râ te hoê taairaa fatata roa e te Atua, mea pinepine e mea fifi no ratou i te na reira. Te haamanaˈo ra o Anthony e: “E taime poto roa to te oaoa rahi ta ˈu i i ite i to ˈu bapetizoraa. Aita i tia hoê matahiti i muri aˈe i to ˈu bapetizoraa, te topa aˈera vau i roto i te hara ino e ua faahapahia maira vau e te mau matahiapo o te amuiraa. No to ˈu pee-tamau-raa i te haerea hape, ua tiavaruhia ˈtura vau i rapae i te amuiraa. E ono matahiti i muri aˈe i to ˈu pûpûraa ia ˈu na Iehova, ua tapeahia vau e ua tuuhia vau i roto i te fare tapearaa no te ohipa taparahiraa taata.”

Te faatupuraa i te hoê taairaa fatata roa e o Iehova

Noa ˈtu eaha to outou iho huru tupuraa, e nehenehe te mau Kerisetiano atoa e pahono i teie titauraa a te Bibilia: “E haafatata ˈtu i te Atua, e na ˈna e haafatata mai ia outou na.” (Iakobo 4:8) Eita e ore e ua haafatata rii outou i te Atua i to outou haapii-matamua-raa i te Bibilia. Ua haapii outou e e ere te Atua i te atua tâuˈa ore i te taata e haamorihia ra i roto i te Amuiraa faaroo Kerisetiano, o te hoê ra taata e iˈoa to ˈna, o Iehova. Ua haapii atoa outou e mea anaanatae roa to ˈna mau huru maitatai, e “e Atua aroha noa [oia], e te hamani maitai rahi, e te faaoromai rahi, e te maitai rahi.”—Exodo 34:6.

No te ora râ ia au i ta outou pûpûraa no te tavini i te Atua, e tia ia outou ia haafatata roa ˈtu â i te Atua! Nafea? Ua pure te papai salamo e: “E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea.” (Salamo 25:4) E nehenehe te haapiiraa taitahi i te Bibilia e i te mau papai a te Taiete e tauturu ia outou ia ite hau atu â no nia ia Iehova. Mea faufaa atoa ia tamau i te pure ma te hohonu. “E ninii hua i to outou [“mafatu,” MN] i mua ia ˈna,” ta te papai salamo ïa e faaitoito ra. (Salamo 62:8) A pahonohia ˈi ta outou mau pure, e ite atu outou e te tâuˈa maira te Atua iho ia outou. E tauturu te reira ia fatata roa ˈtu â outou ia ˈna.

Ua riro atoa te mau tamataraa e te mau fifi ei ravea hau no te haafatata ˈtu i te Atua. Peneiaˈe e te faaruru ra outou i te mau fifi e te mau tamataraa o te faaroo, mai te maˈi anei, te mau faaheporaa i te fare haapiiraa e i te vahi raveraa ohipa, aore ra te fifi i te pae faanavairaa faufaa. Peneiaˈe e mea fifi atoa no outou te tapao teotaratia matauhia o te taviniraa, te haereraa i te mau putuputuraa, aore ra te haapiiraa i te Bibilia e ta outou mau tamarii. Eiaha e faaruru i taua mau huru fifi ra o outou anaˈe! A taparu i te tauturu a te Atua, ma te ani atu i ta ˈna aratairaa e ta ˈna aveia. (Maseli 3:5, 6) A taparu ia ˈna i to ˈna varua moˈa! (Luka 11:13) A fanaˈo ai outou i te tauturu î i te here a te Atua, e fatata roa ˈtu â outou ia ˈna. Mai ta te papai salamo ra o Davida i parau, “a tamata na ia ite i te maitai o Iehova! e ao to te taata i tiaturi ia ˈna ra.”—Salamo 34:8.

Eaha ˈtura no nia ia Anthony? “Ua haamata aˈera vau i te feruri i te tau i rahi ai ta ˈu mau fa pae varua i taaihia i te haapaoraa i te hinaaro o Iehova,” ta ˈna ïa e haamanaˈo nei. “Mea mauiui roa. Na roto râ i te mauiui e te inoino atoa, ua haamanaˈo atura vau i te here o Iehova. Ua faataime rii to ˈu pureraa ia Iehova, ua na reira râ vau, e ua ninii au i to ˈu mafatu i mua ia ˈna a ani atu ai e ia faaore mai oia i ta ˈu hara. Ua haamata atoa vau i te taio i te Bibilia e ua maere roa vau i te rahi o ta ˈu i haamoe e i te iti o ta ˈu i ite mau no nia ia Iehova.” Noa ˈtu â e tia ia Anthony ia faaoti i ta ˈna tau fare tapearaa no ta ˈna ohipa ino, te fanaˈo nei oia i te tauturu a te mau Ite no taua vahi ra e te haere papu nei oia i mua i te maitai pae varua. Ma te aau mehara, te parau nei Anthony e: “Auaa Iehova e ta ˈna faanahonahoraa, ua nehenehe au e faaore i te huru taata tahito, e te tutava nei au i te ahu i te mea apî i te mau mahana atoa. O to ˈu taairaa e o Iehova te mea faufaa roa ˈˈe na ˈu i teie nei.”

Te haereraa i mua i roto i ta outou taviniraa

Ua faaue Iesu i ta ˈna mau pǐpǐ ia riro mai ei feia poro i te “parau apî maitai o te basileia.” (Mataio 24:14, MN) Ei taata poro apî o te parau apî maitai, peneiaˈe mea iti to outou aravihi i roto i te taviniraa. Nafea ïa outou e nehenehe ai e haere i mua no te “rave faahope roa i to toroa na”?—Timoteo 2, 4:5.

Te hoê ravea, te faatupuraa ïa i te manaˈo maitai. A haapii i te hiˈo i te ohipa pororaa mai te hoê “taoˈa,” te hoê haamaitairaa. (Korinetia 2, 4:7) E ravea hoi te reira no te faaite i to tatou here, to tatou taiva ore, e to tatou haapao maitai ia Iehova. E turai atoa te reira ia tatou ia haapeapea no to tatou taata-tupu. E nehenehe te horoaraa ia tatou iho ma te miimii ore i roto i taua tuhaa ra e riro ei tumu no te oaoa mau.—Ohipa 20:35.

E hiˈoraa maitai to Iesu iho no nia i te ohipa pororaa. Ua riro te opereraa i te mau parau mau Bibilia ia vetahi ê ei “maa” na ˈna. (Ioane 4:34) Inaha, e nehenehe to ˈna hinaaro e tauturu ia vetahi ê e haapotohia na roto i ta ˈna mau parau, “Ua tia ia ˈu.” (Mataio 8:3) Ua aroha Iesu i te taata, te feia iho â ra i ‘purara e i faarue-taue-hia’ e te ao a Satani. (Mataio 9:35, 36) E “tia” atoa anei ia outou ia tauturu i te feia tei roto i te pouri i te pae varua e o te hinaaro ra i te haamaramaramaraa no roto mai i te Parau a te Atua? E turaihia ïa outou ia pahono i te faaueraa a Iesu: “E teie nei, e haere outou e faariro i te mau fenua atoa ei pǐpǐ.” (Mataio 28:19) Parau mau, e turaihia outou ia apiti i roto i taua ohipa ra ia au i to outou oraora-maitai-raa e to outou mau huru tupuraa.

Te tahi atu ravea no te haereraa i mua, te apiti-tamau-raa ïa i roto i te taviniraa—i te mau hebedoma atoa mai te peu e e nehenehe. E nehenehe taua ravea ra e tauturu ia faaiti mai i te taiâ e te mǎtaˈu o te nehenehe e haafifi i te hoê o te poro i te tahi noa taime. Te vai râ te mau vahi e faufaahia ˈi outou i te apiti-tamau-raa i roto i te taviniraa. E faarahi te reira i to outou mauruuru no te parau mau, e atuatu i to outou here ia Iehova e i to outou taata-tupu, e e tauturu te reira ia outou ia haamau i te tapao i nia i te tiaturiraa o te Basileia.

Eaha râ mai te peu e e ua taotia rahi to outou huru tupuraa no teie mahana i to outou apitiraa i roto i te ohipa pororaa? Mai te peu e eita iho â e nehenehe e faatitiaifaro, ia tamahanahanahia ïa outou i te iteraa e e mauruuru roa te Atua i te faito o ta outou e rave ra, a tamau noa ˈi outou i te rave ma to outou nephe atoa i ta outou taviniraa. (Mataio 13:23) Peneiaˈe e nehenehe outou e haere i mua i roto i te tahi atu â mau tuhaa, mai te haamaitairaa i to outou aravihi i te poro. I roto i te amuiraa, te horoa ra te Haapiiraa o te Taviniraa Teotaratia e te Putuputuraa no te Taviniraa i te haamataroraa maitai roa i te reira paeau. Inaha, hau atu â tatou i te aravihi i roto i te taviniraa, hau atu â ïa tatou i te fanaˈo i te reira e i te ite i te mau faahopearaa.

No reira, mea maramarama maitai e eita te haereraa i mua i te pae varua e faaea i te mahana bapetizoraa. Ua papai te aposetolo Paulo no nia i to ˈna tiaturiraa ia noaa i te ora pohe ore i nia i te raˈi e: “E au mau taeae, aore au i manaˈo ia ˈu iho nei, e ua noaa, hoê roa a ˈu mea e rave nei, i te haamoeraa i te mau mea i muri ra, e te titauraa ˈtu hoi i tei mua, te nenei tia ˈtu nei au i te tapao, ia noaa te berabeio i te parauraa a te Atua no nia maira i te Mesia nei ia Iesu. E teie nei, e na reira to tatou manaˈo, to te feia atoa i paari ra: e e manaˈo ê to outou i te tahi mea ˈtu, na te Atua e faaite mai ia outou i te reira.”—Philipi 3:13-15.

Oia mau, e tia i te mau Kerisetiano atoa, o te tiaturi i te pohe-ore-raa i nia i te raˈi anei aore ra i te ora mure ore i roto i te Paradaiso i te fenua nei, ia ‘titau atu i tei mua’—a rohi ai i te pae varua ia naeahia te tapao o te ora! E haamataraa maitai roa to outou bapetizoraa, e haamataraa noa râ. A rohi tamau i te haere i mua i te pae varua. “I te ite . . . , ei taata paari ïa outou” na roto i te mau putuputuraa e te haapiiraa taitahi. (Korinetia 1, 14:20) “Ia ite outou . . . i te aano, e te maoro, e te hohonu, e te teitei” o te parau mau. (Ephesia 3:18) Eita noa to outou haereraa i mua e tauturu ia outou ia atuatu i te oaoa i teie nei, ia noaa atoa râ te hoê parahiraa papu i roto i te ao apî a te Atua, i reira outou e nehenehe ai e haere i mua e a muri noa ˈtu, i raro aˈe i te faatereraa a te Basileia i te raˈi!

[Hohoˈa i te api 29]

Mea titauhia te haavîraa ia tatou iho e noaa ˈi te taime no te haapiiraa taitahi

[Hohoˈa i te api 31]

E nehenehe te hoê huru feruriraa maitai e tauturu ia tatou ia ite i te oaoa i roto i te taviniraa