Te mau tapao i nia i te purumu o te ora

MAI te peu e te tere ra outou na nia i te hoê purumu aore ra te hoê eˈa matau-ore-hia, e hiˈo anei outou i te mau tapao mai te mau taoˈa faaapǐapǐ? Eita paha ïa! Papu maitai e e hiˈo outou i te reira mai te hoê tauturu no te faaea noa i nia i te aveia e tae atu ai i te vahi ta outou i manaˈo.

Eaha râ te haereraa na nia i te purumu o te ora? E manuïa anei tatou ia na reira tatou i te haere aita e tapao? Ua faˈi te hoê peropheta a te Atua i tahito ra i te mau taotiaraa o te huitaata i te reira paeau. Ua parau oia e: “Ua ite au, E TE FATU, e ere tei te taata iho to ˈna mau eˈa; e ere atoa tei te taata te faataaraa i te aveia o to ˈna oraraa.”—Ieremia 10:23, The New English Bible.

Ihea ïa te aratairaa e hinaarohia ra e itehia ˈi? Te tumu papu o teie aratairaa, o te Poiete ïa o te taata, e e itehia te mau tapao taipe i roto i te Bibilia. Te parau maira Iehova na roto i ta ˈna Parau e: “E na to outou tariˈa e faaroo i te hoê reo i muri mai ia outou, i te na ôraa e, Teie te eˈa: e na reira i te haere, ia haapehao ê i te pae atau e te pae aui.”—Isaia 30:21.

Oia, te horoa maira te Parau a te Atua i te aratairaa papu no te mau tuhaa atoa o to tatou oraraa. (Isaia 48:17; Timoteo 2, 3:16, 17) Ma te peapea mau râ, te aratai nei te rahiraa o te huitaata i to ratou oraraa ma te ore e tâuˈa i te aratairaa a te Atua. (Mataio 7:13) Te vai papu noa mai ra râ te mau tapao! E haapao atu anei outou i te reira a haere ai outou na nia i te purumu o te ora?