A pee i te hiˈoraa aroha o Iehova

“E aroha atoa hoi outou mai to outou Metua e aroha maira.”—LUKA 6:36.

1. Nafea to te mau Pharisea faaiteraa i to ratou aroha ore noa?

NOA ˈTU e ua poietehia te taata ia au i te huru o te Atua, e pinepine ratou i te ore e pee i to ˈna hiˈoraa aroha. (Genese 1:27) A rave na i te hiˈoraa o te mau Pharisea. Ei pǔpǔ, ua patoi ratou i te oaoa i to Iesu faaoraraa ma te aroha noa i te rima mǎrô o te hoê taata i te Sabati. Ua haaputuputu aˈera râ ratou no te opua “e taparahi” ia Iesu. (Mataio 12:9-14) I te tahi atu taime, ua faaora o Iesu i te hoê taata matapo mai to ˈna fanauraahia mai. I ǒ nei faahou, aita “te hoê pae o taua mau Pharisea ra” i oaoa no te aroha o Iesu. Ua amuamu aˈera râ ratou, ma te parau e: “E ere teie taata i to te Atua, aore hoi oia i haapao i te sabati.”—Ioane 9:1-7, 16.

2, 3. Eaha te auraa o te mau parau a Iesu e, “E ara i te faahopue a te mau Pharisea”?

² Ua riro te haerea etaeta o te mau Pharisea ei ohipa ino i nia i te taata e ei hara i te Atua. (Ioane 9:39-41) No reira mau ïa o Iesu i faaara ˈi i ta ˈna mau pǐpǐ e, “E ara i te faahopue” a teie pǔpǔ iti puai e vetahi atu feia faaroo, mai te mau Sadukea. (Mataio 16:6) Te faaohipahia ra te faahopue i roto i te Bibilia no te faahohoˈa i te hara aore ra te ino. Te parau ra ïa o Iesu e e nehenehe te haapiiraa a “te mau papai parau e te mau Pharisea” e faaino i te haamoriraa viivii ore. Nafea ïa? Na roto ïa i te haapiiraa i te taata ia hiˈo i te Ture a te Atua ia au noa i ta ratou mau ture e mau peu faahepo, ma te ore e tâuˈa i “te mau mea rarahi,” tae noa ˈtu i te aroha. (Mataio 23:23) Ua faariro teie huru haapaoraa huru ê i te haamoriraa i te Atua ei hopoia teimaha roa.

³ I roto i te piti o te tuhaa o ta ˈna parabole o te tamaiti i haamâuˈa i ta ˈna faufaa, ua faaite tahaa o Iesu i te manaˈo ino o te mau raatira faaroo ati Iuda. I roto i te parabole, ua hinaaro te metua tane, o te faahohoˈa ra ia Iehova, i te faaore i te hara a ta ˈna tamaiti i tatarahapa. Area te tuaana o te tamaroa ra, o tei faahohoˈa hoi i “te mau Pharisea e te mau papai parau,” mea taa ê roa ïa to ˈna manaˈo.—Luka 15:2.

Te riri o te hoê tuaana

4, 5. Ua “moe” te tuaana o te tamaiti i haamâuˈa i ta ˈna faufaa, i roto i teihea auraa?

⁴ “Tei roto i te aua te tamaiti matahiapo ra, te haere maira i te utuafare. E fatata maira te fare ia ˈna, faaroo maira i te oto vivo e te ori. Ua tiaoro maira oia i te hoê tavini, ua ui maira i taua mau mea ra. Ua parau atura oia ia ˈna, Teie mai nei to teina e ua patia iho nei to metua i te kafa faaamu nei, no te mea i haere ora mai nei oia aore e maˈi. Riri aˈera oia aore aˈera i tae i roto i te fare.”—Luka 15:25-28.

⁵ Papu maitai e i roto i te parabole a Iesu, e ere to te tamaiti i haamâuˈa i ta ˈna faufaa anaˈe te fifi. “Ua moe na tamaroa toopiti e faataahia ra i ǒ nei,” o ta te hoê faahororaa ïa e parau ra, “no te hoê, o te parau-tia ore ïa o tei faaino ia ˈna, area no te tahi atu ra, o te faataata-parau-tia-raa ïa ia ˈna iho o tei haapoiri ia ˈna.” A tapao na e aita noa te tuaana o te tamaiti i haamâuˈa i ta ˈna faufaa, i patoi i te oaoa, ua “riri” atoa râ oia. Te faataa ra te parau tumu Heleni no te taˈo ra “riri,” eiaha i te hoê tupuraa o te iria, i te hoê râ huru feruriraa tamau. E au ra e ua atuatu te tuaana o te tamaiti i haamâuˈa i ta ˈna faufaa, i te inoino i aˈa roa, no reira oia i manaˈo ai e eita e tano ia faatupu i te oroa no te hoˈiraa mai o te hoê taata, o te ore roa ˈtu hoi e tia ia faarue i te fare.

6. Te tuea ra te tuaana o te tamaiti i haamâuˈa i ta ˈna faufaa ia vai ma, e no te aha?

⁶ Te faahohoˈa maitai ra ïa te tuaana o te tamaiti i haamâuˈa i ta ˈna faufaa, i te feia i inoino i te aroha e te ara-maite-raa ta Iesu i faaite i nia i te feia hara. Aita roa ˈtu teie mau taata faahua parau-tia i putapû i te aroha o Iesu; aita atoa ratou i faaite i te oaoa o te raˈi o te tupu ia faaorehia te hara a te hoê taata. Ua faatupu râ te aroha o Iesu i to ratou riri, e ua haamata ˈtura ratou i te “manaˈo ino” i roto i to ratou mafatu. (Mataio 9:2-4) I te hoê taime, no te riri uˈana o te tahi mau Pharisea, ua faahaere mai ratou i te hoê taata o ta Iesu i faaora e “ua tuu atura ratou ia ˈna i rapae au” i te sunago—e au ra ma te tiavaru ia ˈna i rapae! (Ioane 9:22, 34) Mai te tuaana o te tamaiti i haamâuˈa i ta ˈna faufaa, “aore aˈera i tae i roto i te fare,” ua patoi uˈana te mau raatira faaroo ati Iuda i te “oaoa atoa i te feia e oaoa ra” i te mau taime ratou i nehenehe ai. (Roma 12:15) Ua faaite tahaa ˈtu â o Iesu i ta ratou haaferuriraa ino i to ˈna faahaere-â-raa i ta ˈna parabole i mua.

Te haaferuriraa hape

7, 8. (a) Mea nafea to te tuaana o te tamaiti i haamâuˈa i ta ˈna faufaa, oreraa e taa i te auraa mau o te tiaraa tamaiti? (b) Mea nafea to te tamaiti matahiapo taa-ê-raa i to ˈna metua tane?

⁷ “Haere atura te metua tane i rapae, taparu atura ia ˈna. Ua na ô maira oia i te parauraa mai i ta ˈna metua tane, Inaha, e rave rahi aˈenei o ˈu matahiti i te taviniraa ia oe nei, e aita roa aˈenei au i [ofati] i ta oe [faaueraa]; e aitâ oe i horoa noa mai i te hoê pinia puaaniho na ˈu, ia faaamu atu vau i to ˈu ra taua: te hoˈiraa mai râ o to tamaiti na, o tei puhura i ta oe taoˈa na te mau vahine faaturi ra, patia iho nei oe i te kafa faaamu nei na ˈna.”—Luka 15:28-30; MN.

⁸ Na roto i teie mau parau, ua faaite maitai te tuaana o te tamaiti i haamâuˈa i ta ˈna faufaa e aita oia i taa i te auraa mau o te tiaraa tamaiti. Ua tavini oia i to ˈna metua tane mai te hoê taata rave ohipa e tavini i to ˈna paoti ohipa. Mai ta ˈna i parau i to ˈna metua tane e: ‘Ua tavini au ia oe.’ Parau mau, aita roa ˈtu iho â te tamaiti matahiapo i faarue aˈenei i te fare aore ra i patoi i te faaueraa a to ˈna metua. Teie râ, na te here anei i turai ia ˈna ia auraro? Ua ite anei oia i te oaoa mau a tavini ai oia i to ˈna metua tane, aore ra ua topa mǎrû noa oia i roto i te mauruururaa ia ˈna iho, ma te tiaturi e e tamaiti maitai oia no te mea noa e ua rave oia i ta ˈna mau ohipa i “roto i te aua”? Ahiri e e tamaiti itoito mau â oia, no te aha ïa oia i ore ai e faaite i te huru feruriraa o to ˈna metua tane? I te horoaraahia te ravea ia ˈna ia faaite i te aroha i nia i to ˈna taeae, no te aha ïa aita e aroha i roto i to ˈna mafatu?—A faaau e te Salamo 50:20-22.

9. A faataa na e mea nafea to te mau raatira faaroo ati Iuda tuearaa i te tamaiti matahiapo.

⁹ Ua tuea noa te mau raatira faaroo ati Iuda i teie tamaiti matahiapo. Ua manaˈo ratou e aita ratou i taiva i te Atua no te mea e ua ati maite ratou i te hoê pǎpǎ ture. Parau mau, e mea faufaa roa ia auraro. (Samuela 1, 15:22) Teie râ, na roto i to ratou haafaufaa-rahi-roa-raa i te mau ohipa, ua riro maira te haamoriraa i te Atua ei peu faatia ture matau-noa-hia, ei faaiteraa i te hoê hohoˈa paieti aita e huru mau i te pae varua. Ua tapitapi rahi aˈe ratou i te mau tutuu. Aita e here i roto i to ratou mafatu. Inaha, ua hiˈo ratou i te feia riirii mai te repo i raro aˈe i to ratou avae, ma te faaau ino atoa ia ratou ei mau ‘taata ino roa.’ (Ioane 7:49) Oia mau, nafea te Atua e faahiahia ˈi i te mau ohipa a teie mau huru raatira mai te peu e tei te atea ê to ratou mafatu ia ˈna?—Mataio 15:7, 8.

10. (a) No te aha e aˈoraa tano te mau parau ra, “O te aroha ta ˈu i hinaaro, eiaha te tusia”? (b) Nafea te ereraa i te aroha e riro ai ei tupuraa atâta?

¹⁰ Ua parau atu o Iesu i te mau Pharisea ia “haere, a haapii i te auraa i te maa parau ra e, O te aroha ta ˈu i hinaaro, eiaha te tusia.” (Mataio 9:13; Hosea 6:6) E ere ta ratou mau tapao matamua i te mea papu maitai, no te mea e faufaa ore ta ratou mau tusia atoa mai te peu e aita e aroha. E tupuraa atâta mau â teie, no te mea te parau ra te Bibilia e ua taiohia “te aroha ore” i rotopu i te feia “e au ia ratou te pohe” i te hiˈoraa o te Atua. (Roma 1:31, 32) Eita ïa e maerehia ia parau o Iesu e ua faataahia te hoê pǔpǔ o te mau raatira faaroo no te haamouraa mure ore. Papu maitai, e tano mau â teie haavaraa i nia ia ratou no to ratou aroha ore. (Mataio 23:33) Peneiaˈe râ, e nehenehe te tahi mau taata o teie pǔpǔ e tauturuhia. I te pae hopea o ta ˈna parabole, ua tutava o Iesu i te faatitiaifaro i te huru feruriraa o teie mau ati Iuda na roto i te mau parau a te metua tane i ta ˈna tamaiti matahiapo. O ta tatou ïa e hiˈo mai.

Te aroha o te hoê metua tane

11, 12. Nafea te metua tane o te parabole a Iesu, ia tamata i te haaferuri i ta ˈna tamaiti matahiapo, e eaha te faufaaraa o te parau a te metua tane ra “to taeae”?

¹¹ “Ua na ô atura te metua ia ˈna, E tau tamaiti, e tia oe i ǒ nei ia ˈu nei, e te mau taoˈa atoa na ˈu nei, na oe ïa. E mea tia hoi ia tatou ia faaamuraa maa e ia oaoa; o to taeae nei hoi, i pohe na, e ua ora mai nei; i moe na, e ua itea mai nei.”—Luka 15:31, 32.

¹² A tapao na e ua faahiti te metua tane i te parau ra “to taeae.” No te aha? Te haamanaˈo ra outou e i to ˈna paraparauraa ˈtu i to ˈna metua tane na mua ˈtu, ua pii te tamaroa matahiapo i te tamaiti i haamâuˈa i ta ˈna faufaa, “to tamaiti”—eiaha râ “to ˈu taeae.” E au ra e aita oia i farii i te taairaa utuafare i rotopu ia ˈna iho e to ˈna taeae. No reira, te parau ra te metua tane i teie nei i ta ˈna tamaiti matahiapo e: ‘E ere noa oia i te tamaiti na ˈu. E taeae no oe atoa, to oe iˈo e to oe iho toto. E rave rahi tumu ta oe no te oaoa i to ˈna hoˈiraa mai!’ E mea maramarama maitai te poroi a Iesu i te mau raatira ati Iuda. Te feia hara o ta ratou i haavahavaha, o to ratou iho â ïa mau “taeae.” Oia, “aita mau e taata parau-tia i te fenua nei, o tei rave i te parau maitai, e aore roa e hara.” (Koheleta 7:20) E rave rahi ïa tumu ta te mau raatira ati Iuda no te oaoa ia tatarahapa te feia hara.

13. I te hope-taue-raa te parabole a Iesu, eaha te uiraa faufaa e hiti maira?

¹³ I muri aˈe i te taparuraa a te metua tane, ua hope taue atura te parabole. Mai te mea ra e te ani ra o Iesu i te feia e faaroo maira ia ˈna ia papai i ta ratou iho faaotiraa o te aamu. Noa ˈtu eaha te pahonoraa a te tamaiti matahiapo, to mua te feia atoa i faaroo i te uiraa ra, ‘E apiti anei outou i roto i te oaoa e tupu ra i nia i te raˈi ia tatarahapa anaˈe te hoê taata?’ E nehenehe atoa te mau Kerisetiano i teie mahana e faaite i ta ratou pahonoraa i taua uiraa ra. Nafea ïa?

E pee anaˈe i te hiˈoraa aroha o te Atua i teie mahana

14. (a) Nafea tatou e nehenehe ai e faaohipa i te aˈoraa a Paulo i roto i te Ephesia 5:1 no nia i te parau o te aroha? (b) E tia ia tatou ia haapao maitai i teihea manaˈo tano ore no nia i te aroha o te Atua?

¹⁴ Ua faaue o Paulo i to Ephesia e: “Ei pee outou i te Atua mai te tamarii herehia ra.” (Ephesia 5:1) No reira, ei mau Kerisetiano, e tia ia tatou ia haafaufaa i te aroha o te Atua, ia aˈa hohonu te reira i roto i to tatou mafatu, e ia faaite i teie huru maitai i roto i ta tatou mau raveraa i nia ia vetahi ê. Teie râ, e mea tano ia haapao maitai. Eiaha te aroha o te Atua ia faarirohia mai te hoê ravea no te faaiti i te ino o te hara. Ei hiˈoraa, e manaˈo paha vetahi ma te tâuˈa ore e, ‘Mai te peu e e rave au i te hoê hara, e nehenehe noa vau e pure i te Atua ia faaore mai oia i ta ˈu hara, e e aroha mai oia ia ˈu.’ E au ïa teie huru haerea i ta te papai Bibilia ra o Iuda i pii e “ruri ê i te aroha [faito ore] o to tatou Atua ei [otoheraa no te] taiataraa.” (Iuda 4; MN) Noa ˈtu e e Atua aroha noa o Iehova, “eita roa ˈtu oia e haapae i te faautua” i te feia rave hara tatarahapa ore.—Exodo 34:7, MN; a faaau e te Iosua 24:19; Ioane 1, 5:16.

15. (a) No te aha e tia i te mau matahiapo iho â râ ia tapea i te hoê manaˈo aifaito i nia i te aroha? (b) Noa ˈtu e aita ratou e faatia ra i te ohipa hape, eaha te tia i te mau matahiapo ia tutava i te rave, e no te aha?

¹⁵ I te tahi aˈe pae, e tia ia tatou ia haapao maitai i te tahi atu huru fifi mau—te hinaaro e riro ei mea etaeta e e haava i te feia e faaite ra i te tatarahapa mau e te oto e au i te Atua ra no ta ratou mau hara. (Korinetia 2, 7:11) I te mea hoi e hopoia na te mau matahiapo ia haapao i te mau mamoe a Iehova, e mea faufaa roa ïa ia tapea ratou i te hoê manaˈo aifaito i roto i teie tuhaa, ia rave anaˈe iho â ratou i te mau ohipa haavaraa. E tia i te amuiraa Kerisetiano ia vai mâ noa, e mea tano ia au i te mau Papai ia ‘faataa ê atu i te taata parau ino’ na roto i te tiavaruraa ia ˈna. (Korinetia 1, 5:11-13) I te hoê â taime, e mea maitai ia faaite i te aroha mai te peu e e tumu papu maitai ia na reira. No reira, noa ˈtu e eita te mau matahiapo e faatia i te ohipa hape, e tutava ratou i te imi i te hoê haerea here e te aroha noa i roto i te mau otia o te parau-tia. Ua ite aˈena ratou i te faaueraa a te Bibilia e: “O te faahapa anaˈe ra ta ˈna e noaa, e ore te aroha, ta tei ore roa i aroha ra; e haavi ra te aroha i te faahapa i te taata e aroha ra.”—Iakobo 2:13; Maseli 19:17; Mataio 5:7.

16. (a) A faaite na roto i te Bibilia, e nafea o Iehova e hinaaro mau ai e ia hoˈi mai te feia rave hara ia ˈna ra. (b) Nafea tatou e nehenehe ai e faaite e te farii popou atoa ra tatou i te hoˈiraa mai o te feia hara i tatarahapa?

¹⁶ Te haamaramarama maitai maira te parabole o te tamaiti i haamâuˈa i ta ˈna faufaa, e te hinaaro ra o Iehova e ia hoˈi mai te feia rave hara ia ˈna ra. Oia mau, te pii nei oia ia ratou ia na reira e tae noa ˈtu i te taime e ore roa ˈtu ai ratou e tatarahapa. (Ezekiela 33:11; Malaki 3:7; Roma 2:4, 5; Petero 2, 3:9) Mai te metua tane o te tamaiti i haamâuˈa i ta ˈna faufaa, te ohipa nei o Iehova ma te tura i nia i te feia e hoˈi maira, ma te farii faahou ia ratou ei mau melo tumu no te utuafare. Te pee ra anei outou i te hiˈoraa o Iehova i roto i teie tuhaa? Ia faahoˈi-anaˈe-hia mai te hoê hoa faaroo, o tei tiavaruhia na no te hoê area taime, eaha ïa to outou huru? Ua ite aˈena tatou e e ‘oaoa to nia i te raˈi.’ (Luka 15:7) Teie râ, e oaoa anei to nia i te fenua nei, i roto i ta outou amuiraa, i roto atoa i to outou mafatu? Aore ra, mai te tamaiti matahiapo o te parabole, te vai ra anei te inoino, mai te mea ra e eita e tano ia farii-popou-hia te hoê taata, o tei ore hoi i tia ia faarue i te nǎnǎ a te Atua i te taime matamua?

17. (a) Eaha te ohipa i tupu i Korinetia i te senekele matamua, e mea nafea to Paulo aˈoraa i te feia o te amuiraa ia faaafaro i te fifi? (b) No te aha e mea ohie ia faaohipa i te aˈoraa a Paulo, e nafea tatou ia faaohipa i te reira i teie mahana? (A hiˈo atoa i te tumu parau tarenihia i te pae atau.)

¹⁷ No te tauturu ia tatou ia hiˈopoa ia tatou iho i roto i teie tuhaa, e hiˈo anaˈe i tei tupu i te area matahiti 55 T.T. i Korinetia. I reira, ua faaafaro te hoê taata, o tei tiavaruhia na i rapaeau i te amuiraa, i to ˈna oraraa. Eaha ïa tei tia i te mau taeae ia rave? E tia anei ia ratou ia feaa i to ˈna tatarahapa e ia tamau noa i te ape ia ˈna? Eita roa ˈtu, ua faaue o Paulo i to Korinetia e: “E faaore atu outou i ta ˈna hara, e e haamahanahana ˈtu e tia ˈi, o te horomii-noa-hia taua taata ra e te oto rahi. E teie nei, teie ta ˈu parau ia outou, e faaite papu atu outou i to outou aroha ia ˈna.” (Korinetia 2, 2:7, 8) E pinepine te feia rave hara tatarahapa i te ite taa ê i te haama e te hepohepo. No reira ïa teie mau taata e hinaaro ai e ite papu e te here maira to ratou mau hoa faaroo e o Iehova ia ratou. (Ieremia 31:3; Roma 1:12) E mea faufaa roa te reira. No te aha?

18, 19. (a) Mea nafea to te mau Korinetia faaiteraa na mua ˈtu i to ratou faaherehere rahi roa? (b) Nafea te hoê haerea aroha ore i te aratairaa i to Korinetia ia ‘noaahia e Satani’?

¹⁸ I to ˈna aˈoraa i to Korinetia ia faaore i te hara, ua horoa o Paulo i te hoê o te mau tumu, oia hoi ia ore hoi ‘tatou ia noaahia e Satani; e ere hoi tatou i te ite ore i ta ˈna mau ravea.’ (Korinetia 2, 2:11) Eaha ïa ta ˈna i hinaaro e parau? Oia hoi na mua ˈtu, ua tia ia Paulo ia aˈo i te amuiraa Kerisetiano no to ˈna faaherehere rahi roa. Ua vaiiho noa ratou i te hoê taata ia rave noa na i ta ˈna hara ma te ore e faautua ia ˈna. I to ratou na reiraraa, ua ohipa ïa te amuiraa—ta ˈna iho â râ mau matahiapo—mai tei auhia e Satani, no te mea ua hinaaro oia e faaino i te roo o te amuiraa.—Korinetia 1, 5:1-5.

¹⁹ Mai te peu râ i teie nei e e rave ratou i te tahi atu huru fifi mau e e patoi ratou i te faaore i te hara a te hoê taata tatarahapa, e noaahia ïa ratou e Satani na roto i te tahi atu ravea. Nafea ïa? Oia hoi e nehenehe oia e hauti i nia i to ratou etaeta e to ratou aroha ore. Mai te peu e e “horomii-noa-hia” te taata hara e tatarahapa ra “e te oto rahi”—aore ra mai ta te hoê tatararaa (Today’s English Version) e parau ra, “ua peapea roa a hinaaro ai e faarue roa”—auê ïa hopoia teimaha ta te mau matahiapo e amo i mua ia Iehova! (A faaau e te Ezekiela 34:6; Iakobo 3:1) No reira ïa, i muri aˈe i to ˈna faaararaa i ta ˈna mau pǐpǐ eiaha e faahapa i “te hoê i teie nei mau taata rii,” ua parau o Iesu e: “E ara ia outou iho. Ia hamani ino mai to taeae ia oe, e aˈo atu; e ia tatarahapa oia ra, e faaore atu i ta ˈna hapa.”a—Luka 17:1-4.

20. Mea nafea e tupu ai te oaoa i nia i te raˈi e i nia atoa i te fenua nei, ia tatarahapa anaˈe te hoê taata hara?

²⁰ Te mauruuru nei te mau tausani taata e hoˈi faahou maira i te haamoriraa viivii ore i te mau matahiti atoa, no te aroha o Iehova i nia ia ratou. “Aita vau e haamanaˈo ra i te hoê taime i roto i to ˈu oraraa i to ˈu oaoa-roa-raa no te tahi mea,” o ta te hoê tuahine Kerisetiano ïa e parau ra no nia i to ˈna faahoˈiraahia mai. Parau mau, ua haavevohia to ˈna oaoa i rotopu i te mau melahi. Ia apiti atoa ïa tatou i roto i te ‘oaoa i nia i te raˈi’ o te tupu ia tatarahapa te hoê taata hara. (Luka 15:7) Ia na reira tatou, e pee ïa tatou i te hiˈoraa aroha o Iehova.

[Nota i raro i te api]

Haamanaˈoraa

◻ Mea nafea to te tuaana o te tamaiti i haamâuˈa i ta ˈna faufaa, tuearaa i te mau raatira faaroo ati Iuda?

◻ Mea nafea to te tuaana o te tamaiti i haamâuˈa i ta ˈna faufaa, oreraa e taa i te auraa mau o te tiaraa tamaiti?

◻ Na roto i te faaiteraa i te aroha o te Atua, eaha na huru fifi mau e piti te tia ia tatou ia ape?

◻ Nafea tatou e nehenehe ai e pee i te hiˈoraa aroha o te Atua i teie mahana?

[Tumu parau tarenihia i te api 17]

“E FAAITE PAPU ATU OUTOU I TO OUTOU AROHA IA ˈNA”

No nia i te taata rave hara i tiavaruhia, o tei faaite i te tatarahapa, ua parau o Paulo i te amuiraa no Korinetia e: “Teie ta ˈu parau ia outou, e faaite papu atu outou i to outou aroha ia ˈna.” (Korinetia 2, 2:8) Te parau Heleni i hurihia e “faaite papu,” e parau haamanahia ïa oia hoi te auraa e “haapapu.” Oia, e tia i te feia tatarahapa i faahoˈihia mai, ia taa e te herehia ra e te farii-popou-faahou-hia ra ratou ei mau melo no te amuiraa.

E tia râ ia tatou ia haamanaˈo e aita te rahiraa i roto i te amuiraa e taa maitai ra i te mau huru tupuraa taa ê o tei aratai i te hoê taata ia tiavaruhia aore ra ia faahoˈihia mai. Hau atu, te vai ra paha vetahi o tei huru ê aore ra o tei mauiui—peneiaˈe i te hoê area taime roa—no te hara a te taata i tatarahapa. I te mea hoi e e mauiui ohie noa tatou i teie mau mea, e mea maramarama e eita tatou e faahiti i te mau tapao farii popou hou a rave-taitahi-hia ˈi te reira, ia faaara-anaˈe-hia mai e ua faahoˈihia mai o mea.

Auê hoi te faaroo o te feia i faahoˈihia mai, i te haapuaihia ia ite ratou e te farii-popou-hia ra ratou ei mau melo no te amuiraa Kerisetiano! E nehenehe tatou e faaitoito i taua feia tatarahapa ra na roto i te tauaparauraa ˈtu ia ratou e te haafaufaaraa i to ratou auhoaraa i te Piha no te Basileia, i roto i te taviniraa, e i te tahi atu mau taime e tano. Na roto i te faaite-papu-raa, aore ra te haapapuraa, i to tatou aroha no teie mau taata herehia, aita roa ˈtu ïa tatou e faaiti ra i te ino o te mau hara ta ratou i rave. Tera râ, te oaoa nei tatou, e te mau manihini i nia i te raˈi, i te mea ra e ua haapae ratou i te haerea hara e ua hoˈi mai ia Iehova ra.—Luka 15:7.

[Hohoˈa i te api 15]

Ua patoi te tamaiti matahiapo i te oaoa i te hoˈiraa mai to ˈna taeae