E pohe natura anei to Maria?

IA AU i te vea a te Vaticana ra L’Osservatore Romano, te na ô ra te haapiiraa Katolika o te Afai-tino-raahia o Maria e: “Ua afaihia te Paretenia Viivii ore, tei paruruhia i te mau tafetafeta atoa o te hara matamua, ma to ˈna tino e to ˈna nephe i roto i te hanahana i nia i te raˈi, i te hoperaa to ˈna oraraa i nia i te fenua nei.” Ua aratai teie haapiiraa i te tahi feia tuatapapa faaroo Katolika ia parau e “aita [o Maria] i pohe e ua afai-oioi-hia oia mai te oraraa mai i nia i te fenua nei, i te hanahana i nia i te raˈi,” o ta te vea ra ïa e parau ra.a

Aita i maoro aˈenei, ua horoa te Pâpa Ioane Paulo II i te tahi tatararaa taa ê o te tumu parau. I te Putuputuraa Rahi i te Vaticana i te 25 no Tiunu 1997, teie ta ˈna i parau: “Aita te Faufaa Apî e horoa ra i te mau haamaramaramaraa no nia i te mau huru tupuraa o te poheraa o Maria. Te aratai nei te reira i te hoê taata ia manaˈo e e pohe natura to ˈna, ma te ore e faahiti i te tahi manaˈo taa ê. . . . Te mau manaˈo e patoi ra i to ˈna pohe natura, e au ra ïa e e ere i te mau manaˈo papu.”

Te faaite tahaa ra te mau parau a te Pâpa Ioane Paulo i te hoê hape rahi i roto i te tooma o te Tôraa Viivii ore. Ahiri te metua vahine o Iesu i “paruruhia i te mau tafetafeta atoa o te hara matamua,” nafea ïa o Maria e nehenehe ai e pohe i te hoê “pohe natura,” te faahopearaa hoi o te hara no ǒ mai i te taata hara ra o Adamu? (Roma 5:12) Te tumu o teie fifi i te pae tuatapaparaa faaroo, o te manaˈo tavirihia ïa o te Ekalesia Katolika no nia i te metua vahine o Iesu. Eita e maerehia ia tupu te amahamaharaa e te taa ore i roto i te Ekalesia Katolika i nia i teie tumu parau.

Noa ˈtu e te faataa ra te Bibilia ia Maria mai te hoê vahine haehaa, haapao maitai, e te itoito, aita oia e faahiti ra i teie mau huru maitatai no te hoê “tôraa viivii ore.” (Luka 1:38; Ohipa 1:13, 14) Te parau noa ra te Bibilia e: “Ua rave paatoa hoi i te hara, e ua ere i te haamaitai a te Atua ra.” (Roma 3:23) Oia, ua naea-atoa-hia o Maria i te hara e te huru taata tia ore mai te toea atoa o te huitaata nei, e aita e haapapuraa no te faaite e e ere to ˈna i te pohe natura.—A faaau e te Ioane 1, 1:8-10.

[Nota i raro i te api]