Na vai te hape?

Te faahape nei e rave rahi i te Atua no to ratou mau fifi. Te na ô ra te hoê maseli a te Bibilia e: “Na te maamaa iho o te taata e faaino i to ˈna oraraa, e e faahoˈi oia i to ˈna inoino i nia i te Fatu.” (Maseli 19:3, The New English Bible) Te pariraa e o te Atua te tumu o te mau ati o te taata, e mai te mea ra ïa e te faahapehia ra te hoê taata hamani pereoo no te mau ati purumu e tupu rahi nei no te taero ava.

Ua horoa te Atua i te huitaata nei i te aratairaa i roto i ta ˈna Parau, te Bibilia. Na roto i te haapiiraa i teie buka no ǒ mai i te Atua ra, e te faaohiparaa i te mau ture e te mau faaueraa tumu i roto, e nehenehe tatou e ape e rave rahi mau marei o te oraraa. Ia patoihia râ te aratairaa a te Atua, e ati ïa te tupu mai. Ei hiˈoraa, te faaruru pinepine nei te feia e tamaa, e puhipuhi i te avaava, e inu, aore ra e taiata hua nei, i te mau faahopearaa iino i te pae tino. (Luka 21:34; Korinetia 1, 6:18; Korinetia 2, 7:1) Ua papai te aposetolo kerisetiano ra o Paulo e: “O ta te taata e ueue ra, o ta ˈna â ïa e ooti mai. O te ueue i ta to ˈna ihora tino, o te pohe ta ˈna e noaa i te tino ra; e o te ueue i ta te [v]arua ra, o te ora mure ore ta ˈna e noaa i te [v]arua ra.”—Galatia 6:7, 8.

E mea maitai aˈe ïa ia faaohipa i te mau ture e te mau faaueraa tumu a te Atua! Ia na reira tatou, e ite ïa tatou i te tupuraa mau o te tǎpǔ ta te Atua i parau na roto i te peropheta ra o Isaia e: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra. Ahiri oe i faaroo mai i te mau faaue na ˈu e; ua riro ïa to oe [hau] mai te pape pue ra; e ta oe [parau-tia] mai te are moana ra.”—Isaia 48:17, 18; MN.