Eaha te huru oraraa no a muri aˈe o to tatou Fenua?

“Aita ˈtu senekele e faaauhia i te 20raa o te senekele i roto i te haavîraa uˈana tivila ino mau, i roto i te rahiraa o te mau aroraa i faatupuhia, te tupuraa o te mau nuu taata e horo nei i te tahi atu fenua, te mau mirioni taata i taparahi-pohe-hia i roto i te mau tamaˈi, e te mau haamâuˈaraa rahi mau no te ‘parururaa,’” o ta te buka ra World Military and Social Expenditures 1996 ïa e parau ra. E taui anei teie huru tupuraa i te hoê mahana?

Ua faahaamanaˈo te aposetolo Petero i te mau Kerisetiano i te parau tâpû no ǒ mai i te Atua ra tau senekele na mua ˈtu e: “Te tatari nei râ tatou i te raˈi apî e te fenua apî ta [te Atua] i parau maira, i te vai-mau-raa o te parau-tia ra.” (Petero 2, 3:13) Ua riro teie mau parau ei tuhaa matamua o te parau tohu a Isaia. (Isaia 65:17; 66:22) Ua ite te Iseraela tahito i te tupuraa matamua i to te nunaa haamauraahia i te fenua tâpûhia i muri aˈe i to ˈna tapea-tîtî-raahia i Babulonia e 70 matahiti i te maoro. Ma te faahiti faahou te parau tâpû no nia “i te raˈi apî e te fenua apî,” ua faaite o Petero e e tupu faahou taua parau tohu ra i nia i te hoê faito rahi atu â—na te ao nei!

Te hinaaro o te Atua, te haamauraa ïa i te mau huru tupuraa parau tia i nia i te fenua taatoa, e e faatupuhia te reira e to ˈna Basileia no te raˈi e o te Mesia hoi te Arii. “E ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” (Isaia 2:4) Taua hau taatoa ra e taua vai-maitai-raa, te mea ïa o ta Iesu i haapii i ta ˈna mau pǐpǐ ia tiai e ia pure atu na roto i te mea matau-noa-hia na i te pii To matou Metua, aore ra te Pure a te Fatu, ma te parauraa e: “Ia tae to oe ra [“basileia,” MN]. Ia haapaohia to oe hinaaro i te fenua nei, mai tei te ao atoa na.”—Mataio 6:9, 10

E hinaaro anei outou e ora ˈtu i roto i te hoê ao parau-tia mai tei te raˈi ra te huru? Te tiaturiraa ïa ta te Bibilia e pûpû ra na te feia atoa e imi ra ma te mafatu taatoa no te ite i te Atua e o te ora ia au i to ˈna mau haerea tia.