O vai o Iehova?

UA PARAU Iehova i te hoê o to ˈna feia haamori haapao maitai e: “E ore roa hoi te hoê taata e ora ia na reira i te hiˈo mai ia ˈu.” (Exodo 33:20) “E Varua te Atua,” e e ore te taata e nehenehe e hiˈo ia ˈna e to ratou mata pae tino. (Ioane 4:24) Ia hiˈo tia ˈtu tatou i te mahana i te avatea, e ino to tatou mata, oia atoa, mea ino roa no tatou ahiri e e ite roa ˈtu tatou i te Pu rahi o te puai tei poiete eiaha noa i ta tatou mahana anaana, i te mau mahana atoa râ o te ao materia e ore e pau ia taio.

Auaa râ, eita tatou e hinaaro ia hiˈo roa ˈtu i te Atua e noaa mai ai te ite no nia ia ˈna. Te faaite ra te Bibilia o vai Tei faaineine i te puohu faahiahia na tatou, oia hoi te fenua, e eaha to ˈna huru mau. No reira, mea faufaa roa ia maimi i roto i te Bibilia i te ite no nia i te Metua i horoa mai i te ora no tatou e te hoê fare faahiahia i reira tatou e nehenehe ai e fanaˈo i te oraraa.

Te auraa o To ˈna iˈoa

E auraa to te mau iˈoa atoa, noa ˈtu â ïa e aita te rahiraa e ite ra i teie mahana. Ei hiˈoraa, te iˈoa Beretane matauhia ra o David, no roto mai ïa i te hoê parau Hebera o “Herehia” te auraa. E auraa atoa to te iˈoa o te Poiete oia hoi Iehova. Eaha ïa te auraa? I roto i te reo Hebera tumu o te Bibilia, ua papaihia te iˈoa o te Atua i na reta e maha, YHWH, e e itehia oia e 7 000 taime i roto i te tuhaa reo Hebera o te Bibilia. Te auraa o te iˈoa o te Atua, teie ïa “Na ˈna e faatupu.” Te faaite maira te reira e e faaau Iehova ia ˈna iho, ma te paari, i nia i te huru e titauhia no te faatupu roa i ta ˈna mau opuaraa. Oia te Poiete, te Haava, te Faaora, te Taata e atuatu i te Ora, e no reira, e nehenehe oia e faatupu roa i ta ˈna mau tǎpǔ. Hau atu â, na roto i te reo Hebera, ua papaihia te iˈoa Iehova na roto i te hoê huru e faaite ra e te faatupuhia ra te hoê ohipa. Oia mau, te faariro noa râ Iehova ia ˈna ei taata faatupu roa i ta ˈna mau opuaraa. E Atua oraora mau oia!

Te mau huru maitatai rahi roa ˈˈe o Iehova

Te faataa ra te Bibilia i te Poiete mai te “Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino.” (Exodo 34:6, 7) Te parau ra “aroha,” o te huriraa ïa o te hoê parau Hebera taa maitai. E faataa oia i te hoê maitai e taaihia ma te here i nia i te hoê ohipa e ia raeahia te fa o taua ohipa ra. E nehenehe atoa oia e hurihia na roto i te parau ra “aroha haavare ore.” E taaihia te maitai o Iehova, ma te here, i nia i ta ˈna mau mea ora e e faatupu oia i ta ˈna opuaraa faahiahia. Eita anei outou e hinaaro i teie huru aroha no ǒ mai i Tei horoa mai i te ora no outou?

E ore Iehova e riri vave e e faaore oioi oia i ta tatou mau hape. Mea mahanahana roa ia fatata ˈtu tatou i te hoê taata mai teie. Teie râ, e ere ïa te auraa e e faatia oia i te ohipa hape. Ua parau oia e: “O vau o Iehova tei hinaaro i te parau-tia; o tei ore i hinaaro i te haru e te parau ino.” (Isaia 61:8) Ei Atua o te parau-tia, eita oia e vaiiho noa i te feia rave hara mǎtaˈu ore ia tamau i ta ratou mau ohipa iino. No reira, e nehenehe tatou e tiaturi e i te tau mau, e faatitiaifaro Iehova i te parau-tia ore na te ao nei. E ore oia e tapo i to ˈna mata i nia i tei hepohepo.

E ere i te mea ohie ia faafaito maite noa te aroha e te parau-tia. Mai te peu e e metua outou, e ere anei i te mea fifi ia faaoti afea, nafea, e eaha te faito, ia faatitiaifaro outou i ta outou mau tamarii ia hape to ratou haerea? No te faafaito i te parau-tia e te aroha, e titauhia te paari rahi. E faaite Iehova i teie huru maitatai ma te rahi ia ohipa oia e te taata. (Roma 11:33-36) Oia mau, e nehenehe te paari o te Poiete e itehia i te mau vahi atoa, ei hiˈoraa, i roto i te mau mea poietehia faahiahia mau e haaati ra ia tatou.—Salamo 104:24; Maseli 3:19.

Teie râ, eita e navai noa te paari. No te faatupu i to ˈna hinaaro, e tia atoa i te Poiete ia faaohipa i te puai, e te faaite ra te Bibilia e mea puai roa oia: “A nânâ na i to outou mata i nia; a hiˈo ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai.” (Isaia 40:26) “No to ˈna ra puai rahi,” i oti ai te mau mea i te hamanihia e Iehova. Eita anei te hoê huru maitatai mai teie e huti ia oe ia ˈna ra?

Te Atua o te mau nunaa atoa

‘Teie râ, e ere anei Iehova i te Atua o te “Faufaa Tahito,” te Atua o Iseraela i tahito ra?’ ta outou paha ïa e ui maere. Parau mau e ua faaite Iehova ia ˈna iho i to Iseraela. I te mea râ hoi e na ˈna i poiete i na taata matamua, o te Atua ra o Iehova “te tumu o te iˈoa o te mau utuafare atoa . . . o te ao atoa nei.” (Ephesia 3:15, MN) Mai te peu e tiaturi outou e mea tia ia faatura i to outou mau tupuna, e ere anei i te mea tano ia faaroo i Tei horoa i te ora i te taata matamua, to tatou paatoa tupuna, oia te matamehai o te mau huitupuna atoa e vai ra i te fenua nei i teie mahana?

E ere te feruriraa o to tatou Poiete i te mea aoaoa. Parau mau, i te hoê tau, e taairaa taa ê tei rotopu ia ˈna e te nunaa o Iseraela. Noa ˈtu â râ, i taua tau ra, ua farii maite oia i te mau taata atoa i tiaoro i to ˈna iˈoa. Ua parau te hoê arii paari no Iseraela i roto i te hoê pure ia Iehova e: “I te taata ê ra, e ere i to Iseraela i to oe nei mau taata, mai te fenua roa maira no to oe nei iˈoa i tae mai ai . . . , e faaroo mai oe i reira i nia i te raˈi, . . . a faatia mai ai i ta taua taata ê i pure mai ia oe ra: ia faaroo to te ao atoa nei i to oe ra iˈoa.” (Te mau arii 1, 8:41-43) Tae roa mai i teie nei, e nehenehe â te taata no te mau nunaa atoa e ite ia Iehova e e faatupu i te taairaa faufaa mau e oia. Eaha râ te auraa no outou?

Te mau haamaitairaa i te iteraa ia Iehova

E hoˈi faahou anaˈe i nia i te faahohoˈaraa o to mua ˈtu tumu parau, ia tae mai te hoê puohu nehenehe maitai, e hinaaro iho â ïa outou e ite eaha te faufaaraa o taua ô ra. Nafea ia faaohipa e ia atuatu i te reira? Oia atoa, e hinaaro tatou e ite eaha te feruriraa o te Atua ia ˈna i faaineine i te fenua no tatou. Te parau ra te Bibilia e “aita oia i hamani ia ˈna ia vai faufaa ore noa, ua hamani [râ] oia ia ˈna ia faaeahia” e te taata, mea papu mau ïa.—Isaia 45:18, MN.

Aita râ te rahiraa o te taata i atuatu i te ô a te Poiete. Te faaino nei ratou i te fenua, aita roa ˈtu ïa Iehova e mauruuru nei. Teie râ, ia au i te tiaraa o to ˈna iˈoa, ua faaoti maite Iehova e e faatupu roa oia i ta ˈna opuaraa matamua no te taata e te fenua. (Salamo 115:16; Apokalupo 11:18) E tataî oia i te fenua a horoa ˈtu ai ei tufaa na te feia e hinaaro mau e ora ei tamarii faaroo na ˈna.—Mataio 5:5.

Te faaite ra te buka hopea o te Bibilia eaha te huru ia tupu teie mau mea: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna. . . . E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:3, 4) Eita te taata e heva faahou no te ati aore ra e oto faahou no te ereraa i te hoê taata here. Eita te taata e pii faahou i te tauturu i roto i te hepohepo aore ra e roohia i te mauiui no te mau maˈi pohe. Tae noa ˈtu “te pohe, e haamouhia ïa.” (Korinetia 1, 15:26; Isaia 25:8; 33:24) Teie ïa te faataaraa no nia i te huru oraraa ta Iehova i hinaaro i te omuaraa ia fanaˈo tatou, i to ˈna poieteraa i to tatou nau tupuna matamua.

Oia mau, e nehenehe outou e ite i te mau tupuraa e au i te paradaiso i teie nei i rotopu i te feia haamori ia Iehova. Te parau ra oia ia ratou e: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.” (Isaia 48:17) E Metua maitai Iehova, oia e haapii ia tatou, ta ˈna mau tamarii, i te huru oraraa maitai roa ˈˈe. Eita ta ˈna mau aveia no te taata e faatupu i te mau opaniraa tano ore, e horoa mai râ i te paruru î i te aroha. Te peeraa i te reira, e horoa mai ïa i te tiamâraa e te oaoa, mai tei papaihia e: “E teie nei, o [Iehova] taua [V]arua ra, e tei ia ˈna te [v]arua o [Iehova] ra, tei reira te tiamâ.” (Korinetia 2, 3:17; MN) Na roto i te peeraa i te mau aveia i faataahia i roto i te Bibilia, te tamata ra te feia i farii i ta ˈna aratairaa, i teie nei, i te hau o te varua o te parare roa ia tae i te hoê mahana, i roto i te huitaata na te ao atoa nei.—Philipi 4:7.

Auê ïa Metua î i te maitai o Iehova e! E hinaaro mau anei outou e haapii hau atu â no nia i Tei muri mai i te mau mea faahiahia atoa i poietehia? No te feia e hinaaro mau ra, mea faito ore te mau haamaitairaa e noaa mai i teie nei â. E i te tau i mua nei, mea mure ore ïa te mau haamaitairaa.

[Hohoˈa i te api 5]

E nehenehe te iˈoa o te Atua i papaihia i na reta Hebera e maha, e itehia i nia i te mau papai o te mau fare pure tahito e rave rahi