Te faatia ra te feia poro i te Basileia
“E pûpû to oe mau taata ia ratou iho ma te aau tae”
E LEPERA to te raatira nuu mana ra no Arama o Naamana. Ia ore ia rapaauhia, e riro teie maˈi hairiiri i te faaino roa i te hohoˈa mata e te aratai roa i te pohe. E nafea ïa o Naamana? I rotopu i te mau tavini a Naamana te vai ra te hoê tamahine iti, “e tîtî no Iseraela mai.” Ua faaite oia ma te mǎtaˈu ore e o te peropheta ra o Elisaia te taata e nehenehe e faaora ia Naamana.—Te mau arii 2, 5:1-3, MN.
Auaa to ˈna taiâ ore, ua maimi o Naamana ia Elisaia e ua ora maira oia. I muri aˈe, riro mai nei o Naamana ei taata haamori ia Iehova! Ua tupu teie aamu i faatiahia i roto i te Bibilia i te senekele 10 H.T.T. (Te mau arii 2, 5:4-15) I to tatou nei mahana, e rave rahi feia apî e faaite nei i teie huru itoito na roto i te tururaa i te mau faufaa o te Basileia. O tei haapapuhia ïa e te ohipa i mua nei i tupu i Mozambique.
E taata poro i te parau apî maitai bapetizo-ore-hia o Nuno e e ono matahiti to ˈna. Na mua ˈˈe oia i riro mai ai ei taata poro bapetizo-ore-hia, e peu matauhia e Nuno i te haaputuputu i te mau tamarii e haaati ra i to ˈna nohoraa e te pure e te haapii atu ia ratou i te Bibilia ma te faaohipa i te buka ra Ta ˈu Buka Aamu Bibilia.
Mea pinepine o Nuno i te tia oioi mai i nia i te Mahana maa i te poipoi e te faahaamanaˈo i to ˈna utuafare e: “I teie mahana e haere tatou i roto i te taviniraa.” E itehia to ˈna itoito no te taviniraa i roto i te tahi atu â mau tupuraa. Ia apee oia i to ˈna mau metua i roto i te taviniraa i roto i te mau aroâ i Maputo, mea pinepine o Nuno iho i te haere roa ˈtu i mua i te taata. I roto i te hoê tupuraa mai teie, ua tapiri maira te hoê taata tapihoo ia ˈna e ua ani maira e: “No te aha oe e hoo ai i teie mau vea?” Ua parau atura o Nuno e: “Aita vau e hoo ra i te mau vea, e farii râ vau i te hoê ô no te turu i te ohipa pororaa.” Ua pahono maira te taata tapihoo ra e: “Noa ˈtu e aita vau e anaanatae ra, mea maere roa râ na ˈu to oe haerea e to oe aravihi. Te hinaaro nei au e horoa i te hoê ô no teie ohipa.”
I roto i te tahi atu tupuraa, ua haafatata ˈtu o Nuno i te hoê taata i roto i te aroâ e ua pûpû atura oia i te buka ra Te hau e te ino ore mau—Nafea e itehia mai ai? Ua ani maira te taata ra e: “Aita anei oe e haere ra i te fare haapiiraa e vai ra i ǒ?” “Oia,” ta Nuno ïa i pahono atu, “e haere vau i tera fare haapiiraa, i teie râ mahana te poro nei au i te hoê poroi faufaa no roto mai i teie buka. Te faaite maira oia e e nehenehe oe e ora i roto i te ao apî ta te Atua e hopoi mai, mai tei faaitehia i nia i te hohoˈa i roto i teie buka.” Aita roa ˈtu o Nuno e ite ra e te taata ta ˈna e paraparau atura, o te hoê ïa taata haapii no ta ˈna fare haapiiraa. Aita noa te taata haapii i farii i te buka, e rave atoa râ oia i teie nei i te mau vea ra Te Pare Tiairaa e te A ara mai na! ia Nuno ra.
Ia anihia ia Nuno no te aha oia e au ai i te amui atu i roto i te pororaa, e parau oia e: “Te hinaaro nei au e paraparau i te taata e e haapii ia ratou no nia ia Iehova e ta ˈna Tamaiti, o Iesu Mesia.” Ua parau faahou ihora oia e: “Eita anaˈe te taata e hinaaro e faaroo, eiaha roa ˈtu tatou e haapeapea.”
Na te ao atoa nei, te “pûpû” nei te mau tausani feia apî mai ia Nuno “ia ratou iho ma te aau tae” no te haapii e te poro i te Basileia o te Atua. (Salamo 110:3, MN) Eita râ teie ohipa e tupu noa mai ma te manaˈo-ore-hia. E haamaitairaa rahi te roaa mai i te mau metua i haapii i ta ratou mau tamarii no nia ia Iehova mai to ratou tamariiriiraa mai â, i horoa i te hoê hiˈoraa maitai i roto i te taviniraa, e i haapao i te mau faufaa o te Basileia ma te itoito.