Te mau taote, te mau haava, e te mau Ite no Iehova

I TE avaˈe Mati 1995 ra, ua faatupu te mau Ite no Iehova e piti apooraa i Beresilia. Eaha te tumu? No te ani ïa i te tahoêraa a te tino rapaauraa e a te pae o te ture, ia mau anaˈe te hoê Ite no Iehova i te fare maˈi e ia ore oia e farii i te pâmuraa toto.—Ohipa 15:29.

Te vahi peapea, i roto i te tahi mau tupuraa, aita te mau taote i tâuˈa aˈe i te mau aniraa a te mau taata maˈi Ite no Iehova, e ua titau ratou i te mau faaueraa a te tiribuna no te faahepo i te hoê pâmuraa toto. I roto i teie mau huru tupuraa, ua faaohipa te mau Ite i te mau ravea atoa i te pae no te ture, no te paruru ia ratou iho. Tera râ, mea au aˈe na ratou i te tahoêraa maoti hoi i te faaûraa. No reira, ua haamatara na apooraa e piti e e rave rahi mau ravea monoraa i te mau pâmuraa toto e te farii popou nei te mau Ite no Iehova i teie mau ravea.a

Ua turu aˈena te hoê putuputuraa a te Apooraa Taote no te Pae fenua no São Paulo i te tiaraa o te mau Ite. I te avaˈe Tenuare 1995, ua faaotihia e mai te peu e e patoihia te rapaauraa e faauehia e te hoê taote, e tiaraa to te taata maˈi no te patoi i te reira e no te maiti i te hoê taote ê.

Te vahi oaoa, i teie nei, e mau hanere melo no te tino rapaauraa no Beresilia o tei farii i te rave i te mau rapaauraa aita e toto, i nia i te feia maˈi e ani mai i te reira. Mai te mau apooraa i tupu i te avaˈe Mati 1995 mai, ua maitai roa te tahoêraa i rotopu i te mau taote, te mau haava, e te mau Ite no Iehova i Beresilia. I te matahiti 1997, ua nenei te vea taote no Beresilia ra Âmbito Hospitalar i te hoê tumu parau o tei haapapu maitai i te mau tiaraa o te mau Ite no Iehova, oia hoi ia faaturahia to ratou tiaraa no nia i te toto. I teie nei, te fariihia nei e, mai ta te Apooraa Taote no te Pae fenua no te mau hau no Rio de Janeiro e no São Paulo i faaite, “eiaha te hopoia a te taote e paruru i te ora o te taata maˈi, ia na nia ˈtu i ta ˈna hopoia e paruru i te tiaraa o te taata maˈi ia maiti.”

[Nota i raro i te api]