Ia rahi atu te taata e faaroo i te parau apî maitai

I TE hoê taime, ua feruri au i te mau taata o to ˈu nei fenua, e ua ite atura vau e e rave rahi o tei faarooroo i te parau no te mau Ite no Iehova na roto noa i te mau parau apî. Ua manaˈo atura vau e e tia ia farereihia teie mau taata ia nehenehe ratou e ite e o vai mau te mau Ite no Iehova e eaha mau na ta ratou mau tiaturiraa. Nafea râ vau ia tauturu atu? E matahiapo kerisetiano ta ˈu tane, e ua horoa mai oia i te mau aratairaa paari e te mau manaˈo tauturu.

Ua itea mai ia mâua te hoê manaˈo faufaa roa i roto i te tumu parau ra “Te mau vea o te horoa i te tamahanahanaraa e au,” neneihia i roto i te A ara mai na! o te 8 no Tenuare 1995 (Farani). No nia i te ohipa i ravehia e te hoê Ite, te na ô ra teie tumu parau e: “Te haere nei oia e ohi haere i te tahi mau A ara mai na! tahito ta te tahi atu mau Ite i haapue noa i te fare. I muri iho, e haere atu oia i roto i te mau piha toroa o te anaanatae taa ê mai i te tahi o te mau tumu parau.”

Ma te tauturuhia mai e ta ˈu tane, ua haaputu mai au tau hanere vea. Ua maiti atura vau i te mau tumu parau huru rau e tano maitai no te feia o ta ˈu e tamata ˈtu i te farerei.

Na roto i te imiraa i roto i te mau buka numera niuniu e te mau vairaa parau huiraatira, ua noaa maira ia ˈu te hoê tabula o te mau fare maˈi, te mau puhaparaa a te mau piahi, e te mau fare ruau. Ua tapao atoa vau i nia iho, te feia huna maˈi, te mau faatere fare haapiiraa e te feia aˈo, te mau taote hiˈopoa, e te mau tia no te mau fare auri e te mau tiribuna. Tei roto atoa i ta ˈu tabula, te mau faatere o te mau pu tauturu i te feia inu ava e te feia rave i te raau taero, te mau taatiraa paruru i te natura, i te feia huma e te feia i atihia i te tamaˈi, e te mau taatiraa maimi no nia i te maa. Aita atoa i moehia ia ˈu te mau raatira piha toroa no te turuutaa, te mau tuhaa totiale, e te mau ohipa utuafare.

Eaha ta ˈu e parau atu i te taata?

Te mea matamua o ta ˈu i rave i to ˈu haereraa i te hoê vahi, o te faaite-papu-raa ïa e o vai au. I muri iho, e faaite atu na vau e tau minuti noa to ˈu tere.

Ia farerei roa ˈtu vau i te taata faatere, e parau atu na vau e: “E Ite no Iehova vau. Tera râ, aita vau i haere mai no te paraparau no nia i te haapaoraa, eita hoi te reira e tano i te taime raveraa ohipa.” E pinepine e farii ohie aˈe mai te taata. I muri iho, ma te faatano i ta ˈu mau parau ia au i te huru tupuraa, e na ô atu vau e: “E piti tumu to to ˈu nei tere. A tahi, te hinaaro nei au e faaite i to ˈu mauruuru no te ohipa ta ta outou piha toroa e faanahonaho nei. Eita hoi e tia ia haafaufaa ore i te taime e te tutavaraa e pûpûhia nei no te maitairaa o te huiraatira. E tia mau â ia haapopouhia.” I te rahiraa o te taime, e hitimahuta te taata i teie huru parau.

I reira ïa te taata e aniani ai e eaha râ te piti o te tumu o to ˈu tere. E parau atu vau e: “Te piti o te tumu o to ˈu tere, teie ïa: I roto i ta matou vea A ara mai na!, o te operehia nei hoi na te ao atoa nei, ua maiti mai au i te tahi mau tumu parau o te tuatapapa ra i ta outou huru ohipa e te mau fifi i taaihia i te reira. Ua papu ia ˈu e e oaoa roa oe i te iteraa e mea nafea te hoê vea e operehia nei na te ao nei, ia hiˈopoa i teie mau fifi. E oaoa roa vau i te vaiiho mai i teie mau vea na oe.” E pinepine, e haamauruuru mai te taata ia ˈu no ta ˈu mau tutavaraa.

Mau faahopearaa maere e te oaoa

I to ˈu faaohiparaa i teie huru faaiteraa, ua farii maitai mai te rahiraa; hoê anaˈe taata i nia i te 17 o tei ore i farii mai. E rave rahi mau tupuraa o ta ˈu i farerei e mea maere e mea oaoa atoa.

Ei hiˈoraa, i muri aˈe i to ˈu tamataraa e maha taime e to ˈu tiai-noa-raa ma te faaoromai, ua nehenehe atura vau e farerei i te hoê taata hiˈopoa i te mau fare haapiiraa o te hoê mataeinaa. E taata ohipa roa oia. Teie râ, ua farii maitai mai oia e ua paraparau mai oia ia ˈu tau taime. I to ˈu faaineineraa i te haere, ua parau maira oia e: “Te haamauruuru nei au ia oe no ta oe mau tutavaraa, e e taio mau â vau i ta oe mau vea.”

I te tahi atu taime, ua haere atu vau i te hoê tiribuna mataeinaa no te farerei i te haava rahi, e taata faito matahiti au noa. I to ˈu tomoraa ˈtu i roto i ta ˈna piha ohipa, ua hiˈo maira oia na nia i ta ˈna mau papie ma te iria.

“Te mau hora e matara ˈi ta ˈu piha ohipa, o te Mahana piti poipoi noa, e nehenehe ïa vau e horoa ˈtu i te mau haamaramaramaraa,” o ta ˈna ïa i parau mai ma te etaeta.

“Eiaha oe e inoino mai mai te peu e e ere teie i te taime tano,” o ta ˈu ïa i pahono oioi atu e ua na ô atoa ˈtu vau e, “E hoˈi mai râ vau i te tahi atu taime. Tera râ, e tumu parau taa ê ta ˈu e hinaaro ra e paraparau atu ia oe.”

Ua hinaaro atura te haava e ite e eaha râ tera tumu parau. Ua ani maira oia ma te mǎrû aˈe e eaha ta ˈu e hinaaro ra. Ua parau faahou atura vau e e hoˈi mai au i te Mahana piti.

“A parahi mai,” o ta ˈna ïa i ani mai, e ua hitimahuta hoi au. “Eaha ta oe e hinaaro?”

Ua tupu atura te hoê aparauraa anaanatae roa, e ua tatarahapa maira oia no to ˈna huru auhoa ore i te haamataraa, no te mea mea rahi roa ta ˈna ohipa.

“Ua ite anei oe e eaha te mea ta ˈu i au roa e te mau Ite no Iehova?” o ta te haava ïa i ani mai i muri iho. “E mau faaueraa tumu papu maitai ta ratou, e eita roa ˈtu ratou e faarue i te reira. Ua tamata o Hitler i te mau ravea atoa, aita râ te mau Ite i haere i te tamaˈi.”

I to mâua tomoraa ˈtu i roto i te piha ohipa, ua ite mai te mau papai parau e o vai râ mâua. I muri iho, ua parau maira te papai parau rahi ma te auhoa ore e, “Eita roa ˈtu te peretiteni e farii i te taata.”

“Tera râ, e farii mai oia ia mâua,” o ta ˈu ïa i pahono atu ma te mǎrû, “no te mea e Ite no Iehova mâua. E ere mâua i te feia taparu, e eita mâua e haamaoro, e toru noa minuti.” Ua pure puai atura vau i roto i to ˈu mafatu, “E Iehova e, a rave e ia tupu maitai teie farereiraa!”

Ua pahono maira te papai parau ma te faateitei e, “Na reira ïa, e tamata ïa vau.” Ua haere atura oia. E piti paha minuti i muri iho, e tau maoro roa ïa i to ˈu manaˈoraa, ua hoˈi maira oia apeehia e te peretiteni iho. Ma te ore e faahiti aˈe i te parau, ua aratai atura oia ia mâua i roto i ta ˈna piha ohipa, na mua mai e piti piha ê atu.

A haamata ˈi matou i te paraparau, ua mǎrû roa mai oia. Ua farii popou ihora oia i te mau numera taa ê o te A ara mai na! o ta mâua i pûpû atu. Ua haamauruuru mâua ia Iehova no teie ravea no te horoa i te hoê faaiteraa maitai no nia i te tumu o ta tatou ohipa.

Ia feruri anaˈe au i te rahiraa o te mau tupuraa oaoa i farereihia, ua rahi atu to ˈu papuraa i te mau parau a te aposetolo Petero: “Ua ite mau atura vau e ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Te hinaaro nei te Atua e ia fanaˈo te mau taata atoa, noa ˈtu to ratou huru oraraa, to ratou reo, aore ra to ratou tiaraa totiale, i te ravea ia ite ratou i ta ˈna opuaraa no te huitaata nei e no te fenua nei.—Na te hoê vahine taio.