Te faatia ra te feia poro i te Basileia

Ua haamaitai te Atua i te faaoromai i Malawi

UA RIRO na o Iosepha ei tavini haapao maitai no Iehova. (Hebera 11:22) E taata faaoromai faahiahia atoa oia. Noa ˈtu e ua haavarehia o ˈna e to ˈna iho mau taeae, ua hoohia ei tîtî e piti taime, e ua tapeahia oia i muri iho i roto i te fare auri no te mau pariraa haavare, aita o Iosepha i haaparuparu. Ua faaoromai râ oia i te mau matahiti ati, a tiai noa ˈi ma te haehaa i te haamaitairaa a Iehova.—Genese 37:23-28, 36; 39:11-20.

I teie mahana atoa, ua tiai te mau Ite no Iehova no Malawi ma te faaoromai i te haamaitairaa a te Atua. I te roaraa e 26 matahiti, ua faaruru teie mau Ite kerisetiano i te mau opaniraa a te faatereraa, te patoiraa uˈana, e e rave rahi mau hamani-ino-raa. Ua haamauruuruhia râ to ratou faaoromai!

I te tupuraa te hamani-ino-raa i Malawi i te hopea matahiti 1967, te vai ra tau 18 000 feia poro i te Basileia. A feruri na i te oaoa o te mau Ite i to ratou faarooraa e ua haamata te matahiti taviniraa 1997 e te hoê numera apî e 38 393 feia poro—hau atu ïa i te piti taime te numera i te haamataraa mai te opaniraa! Hau atu, ua maraa te numera o te feia i tae i na Tairururaa Mataeinaa 13 “Te mau vea o te hau a te Atua” i tupu i Malawi e hau atu i te 117 000. Ua haamaitai mau â o Iehova i to ratou faaroo e to ratou faaoromai.

O te tupuraa o te hoê taata apî, o Machaka te iˈoa, te hoê hiˈoraa o teie haamaitairaa. I to Machaka fariiraa i te haapii i te Bibilia e te mau Ite no Iehova, ua riri roa to ˈna mau metua. Ua parau raua e: “Mai te peu e e hinaaro oe e riro mai ei Ite, eiaha ïa oe e faaea mai i te fare.” Aita râ teie haamǎtaˈuraa i haaparuparu ia ˈna ia faaea i ta ˈna haapiiraa. I te pae hopea, ua haru pauroa te mau metua o Machaka i to ˈna mau ahu. Ua hoo atura te mau taeae i te tahi mau ahu no ˈna. I to te mau metua o Machaka faarooraa i te ohipa i tupu, ua parau atura raua ia ˈna e: “Mai te peu e e tauturu te mau Ite ia oe, a haere ïa e faaea ia ratou ra.” I muri aˈe i te feruri-maite-raa i te fifi, ua faarue atura o Machaka i te fare, e ua rave maira te hoê utuafare Ite o te amuiraa no reira ia ˈna i ǒ ratou ra.

No te inoino rahi o te mau metua o Machaka, ua opua ˈtura raua e haere e faaea i te tahi atu vahi ia ore roa hoi raua e farerei i te mau Ite. Parau mau e ua peapea roa o Machaka, ua itea mai râ ia ˈna i te tamahanahanaraa i to te mau taeae paraparauraa mai ia ˈna no nia i te Salamo 27:10, e na ô ra e: “Faarue noâ tau metua tane e tau metua vahine ia ˈu, ei reira Iehova e rave mai ai ia ˈu.”

I muri iho, ua mǎrû maira te riri o to ˈna mau metua, e ua opua ˈtura o Machaka e hoˈi i ǒ na ra. E au ra e ua putapû roa raua i te faaotiraa papu a ta raua tamaroa e tavini ia Iehova, no te mea ua hinaaro atoa raua e haapii i te Bibilia e te mau Ite no Iehova! Ua haere atoa raua i na mahana Tairururaa Mataeinaa e toru “Te mau vea o te hau a te Atua,” i muri iho, ua parau roa raua e: “Teie mau â te faanahonahoraa a te Atua.”

Oia, e riro paha te patoiraa ei mea mauiui, eita râ te mau vea taiva ore a te Atua e tuu. E haere noa ratou i mua ma te itoito, ua ite hoi ratou e “na te [ati] e faatupu i te faaoromai; e na te faaoromai e faatupu i te [huru e fariihia].” (Roma 5:3, 4; MN) E nehenehe mau â te mau Ite no Iehova no Malawi e haapapu e e haamaitai te Atua i te faaoromai.