Te faatia ra te feia poro i te Basileia

Te arue ra te feia apî i te atua i te Repubilita Demotaratia no Congo

E MAU senekele i teie nei, ua titau manihini te papai salamo ma te mahanahana i te feia apî ia arue i te Arii mure ore: “Te mau taata apî, e te mau paretenia; te mau taata paari, e te mau tamarii ra . . . [a] haamaitai i te iˈoa o Iehova; to ˈna anaˈe ra hoi te iˈoa ia faateitei.” (Salamo 148:12, 13) Te haapapu ra te mau hiˈoraa i muri nei no te Repubilita Demotaratia no Congo i teie haamaitairaa faito ore.

• Ua putapû roa te fatu o te fare i tarahuhia e te hoê pionie taa ê, i te haerea o te mau Ite no Iehova. Ua faatia ˈtura oia i te mau Ite ia haapii te Bibilia i ta ˈna tamahine ra o Fifi, e pae matahiti to ˈna. I muri aˈe i to ˈna iteraa i te mau haereraa i mua a Fifi i roto i te haapiiraa i Ta ˈu Buka Aamu Bibilia,a ua faatia ˈtura to ˈna metua tane ia ˈna ia haere i te mau putuputuraa i te Piha no te Basileia. I reira, ua haapii o Fifi iti i te mau himene o te Basileia i roto i te buka himene a te mau Ite. Mea au iho â râ na ˈna te himene numera 4, teie te upoo parau “Te parau tǎpǔ a te Atua no te hoê Paradaiso.”

I te hoê mahana, ua opua ˈtura te metua tane o Fifi e afai ia ˈna i ta ˈna pureraa. Ua maere roa te taata, no te mea aita o Fifi i himene i te mau himene pureraa. No te aha? No te mea ua manaˈo oia e aita te mau himene e himenehia ra i roto i te fare pure a to ˈna metua tane e tu ra e te mea ta ˈna i ite i roto i ta ˈna haapiiraa Bibilia. Ma te itoito, ua himene atura oia i ta ˈna himene o te Basileia au roa ˈˈe.

I muri aˈe e rave rahi tamataraa manuïa ore e faataui i to ˈna feruriraa, ua opua ˈtura te mau raatira ekalesia e tiavaru i teie tamahine iti e pae matahiti ra o Fifi! Noa ˈtu teie rave-ino-raa, ua faaea hau noa to ˈna metua tane. Ua teoteo oia e ua rave o Fifi i te hoê tiaraa papu no ta ˈna tiaturiraa. Ua hinaaro nau metua o Fifi e ia tamau noa oia i te amuimui e te mau Ite no Iehova.

• I to te hoê taurearea tamaroa, o Lukodi te iˈoa, opuaraa e haapii i te Bibilia e te mau Ite no Iehova, ua patoi uˈana to ˈna metua tane. I te hoê taime, te faaineine ra o Lukodi i te haere i te hoê putuputuraa i te Piha no te Basileia, ua haamǎtaˈu maira to ˈna metua tane ia ˈna e te hoê tipi rahi. I te tahi atu taime, ua tairi te metua tane o Lukodi ia ˈna e te hoê raau, o tei haapepe maitai i to ˈna tua. Noa ˈtu teie patoiraa uˈana, ua tapea maite o Lukodi i ta ˈna faaotiraa e riro mai ei Ite no Iehova. Ua tamau noa oia i te haere i mua e ua bapetizohia oia. I teie nei, te tavini ra oia ei pionie tamau.

Ua maere roa o Sona, te tuahine iti o Lukodi, i te tiaraa o to ˈna tuaana, e ua haapii atoa oia i te Bibilia e te mau Ite no Iehova. Teie râ, ia ore o Sona e haapii, ua afai to raua metua tane ia ˈna i te fare haapiiraa i te tahi atu oire iti, aita hoi e Ite i reira. Noa ˈtu râ, ua faariro o Sona ei peu matau na ˈna e tauaparau ia vetahi ê i te mau mea ta ˈna i haapii. I te pae hopea, ua anaanatae atoa maira to ˈna tuahine fetii.

I to te mau Ite i roto i te hoê oire iti tapiri faarooraa i te ohipa pororaa a Sona, ua haere atura ratou e farerei ia ˈna e ua faanaho atura no ˈna i te hoê haapiiraa Bibilia tamau i to ˈna fare. Ua tamau noa oia i te haere i mua, e aita i maoro, ua apiti atura oia i to ˈna tuaana ei Ite no Iehova pûpûhia e bapetizohia. Hau atu, e taata poro bapetizo-ore-hia to ˈna tuahine fetii i teie nei, e te faaterehia ra te hoê haapiiraa buka i roto i teie oire iti.

Auê te faahiahia e te haumǎrû e ia arue anaˈe te feia apî i te iˈoa o Iehova!

[Nota i raro i te api]