E nehenehe anei outou e tiaturi i te hoê atua mau?

“AITA e faufaa ia tiaturi i te Atua no te riro ei Kerisetiano . . . E tuhaa tatou no te hoê tauiraa rahi i teie nei, tera râ, i te senekele 21, aita e Atua faahou, i matau-noa-hia na, i roto i te ekalesia,” o ta te hoê ïa omonie rahi o te fare haapiiraa tuatoru Beretane i faataa. Ua paraparau mai oia ei auvaha no te pǔpǔ faaroo ra “Sea of Faith” (Miti o te Faaroo) tei turuhia e hoê hanere aˈe perepitero Beretane. Te parau nei teie “mau Kerisetiano tiaturi ore i te Atua” e na te taata i hamani i te faaroo e, mai ta te hoê melo i faahiti, “e manaˈo” noa te Atua. Aita ratou e tiaturi faahou ra e te vai ra te hoê Atua tei hau aˈe i te natura.

“Ua pohe te Atua,” o te poroi ïa tei parare i te mau matahiti 1960 ra. Te reira hoi te manaˈo o te philosopho Helemani o te senekele 19 ra o Friedrich Nietzsche, o tei faatia i te mau taurearea e rave rahi ia rave i ta ratou e hinaaro, ia taiata, e ia faaohipa i te raau taero ma te otia ore i te pae morare. Tera râ, ua aratai anei teie huru tiamâraa i te mau tamarii hipi, mai tei matauhia i te pii, i te hoê oraraa hau atu i te oaoa?

I taua noa ahuru matahiti ra, ua nenei te epikopo Beretane ra o John A. T. Robinson i ta ˈna buka i aimârôhia Te faˈiraa i te parau mau i mua i te Atua (Beretane). E rave rahi o to ˈna mau hoa ekalesiatiko tei faahapa mai ia ˈna no to ˈna manaˈoraa “e ua riro [te Atua] ei tuhaa hohonu i roto i te oraraa o te taata.” Ua ui te orometua tuatapapa no nia i te Atua ra o Keith Ward e: “Ua riro anei te tiaturiraa i te Atua mai te tahi huru peu haavare tahito, tei faaruehia e te taata manaˈo paari i teie nei?” Ma te pahono i ta ˈna iho uiraa, teie ta ˈna i parau: “Aita ˈtu e mea faufaa roa ˈˈe i roto i te haapaoraa i teie mahana, maoti râ ia noaa faahou mai te ite no nia i te Atua ia au i tei matauhia na.”

Te mauiui e te hoê Atua mau

No e rave rahi taata o te tiaturi ra i te hoê Atua mau, e mea fifi ia faatuati to ratou tiaturiraa i te mau ati e te mauiui ta ratou e ite ra. Ei hiˈoraa, i te avaˈe Mati 1996, 16 tamarii apî, e ta ratou orometua haapii, tei pupuhihia e tei pohe i Dunblane, i Ekosia. “Aita vau e taa ra e eaha te hinaaro o te Atua,” o ta te hoê ïa vahine ahoaho i parau. Ua itehia te mauiui o te ati i tupu, i nia i te hoê papie i rotopu i te mau tiare i rapaeau mai i te fare haapiiraa a te mau tamarii. Teie tei papaihia, “NO TE AHA?” Ei pahonoraa, teie ta te orometua o te Fare pure rahi no Dunblane i parau: “Aita e haamaramaramaraa. Eita ta tatou e nehenehe e pahono e no te aha i tupu ai taua ati ra.”

I muri iho, i taua noa matahiti ra, ua haapohehia te hoê ekalesiatiko apî matauhia o te Ekalesia no Beretane. Ua tapao te vea ra Church Times e ua faaroo te hoê amuiraa tei huru ê roa i te hoê diakono rahi no Liverpool i te parauraa e ia “tupaipai atu i te opani o te Atua no te ani e no te aha? no te aha?” Aita atoa teie diakono i horoa i te poroi tamahanahanaraa a te hoê Atua mau.

No reira, eaha te tia ia tatou ia tiaturi? E mea tano ia tiaturi i te hoê Atua mau. Tera te ravea e pahonohia ˈi te mau uiraa teiaha mau tei faahitihia i nia nei. Te ani atu nei matou ia outou ia hiˈopoa i te mau haapapuraa e vauvauhia i roto i te tumu parau i muri nei.

[Hohoˈa i te api 3]

Te uihia ra i nia i te papie e “No te aha?”

[Faaiteraa i te tumu]

NEWSTEAM No. 278468/Sipa Press